1. Ino ty tsy maintsy ataon’olo raiky laha ta hiresaky amy mpanjakani-Persa?

ERITSERETO hoe nipetraky ta Persa any iha, 2 500 tao lasa zay. Misy raha teanao horesahy amy mpanjaka, farany iha nandeha a Sosana, amy tanà ipetrahani-mpanjaka any. Azo antoky fa tsy hiresaky aminy iha laha tsy fa nahazo alala taminy. Laha tsy zay le ty ainao ro hafoinao!—Est. 4:11.

2. Ino ty teani-Jehovah ho tsapantsika lafa mifandramby aminy?

² Soa avao fa tsy manahaky ani-mpanjakani-Persa iny Jehovah! Anabo marè mandilatsy ty mpanday olombelo iaby ie, fe afaky miresaky aminy avao tsika ndre ombia ndre ombia. Teani-Jehovah tsy hisalasala hiresaky aminy tsika. Mana anaram-boninahitsy anabo manahaky hoe Mpamoro Be Voninahitsy, Farani-Ze Mahery, noho Tompo Fara Tampony Jehovah. Fe teany laha kaihintsika hoe “Baba” ie. (Mat. 6:9) Mifandramby marìny noho mifankatea ty mpianaky. Teani-Jehovah hifandramby aminy manahaky ani-zay tsika. Hasoan-draha zay!

3. Manino ro mety laha kaihintsika hoe “Baba” Jehovah, le ino ty hodinihintsika amy lahatsoratsy toy ato?

³ Mety laha kaihintsika hoe “Baba” Jehovah satria ie ro nanome ay antsika. (Sal. 36:9) Babantsika ie, ka mila manoriky ty safàny tsika. Laha manao ze raha ampanaoviny tsika, le hahazo raha soa maro. (Heb. 12:9) Anatini-zay ty fiaina zisiky farany an-danitsy any na an-tany etoy. Fa mahazo fitahia koa tsika henanizao. Hodinihintsika amy lahatsoratsy toy ato hoe ino iaby ty ataoni-Jehovah henanizao mba hampisehoa hoe Baba be fitiava ie, le manino tsika ro afaky matoky fa tsy hanenga  antsika mihintsy ie amy hoavy. Fe ndao hohenteantsika tse hoe manino tsika ro afaky matoky fa soa fanahy noho tea antsika biby Babantsika an-danitsy any iny.

4. Manino ro sarotsy amin’olo sisany ty haneky hoe Babany Jehovah?

⁴ Sarotsy aminao va ty haneky hoe Babanao Ndranahary? Mety hieritseritsy ty olo sisany hoe maliniky noho tsy misy dikany ie laha anilani-Jehovah eo. Tsy matoky rozy hoe midary an-drozy kiraidraiky Ndranahary Farani-Ze Mahery iny. Kanefa tsy teani-Babantsika be fitiava iny hieritseritsy ho zay tsika. Nanome ay antsika ie, sady teany hifandramby aminy koa tsika. Nivolanini-apostoly Paoly tamy Atenianina reo fahamarina zay. Bakeo nihazavaniny amin-drozy hoe “tsy lavitsy antsika kiraidraiky” Jehovah. (Asa. 17:24-29) Tsy misalasala ty ajà lafa miresaky amy babany soa fanahy noho be fitiava. Teani-Jehovah hanahaky ani-zay koa tsika kiraidraiky lafa mamonjy azy.

5. Ino ty azontsika ianara baka amy raha niainani-ranabavy raiky?

⁵ Tsy mora amin’olo hafa koa ty handramby ani-Jehovah ho Babany, satria tsy nisoa fanahy taminy na tsy nampiseho fitiava taminy mihintsy ty babany. Nanahaky ani-zay ranabavy raiky toy. Hoy ty asany: “Tena nampijaly ahy babako. Laha vo nianatsy Baiboly amy zay aho, le nisarotsy tamiko mifandramby amy Baba an-danitsy any zao. Fe niova raha zay lafa nahay ani-Jehovah aho.” Ho zay koa va ty tsapanao? Matokisa fa lafa mandeha ty fotoa, le ho hitanao koa hoe Jehovah ro Baba farani-ze soa.

