1. Ino ty raha nivolanini-Jesosy tamy mpianatsiny rey mikasiky ty fotoa hiaviani-farany, le ino ty fampitandrema nameany an-drozy?

 ANDRO vitsivitsy talohani-nahafatesani-Jesosy, le nanontany azy ty efatsy amy mpianatsiny rey hoe: “Ino ty ho famantara hoe ... fa marìny ty farani-zao tontolo zao?” (Mat. 24:3) Azo antoky fa teani-mpianatsy reo ho hay hoe ombia Jerosalema noho ty tempoliny ro ho ravà. Hita tamy valin-tenini-Jesosy hoe tsy ty fandravà ani-Jerosalema noho ty tempoliny avao ro niresahiny, fa niresahiny koa hoe “fa marìny ty farani-zao tontolo zao”, zany hoe tontolo misy antsika zao. Mifandramby amy fotoa hiaviani-farany zay, le zao ty raha niresahini-Jesosy: “Tsy misy mahay ani-andro na lera zay, na ty anjely an-danitsy any, na ty Anaky, laha tsy Baba raiky avao.” Bakeo ie nampitandrina ani-mpianatsiny rey iaby hoe: “Miambena avao.”​—Mar. 13:32-37.

2. Manino ro tena nila niamby avao ty Kristiana tamy taonjato voalohany?

² Tsy maintsy niamby avao Kristiana Jiosy tamy taonjato voalohany rey satria nianky amy zay ty ain-drozy. Niresahini-Jesosy tamy mpanori-dia azy rey ty raha tokony ho hain-drozy lafa ho ravà Jerosalema noho ty tempoliny. Hoy ty asany: “Lafa hitanareo fa misy maramila mitoby manodidy ani-Jerosalema, le tokony ho hainareo hoe fa marìny ty fandravà azy.” Tsy maintsy nanoriky ani-fampitandrema nameani-Jesosy io rozy tamy zay sady nila “nilay am-bohitsy any.” (Lioka 21:20, 21) Niavotsy ze nanoriky soa ani-fampitandrema io lafa niravàni-Romanina reo Jerosalema.

3. Ino ty hodinihintsika amy lahatsoratsy toy ato?

³ Miay amy tontolo raty fa marìny ho rava toy tsika henanizao. Tsy maintsy mandiniky soa noho miamby avao zany tsika. Hodinihintsika amy lahatsoratsy toy ato hoe ino ty hanampy antsika handiniky soa avao lafa manenty ty raha miseho maneran-tany.  Hodinihintsika koa hoe ino ty hanampy antsika hitandrina avao amy ty raha ataontsika, le ino ty azontsika atao mba hampiasà soa ty fotoa sisa tavela.

4. Manino ro tokony hahakinto antsika ty mahita hoe manatanteraky ty faminaniani-Baiboly ty raha miseho amy tany toy iaby?

⁴ Ara-dalàna aloha laha teantsika ty manaraky vaovao niboaky vo tsiela mikasiky ty raha miseho maneran-tany satria manatanteraky ty faminaniani-Baiboly raha rey. Niresaky raha maromaro, ohatsy, Jesosy mba hanampea antsika hahay hoe fa mihamariny ty farani-tontoloni-Satana toy. (Mat. 24:3-14) Nampirisiky antsika apostoly Petera mba handiniky soa ty fahatanterahani-faminania, amy zay hatanjaky avao ty finoantsika. (2 Pet. 1:19-21) Zao ty sàfa fampilira amy boky farany amy Baiboly ao: “Ty raha nambarani-Jesosy Kristy, sady namea-Ndranahary azy, mba hampisehoa amy ty mpanompony ty raha hiseho tsy ho ela.” (Apok. 1:1) Tena mahakinto antsika zany ty raha miseho amy tany toy iaby. Mahakinto antsika koa ty mahay hoe mety manatanteraky ty faminaniani-Baiboly raha rey. Farany mety tsy ho linintsika amy zay ty hiresaky ani-raha rey amin’olo hafa.

