Fa Nihainao Va?
Manino ro misy safà mimpolimpoly amy Baiboly ao?
NISY fotoa mpanoratsy Baiboly rey nampimpolimpoly fehezanteny na safà sisany. Ino ty antony mety nahavy an-drozy nanao ani-zay? Ndao tsika handiniky antony telo:
Ty fotoa nanorata azy. Tsy nana kopỳ amy Lalàna ty ankamaroan’ny Israelita reo taloha. Lafa nivory tamy tranolay masy noho tamy tempoly tao rozy vo naharè ty Lalàna satria nivakỳ tamin-drozy raha io. (Deot. 31:10-12) Azo antoky fa mety nisy raha nanelingely rozy lafa nijanjy noho nitsanga niaraky tamy vahoaky be rey teo, tanatin’ny lera maromaro. (Neh. 8:2, 3, 7) Ka lafa nampolimpoly ty hevitsy bevata, le mety ho nimora tamin-drozy ty hitiaro noho hanoriky ze raha resahin’ny Soratsy Masy. Vomaiky koa aza raha zay nanampy an-drozy hahatiaro ty tsipiriany amy lalàna namean’i Jehovah an-drozy rey.—Lev. 18:4-22; Deot. 5:1.
Ty fomba nanorata azy. Hira ty 10 sanjato eo ho eo amy Baiboly, anisani-zay ty bokin’ny Salamo, Tononkiran’i Solomona, noho ty Fitomaniana. Misy safà mimpolimpoly matetiky amy hira rey. Nampiboaky soa ty foto-kevitsin’ny hira iny raha zay sady nanampy ty mpijanjy hahatiaro an’ny tononkira rey. Henteo moa, ohatsy, ty Salamo 115:9-11. Volaniny ao hoe: “Matokisa an’i Jehovah lahy nareo Israely!—Ie ro mpanampy noho ampingan-drozy. Matokisa an’i Jehovah lahy nareo taranakin’i Arona!—Ie ro mpanampy noho ampingan-drozy. Nareo ze matahotsy an’i Jehovah, matokisa an’i Jehovah.—Ie ro mpanampy noho ampingan-drozy.” Tsy hitanao va fa lasa nanampy an’ny mpihira rey hitiaro noho handentiky am-po ty fahamarina lafovily safà mimpolimpoly reo?
Ty antony nanorata azy. Kindraiky mpanoratsy Baiboly rey nampimpolimpoly fehezanteny manan-danja. Ohatsy zao, lafa Jehovah nandidy ty Israelita hoe tsy tokony hihina lio rozy, le nivolanin’i Jehovah Mosesy mba hampimpolimpoly ty antony nahavy azy nandrara an’ny raha zay. Tea-Ndranahary hohamafisy hoe anatin’ny lio ao ro misy ty ain’ny nofo iaby, zany hoe ay ty lio. (Lev. 17:11, 14) Tafara atoy, lafa nanoratsy mikasiky ty raha tsy tokony hatao mba hampifalifalea a-Ndranahary ty apostoly noho ty anti-panahy ta Jerosalema tao, le nihamafisin-drozy ndraiky hoe tsy tokony hihina lio ty Kristiana.—Asa. 15:20, 29.
Marina fa misy safà mimpolimpoly amy Baiboly ao, fe tsy midika zay hoe tean’i Jehovah hanao tsianjery ty raha ao tsika. Nivola, ohatsy, Jesosy hoe: “Lafa mivavaky nareo, le ka mampimpolimpoly raha mitovy avao.” (Mat. 6:7) Bakeo ie niresaky raha vitsivitsy azontsika resahy amy vavaky. (Mat. 6:9-13) Ka ndre tsy afaky mampimpolimpoly safà mitovy aza tsika lafa mivavaky, le azontsika atao ty mampimpolimpoly an’ny hevitsy rey.—Mat. 7:7-11.
Misy antony soa zany mahavy ty Safà-Ndranahary mampimpolimpoly safà sisany. Zay ro anisan’ny fomba ampianaran’ny Mpampianatsy Be Voninahitsy iny antsika ze raha hahasoa antsika.—Isaia 48:17, 18.