1. Ino ty mampiseho hoe tena vatan-draha tamy Jesosy ty Soratsy Masy?

 ERITSERETO moa hoe mampianatsy Jesosy, le mijanjy azy iha! Akory ty nataony? Tozoro nampiasa andinin-teny baka amy Soratsy Masy ao ie sady tiarony soa raha rey. Laha ty marina, le baka amy Soratsy Masy ao iaby ndre raha nivolaniny voalohany tafarani-batisany rey, ndre ty sisany amy raha nivolaniny talohani-nahafaty azy. b (Deot. 8:3; Sal. 31:5; Lioka 4:4; 23:46) Le tanatini-telo tao noho tampany, tafarani-batisany zisiky nahafaty azy, le matetiky ie namaky noho nanono andinin-teny baka amy Soratsy Masy ao sady nanazava ani-raha rey tanatrehan’olo maro.​—Mat. 5:17, 18, 21, 22, 27, 28; Lioka 4:16-20.

2. Ino ty nanampy ani-Jesosy hahay soa ty Soratsy Masy lafa ie nihabe? (Henteo sary amy fononi-gazety toy.)

² Tao vitsivitsy talohani-nanombohani-Jesosy ty fanompoany, le matetiky ie namaky noho nijanjy ty Safà-Ndranahary. Azo antoky fa naharè ani-Maria noho Josefa niresaky andinin-teny baka amy Soratsy Masy ao ie, lafa rozy niresadresaky tan-trano ao. c (Deot. 6:6, 7) Afaky matoky tsika fa nivory tamy synagoga any niaraky tamy fianakaviany Jesosy saky Sabata. (Lioka 4:16) Tsy maintsy nijanjy soa ie lafa tany, lafa nivakỳ ty Soratsy Masy. Lafa nandeha ty fotoa, le ie mihintsy ro namaky ty Soratsy Masy. Ino ty vokany? Lasa nahay soa ty Soratsy Masy Jesosy. Fe tsy zay avao fa lasa niteany koa raha io ka nengany hisy vokany taminy. Mbo tiaronao va raha niseho tamy tempoly tao iny? Vo 12 tao Jesosy tamy zay. “Nitseriky” mpampianatsy nahay soa ty Lalànani-Mosesy  rey lafa nahita “ty fahihirany noho ty valin-teniny.”​—Lioka 2:46, 47, 52.

3. Ino ty hodinihintsika amy lahatsoratsy toy ato?

³ Afaky hahay noho ho tea ty Safà-Ndranahary koa tsika laha mamaky azy tsy tampaky. Fe ino ty hanampy antsika handramby soa lafa mamaky ty Soratsy Masy? Andrambesantsika fianara ty raha nivolanini-Jesosy tamin’olo nahay Lalàna rey, anatini-zay ty mpanora-dalàna, ty Fariseo, noho ty Sadoseo. Namaky matetiky ty Soratsy Masy mpitariky fivavaha reo, fe tsy nahasoa an-drozy ty raha nivakin-drozy. Niresaky raha telo tokony ho nataoni-lahilahy reo Jesosy. Hanampy antsika koa raha nivolaniny reo mba ahafahantsika hiezaky 1) hahazo soa ze raha vakintsika, 2) hahita hanana lafovily, noho 3) hanenga ty Safà-Ndranahary hisy vokany amintsika. Handiniky ani-reo tsika amy lahatsoratsy toy ato.

4. Ino ty ampianarini-​Lioka 10:25-29 antsika mikasiky ty famakia ty Safà-Ndranahary?

⁴ Teantsika ho azo soa ty dikani-ze raha vakintsika amy Safà-Ndranahary ao. Laha tsy zay, le mety tsy hahasoa antsika ty raha vakintsika. Diniho, ohatsy, ty resaky nifanaovani-Jesosy tamy “lahilahy raiky nahay Lalàna.” (Vakio Lioka 10:25-29.) Lafa nanontany azy lahilahy iny hoe ino ty tokony hataony mba hahazoany fiaina mandrakizay, le nampeani-Jesosy ie mba hahita ty valiny amy Safà-Ndranahary ao. Nanontany azy Jesosy hoe: “Ino ty voasoratsy amy Lalàna ao? Akory ty fahazoanao azy?” Nihaini-lahilahy iny ty namaly ani-raha iny sady marina ty valin-teniny. Niresaky andinin-teny mikasiky fitiava a Ndranahary noho fitiava nama ie. (Lev. 19:18; Deot. 6:5) Fe henteo moa hoe ino ty raha nivolaniny tafarani-zay. Hoy ty asany: “Ia vatany moa ty namako?” Hita tamy raha nivolanini-lahilahy io hoe tsy niazony soa ty dikani-raha nivakiny iny. Lasa tsy nihainy amy zay hoe akory ty fomba hanoriha ani-raha nivolanini-andinin-teny rey amy fiainany.