5. Ino ty raha tokony ho tandremantsika, fe ino ty raha tokony hataontsika? (Henteo koa sary reo.)

⁵ Fe lafa miresadresaky ty faminaniani-Baiboly tsika, le mila mitandrina mba tsy haminavina ty raha hiseho. Ino ty antony? Satria tsy teantsika ty hanao raha mety tsy hampitovy hevitsy ty olo amy fiangona eo. Mety haharè mpitondra hivola, ohatsy, tsika hoe mahita fomba mety soa mba tsy hisiani-aly, noho hampisy fiadana noho filamina. Fe tsy tokony haminavina tsika hoe manatanteraky ani-faminania amy 1 Tesalonianina 5:3 ao iny raha zay, fa aleo miezaky haharaky avao ze fanazavà farany. Laha ataontsika miory amy fanazavà aboakini-fandaminani-Jehovah ty resadresaky ataontsika, le hiharo raiky ty fiangona ka “hitovy hevitsy” avao.​—1 Kor. 1:10; 4:6.

6. Ino ty ianarantsika baka amy 2 Petera 3:11-13?

⁶ Vakio 2 Petera 3:11-13. Tokony handiniky ty faminania amy Baiboly ao tsika. Manampy antsika hieritseritsy ty antony anaovantsika ani-zay apostoly Petera. Nampirisiky antsika ie mba “hanao an-tsay avao ty hiaviani-androni-Jehovah.” Ino ty antony? Tsy hoe mba hahavy antsika hahay ty “andro noho lera” hiaviani-Aramagedona, fa mba hanampea antsika hampiasa soa ty fotoa sisa tavela mba hahafahantsika hana “fandaisam-bata masy noho hahafoy vata ho a Ndranahary.” (Mat. 24:36; Lioka 12:40) Laha atao amy safà hafa, le teantsika laha malio fandaisam-bata avao tsika sady teantsika ho azo antoky hoe fitiava ro mandrisiky antsika hanompo ani-Jehovah. Mba hahavitantsika ani-zay, le tsy maintsy mitandrina soa avao tsika amy ty raha ataontsika.

7. Akory ty ampisehoantsika fa mitandrina soa avao tsika amy ty raha ataontsika? (Lioka 21:34)

⁷ Nivola tamy mpianatsiny rey Jesosy hoe mila mitandrina rozy. Tsy hoe amy ty raha miseho amy zao tontolo zao avao, fa amy ty raha ataon-drozy koa. Zay mihintsy ty raha resahini-fampitandrema amy Lioka 21:34 ao iny. (Vakio.) Henteo fa nivola Jesosy ao hoe: ‘Mitandrema nareo.’ Ty olo mitandrina le tsy manao raha mety hanimba ty fifandrambesany amy Jehovah sady miezaky manalavitsy ani-raha rey. Laha manao ani-zay  ie, le hijano amy fitiava-Ndranahary ao avao.​—Ohab. 22:3; Joda 20, 21.

8. Ino ty raha nampirisihini-apostoly Paoly hataoni-Kristiana?

⁸ Nampirisiky ty Kristiana apostoly Paoly mba hitandrina avao amy ty raha ataon-drozy. Nivolaniny, ohatsy, Kristiana ta Efesosy tany rey hoe: “Mitandrema soa avao amy ze ataonareo, mba ho hita hoe hendry nareo fa tsy adala.” (Efes. 5:15, 16) Tsy mieny Satana fa miezaky manao ze azony atao mba hanimbà ty fifandrambesantsika amy Jehovah. Zay mahavy ty Baiboly manoro hevitsy antsika io hoe “anovo hay avao ty sitraponi-Jehovah,” amy zay tsika afaky hiaro ty vatantsika amy fandrikini-Satana iaby.​—Efes. 5:17.