6. Laha hentea ty Matio 11:27, akory ty anampeani-Jehovah antsika mba hahita hoe Baba be fitiava ie?

⁶ Maro ty fomba nanampeani-Jehovah antsika hieritseritsy azy sahala amy Babantsika be fitiava. Nampanoratiny amy Baiboly ao, ohatsy, ty raha nivolanini-Jesosy noho nataony. (Vakio Matio 11:27.) Tena nanahaky ty toetsini-Babany Jesosy ka afaky nivola hoe: “Ze nahita ahy, le nahita ani-Baba koa.” (Jaona 14:9) Matetiky Jesosy ro nivola fa manahaky baba io Jehovah amy ty raha ataony. Amy Filazantsara efatsy reo avao, le in-165 Jesosy ro nikaiky ani-Jehovah hoe “Baba.” Manino raha zay ro niresahini-Jesosy matetiky? Amy zay hatòky ty olo hoe Baba be fitiava vatany Jehovah.—Jaona 17:25, 26.

7. Ino ty ianarantsika mikasiky ani-Jehovah lafa hentea ty raha nataony tamy Anakilahiny iny?

⁷ Ino ty ianarantsika mikasiky ani-Jehovah lafa hentea ty raha nataony tamy Jesosy? Nijanjy ty vavaky nataoni-Jesosy avao Jehovah. Fe tsy zay avao, fa namaly ty vavaky nataoni-Jesosy koa ie. (Jaona 11:41, 42) Tsapani-Jesosy fa tea azy noho nanoha azy avao Babany, ndre ino ndre ino ty raha sarotsy natrehiny.—Lioka 22:42, 43.

8. Ino iaby ty nanampeani-Jehovah ani-Jesosy?

⁸ Haini-Jesosy fa Babany ro nanome ay azy sady nahavy azy mbo velo avao, ka nivola ie hoe: “Velo aho satria eo Baba.” (Jaona 6:57) Natoky tanteraky ani-Babany Jesosy. Nampeani-Jehovah ie mba hahazo ze raha nilàny mba hahavelo azy. Fa ty vatan-draha marè, le nampeani-Jehovah hatanjaky ara-panahy ie.—Mat. 4:4.

9. Akory ty nampisehoani-Jehovah hoe Baba be fitiava ie tamy Jesosy?

⁹ Be fitiava Jehovah, ka nataony ze hahaizani-Jesosy hoe manoha azy Babany. (Mat. 26:53; Jaona 8:16) Marina fa tsy nisakanani-Jehovah iaby ze raha raty mety hahazo ani-Jesosy, fe nampeany hiaritsy fitsapà ie. Haini-Jesosy amy zay fa tsy haharitsy ze fijalea hahazo azy. (Heb. 12:2) Tea ani-Jesosy koa ie ka nijanjy azy, nanome ze raha nilàny,  nampiofana azy, noho nanoha azy. (Jaona 5:20; 8:28) Ndao hohenteantsika hoe ino iaby ty ataoni-Babantsika an-danitsy any iny mba hanampea antsika manahaky ani-zay koa.

10. Laha hentea ty Salamo 66:19, 20, akory ty ampisehoani-Jehovah hoe tea antsika ie?

¹⁰ Mijanjy ty vavaky ataontsika Jehovah. (Vakio Salamo 66:19, 20.) Tsy teany hisalasala tsika, fa ampirisihiny hivavaky avao ndre ino ndre ino ty raha teantsika horesahy. (1 Tes. 5:17) Afaky mivavaky aminy avao tsika amy ze fotoa noho pilasy mety amintsika. Tsy ho tery mihintsy ty fotoany ndre mijanjy ty vavaky ataontsika ie. Hifandramby soa amy Jehovah tsika lafa mahay hoe mijanjy ty vavaky ataontsika ie. Nivola ty mpanao salamo hoe: “Teako Jehovah satria mijanjy ty feoko.”—Sal. 116:1.

