1. Manino iha ro tena mankasitraky ty Baiboly?

 TENA mankasitraky ani-Jehovah Ndranahary tsika satria nameany ty Baiboly! Manome torohevitsy tena soa antsika ie amy Baiboly ao mba hanampea antsika hahay ty tokony hatao lafa miatriky raha sarotsy. Mampitamà antsika koa ie hoe hanome raha soasoa ho antsika amy hoavy. Fa ty tena vatan-draha, nampiasa ty Baiboly Jehovah mba hanampea antsika hahay ty toetsiny. Ka laha mametsivetsy ani-toetsiny soasoa rey tsika, le vomaiky ho tea azy sady ta hinama aminy.​—Sal. 25:14.

2. Ino iaby ty nataoni-Jehovah mba hanambarà ty mikasiky azy?

² Teani-Jehovah hahay azy ty olo. Taloha, le nataony nanonofy noho nahita fahità ty mpanompony sisany mba hanambarà ty mikasiky azy. Naniraky anjely koa ie mba hanambarà ty hafatsiny. (Nom. 12:6; Asa. 10:3, 4) Fe manao akory moa ty ho nahaizantsika ani-nofy, fahità, na hafatsy baka amy anjely rey laha tsy nampanoraty? Zay ty antony nahavy ani-Jehovah nampiasa lahilahy vitsivitsy mba ‘hanoratsy amy boky’, ty raha teany ho haintsika. (Jer. 30:2) “Tena soa ty lalani-Ndranahary marina iny”, ka afaky matoky tsika hoe mety soa fomba nampiasany io sady hanampy antsika hifandramby soa aminy.​—Sal. 18:30.

3. Ino ty nataoni-Jehovah mba ho azo antoky hoe hisy zisiky henanizao ty Baiboly? (Isaia 40:8)

³ Vakio Isaia 40:8. Fa an’arivony tao ty Safà-Ndranahary ro nanome tari-dala tena soa ho ani-lahilahy noho ampela tsy nivaliky. Akory ty nampety ani-zay? Soa fipetraky fanontanea zay satria nisoraty tamy boky mihoro noho tamy hoditsy tse ty Baiboly taloha tany, ka nisimba raha rey lafa nandeha ty fotoa.  Fe nataoni-Jehovah azo antoky hoe hisy olo hanao kopỳ ty Soratsy Masy. Marina fa tsy lavorary olo rey, fe nitandrina soa rozy. Ho zao, ohatsy, ty nivolanini-manam-pahaiza raiky zay mikasiky ty Soratsy Hebreo: “Tsy diso tsika laha mivola fa marina soa raha io. Tsy misy aloha boky fa ela biby manahaky ani-zay.” Ka ndre fa ela noho nisoraty tamy raha mora simba zany ty Baiboly, sady tsy lavorary azy nanao kopỳ azy rey, le afaky matoky tsika fa mbo hevitsini-Jehovah azy nampanoratsy azy iny avao raha vakintsika ao henanizao rey.

4. Ino ty hodinihintsika amy lahatsoratsy toy ato?

⁴ Baka amy Jehovah ty “fanomeza soa iaby.” (Jak. 1:17) Anisani-fanomeza farani-ze soa nameani-Jehovah antsika ty Baiboly. Ahaiza raha maro mikasiky ty mpanome azy ty kadò raiky. Lafa misy olo manome raha antsika, ohatsy, le hita baka amy raha iny hoe hainy soa tsika sady hainy ty raha ilàntsika. Manahaky ani-zay koa ty Baiboly. Hahay raha maro mikasiky ani-Jehovah tsika laha mandiniky ani-fanomeza io. Hitantsika baka amy raha io hoe hainy soa tsika sady hainy ty raha ilàntsika. Amy lahatsoratsy toy ato tsika handiniky ty raha volanini-Baiboly mikasiky ani-toetsini-Jehovah telo retoa: Ty fahendreany, ty fanaovany ty rariny, noho ty fitiavany. Ndao tse hodinihintsika voalohany ty raha resahini-Baiboly ka mampiseho hoe hendry Ndranahary.