9. Akory ty hahaizantsika ty sitraponi-Jehovah?

⁹ Tsy resahini-Baiboly hoe ino iaby ty raha mety hanimba ty fifandrambesantsika amy Jehovah. Misy raha sisany tsy resahini-Soratsy Masy mivanta le tsy maintsy manapa-kevitsy tsika. Ka mba hahafahantsika mandramby fanapahan-kevitsy soa, le mila mandiniky soa tsika hoe ino “ty sitraponi-Jehovah.” Hahay ty sitraponi-Jehovah tsika laha mianatsy tsy tampaky noho mametsivetsy ty Safà-Ndranahary. Arakaraky ty ahaizantsika soa ty sitraponi-Jehovah noho iezahantsika hana “ty saini-Kristy”, le vomaiky ho hita hoe “hendry” tsika ndre tsy misy fitsipiky voafaritsy soa miresaky mikasiky ty raha tokony ataontsika aza. (1 Kor. 2:14-16) Misy loza sisany avy le haintsika ka tsy sarotsy amintsika ty manalavitsy azy, fa misy loza sisany tsy manahaky ani-zay.

10. Ino ty loza sisany tsy maintsy halavirintsika?

¹⁰ Retoa, ohatsy, ty loza sisany tsy maintsy halavirintsika: Mihaminkamy olo tsy valin-tena, miboboky toaky, tea hany, manao safà mahery, manao fialam-boly misy hasatà, manenty sary tiva, noho ty raha hafa manahaky ani-reo. (Sal. 101:3) Tsy mieny Devoly azy fahavalontsika iny fa mila fomba avao mba hanimbà ty finamantsika amy Jehovah. (1 Pet. 5:8) Ka laha tsy miamby soa tsika le ho vitani-Satana ty hamboly toetsy raty am-pontsika noho an-tsaintsika ao, ka lasa hialona tsika, tsy hanao ty marina, tsy ho mety afa-po, halay olo, hirengirengy, noho hitanjaky lolompo. (Gal. 5:19-21) Mety hieritseritsy tse tsika amy voalohany hoe tsy manimba raha reo. Fe laha tsy manao raha malaky tsika mba hangalà ani-raha reo, le hitombo avao rozy manahaky akata misy poizy io ka hanimba antsika.​—Jak. 1:14, 15.

11. Ino ty loza raiky tsy hita mivanta tsy maintsy halavirintsika, le ino ty antony?

¹¹ Anisani-manimba ty fiaraha amy naman-draty, fe tsy avy le hita raha zay. Ndao atao hoe miaraky miasa amin’olo raiky tsy mpanomponi-Jehovah iha. Teanao laha mieritseritsy raha soa mikasiky ty Vavolombeloni-Jehovah ie. Farany iha miezaky ho soa fanahy noho ho tea manampy azy. Mety haneky mihintsy aza iha lafa asàny hiaraky mihina aminy. Tsielatsiela avao le fa niaraky nihina aminy matetiky iha. Nisy fotoa amy zay ie lasa niresaky mikasiky fandaisam-bata maloto. Tsy niteanao tse ty naharè ani-raha iny tamy voalohany. Fe lafa nandeha ty fotoa, le tsy nampanino anao sasy ndre ty nandramby anjara tamy resaky iny aza. Ndraiky andro, nanasa anao hiaraky hisotrosotro aminao mpiaraky miasa aminao iny, le nandeha iha. Lasa niaraky aminy tsy tampaky amy zay iha tamy farany. Tsy hitahita avao le fa nanao raha manahaky ani-mpiaraky miasa aminao iny iha. Marina aloha, fa tokony ho soa fanahy noho hanaja ty olo iaby tsika, fe mila tiarovintsika hoe tena misy vokany amintsika  ty olo iarahantsika matetiky. (1 Kor. 15:33) Laha mitandrina soa avao tsika amy ty raha ataontsika, arakini-fampirisihani-Jesosy iny, le tsy hinama amin’olo tsy manoriky ty fitsipikini-Jehovah. (2 Kor. 6:15) Ho haintsika amy zay hoe ino ty loza mety hiseho le akory ty hanalavirantsika azy.