11. Manao akory ty amaleani-Jehovah ty vavaky ataontsika?

¹¹ Tsy hoe mijanjy ty vavaky ataontsika avao Babantsika iny fa mamaly vavaky koa. Nanome toky antsika ho zao ty apostoly Jaona: “Ndre ino ndre ino angatahintsika, ka mifanaraky amy ty sitrapo-[Ndranahary], le mijanjy antsika ie.” (1 Jaona 5:14, 15) Mety tsy hifanaraky amy ty ieritseretantsika azy aloha ty hamaleani-Jehovah ty vavaky ataontsika. Hainy ze tena hahasoa antsika, ka mety tsy hekeny ty raha angatahintsika na teany handiny tsika.—2 Kor. 12:7-9.

12-13. Ino iaby ty raha ameani-Babantsika an-danitsy any iny antsika?

¹² Manome ty raha ilàntsika Jehovah. Ze raha takiny amy baba iaby le ataony koa. (1 Tim. 5:8) Ameany ze raha hahavelo azy ty anakiny. Tsy teany hiasa loha amy resaky hany, siky, na fialofa tsika. (Mat. 6:32, 33; 7:11) Be fitiava Jehovah ka fa nataony ze hahavy antsika ho afa-po amy ze raha ilàntsika amy hoavy.

¹³ Fa ty vatan-draha marè, le manampy antsika hatanjaky ara-panahy Jehovah. Nameany antsika ty Safàny mba hahaizantsika ty marina mikasiky azy noho ty raha teany hatao, ty antony nampisy antsika, noho ty raha hiseho amy hoavy. Nidary antsika koa ie tamintsika vo nianatsy fahamarina, ka nampiasa ty baba noho renintsika na olo hafa mba hanampy antsika hahay azy. Mbo ampeany hifandramby soa aminy avao koa tsika amy alalani-anti-panahy be fitiava amy fiangona eo, le eo koa ty rahalahy noho anabavy matotsy. Ampianarini-Jehovah tsika lafa miaraky amy rahalahy noho anabavintsika reo am-pivoria atoy. Hitantsika amy fomba reo noho amy fomba hafa fa mikarakara antsika kiraidraiky Jehovah.—Sal. 32:8.

14. Manino Jehovah ro mampiofana antsika, le akory ty anaovany ani-zay?

¹⁴ Mampiofana antsika Jehovah. Tsy manahaky ani-Jesosy tsika satria tsy lavorary. Ka lafa mampiofana antsika azy Babantsika be fitiava iny, le mety hananatsy antsika koa. Mampitiaro antsika ho zao ty Safàny: “Ze teani-Jehovah ro anariny.” (Heb. 12:6, 7) Mananatsy antsika amy fomba maro Jehovah. Mety hanity antsika, ohatsy, ty raha nivakintsika amy Safàny ao na nirentsika am-pivoria atoy. Mety hahazo fanampea baka amy anti-panahy koa tsika. Fitiava avao ro mahavy ani-Jehovah hananatsy antsika, ndre manao akory ndre manao akory ty anaovany azy.—Jer. 30:11.

15. Akory ty iarovani-Jehovah antsika?

¹⁵ Manampy antsika hiaritsy fitsapà Jehovah. Manahaky baba soa fanahy io Babantsika an-danitsy any iny, ka manoha antsika lafa mandalo raha sarotsy tsika. Mampiasa ty fanahiny masy ie mba hiarova antsika amy ze raha  mety hanimba ty fifandrambesantsika aminy. (Lioka 11:13) Manampy antsika tsy ho kivy koa Jehovah. Mampitamà antsika raha soa, ohatsy, ie amy hoavy. Fampitamana zay ro manampy antsika hiaritsy raha sarotsy. Mba eritsereto moa: Ndre raty manao akory ty raha mahazo antsika, le hafahini-Babantsika be fitiava iny iaby raha rey. Mandalo avao ty fitsapà mahazo antsika, fa ty fitahia ameani-Jehovah ro haharitsy zisiky farany.—2 Kor. 4:16-18.