5. Akory ty ahità hoe misy fahendrea-Ndranahary amy Baiboly ao?

⁵ Haini-Jehovah hoe mila ty torohevitsiny tsika. Le feno ty fahendreany anatini-Baiboly, azy fanomeza nameany iny ao. Tena manampy olo ty torohevitsini-Baiboly. Manova olo koa ty Baiboly. Lafa nanoratsy ty boky limy voalohany amy Baiboly ao Mosesy, le zao ty nivolaniny tamy vahoaki-Ndranahary rey, zany hoe ty Israelita: “Tsy hoe safà tsy misy dikany reo aminareo, fa iankinani-ainareo.” (Deot. 32:47) Nifalifaly sady nahatiaro sambatsy ze nanoriky ty Soratsy Masy. (Sal. 1:2, 3) Ndre fa nisoraty taloha biby tany aza ty Safà-Ndranahary le mbo mahavita manova olo avao raha io. Misy lahatsoratsy mitohitohy hoe “Manova Olo ty Baiboly”, ohatsy, amy jw.org ao, le hahita tantaran’olo 50 mahery iha ao. Resahiny ao fa misy olo nahavita nanova tanteraky ty fiainany satria nanomboky nanoriky ty torohevitsini-Baiboly.​—1 Tes. 2:13

6. Manino tsika ro afaky mivola fa tsy misy boky mitovy amy Baiboly?

⁶ Tsy misy boky mitovy amy ty Safà-Ndranahary. Fa manino? Satria Jehovah Ndranahary azy nampanoratsy ani-boky io tena mahery, maharitsy mandrakizay, sady tena hendry. Misy boky sisany mbo vakin’olo avao ndre fa maty olo nanoratsy azy iny. Fe fa tsy mahasoa matetiky ty torohevitsy resahiny lafa mandeha ty fotoa. Tsy manahaky ani-zay ty Baiboly satria mahasoa avao ty raha volaniny. Mahavita manampy olo niay tanatini-fotoa samby hafa koa ty Baiboly. Laha mamaky ani-boky masy io tsika noho mametsivetsy ty raha ianarantsika ao, le hampiasa ty fanahiny mahery Azy Nampanoratsy azy iny, mba hanampea antsika hahita hoe akory ty azontsika anoriha ty torohevitsini-Baiboly amy fiainantsika. (Sal. 119:27; Mal. 3:16; Heb. 4:12) Tena ta hanampy anao Azy Nampanoratsy ty Baiboly iny. Tsy tokony handrisiky antsika hamaky Baiboly tsy tampaky va raha zay?

7. Akory ty nanampeani-Baiboly ty vahoaki-Ndranahary taloha tany mba hiharo raiky?

⁷ Misy raha hafa koa ahità hoe misy fahendrea-Ndranahary amy Baiboly ao. Manampy ty vahoaki-Ndranahary hiharo raiky  raha io. Lafa niavy tamy Tany Nampitamany tany Israelita rey le nipetraky amy faritsy samby hafa rozy. Lasa mpihaza, ohatsy, ty sisany, le ty ilany nihary aomby, aosy, noho aondry. Nisy koa lasa mpamboly. Vokatsini-zay, le mety tsy hidary ty Israelita mipetraky amy faritsy hafa any ty Israelita mipetraky amy tanà hafa any. Fe nanao fandahara sankarazany Jehovah mba hahavy an-drozy hivory raiky, le hijanjy lafa vakỳ noho hazavany ty Safàny. (Deot. 31:10-13; Neh. 8:2, 8, 18) Mba eritsereto amy zay hoe ino ty nitsapani-Israelita raiky tsy mivaliky lafa ie niavy ta Jerosalema ao le nahita mpanomponi-Jehovah an-tapitrisany baka amy faritsy samby hafa! Lasa afaky nanampy ty vahoakiny hiharo raiky Jehovah tamy fotoa rey. Lafa niforo ty fiangona kristiana tafara atoy, le nisy lahilahy noho ampela baka amy fivolana samby hafa. Olo nalaza ty sisany tamin-drozy le ty ilany tsotsotra. Nisy koa nimpanarivo le tao ty nahantra. Fe lasa niharo raiky rozy satria samby tea ty Soratsy Masy ka niaraky nanompo ani-Ndranahary marina iny. Hain’olo lasa Kristiana rey fa tsy ho nahay ty Safà-Ndranahary rozy laha tsy nanampy noho niaraky nivory amin-drozy ty mpiara-manompo.​—Asa. 2:42; 8:30, 31.

8. Akory ty anampeani-Baiboly ty vahoakini-Jehovah hiharo raiky henanizao?

⁸ Mbo mampianatsy noho manampy antsika hiharo raiky avao Ndranaharintsika iny, le ty  Baiboly ro ampiasany hanaova ani-zay. Amy Baiboly ao ty ahitantsika ty fahamarina iaby mikasiky ani-Jehovah le mila mahay ani-raha rey tsika. Miaraky mivory tsy tampaky noho manatriky fivoriambe tsika mba hijanjy fanazavà ty Soratsy Masy. Ty Baiboly zany ro fitaova tena ampiasàni-Jehovah mba hanampea ty vahoakiny “hiaraky hanompo azy.”​—Zef. 3:9.