5. Manino ty vavaky noho famakia miada ro manampy antsika hahazo soa ty raha vakintsika?

⁵ Hahazo soa ty raha volanini-Safà-Ndranahary tsika laha mana fahazara soa. Retoa misy soso-kevitsy vitsivitsy afaky manampy anao. Mivavaha tse alohani-hamakia Baiboly. Mila ty fanampeani-Jehovah tsika mba hahafahantsika mahazo soa ty Soratsy Masy. Azontsika atao zany ty mangataky fanahy masy aminy, soa tsika hifantoky. Bakeo vakio miada raha iny. Ho azonao soa amy zay ty raha vakinao. Mety ho hitanao hoe mahasoa koa ty mamaky marerè na mijanjy Baiboly nalà feo. Laha iha mijanjy Baiboly nalà feo sady manaraky amy Baibolinao ao, le hilentiky soa an-tsainao noho am-ponao ao ty Safà-Ndranahary. (Jos. 1:8) Lafa baka namaky iha, le mivavaha ndraiky. Isaoro Jehovah satria nanome ty Safàny, le angataho ie mba hanampy anao hanoriky ani-raha nivakinao iny.

6. Manino iha ro mila mametraky fanontanea amy ty vatanao noho mandramby an-tsoratsy kelikely lafa mamaky Baiboly? (Henteo koa sary io.)

⁶ Retoa koa misy soso-kevitsy roe hanampy anao hahazo soa ty raha volanini-Baiboly. Voalohany, mametraha fanontanea amy ty vatanao mikasiky ani-raha vakinao iny. Lafa iha mamaky tantara, le eritsereto hoe: ‘Ia resahy eto io? Ia mivola io? Miresaky amin’ia ie, le ino ty antony? Taia ty nisehoani-raha toy, le tamy fotoa manao akory?’ Laha mieritseritsy fanontanea manahaky ani-reo iha le ho azonao soa raha vakinao iny. Faharoe, azonao atao koa ty mandramby an-tsoratsy kelikely. Lasa hieritseritsy soa ani-raha nivakinao iny iha amy zay ka ho azonao soa  raha iny. Ho tiaronao koa raha nivakinao iny laha mandramby an-tsoratsy iha. Azonao atao ty manoratsy fanontanea, ty valini-fikaroha nataonao, noho famintina ty hevitsy bevata. Sorato koa hoe akory ty azonao ampiasà ani-raha nivakinao iny, na ino ty raha tsapanao mikasiky ani-raha iny. Lafa iha mandramby an-tsoratsy, le lasa ho tsapanao hoe sahala amy hafatsy nalefa-Ndranahary ho anao mihintsy ty Baiboly.

7. Ino ty toetsy mila ananantsika lafa tsika mamaky Baiboly, le ino ty antony? (Matio 24:15)

⁷ Niresahini-Jesosy hoe misy toetsy raiky bevata mila ananantsika laha teantsika ty hahazo soa ze raha vakintsika amy Safà-Ndranahary ao. Tsy ino zay fa ty fahaiza mandiniky. (Vakio Matio 24:15.) Ino ty atao hoe fahaiza mandiniky? Tsy ino io fa ty fahaiza hoe ino ty ifandrambesani-hevitsy raiky iny amy hevitsy hafa, le ino ty tsy mampitovy an-drozy. Ty olo mahay mandiniky koa le misy hevitsy takatsiny avao amy raha iny eo ndre tsy resahy mivanta eo aza raha zay. Ankoatsini-zay, nasehoni-Jesosy hoe mila mahay mandiniky tsika mba hahaiza hoe ino iaby ty raha niseho manatanteraky ty faminaniani-Baiboly. Mila ani-toetsy io koa tsika mba hahafahantsika mandramby soa amy ze raha iaby vakintsika amy Baiboly ao.

8. Akory ty ampisehoantsika hoe mahay mandiniky tsika lafa mamaky Baiboly?

⁸ Ameani-Jehovah fahaiza mandiniky ty mpanompony. Mivavaha aminy zany, le angataho ie hanampy anao hana ani-toetsy io. (Ohab. 2:6) Mila manao raha mifanaraky amy vavaky ataonao iny koa iha. Akory ty hanaova ani-zay? Diniho soa raha vakinao iny, le henteo hoe ino ty ifandrambesany amy raha hafa fa hainao. Mba hahavitanao ani-zay, le ampiasao fitaova fianara Baiboly rey. Azonao atao, ohatsy, ty mampiasa ani-Fitaovana Fikarohana ho An’ny Vavolombelon’i Jehovah iny. Hanampy anao fitaova rey mba hahay hoe ino ty teani-raha vakinao iny hovolany, le akory ty azonao anoriha ani-raha iny amy  fiainanao. (Heb. 5:14) Hihamitombo ty fahaizanao ty Soratsy Masy laha iha mandiniky soa lafa mamaky.

