LAHATSORATSY FIANARA 10
Ty Fitiava ani-Jehovah ro Handrisiky Anao Hatao Batisa
“Ino ty misaka ahy tsy hatao batisa?”—ASA. 8:36.
HIRA 37 Hanompo Anao Amin’ny Foko Manontolo Aho
HO HITANAO ATO *
1-2. Ino ty nanosiky ani-tandapa etiopianina iny hatao batisa, laha hentea ty Asan’ny Apostoly 8:27-31, 35-38?
TA HATAO batisa va iha mba hanjary mpianatsini-Kristy? Nandrisiky olo maro hanao ani-fanapahan-kevitsy io ty fitiava noho fankasitraha. Anatini-zay ty manam-pahefà raiky niasa ho ani-mpanjakavavini-Etiopia.
2 Avy le nanao raha mifanaraky amy ty raha nianarany baka amy Soratsy Masy ao Etiopianina iny. (Vakio Asan’ny Apostoly 8:27-31, 35-38.) Ino ty nanosiky azy hanao ani-zay? Namaky tampany baka amy bokini-Isaia ie tanatini-sarety iny tao. Hita baka amy zay fa teany ty Safà-Ndranahary. Ka lafa niresaky taminy Filipo, le nanjary nankasitraky ty raha nataoni-Jesosy ho azy ie. Fe nanino manam-pahefà io ro nandeha a Jerosalema any? Satria fa nisy fitiava ani-Jehovah taminy tao. Ino ty ahaizantsika ani-zay? Vo baka nandeha nivavaky amy Jehovah ta Jerosalema any ie. Mety fa nana ty fivavahany lahilahy io, fe nialany raha zay mba hahafahany miaraky amy firenena raiky fa nanokam-bata ho ani-Ndranahary marina iny. Mbo fitiava ani-Jehovah zay avao ro nanosiky azy hanao fanapahan-kevitsy bevata hafa. Tsy ino zay fa ty hatao batisa mba hanjary mpianatsini-Kristy.—Mat. 28:19.
3. Ino ty raha mety hanaka ty olo raiky tsy hatao batisa? (Henteo ty efajoro hoe “ Manao Akory ty Fonao?”)
3 Afaky mandrisiky anao hatao batisa ty fitiava ani-Jehovah. Fe misy fitiava hafa koa mety hanaka anao tsy hanao ani-zay. Manao akory zao? Retoa misy ohatsy vitsivitsy. Mety ho teanao marè ty fianakavianao noho ty namanao tsy manompo ani-Jehovah, ka matahotsy iha tsy no ho halan-drozy lafa vita batisa. (Mat. 10:37) Na misy fahazara teanao, fe hainao hoe halani-Jehovah. Mety ho sarotsy aminao amy zay ty ho afaky amy fahazara rey. (Sal. 97:10) Mety fa nizatsy nanao fety mifandramby amy fivavahan-diso koa iha liany mbo nikely. Mbo tiaronao ty raha soa niseho tamy fety rey, ka mety ho teanao. Farany, manjary sarotsy aminao ty tsy hanao ani-fety tsy mampifalifaly ani-Jehovah rey. (1 Kor. 10:20, 21) Mety hametsivetsy ani-fanontanea toy amy zay iha: “Aia amy reo ty teako marè?”
IA TY TOKONY HO TEANTSIKA MARÈ?
4. Ino ty antony bevata marè tokony handrisiky anao hatao batisa?
4 Maro ty raha soa mety ho teanao noho ankasitrahanao. Ndre mbo tsy nianatsy Baiboly miaraky amy Vavolombeloni-Jehovah, ohatsy, iha le mety fa nivatan-draha taminao ty Baiboly. Mety fa nitea ani-Jesosy koa iha. Fa mahay Vavolombeloni-Jehovah amy zay iha henanizao, ka mety ho teanao ty miaraky amin-drozy. Fe ndre teanao raha reo, le mety tsy handrisiky anao haniry hanokam-bata ho ani-Jehovah noho hatao batisa. Jehovah Ndranahary mihintsy ro mila teanao. Zay ro antony bevata marè tokony handrisiky anao hatao batisa. Laha teanao mandilatsy ty raha iaby Jehovah, le tsy misy olo na raha hafa henganao hanaka anao tsy hanompo azy. Handrisiky anao hatao batisa ty fitiava ani-Jehovah sady hanampy anao tsy hivaliky aminy afarani-batisanao.