9. Ino ty toetsy mila ananantsika laha teantsika ty hahay ty raha volanini-Baiboly? (Lioka 10:21)

⁹ Misy porofo hafa koa toy mampiseho hoe hendry Jehovah. Maro ty raha nampanoratiny amy Soratsy Masy ao. Fe ty olo miambany avao ro nataony hahazo ty teani-raha rey hovolany fa tsy ty kila olo iaby. (Vakio Lioka 10:21.) Mamaky Baiboly ty olo iaby. Nivola manam-pahaiza raiky zay hoe: “Tsy misy boky maro mpamaky mandilatsy ty Baiboly, sady mitandrina soa ty olo lafa mamaky azy.” Fe ze olo miambany avao ro tena mahazo noho manoriky ty raha volanini-Baiboly.​—2 Kor. 3:15, 16.

10. Akory koa ty ampisehoani-Baiboly hoe hendry Jehovah?

¹⁰ Mbo misy raha hafa koa amy Baiboly ao mampiseho hoe hendry Jehovah. Mampiasa ty Soratsy Masy ie mba hampianara antsika iaby. Fe mampiasa ani-raha io koa ie mba hampianara noho hampahereza antsika kiraidraiky. Lafa mamaky ty Safà-Ndranahary tsika le ho haintsika hoe tena midary antsika kiraidraiky ie. (Isaia 30:21) Lafa iha miatriky problemo, impiry zay iha ro namaky Baiboly ka nahatsapa hoe atao raha natao ho anao mihintsy andinin-teny iny? Fe natao ho an’olo maro moa ty Baiboly. Ka laha zay ie, manino ro volany hoe misy fanazavà ho anao manoka ty anatiny ao? Satria tena hendry Azy Nampanoratsy Baiboly iny.​—2 Tim. 3:16, 17.

11. Akory ty nampisehoa-Ndranahary hoe tsy manavakavaky ie lafa nampanoratsy ty Baiboly?

¹¹ Anisani-toetsini-Jehovah koa ty hoe manao ty rariny. (Deot. 32:4) Tsy manavakavaky matetiky ty olo manao ty rariny. Manahaky ani-zay mihintsy Jehovah. (Asa. 10:34, 35; Rom. 2:11) Hita hoe tsy manavakavaky vatany ie satria ze fivolana nampiasan’olo maro ro nanorata ty Baiboly tamy voalohany. Nisoraty tamy safà hebreo ty ankamaroani-boky 39 voalohany amy Baiboly ao, amy zay ho mora azoni-vahoaki-Ndranahary tamy fotoa zay. Fe tamy taonjato voalohany, le ty safà grika ro nampiasan’olo maro ka nisoraty tamy fivolana io ty boky 27 farany amy Baiboly ao. Hita baka amy zay fa tsy nampanoratini-Jehovah tamy fivolana raiky avao ty Safàny. Henanizao, le fa ho 8 000 tapitrisa eo ho eo ty olo an-tany eto sady mampiasa fivolana maro sankarazany. Ka manao akory ty hahavy ani-olo maro reo hianatsy mikasiky ani-Jehovah?

12. Ino ty mampiseho fa tanteraky amy andro farany zao ty Daniela 12:4?

¹² Nampitamà Jehovah tamy alalani-Daniela mpaminany hoe amy andro farany, le “hitombo marè” ty “tena fahaiza” amy Baiboly ao, zany hoe ho maro ty olo hahay ty raha volaniny. (Vakio Daniela 12:4.) Anisani-nampitombo marè ani-fahaiza zay zao ty fandikà Baiboly noho boky ara-baiboly amy fivolana maro. Tsy zay avao fa natao printy raha rey, bakeo nizarà amin’olo maro. Lasa ty Baiboly ro boky voadika amy safà maro noho tena miparitaky maneran-tany. Misy fikambana sisany mamboatsy Baiboly fe avilin-drozy sarotsy raha rey kindraiky. Fe tsy manahaky ani-zay ty vahoakini-Jehovah. Tena miezaky rozy mandika ty Safà-Ndranahary amy fivolana 240 mahery, na ie iabiaby zay na ty  ampahany avao. Lasa afaky mahazo Baiboly ty olo kiraidraiky fa tsy voatery mivily. Ino ty vokany? Lasa maro ty olo baka amy firenena samby hafa maneky ty “vaovao soani-Fanjakà iny” alohani-hiaviani-farany. (Mat. 24:14) Teani-Ndranaharintsika manao ty rariny iny laha mamaky ty Safàny ty olo, amy zay hahay azy. Hita baka amy zay hoe tena tea antsika iaby ie.

