1. Akory ty nandamina ty vahoakin’i Jehovah tamy taonjato voalohany?

 LAFA Jehovah manome asa ty vahoakiny, le teany laha ataon-drozy milamy soa raha iny. (1 Kor. 14:33) Anisan’ny asa nampanoviny an-drozy, ohatsy, ty fitoria ty vaovao soa satria teany haharè an’ny raha io ty olo iaby an-tany etoy. (Mat. 24:14) Jesosy ro nanankinan’i Jehovah an’ny asa io. Nataon’i Jesosy azo antoky hoe atao amy fomba milamy raha io. Tamy taonjato voalohany, ohatsy, le nisy fiangona niory tamy tanà samby hafa. Nisy anti-panahy amy zay nitendrè mba hanome toromariky noho hitariky an’ny fiangona rey. (Asa. 14:23) Ty apostoly noho ty anti-panahy ta Jerosalema tao ro nandramby fanapahan-kevitsy, le nila nanaraky ani-zay ty fiangona iaby. (Asa. 15:2; 16:4) Ino ty vokany? Lasa “nihanatanjaky ty finoan’ny fiangona reo sady nihamaro sanandro rozy”, satria nanoriky toromariky rahalahy noho anabavy rey.​—Asa. 16:5.

2. Nanomboky tamy 1919, akory ty nataon’i Jehovah mba hanomeza tari-dala noho hany ara-panahy ty vahoakiny?

² Mbo mandamy ty vahoakiny avao koa Jehovah ndre amy henanizao. Nanomboky tamy 1919, le nampiasa lahilahy voahosotsy vitsivitsy Jesosy mba handamy ty asa fitoria noho hanome hany ara-panahy ty mpanori-dia azy. a (Lioka 12:42) Tena nitahy ty asa nataon-drozy Jehovah.​—Isaia 60:22; 65:13, 14.

3-4. a) Manomeza ohatsy mampiseho ty soa azontsika lafa tsika voalamy soa. b) Ino ty hodinihintsika ato?

³ Laha tsy nalamy tsika, le tsy ho vitantsika ty hanatanteraky an’ny asa nampanovin’i Jesosy antsika iny. (Mat. 28:19, 20) Eritsereto, ohatsy, hoe tsy nalamy ty faritany iasan’ny fiangonantsika. Ino ty ho vokany? Mety samby nitory amy ze pilasy teany ty mpitory kiraidraiky. Mety lasa voasa matetiky ty faritany  sisany, fa ty ilany tsy itoria mihintsy. Ino koa hoasanao ty soa azontsika lafa tsika voalamy soa?

⁴ Nalamin’i Jesosy soa ty mpanori-dia azy tamin’ie tan-tany etoy. Mbo zay avao koa ty ataony amy ty vahoaki-Ndranahary henanizao. Hodinihintsika amy lahatsoratsy toy ato hoe ino ty modely namean’i Jesosy, le akory ty anorihan’ny fandamina misy antsika toy an’ny raha zay. Horesahintsika koa ty fomba azontsika ampisehoa hoe tena matoky ty fandaminan’i Jehovah tsika.

MANARAKY TY MODELIN’I JESOSY TY FANDAMINANTSIKA

5. Miresaha fomba raiky ahità hoe manaraky ty modelin’i Jesosy ty fandamina. (Jaona 8:28)

⁵ Nianatsy tamy ty raha nataon’ny Babany noho nivolaniny Jesosy. Manaraky ty modelin’i Jesosy ty fandaminan’i Jehovah ka mampiasa ty Safà-Ndranahary mba hanampea antsika hahay ty soa noho ty raty. Ataony miory amy Safà-Ndranahary koa ty tari-dala amea antsika. (Vakio Jaona 8:28; 2 Tim. 3:16, 17) Ampitiarovy avao tsika matetiky hoe mila mianatsy ty Safà-Ndranahary. Manino ro mahasoa antsika ty manaraky an’ny torohevitsy zay?

6. Ino ty soa bevata ho azontsika laha tsika mampiasa an’ny boky noho gazetintsika rey lafa mianatsy Baiboly?

⁶ Lafa mianatsy ty Baiboly tsika, le afaky mampitaha ty raha resahiny amy ty toromariky azontsika baka amy fandamina, hita amy boky noho gazetintsika rey. Lafa hitantsika amy zay hoe miory amy Soratsy Masy ty tari-dala azontsika, le vomaiky tsika matoky ty fandaminan’i Jehovah.​—Rom. 12:2.