5. Ino iaby ty fanontanea hodinihintsika?
5 Nivola Jesosy hoe tokony ho tea ani-Jehovah tsika, amy ty fontsika iaby, ty vatantsika iaby, ty saintsika iaby, noho ty herintsika iaby. (Mar. 12:30) Ino ty hanampy anao ho tea noho hanaja laliky ani-Jehovah? Laha mandiniky ty fitiavani-Jehovah antsika tsika, le hanjary ho tea azy koa. (1 Jaona 4:19) Ino iaby ty ho tsapanao noho hataonao lafa teanao mandilatsy ty raha iaby Jehovah? *
6. Ino ty fomba raiky ahafahanao mianatsy mikasiky ani-Jehovah, laha hentea ty Romanina 1:20?
6 Miezaha hahay ani-Jehovah amy alalani-zavaboariny. (Vakio Romanina 1:20; Apok. 4:11) Diniho ty hazo noho biby namboarini-Jehovah, le vetsevetseo hoe manino raha rey ro mampiseho fa tena hendry ie. Mianara raha vitsivitsy mikasiky ty fomba miavaky nanamboara anao. (Sal. 139:14) Diniho koa ty hery nataoni-Jehovah amy masoandro iny, kanefa namboatsy basia an’arivony tapitrisa manahaky an’iny ie. * (Isa. 40:26) Vomaiky iha hanaja marè ani-Jehovah lafa manao ani-zay. Tena ilà ty mahay hoe mana fahendrea noho hery Jehovah. Fe mbo mila mahay raha maro mikasiky ani-Jehovah iha amy zay hitombo ty fitiavanao azy sady hifandramby marìny nareo.
7. Tokony ho resy lahatsy amin’ino iha mba hahafahanao ho tea marè ani-Jehovah?
7 Tokony ho resy lahatsy iha hoe mikarakara anao manoka Jehovah. Sarotsy aminao va ty mino hoe manenty noho mikarakara anao azy Mpamoro ty lanitsy noho tany iny? Laha zay, le tiarovo fa “tsy lavitsy antsika kiraidraiky” Jehovah. (Asa. 17:26-28) “Mandiniky ty fo iaby” ie. Mampitamà anao koa ie fa “laha mila azy iha, le hataony ze hahitanao azy.” Zay ty nivolanini-Davida tamy Solomona. (1 Tan. 28:9) Mivola aminao koa Jehovah hoe: ‘Nitariky anao aho.’ Zay ty antony mahavy anao mianatsy Baiboly henanizao. (Jer. 31:3) Vomaiky ho tea marè ani-Jehovah iha lafa azonao soa ze raha nataony ho anao.
8. Akory ty hamaleanao ty fitiavani-Jehovah?
8 Mamaly ty fitiavani-Jehovah iha lafa miresaky aminy amy vavaky. Hitombo ty fitiavanao a Ndranahary lafa mitantara aminy ty raha iaby manahira anao iha, le misaotsy azy amy ze raha iaby nataony ho anao. Le vomaiky hatanjaky ty fifandrambesanao amy Jehovah lafa hitanao hoe namaly ty vavaky nataonao ie. (Sal. 116:1) Hatòky iha amy zay fa hainy soa ty raha mahazo anao. Fe laha teanao ty hihamariny ani-Jehovah, le mila mahay ty hevitsiny iha. Tokony ho hainao koa ty raha teany hataonao. Lafa mianatsy ty Safàny avao iha vo hahay ani-zay.
Ty fianara Baiboly ro fomba soa marè hanampy antsika hifankariny amy Ndranahary noho hahay ty raha takiny amintsika (Fehintsoratsy 9) *
9. Akory ty ampisehoanao hoe lafovily aminao ty Baiboly?
9 Miezaha hankasitraky ty Safà-Ndranahary. Ty Baiboly avao ro miresaky ty marina mikasiky ani-Jehovah noho ty raha teany hatao ho anao. Mankasitraky ty Baiboly iha laha mamaky azy sanandro, manoma ty fianaranao Baiboly, noho manoriky ty raha ianaranao. (Sal. 119:97, 99; Jaona 17:17) Manao fandahara hamakia Baiboly va iha? Manaraky ani-fandahara zay va iha ka ataonao azo antoky hoe mamaky Baiboly iha sanandro?
10. Mivolana raha raiky mampiavaky ty Baiboly.
10 Maro ty raha mampiavaky ty Baiboly. Boky io avao, ohatsy, ro misy tantara baka amin’olo nahita maso ani-Jesosy, ka ao avao ro ahità tantara marina mikasiky ty raha nataony ho anao. Manjary ta hifandramby amy Jesosy iha lafa mianatsy mikasiky ty raha nivolaniny noho nataony.
11. Ino ty hanampy anao ho tea ani-Jehovah?
11 Miezaha ho tea ani-Jesosy, amy zay hitombo ty fitiavanao ani-Jehovah. Ino ty antony? Satria manahaky tanteraky ty toetsini-Babany Jesosy. (Jaona 14:9) Ka lafa mihamaro ty raha hainao mikasiky ani-Jesosy, le vomaiky hahay ani-Jehovah iha sady hankasitraky azy. Niferinesani-Jesosy, ohatsy, ty olo nieritserety ho ambany, anatini-zay ty mahantra, marary, noho ze tsy nisy mpiaro. Eritsereto koa ty torohevitsy ameany anao noho ty vokany soa amy fiainanao lafa manoriky ani-raha zay.—Mat. 5:1-11; 7:24-27.