9. Ino ty fahamarina raiky bevata amy Soratsy Masy ao tsy nekeni-Sadoseo rey?

⁹ Nahay soa ani-boky limy voalohany tamy Soratsy Hebreo ao rey ty Sadoseo, fe tsy neken-drozy ty fahamarina bevata resahy anatini-boky reo ao. Diniho, ohatsy, ty fomba namaleani-Jesosy ani-Sadoseo rey lafa rozy nanontany azy mikasiky ty fameloma ty maty. Nanontaneany rozy hoe: “Mbo tsy nivakinareo va azy amy bokini-Mosesy ao iny, amy fitantarà mikasiky voarointsilo iny, fa nivola taminy Ndranahary hoe: ‘Zaho ro Ndranaharini-Abrahama noho Ndranaharini-Isaka voho Ndranaharini-Jakoba’?” (Mar. 12:18, 26) Azo antoky fa namaky ani-tantara io matetiky Sadoseo rey. Fe hita tamy fanontaneani-Jesosy io hoe tsy neken-drozy fahamarina raiky bevata amy Soratsy Masy ao mikasiky fameloma ty maty iny.​—Mar. 12:27; Lioka 20:38. d

10. Ino ty tokony hodinihintsika soa lafa tsika mamaky Baiboly?

¹⁰ Ino ty fianara ho antsika? Lafa mamaky Baiboly tsika, le tokony handiniky soa ty raha azontsika ianara baka amy andinin-teny iny na baka amy tantara iny. Ho haintsika amy zay fahamarina noho torolala lafovily rey, fa tsy ty fampianara fototsy avao.

11. Akory ty azonao ampiasà ty 2 Timoty 3:16, 17 mba hahità hanana lafovily amy Baiboly ao?

¹¹ Akory ty hahitanao hanana lafovily lafa iha mamaky Baiboly? Henteo ty raha volanini-​2 Timoty 3:16, 17. (Vakio.) Mivola andinin-teny io hoe “lafa atao raha voasoratsy amy Soratsy Masy ao le ... mahasoa” mba 1) hampianara, 2) hananara, 3) hanarena ze tsy mety, noho 4) hanabeaza. Afaky hahazo ani-raha soa efatsy reo avao iha ndre amy boky tsy de mahazatsy anao amy Baiboly ao rey aza. Diniho soa tantara iny mba hahità hoe ino ty ianaranao amy raha iny mikasiky ani-Jehovah, mikasiky ty raha teany hatao, na mikasiky ty torolala-Ndranahary. Henteo hoe manino raha io ro manampy anao hananatsy ty vatanao. Hahavita ani-zay iha laha dinihinao hoe akory ty anampeani-andinin-teny rey anao hahay hoe ino ty fahazara na ty toe-tsay raty anananao, le akory ty hialanao ani-raha iny mba hahavy anao tsy hivaliky amy Jehovah mihintsy. Eritsereto hoe akory ty azonao ampiasà ani-andinin-teny iny mba hanarena ze tsy mety, na hanitia ty hevitsy diso nivolanin’olo tamy fanompoa eny. Le farany, henteo hoe ino ty fanabeaza ameani-andinin-teny rey ka afaky manampy anao hitovy hevitsy amy Jehovah. Laha tiarovinao avao raha soa efatsy reo, le hahita hanana lafovily iha. Handramby soa iha amy zay lafa mamaky Baiboly.

12. Nanino Jesosy ro nanontany ani-Fariseo rey hoe: “Mbo tsy nivakinareo va?”

¹² Nanontany ani-Fariseo rey koa Jesosy hoe “Mbo tsy nivakinareo va?”, mba hampisehoa hoe nana hevitsy diso mikasiky ty Soratsy Masy rozy. (Mat. 12:1-7) e Nivola Fariseo rey tamy fotoa io hoe nandika ty Lalàna mikasiky Sabata mpianatsini-Jesosy rey. Mba hamalea an-drozy, le niresaky ohatsy roe baka amy Soratsy Masy ao Jesosy sady nanono andinin-teny raiky baka amy bokini-Hosea ao. Teani-Jesosy haseho hoe tsy azoni-Fariseo rey soa ty antony nanomeza lalàna mikasiky Sabata sady tsy niferinay olo rozy. Manino ro tsy nisy vokany tamy lahilahy reo ty raha nivakin-drozy tamy Safà-Ndranahary ao? Satria nikinokino ty raha nivakin-drozy rozy sady nanambony tena. Lasa tsy nanao raha nifanaraky tamy raha nivakin-drozy iny amy zay rozy.​—Mat. 23:23; Jaona 5:39, 40.

