1. Ino ty toe-tsay soa ananan’ny mpanompon’i Jehovah bakany zay?

 TENA tea an’i Jehovah va iha? Azo antoky aloha zay! Tsy iha raiky avao ro mahatsapa ani-zay. Maro amin’olo taloha tany rey koa ro nahatsapa manahaky anao zay. (Sal. 104:33, 34) Nahafoy raha maro rozy mba hanompoa an’i Jehovah. Zay mihintsy ty nataon’ny Nazirita tamy andron’Israely. Ia marina moa rozy reo, le ino ty ianarantsika baka amy ty modelin-drozy?

2. a) Ia Nazirita reo? (Nomery 6:1, 2) b) Nanino ty Israelita sisany ro nifily ho lasa Nazirita?

² Ty safà hoe “Nazirita” le nalà baka amy safà hebreo midika hoe “Voafily”, “Tafasaraky”, na “Nanokam-bata.” Israelita be zotom-po ty Nazirita. Miavaky ty raha ataony satria tena mahafoy raha maro ie mba hanompoa an’i Jehovah. Nengan’ny Lalànan’i Mosesy hanao voady manoka ho an’i Jehovah ty lahilahy raiky na ampela raiky, ka afaky nifily ho Nazirita ie anatin’ny fotoa voafaritsy. a (Vakio Nomery 6:1, 2.) Lafa nanao voady ho Nazirita ty Israelita raiky, le misy toromariky tsy maintsy narahiny, fe tsy voatery nanaraky an’ny raha zay ty Israelita hafa. Ka nanino zany ty Israelita raiky ro nifily ho lasa Nazirita? Azo inoa fa ty fitiava laliky an’i Jehovah ro nandrisiky azy. Ta hankasitraky azy koa ie amy ty raha soa maro nameany azy.​—Deot. 6:5; 16:17.

3. Ino ty itovizan’ny mpanompon’i Jehovah henanizao amy Nazirita?

³ Tsy nanao Nazirita sasy ty vahoaki-Ndranahary lafa nisoloa “Lalànan’i Kristy” ty Lalànan’i Mosesy. (Gal. 6:2; Rom. 10:4) Fe manahaky an’ny Nazirita rey, le asehon’ny mpanompon’i Jehovah henanizao hoe tena maniry hanompo azy  amy fo, vata, say, noho ty herin-drozy iaby rozy. (Mar. 12:30) Manao voady hanompo an’i Jehovah tsika lafa manokam-bata ho azy. Tsy maintsy manao ty sitrapon’i Jehovah noho mahafoy raha mba hanompoa azy tsika laha miay mifanaraky amy voady nataontsika iny. Lafa mandiniky ty fomba nanatanterahan’ny Nazirita reo ty voady nataon-drozy tsika, le lasa haintsika hoe akory koa ty ahafahantsika manatanteraky ty ahintsika. b (Mat. 16:24) Ndao moa tsika handiniky ohatsy vitsivitsy.

MIEZAHA HAHAFOY TENA

4. Laha hentea ty Nomery 6:3, 4, ino ty soro nataon’ny Nazirita?

⁴ Vakio Nomery 6:3, 4. Tsy nahazo ninon-toaky noho nihina voaloboky, na raha vita tamy voaloboky ty Nazirita. Tena nankafỳ an’ny raha reo matetiky ty Israelita sisany. Sady tsy raty koa moa ty fanaova an’ny raha reo. Mivola mihintsy aza ty Baiboly fa fanomeza baka amy Ndranahary ty divay sady “mampifalifaly ty fon’olo.” (Sal. 104:14, 15) Fe ndre zay, le niparè hanao soro ty Nazirita ka tsy nihina an’ny raha reo. c

5. Ino ty soro nataon’i Madián noho Marcela, le nanino rozy ro nanao ani-raha zay?

⁵ Manahaky Nazirita rey, le mahafoy raha koa tsika mba hahafahantsika manompo an’i Jehovah bebe kokoa. Diniho moa ty tantaran’i Madián noho Marcela. d Tena niada rozy morovaly. Nana asa soa Madián le nipetraky tamy trano bevata sady soasoa rozy. Fe naniry hampitombo ty fanompoan-drozy an’i Jehovah rozy. Farany rozy nanapa-kevitsy hanao fanovà mba hahafahan-drozy manatratsy an’ny raha kendren-drozy zay. Nivola rozy hoe: “Nanomboky nampihena ty fandanianay zahay. Nifindra tamy trano kelikely zahay le navilinay tomobilinay iny.” Tsy voatery nanao soro manahaky ani-zay Madián noho Marcela, fe rozy mihintsy ro nifily ty hanao ani-zay satria ta hampitombo ty fanompoan-drozy. Nahatiaro sambatsy noho afa-po rozy lafa nanao an’ny fanapahan-kevitsy zay.