7. Ino ty hafatsy nitorin’i Jesosy, le ino ty ataon’ny fandaminan’i Jehovah mba hanahafa ty modeliny?

⁷ Nitory “ty vaovao soan’ny Fanjakà-Ndranahary” Jesosy. (Lioka 4:43, 44) Nandidy ty mpianatsiny koa Jesosy mba hitory mikasiky Fanjakà io. (Lioka 9:1, 2; 10:8, 9) Mitory ty hafatsy mikasiky Fanjakà io iaby henanizao ze olo miaraky amy fandaminan’i Jehovah. Manao ani-zay rozy ndre aia ndre aia ty misy an-drozy, ndre be manao akory aza ty andraikitsy ananany anivon’ny fandamina eo.

8. Ino ty tombotsoa ananantsika?

⁸ Tombotsoa ho antsika ty miresaky amin’olo ty fahamarina mikasiky Fanjakà-Ndranahary! Tsy ty olo iaby ro mana an’ny tombotsoa zay. Tamy Jesosy tan-tany etoy, ohatsy, le tsy nengany hanambara ty mikasiky azy amin’olo ty demonia. (Lioka 4:41) Amy henanizao koa, laha misy olo ta hitory miaraky amy Vavolombelon’i Jehovah, le tsy maintsy mahafeno fepetra ie zay vo afaky manao ani-zay. Akory ty ampisehoantsika hoe tena teantsika tombotsoa ananantsika io? Mitory avao tsika ndre aia ndre aia ty misy antsika, na amy fotoa manao akory aza. Manahaky an’i Jesosy tsika ka miezaky mamboly noho manondraky ty voan’ny fahamarina am-pon’olo ao. Zay ty raha kendrentsika.​—Mat. 13:3, 23; 1 Kor. 3:6.

9. Ino ty ataon’ny fandamina mba hahaizan’olo ty anara-Ndranahary?

⁹ Nanambara ty anara-Ndranahary Jesosy. Zao ty nivolanin’i Jesosy tamy Babany lafa ie nivavaky: “Fa nambarako an-drozy ty anaranao.” (Jaona 17:26) Manahaky ty modelin’i Jesosy ty fandaminan’i Jehovah ka manao ze azony atao mba hanampea ty olo hahay ty anara-Ndranahary. Anisan’ny mandramby anjara bevata amy zay ty Soratra Masina Fandikan-tenin’ny Tontolo Vaovao, satria nampoly amy pilasy tokony hisy azy ty anara-Ndranahary, amy Baiboly io ao. Fa misy amy fivolana 270 mahery Baiboly io iaby henanizao na ty ampahany aminy. Laha iha mamaky ty Fanazavà Fanampiny A4 noho A5 amy Baiboly io ao, le ho hainao amy an-tsipiriany hoe manino ro nampoly amy pilasiny ty anara-Ndranahary, le akory ty nahavità ani-zay. Henteo koa ty  bokikely hoe Fianaran-draha amy Safà-Ndranahary Ao, pejy 6-11. Hazavaniny ao koa hoe tokony ho hita in-237 amy Soratsy Grika Kristiana ao ty anara-Ndranahary.

10. Ino ty ianaranao baka amy raha nivolanin’ny ampela mipetraky a Myanmar any io?

¹⁰ Manahaky an’i Jesosy, le teantsika ty hanampy olo maro araky ze azo atao mba hahay ty anara-Ndranahary. Lafa nahay ty anara-Ndranahary, ohatsy, ampela raiky 67 tao, mipetraky a Myanmar any zay le nilatsaky ty ranomasony. Nivola tamy ranabavy mampianatsy azy iny ie hoe: “Tena vo sambako naharè hoe Jehovah ty anara-Ndranahary. ... Raha mbo tsy nihaiko mihintsy nampianarinao ahy toy. Tena bevata amiko toy.” Hitantsika baka amy tantara io fa tena misy vokany amin’olo mana fo soa ty fahaiza ty anara-Ndranahary.