16. Ino ty niseho lafa tsy nanoriky ty safàni-Babany be fitiava iny Adama?

¹⁶ Tena hita hoe tea antsika Jehovah, lafa hentea ty fomba namahany ty raha manahira niseho tamy fianakaviany voalohany tan-tany etoy. Lafa tsy nanoriky safàni-Babany an-danitsy any iny Adama, le nanjary tsy anatini-fianakaviani-Jehovah ie noho ty taranakiny. (Rom. 5:12; 7:14) Fe nanao raha Jehovah mba hanampea ty taranakini-Adama.

17. Ino ty nataoni-Jehovah laha vo nanota Adama?

¹⁷ Nisazini-Jehovah Adama, fe mbo nengany hana raha tamany ty taranakiny afara ao. Avy le nampitamà ie fa hampoliny ho anatini-fianakaviany ze olo manoriky ty safàny. (Gen. 3:15; Rom. 8:20, 21) Mba hahatanteraky ani-zay, le nameani-Jehovah hatao soro ho antsika Jesosy. Nameany ho vilim-panavota ho antsika Anakilahiny teany iny. Tena tea antsika vatany Jehovah.—Jaona 3:16.

18. Ino ty porofo hoe mbo teani-Jehovah ho anakiny avao tsika ndre niala taminy aza?

¹⁸ Ndre tsy lavorary aza tsika, le mbo teani-Jehovah ho anatini-fianakaviany avao. Tsy enta-mavesatsy mihintsy ty fanenteany antsika. Ndre mandiso fanantenà azy na miala aminy aza tsika kindraiky, le mbo mitamà avao ie fa mbo himpoly aminy tsika. Nanao fanohara Jesosy mba hampisehoa hoe tena baba be fitiava  Jehovah. Nitantara mikasiky baba raiky trobo anaky ie. (Lioka 15:11-32) Nitamà avao lahilahy io hoe mbo himpoly anakilahiny iny. Lafa noly amy zay anakiny iny, le nanitranitra babany nandramby azy. Laha niala tamy Jehovah tsika fe nibebaky, le afaky matoky hoe parè handramby antsika Babantsika be fitiava iny.

19. Ino ty hataoni-Jehovah mba hanafaha ty vokatsini-fahotani-Adama?

¹⁹ Hafahini-Jehovah iaby ty raha raty vokatsini-fahotani-Adama. Lafa nanota Adama, le nanapa-kevitsy Jehovah fa hisy olo 144 000 hatsangany ho anakiny. Ho an-danitsy any rozy, le ho mpanjaka noho mpisoro miaraky amy Jesosy. Lafa amy tontolo vaovao ao, le hampeani-Jesosy noho mpiaraky manjaka aminy reo ze olo manoriky safà ka hanjary lavorary. Bakeo hisy fitsapà farany. Afarani-zay, le hamea-Ndranahary fiaina zisiky farany rozy. Ho falifaly biby Jehovah amy fotoa zay lafa mahita hoe feno anakilahiny noho anakampelany lavorary tany toy. Tsy misy fotoa mahafalifaly mandilatsy ani-zay!

20. Ino iaby ty fomba nampisehoani-Jehovah hoe tea antsika biby ie, le ino ty hodinihintsika amy lahatsoratsy manaraky?

²⁰ Nasehoni-Jehovah hoe teany biby tsika. Ie ro Baba farani-ze soa. Mijanjy ty vavaky ataontsika ie sady manome ze raha ilàntsika ara-nofo noho ara-panahy. Mampiofana noho manoha antsika ie. Hanome fitahia antsika koa ie amy hoavy. Midosiky ty fontsika ty mahay hoe tea antsika noho midary antsika Babantsika iny! Hodinihintsika amy lahatsoratsy manaraky hoe ino ty azontsika anakiny atao mba hamalea ty fitiavany antsika.