6. Manino ty Kristiana henanizao ro mahafoy raha maro? (Henteo koa sary io.)

 ⁶ Parè hamoy raha ty mpanompon’i Jehovah henanizao amy zay mba manam-potoa maro hanompoa an’i Jehovah. (1 Kor. 9:3-6) Tsy mitaky antsika hanao ani-zay Jehovah, sady tsy raty koa ty ankamaroan’ny raha afointsika rey. Misy, ohatsy, mamoy ty asa tena teany, trano, na ty biby harèny. Maro koa ty nanapa-kevitsy tsy hanambaly na hanambaly fe tsy hanan’anaky. Ty sisany nifily hanompo amy pilasy mila mpitory maro, ndre lavitsy ty fianakaviany noho ty namany aza ty any. Parè hanao soro manahaky rey ty ankamaroantsika satria teantsika ty hanome ze farani-soa ho an’i Jehovah. Matokisa fa tena lafovily amy Jehovah ze soro ataonao mba hanompoa azy, ndre be zay ndre kelikely.​—Heb. 6:10.

MIEZAHA HIAVAKY AMY TY MARO

7. Manino ro mety ho sarotsy amy Nazirita kindraiky ty hanatanteraky ty voady nataony? (Nomery 6:5) (Henteo koa sary io.)

⁷ Vakio Nomery 6:5. Nanao voady ty Nazirita hoe tsy hoheteza ty volon-drozy. Zay ty fomba ampisehoan-drozy hoe naneky tanteraky an’i Jehovah rozy. Laha Nazirita anatin’ny fotoa elaela ty Israelita raiky, le ho lava biby ty volony ka ho mora arakin’olo ie. Laha manoha ty safidy nataony noho mampirisiky azy hanatanteraky ty voady nataony ty olo hafa, le tsy ho sarotsy aminy ty hoe miavaky. Fe mampalahelo fa nisy fotoa Nazirita rey tsy nankasitrahan’olo na tsy nitohanan’olo. Tamy andron’i Amosa mpaminany, ohatsy, le nampinomin’ny Israelita mpivadi-pinoa rey divay ty Nazirita. Mety tean-drozy hivaliky amy ty voady nataon-drozy vasa rozy. (Amosa 2:12) Tena nila herim-po kindraiky ty Nazirita mba hahafahany hanatanteraky avao ty voady nataony noho hahavitany hiavaky amy ty maro.

8. Ino ty hitanao hoe mampahery amy tantaran’i Benjamin?

⁸ Manampy antsika koa Jehovah ka afaky manao raha mba hiavaha amy ty maro tsika ndre saro-kenatsy aza. Diniho moa tantaran’ny pamaraky raiky a Norvezy any mana anara Benjamin toy. Vavolombelon’i Jehovah ie le vo 10 tao. Nanao fandahara ty tan-dakilasin-drozy tany mba hanohana ty olo a Ukraine any, amy aly any io. Nivolany ty ajà mba hisiky ty sainam-pirenenan’i Ukraine sady hihira. Tsy ta handramby anjara amy raha iny Benjamin, farany ie nitsanga lavidavitsy an’ny pilasy nanaova an’ny raha iny. Fe nisy mpampianatsy raiky zay nahita azy le nikaiky azy hoe: “Avia fa mandiny anao zahay!” Nahasaky namonjy an’ny mpampianatsy iny Benjamin le nivola hoe: “Tsy manoha ndre ia ndre ia aho ka tsy mandramby anjara amy fihetsiketseha  ara-politiky. Zay anè mahavy Vavolombelon’i Jehovah maro nigadrà io satria tsy nety nandramby anjara tamy aly.” Nekenin’ny mpampianatsy iny ty fanazavàn’i Benjamin ka nivolaniny ie hoe tsy voatery mandramby anjara. Fe nanomboky nanontanintany koa mpiaraky mianatsy aminy rey hoe nanino ie ro tsy niaraky amin-drozy. Natahotsy biby Benjamin ka fa ho nitany, fe nampoliny tamin-drozy raha nivolaniny tamy mpampianatsy iny. Tafarani-zay, le nivola tamy ray aman-dreniny Benjamin hoe tsapany fa nanampy azy Jehovah ka vitany ty niaro ty finoany.