13. Ino ty toe-tsay tokony hananantsika lafa tsika mamaky Baiboly, le ino ty antony?

¹³ Ianarantsika baka amy raha nivolanini-Jesosy rey hoe mila mana toe-tsay soa tsika lafa mamaky Baiboly. Tokony hiambany noho parè hianatsy tsika fa tsy hanahaky ani-Fariseo rey. Tokony ‘hekentsika amim-pahalemem-panahy ty safà ambolè-Ndranahary am-pontsika ao.’ (Jak. 1:21) Laha malemy fanahy tsika, le hengantsika hamahatsy am-pontsika ao ty Safà-Ndranahary. Hahavita ani-zay tsika laha tsy tea kinokino na manambony tena. Hisy vokany amintsika amy zay ty raha ampianarini-Baiboly ka hahay hamindra fo tsika, hiferinay olo, sady ho be fitiava.

14. Akory ty ahaizantsika hoe engantsika hisy vokany amintsika ty Baiboly? (Henteo koa sary reo.)

¹⁴ Hita amy fomba anandesantsika ty olo hafa laha engantsika hisy vokany amintsika ty Safà-Ndranahary.  Tsy nengani-Fariseo rey hanova ty toe-tsain-drozy ty Safà-Ndranahary, farany nimelohin-drozy iaby ndre ty olo tsy nanao raty. (Mat. 12:7) Manahaky ani-zay koa fa hita amy ty fomba fahitantsika noho ty fomba anandesantsika ty olo hafa hoe engantsika hisy vokany amintsika vatany va ty Safà-Ndranahary. Ino, ohatsy, matetiky ty raha tena resahintsika mikasiky ty olo hafa, ty raha soa ataony sa ty hadisoany? Miferinay olo noho parè hanenga hadisoa va tsika, sa tsika tea kinokino noho mitanjaky lolompo? Laha mandiniky ty vatantsika manahaky ani-zay tsika le ho hitantsika hoe engantsika hisy vokany amy ty eritserintsika, ty fihetseham-pontsika, noho ty raha ataontsika vatany ty raha vakintsika.​—1 Tim. 4:12, 15; Heb. 4:12.

15. Nanao akory ty fahitani-Jesosy ty Soratsy Masy?

¹⁵ Nitea ty Soratsy Masy Jesosy. Hita amy faminania amy Salamo 40:8 ao hoe manao akory ty ho fahitany ty Safà-Ndranahary. Zao ty volany ao: “Ty manao ty sitraponao lahy Ndranahary ro mahafalifaly ahy, le anatiko marè ao ty lalànanao.” Satria nitea ty Soratsy Masy Jesosy, le nahatiaro sambatsy avao ie sady tsy nieny nanompo ani-Jehovah. Ho sambatsy manahaky ani-zay koa tsika sady hahavita hanompo ani-Jehovah avao laha mamaky ty Safà-Ndranahary noho miezaky ho tea ani-raha io.​—Sal. 1:1-3.

16. Ino iaby ty azonao atao laha teanao ty handramby soa lafa mamaky Baiboly? (Henteo ty efajoro hoe “H anampy Anao Hahazo ty Raha Vakinao ty Raha Nivolanini-Jesosy.”)

¹⁶ Ndao tsika hanaraky ty raha nivolanini-Jesosy noho ty modely nameany, ka hiezaky hanasoa ty fomba famakiantsika Baiboly. Ho azontsika soa ty raha volanini-Baiboly laha tsika mivavaky, mamaky miada, mametraky fanontanea amy vatantsika, noho mandramby an-tsoratsy kelikely. Afaky mampiasa ty fahaiza mandiniky tsika ka mandiniky soa ze raha vakintsika noho mampiasa ani-boky noho gazetintsika rey. Azontsika atao koa ty miezaky hahay hampiasa soa ty Baiboly, ndre amy andinin-teny tsy de mahazatsy antsika rey aza, ka miezaky mila hanana lafovily tsika. Engantsika hisy vokany amintsika ty Safà-Ndranahary ka miezaky tsika hana toe-tsay soa avao lafa mamaky azy. Laha miezaky manaraky ani-raha reo tsika, le tena handramby soa lafa mamaky Baiboly sady vomaiky hifandramby marìny amy Jehovah.​—Sal. 119:17, 18; Jak. 4:8.