ATORÒ AVAO HOE MATOKY TY FANDAMINANTSIKA IHA

11. Akory ty ampisehoan’ny anti-panahy hoe matoky ty fandaminan’i Jehovah rozy? (Henteo koa sary io.)

¹¹ Akory ty ampisehoan’ny anti-panahy hoe matoky ty fandamina-Ndranahary rozy? Toy misy fomba raiky: Lafa mahazo toromariky rozy le mila vakin-drozy soa raha iny, bakeo manao ze azon-drozy atao rozy mba hanoriha an’ny raha iny. Mahazo toromariky, ohatsy, rozy hoe akory ty fomba anaova anjara am-pivoria any, le akory ty atao lafa misolo tena ty fiangona amy vavaky. Fe tsy zay avao fa mahazo toromariky koa rozy hoe akory ty ikarakarà ty aondrin’i Kristy. Laha orihin’ny anti-panahy soa ze toromariky amean’ny fandamina, le ho tsapan’ny rahalahy noho anabavy reo hoe tea an-drozy Jehovah sady mikarakara an-drozy.

12. a) Manino tsika ro tokony hiaraky miasa amy azy mitariky reo? (Hebreo 13:7, 17) b) Manino tsika ro tokony hifantoky amy ty toetsy soan-drozy?

¹² Lafa mahazo toromariky baka amy anti-panahy tsika, le tokony ho parè hanaraky an’ny raha iny. Laha manao ani-zay tsika, le ho mora amy azy mitariky reo ty hanao ty asan-drozy. Mampirisiky antsika ty Baiboly mba hanoriky noho haneky ty safàni-azy mitariky reo. (Vakio Hebreo 13:7, 17.) Tsy mora anefa ty manao ani-zay kindraiky. Fa manino? Satria tsy lavorary lahilahy reo. Fe laha mifantoky amy ty toetsy ratin-drozy tsika fa tsy amy ty toetsy soan-drozy, le vomaiky hanampy ty fahavalontsika. Amy fomba akory? Manao ze azon-drozy atao fahavalontsika reo mba hahavy antsika hisalasala hoe tena mampiasa ty fandaminany vatany va Ndranahary mba hitariha antsika. Ka laha tsika mieritseritsy raha raty mikasiky ty anti-panahy, le mety ho mora amintsika ty hieritseritsy raha raty mikasiky ty fandamina. Farany, lasa tsy hatòky ty fandamina sasy tsika. Ino zany ty azontsika atao mba hahaiza ty vandy resahin’ny fahavalontsika reo, le akory ty hanalavirantsika an’ny raha zay?

KA ENGÀ HAMPIHENA TY FATOKISANAO TY RAHA ATAON’OLO

13. Ino ty ataon’ny fahavalo-Ndranahary mba handratiratia ty fandaminany?

¹³ Miezaky mandratiraty ty fandaminan’i Jehovah ty fahavalony, amy zay tsika mieritseritsy raha raty mikasiky azy. Nianarantsika tamy Baiboly ao, ohatsy, hoe tean’i Jehovah halio amy lafiny iaby tsika mpanompony, anatini-zay ty vatantsika, noho ty fandaisam-batantsika. Teany koa laha manompo azy mifanaraky amy ty itiavany azy tsika. Mivola ie fa tokony horoasy tsy ho amy fiangona eo ze olo maloto fandaisam-bata kanefa tsy mibebaky. (1 Kor. 5:11-13; 6:9, 10) Manoriky an’ny didy napetrany amy Soratsy Masy ao zay tsika. Vokany, mivola amy zay ty mpanohitsy antsika hoe tsy tea olo tsika, mitsaratsara olo, sady tsy mandefitsy.

14. Baka amin’ia vandy mikasiky ty fandaminan’i Jehovah rey?

 ¹⁴ Anovo hay hoe baka amin’ia vandy mikasiky fandamina rey. Satana Devoly ro tena ambalikin’ny vandy rey satria mivola ty Baiboly hoe “baban’ny vandy” ie. (Jaona 8:44; Gen. 3:1-5) Tsy mahatseriky antsika zany laha mampiasa ty fahavalontsika ie mba hampiparitaky vandy mikasiky ty fandaminan’i Jehovah. Zay mihintsy ty raha niseho tamy taonjato voalohany.