9. Akory ty ahafahantsika mampifalifaly ty fon’i Jehovah?

⁹ Voamarikin’olo manodidy antsika hoe miavaky tsika satria mifily hanoriky ty sitrapon’i Jehovah. Mila herim-po tsika mba hivolana amin’olo an-dakilasy na am-piasà any hoe Vavolombelon’i Jehovah tsika. Satria vomaiky miharaty miharaty avao ty toe-tsay noho ty fandaisam-batan’olo amy tontolo toy eto, le mety ho sarotsy amintsika ty hiay mifanaraky amy torolalan’ny Baiboly noho hizara ty vaovao soa. (2 Tim. 1:8; 3:13) Fe tiarovo avao fa ‘falifaly ty fon’i Jehovah’ laha sakintsika ty manao raha mba hiavaha amin’olo tsy manompo azy.​—Ohab. 27:11; Mal. 3:18.

ANOVO VOALOHA LISTA AMY FIAINANAO JEHOVAH

10. Manino ro mety ho sarotsy tamy Nazirita rey ty nanoriky an’ny didy amy Nomery 6:6, 7 ao?

¹⁰ Vakio Nomery 6:6, 7. Tsy nahazo nitolotolo faty ty Nazirita. Mety hieritseritsy vasa iha hoe tsy de sarotsy raha zay. Fe tena nisarotsy tamy Nazirita raha zay lafa nisy longony maty. Anisan’ny fomba tamy andron’ny Baiboly ty hoe ty longony ro mikarakara an’ny faty iny. (Jaona 19:39, 40; Asa. 9:36-40) Tsy tokony hanaraky an’ny fombafomba zay ty Nazirita. Ndre tsy afaky niaraky tamy fianakavian-drozy aza rozy tamy fotoa sarotsy io, le hita hoe tena nanam-pinoa rozy ka nanatanteraky avao ty voady nataon-drozy. Azo antoky fa nanampy an’ny mpanompony tsy nivaliky reo Jehovah ka vitan-drozy ty niatriky an’ny raha sarotsy rezay.

11. Tokony ho tapa-kevitsy hanao ino ty Kristiana lafa mandramby fanapahan-kevitsy mikasiky ty fianakavia? (Henteo koa sary io.)

¹¹ Tena vatan-draha amintsika Kristiana koa ty voady nataontsika tamy Jehovah lafa tsika nanokam-bata ho azy. Misy vokany amy fanapahan-kevitsintsika noho ty raha  ataontsika amy fianakaviantsika raha zay. Miezaky mafy tsika mikarakara ze raha ilàn’ny fianakaviantsika, fe tsy ze raha tean-drozy mihintsy ro ataontsika aloha fa ty an’i Jehovah. (Mat. 10:35-37; 1 Tim. 5:8) Kindraiky tsika mety mila manao fanapahan-kevitsy tsy mahafaly ty fianakaviantsika fe mampifaly an’i Jehovah.

12. Ino ty nataon’i Alexandru ndre niatriky raha sarotsy aza ie tan-trano ao, le ino ty tsy nataony?

¹² Diniho moa ty tantaran’i Alexandru noho Dorina valiny. Niaraky nianatsy Baiboly rozy morovaly. Fe tao raiky tafarani-zay, nijano Dorina le niteany hijano koa Alexandru. Fe tsy nasiaky Alexandru fa nivola moramora taminy hoe mbo hanohy hianatsy ie. Tsy nahafaly an’i Dorina raha zay ka nataony ze raha iaby mba hampijano azy. Nivola Alexandru fa azony soa ty raha tsapan’ny valiny, fe ndre zay le tsy nimora taminy raha zay. Nisy fotoa, ohatsy, Dorina nivolambola azy sady nasiaky taminy, le nieritseritsy ie hoe vasa hajanony ty fianarany Baiboly. Fe niezaky avao Alexandru ka Jehovah ro nataony amy pilasy voalohany, le nasehony an’ny valiny hoe teany ie sady nihajàny. Lafa nahita ty modely soa nameany valiny, le nanapa-kevitsy hianatsy Baiboly ndraiky. Natao batisa ie tafara atoy.​—Henteo amy jw.org ao ty video hoe Alexandru Noho Dorina Văcar: “Ty Fitiava Mahari-po Noho Soa Fanahy” amy video mifampitohy hoe “Mampiova Olo ty Fahamarina.”