13. Manino tsika ro afaky mivola fa be fitiava Jehovah laha hentea ty Baiboly? (Jaona 21:25)

¹³ Manampy antsika hahay ty Baiboly hoe anisani-toetsy tena mampiavaky ani-Jehovah ty fitiava. (1 Jaona 4:8) Mba diniho moa hoe ino ty raha nampanoratini-Jehovah amy Baiboly ao, le ino ty tsy nampanoratiny. Resahiny ao ty raha mila ataontsika mba hahavy antsika hifandramby soa aminy, hana fiaina soa henanizao, noho hahazo fiaina mandrakizay. Fe tea antsika Jehovah ka tsy nampanoratiny amy antsipiriany ty raha tokony hataontsika mba hanompoa azy.​—Vakio Jaona 21:25.

14. Ino koa ty ahità fa be fitiava Jehovah laha hentea ty Baiboly?

¹⁴ Nasehoni-Jehovah koa hoe be fitiava ie ka manaja antsika ie lafa mifandramby amintsika. Tsy nametraky fitsipiky maro biby amy Baiboly ao ie, na koa hoe niresahiny amintsika ze kila raha iaby tokony ataontsika na tsy tokony ataontsika amy fiainantsika. Tsy zay ty nataony fa mampiasa tantara tena nisy ie, miresaky faminania mahakinto, sady manoro hevitsy antsika mba hahaizantsika manapa-kevitsy. Vokany, lasa manampy antsika ho tea azy noho hanoriky ty raha volaniny ty Safàny.

15. a) Akory ty ahità hoe midary antsika Jehovah laha hentea ty Baiboly? b) Laha hentea sary io, tantaran’ia amy Baiboly ao vetsevetseni-ajà ampela io, rahalahy tanora io, noho anabavy be tao io? (Gen. 39:1, 10-12; 2 Mpanj. 5:1-3; Lioka 2:25-38)

 ¹⁵ Mivola ty Baiboly fa tena midary antsika Jehovah. Amy fomba akory? Maro tantaran’olo nampiseho ty fihetseham-pony amy Safàny ao. Azontsika soa fihetseham-pon’olo resahy amy Baiboly ao rey satria “olo nana fihetseham-po manahaky antsika avao” rozy. (Jak. 5:17) Fa ty tena vatan-draha, lafa mandiniky ty fomba nanandesany an’olo rey tsika, le lasa haintsika hoe “tena be fitiava Jehovah sady mamindra fo.”​—Jak. 5:11.

16. Ino ty raha haintsika mikasiky ani-Jehovah lafa tsika mamaky tantaran’olo nanao hadisoa voaresaky amy Baiboly ao rey? (Isaia 55:7)

¹⁶ Misy fomba hafa koa resahini-Baiboly ahità hoe tea antsika Jehovah. Manome toky antsika ty Soratsy Masy fa tsy hanenga antsika Ndranaharintsika iny lafa manao hadisoa tsika. Nanota matetiky tamy Jehovah Israelita rey, fe lafa tena nibebaky rozy le nengany ty hadisoan-drozy. (Vakio Isaia 55:7.) Haini-Kristiana tamy taonjato voalohany rey koa hoe tena tea an-drozy Ndranahary. Zatsy nanao fahotà bevata, ohatsy, lahilahy raiky zay fe nibebaky. Nampirisihini-apostoly Paoly amy zay olo finoa raiky aminy rey mba ‘hanenga ty hadisoani-lahilahy io noho hampionona azy.’ (2 Kor. 2:6, 7; 1 Kor. 5:1-5) Tena miavaky aloha Jehovah satria tsy manary ty mpanompony zao ie ndre nanao hadisoa rozy! Vomaiky aza rozy nampeany, nanariny, sady nitaominy mba hinama aminy ndraiky. Mbo zay koa ty ataoni-Jehovah henanizao. Mampitamà ie fa ndre ia ndre ia manota fe mibebaky, le hengany ty hadisoany.​—Jak. 4:8-10.

17. Manino ro fanomeza tena miavaky ty Baiboly?

¹⁷ Nameani-Jehovah fanomeza tena soa tsika, zany hoe ty Safàny. Manino ro tena miavaky raha io? Nianarantsika tato fa resahini-Baiboly hoe hendry Ndranahary, manao ty rariny, noho tena tea antsika. Asehoni-boky io fa teani-Jehovah hahay azy tsika. Teany ho lasa namany tsika.

18. Akory ty azontsika ampisehoa hoe ankasitrahantsika “fanomeza soa” baka amy Jehovah iny?

¹⁸ Tokony hotiarovintsika avao hoe “fanomeza soa” ty Safà-Ndranahary. (Jak. 1:17) Enga anè hasehontsika avao hoe ankasitrahantsika raha io. Manao ani-zay tsika laha mivavaky, le mamaky noho mametsivetsy ty raha volaniny. Laha manao ani-zay tsika, le afaky matoky fa hitahy ty ezaky ataontsika Azy Nampanoratsy ty Baiboly iny sady hahay azy soa tsika.​—Ohab. 2:5.