15. Ino ty nataon’ny mpitariky fivavaha tamy Jesosy noho ty mpanori-dia azy?

¹⁵ Nampiasa olo Satana tamy taonjato voalohany mba hampiparitaky vandy mikasiky an’i Jesosy, ndre lavorary noho nahavita fahagagà aza Anaki-Ndranahary io. Nivola, ohatsy, ty mpitariky fivavaha fa “ty sefon’ny demonia” ro nanome hery an’i Jesosy, le zay ro nahavitany nandroaky demonia. (Mar. 3:22) Lafa nitsarà koa Jesosy, le nivola mpitariky fivavaha rey fa nanivativa a-Ndranahary ie. Nataon-drozy mihintsy aza ze hahavy ty olo ho resy lahatsy hoe tokony hovonoa ie. (Mat. 27:20) Lafa nitory ty vaovao soa mpianatsin’i Kristy rey tafara atoy, le “nampirisiky noho nitao ty olo” hanenjiky ty Kristiana mpanohitsy rey. (Asa. 14:2, 19) Nanazava ty raha resahin’ny Asan’ny Apostoly 14:2 ty Tilikambo Fiambena 1 Desambra 1998, le zao ty nivolaniny: “Tsy hoe nandà ty hafatsy nitorin’ny Kristiana avao Jiosy mpanohitsy rey fa nivola raha raty mikasiky an-drozy koa, amy zay ty olo tsy hijanjy an-drozy noho halay an-drozy.”

16. Ino ty tokony hotiarovintsika lafa tsika maharè vandy mikasiky fandamina noho rahalahy mitariky rey?

¹⁶ Mbo tsy mieny mavandy avao Satana zisiky henanizao. “Mamitaky ty tany iaby misy olo” ie. (Apok. 12:9) Lafa iha maharè vandy mikasiky ty fandaminan’i Jehovah na mikasiky an’ny rahalahy mitariky reo, le tiarovo  hoe fa nanao manahaky ani-zay tamy Jesosy noho mpianatsiny tamy taonjato voalohany rey ty fahavalo-Ndranahary. Fa nivola Jesosy fa hisy hanohitsy ze olo manompo an’i Jehovah sady hamoronan’olo vandy. Zay mihintsy ty raha miseho henanizao. (Mat. 5:11, 12) Tsy hisy vokany amintsika vandy rey laha tiarovintsika avao hoe baka amin’ia raha rey, le manao raha malaky tsika mba hiarova ty vatantsika. Ino ty tokony hataontsika?

17. Ino ty tokony hataontsika mba tsy ho voafitaky lafa maharè vandy? (2 Timoty 1:13) (Henteo koa ty efajoro hoe “ Ino ty Tokony Hataonao lafa Maharè Tantara Tsy Marina?”)

¹⁷ Ka mijanjy tantara tsy marina. Nivolanin’ny apostoly Paoly mazava soa hoe ino ty tokony hataontsika lafa tsika maharè tantara tsy marina. Nivola tamy Timoty ie mba ‘handrara ty olo sisany tsy hijanjy tantara tsy marina.’ (1 Tim. 1:3, 4; 4:7) Eritsereto tse moa zao: Lafa mahita raha ty ajà, le avy le ataony am-bava raha iny ndre maloto aza. Fa ty olobe tsy hanao ani-zay mihintsy satria hainy hoe hamparary azy raha zay. Manahaky ani-zay koa tsika. Tsy mijanjy tantara tsy marina mihintsy tsika satria haintsika hoe baka amin’ia raha rey. Ty “safà mahasoa” avao ro janjinintsika.​—Vakio 2 Timoty 1:13.

18. Akory ty ampisehoantsika hoe matoky ty fandaminan’i Jehovah tsika?

¹⁸ Maro ty raha ataon’ny fandamina-Ndranahary mba hanahafa an’i Jesosy, fe vo telo avao nidinihintsika zay. Ka lafa mianatsy Baiboly iha, le henteo hoe ino koa ty raha hafa ataon’ny fandamina mba hanaraha ty modelin’i Jesosy. Ampeo ty olo amy fiangona misy anao mba hatòky kokoa ty fandamina. Le asehò avao hoe matoky ty fandamina iha ka manompoa an’i Jehovah avao. Ka miala amy fandamina koa satria io avao ro ampiasan’i Jehovah mba hanatanteraky ty sitrapony. (Sal. 37:28) Mana tombotsoa tsika satria anisan’ny vahoakin’i Jehovah. Tena be fitiava rozy sady tsy mivaliky. Enga anè tsika mba hankasitraky avao an’ny tombotsoa zay.