13. Akory ty ampisehoantsika hoe teantsika Jehovah noho ty fianakaviantsika?

¹³ Jehovah ro namoro ty fianakavia ka teany ho sambatsy ty fianakaviantsika. (Efes. 3:14, 15) Laha tena ta ho sambatsy tsika, le mila manao ze raha tean’i Jehovah hataontsika. Matokisa fa lafovily amy Jehovah ty ezaky ataonao mba hanompoa azy lafa iha mikarakara ty fianakavianao, sady soa fanahy iha no manaja an-drozy.​—Rom. 12:10.

AMPIRISIHO TY OLO HAFA MBA HANAHAKY AN’NY NAZIRITA REY

14. Ia ty olo tena tokony hiezahantsika ampaherezy?

¹⁴ Mila parè hamoy raha ty olo iaby mifily hanompo an’i Jehovah henanizao. Manao ani-zay rozy satria tea azy. Fe tsy mora kindraiky ty manao ani-zay. Ino ty azontsika atao mba hanampea ty hafa hana toe-tsay manahaky zay? Miezaha hanao safà mampahery. (Joba 16:5) Hitanao va hoe misy olo miezaky hana fiaina tsotra ty amy fiangonanareo eo satria ta hampitombo ty fanompoany? Mahay tanora miezaky manao raha mba hiavaha amy ty olo an-dakilasy any va iha, ndre sarotsy aminy aza ty manao ani-zay? Ka manao akory koa mpianatsy Baiboly noho mpiara-manompo  toherin’ny fianakaviany, fe miezaky tsy mivaliky rey? Anovo ze azonao atao mba hampahereza an-drozy. Ameo toky rozy fa tena ankasitrahantsika ty herim-pon-drozy noho ty raha ataon-drozy ho an’i Jehovah.​—Filem. 4, 5, 7.

15. Ino ty azon’olo sisany atao mba hanampea ani-ze manompo manontolo andro?

¹⁵ Mety afaky manome fanampea ho an’ny mpiara-manompo manompo manontolo andro rey tsika kindraiky. (Ohab. 19:17; Heb. 13:16) Zay mihintsy ty raha nirin’ny ranabavy raiky be tao mipetraky a Sri Lanka any zay. Nitombo ty drala pansion niazony ka ta hanampy ranabavy tanora roe mpisava lala rezay ie. Tsy de nanan-drala rozy fe mbo nanohy nanao mpisava lala avao. Farany ranabavy be tao io nanapa-kevitsy hanome drala an-drozy sambola, mba handoavan-drozy ze crédit lanin-drozy. Tena nana toe-tsay soa ranabavy io!

16. Ino ty ianarantsika baka amy Nazirita?

¹⁶ Azo antoky fa maro ty raha nianarantsika baka amy modely soan’ny Nazirita rey! Fe tsy zay avao fa ianarantsika raha mikasiky an’i Jehovah, azy Babantsika an-danitsy any iny koa fandahara iny. Hainy fa tena ta hampifalifaly azy tsika sady parè hamoy raha mba hahafahantsika miay mifanaraky amy fanokanam-batantsika. Ameany voninahitsy tsika ka tsika avao ro engàny hifily ze fomba ampisehoantsika ty fitiavantsika azy. (Ohab. 23:15, 16; Mar. 10:28-30; 1 Jaona 4:19) Hitantsika baka amy fandahara mikasiky Nazirita rey koa fa hitan’i Jehovah ty soro ataontsika sady tena lafovily aminy ze raha ataontsika ho azy. Enga anè tsika ho tapa-kevitsy hanompo an’i Jehovah avao, sady ho parè hanome ze farani-soa ho azy.