12. Ino ty raha tokony hataoni-mpianatsini-Jesosy rey lafa rozy nandiny ty handravà ani-Jerosalema noho ty tempoliny?

¹² Teani-Jesosy laha be atao avao mpianatsiny rey lafa nandiny ty hiaviani-farany. Farany nameany asa rozy. Nivolaniny rozy mba hitory ty vaovao soa “a Jerosalema any noho mbamy faritsini-Jodia noho Samaria voho amy faritsy farany lavitsy an-tany eto.” (Asa. 1:6-8) Tena bevata ty asa nampanaovini-Jesosy ty mpanori-dia azy! Nampiasa soa ty fotoan-drozy zany rozy laha nanao ze azon-drozy atao mba hitoria amin’olo.

13. Manino tsika ro mila mampiasa soa ty fotoantsika? (Kolosianina 4:5)

¹³ Vakio Kolosianina 4:5. Mila mandiniky soa ty fomba ampiasantsika ty fotoantsika tsika laha teantsika ty hitandrina soa amy ty raha ataontsika. Samby mety ho azon-draha amy fotoa tsy ampoizy iaby tsika. (Mpito. 9:11) Mety ho maty tampoky aza tsika.

14-15. Akory ty hampiasantsika soa ty fotoantsika? (Hebreo 6:11, 12) (Henteo koa sary io.)

 ¹⁴ Mampiasa soa ty fotoantsika tsika laha manao ty sitraponi-Jehovah noho miezaky manamafy ty finamantsika aminy. (Jaona 14:21) ‘Tsy tokony haneky ho voahozonkozo’ tsika, sady ‘tsy tokony hiovaova mihintsy’, fa ‘miezaky ho be atao avao amy asani-Tompo.’ (1 Kor. 15:58) Ka laha maty tampoky tsika, na avy ty farani-tontolo toy, le tsy haneny mihintsy tsika.​—Mat. 24:13; Rom. 14:8.

¹⁵ Mbo mitariky ty mpianatsiny avao Jesosy henanizao satria mitory ty Fanjakà-Ndranahary amy tany toy iaby rozy. Nanatanteraky ty raha nampitamaniny ie. Mampiasa ty fandaminani-Jehovah Jesosy mba hampianara antsika hoe akory ty tokony hitoria ty vaovao soa. Ameany antsika koa ze fitaova ilàntsika mba hanaovantsika ani-asa io. (Mat. 28:18-20) Ka manao akory ty ampisehoantsika hoe manao ty raha ampanaovini-Jesosy antsika tsika? Manao ani-zay tsika laha miezaky mafy mitory noho mampianatsy. Manao ani-zay koa tsika laha miamby avao zisiky hiaviani-fotoa handravani-Jehovah ani-tontolo raty toy. Laha orihintsika torohevitsy amy Hebreo 6:11, 12 ao io, le hivahatsy “zisiky farany” amy raha tamanintsika iny tsika.​—Vakio.

16. Tapa-kevitsy hanao ino tsika?

¹⁶ Fa misy andro noho lera natokani-Jehovah handravà ani-tontoloni-Satana toy. Lafa avy andro zay, le ho tanterahini-Jehovah iaby faminania mikasiky tontolo vaovao amy Safàny ao rey. Fe mety hieritseritsy tsika kindraiky hoe atao raha mbo ho ela ty hiaviani-farany. Fe “tsy ho tara” zao ty androni-Jehovah! (Hab. 2:3) Enga anè tsika “hitamà ani-Jehovah” avao ka hampiseho hoe “parè handiny ani-Ndranahary mpanavotsy [antsika] iny.”​—Mika 7:7.