Tsapan-drozy hoe Tea An-drozy ty Fiangona
MIPETRAKY amy tanà kelikely a Goatemalà any Yomara noho anadahiny roe rezay. Marcelo noho Hiver ty anaran-drozy. Yomara tse ro nianatsy Baiboly voalohany tamy Vavolombeloni-Jehovah, bakeo nianatsy koa anadahiny rey tafara atoy. Fe mampalahelo fa samby jiky rozy telo mianadahy sady tsy mahay mamaky soratsy braille. Fe ndre teo zay, le niezaky mpampianatsy an-drozy iny. Ie avao ro namaky ty fehintsoratsy noho ty andinin-teny iaby lafa rozy nianatsy.
Tsy zay avao fa nisarotsy amin-drozy koa ty nandeha nivory, satria lala 40 minity eo ty mandeha amy Efitrano Fanjakà farani-ze marìny an-drozy. Fe nanao fandahara ty mpiara-manompo amy fiangona eo hoe hangalaky an-drozy mba hahafahan-drozy manatriky fivoria tsy tampaky. Lafa rozy koa nahazo anjarani-mpianatsy amy fivoria andavanandro, le nampeani-mpiara-manompo rozy mba hahatiaro ty raha hovolanin-drozy amy anjaran-drozy iny.
Tamy Mey 2019, le nanomboky nasia fivoria tan-tanàn-drozy eo. Farany, nifindra any mpivaly mpisava lala rezay. Nataon-drozy raha kendrè ty hanampy an-drozy telo mianadahy hahay hanoratsy noho hamaky soratsy braille, ndre tsy nahay namaky noho nanoratsy braille aza rozy morovaly. Nandeha amy trano famarota boky rey tany rozy, le nivily boky amy soratsy braille, amy zay rozy afaky hampianatsy ty hafa koa.
Marcelo mamaly teny am-pivoria any
Tanatini-vola vitsivitsy avao, le fa nahay namaky soratsy braille rozy telo mianadahy ka nanampy an-drozy handroso ara-panahy raha zay. Mpisava lala maharitsy henanizao Yomara, Marcelo noho Hiver. Mpikarakara fiangona Marcelo. Tena mandramby anjara be amy fanompoa ani-Jehovah rozy satria manompo avao sankerinandro. Mahita ani-hafanam-pon-drozy zay ty hafa, le lasa mafana fo manahaky an-drozy koa.
Tena mankasitraky ty fiangona rozy telo mianadahy amy fanohana ataon-drozy. Zao ty nivolanini-Yomara: “Vo nifandramby voalohany tamy Vavolombeloni-Jehovah avao zahay, le fa nahatsapa hoe tean-drozy.” Hoy koa Marcelo: “Tena falifaly zahay fa mana nama soa amy fiangonanay eo sady anisani-fianakavia mifankatea amy tany toy iaby.” Tena fa tsy linini-Yomara noho anadahiny rey ty hahita ty hanovàni-Jehovah ani-tany toy ho paradisa.—Sal. 37:10, 11; Isaia 35:5.