12. Hanosiky anao hanao ino ty fianara mikasiky ani-Jesosy?
12 Hitombo ty fitiavanao ani-Jesosy lafa mametsivetsy iha hoe nanao soro ty vatany ie mba hengà ty fahotantsika. (Mat. 20:28) Lafa mazava aminao hoe niparè ho maty ho anao Jesosy, le mety hanosiky anao raha zay mba hibebaky noho hanao ze hanengani-Jehovah ty fahotanao. (Asa. 3:19, 20; 1 Jaona 1:9) Lafa tea ani-Jesosy noho Jehovah amy zay iha, le vomaiky ho teanao ty hiaraky amin’olo tea an-drozy.
13. Ino ty nomanini-Jehovah ho anao?
13 Miezaha ho tea ty fianakaviani-Jehovah. Tsy mazava amy ty fianakavianao noho ty namanao tsy manompo ani-Jehovah hoe manino iha ro maniry hanokam-bata ho ani-Jehovah. Mety hanohitsy anao mihintsy aza rozy. Hanampy anao Jehovah, ka hanome fianakavia ara-panahy anao. Laha miaraky amy fianakavia ara-panahy io avao iha, le ho hitanao ty fitiava noho fanohana ilànao. (Mar. 10:29, 30; Heb. 10:24, 25) Lafa mandeha ty fotoa, le mety hanompo ani-Jehovah miaraky aminao koa ty fianakavianao sady hanoriky ty fitsipikini-Jehovah.—1 Pet. 2:12.
14. Ino ty raha nihitanao mikasiky ty fitsipikini-Jehovah, ka manaporofo ty raha volanini-1 Jaona 5:3?
14 Miezaha hankasitraky noho hanoriky ty fitsipikini-Jehovah. Mety ho nanao ze teanao iha talohani-nahaizanao ani-Jehovah. Fe hitanao henanizao hoe ty fitsipikini-Jehovah ro tena soa. (Sal. 1:1-3; vakio 1 Jaona 5:3.) Mba diniho moa ty torohevitsini-Baiboly ho ahi-ty lahilahy noho ampela manambaly, baba noho reny, noho ty anaky. (Efes. 5:22–6:4) Hitanao va hoe nihasoa ty fiainani-fianakavianao lafa nanoriky ani-torohevitsy reo? Hitanao va hoe nihasoa ty fahazaranao lafa norihinao ty torohevitsini-Jehovah mikasiky fifilia nama? Nanjary olo falifaly va iha? (Ohab. 13:20; 1 Kor. 15:33) Azo antoky fa eka ty valini-fanontanea reo.
15. Ino ty azonao atao laha tsy mora aminao ty manoriky ty torolalani-Baiboly?
15 Lafa mianatsy ty torolalani-Baiboly iha, le mety tsy ho hainao ty fomba hanorihanao azy. Zay ro mahavy ani-Jehovah hampiasa ty fandaminany mba hanome anao fitaova mifototsy amy Baiboly, hanampy anao hahay hanavaky ty soa amy ty raty. (Heb. 5:13, 14) Lafa mamaky noho mianatsy amy fitaova io iha, le ho hitanao hoe voafaritsy soa noho azo orihy ty raha resahiny. Hihamariny ty fandaminani-Jehovah iha amy zay.
16. Manao akory ty andaminani-Jehovah ty vahoakiny?
16 Miezaha ho tea noho hanoha ty fandaminani-Jehovah. Alamini-Jehovah mba ho anatini-fiangona maro ty vahoakiny, le Jesosy Anakilahiny ro lohani-fiangona iaby reo. (Efes. 1:22; 5:23) Nanendry lahilahy voahosotsy vitsivitsy Jesosy mba hitariky amy fanatanteraha ty asa teany hatao henanizao. “Mpanompo azo atokisa noho mahihitsy” ro nikaihani-Jesosy ani-lahilahy reo amy fitambarany. Namea andraikitsy hanome sakafo ara-panahy anao noho hiaro ty fifandrambesanao amy Ndranahary rozy. (Mat. 24:45-47) Manampy anao mpanompo io ka ataony azo antoky hoe misy anti-panahy voatendry mba hiarakandro anao. (Isa. 32:1, 2; Heb. 13:17; 1 Pet. 5:2, 3) Manao ze azon-drozy atao ty anti-panahy mba hampahereza anao noho hanampea anao hihamariny marè ani-Jehovah. Fe ty vatan-draha marè, le manampy anao hampianatsy ty hafa mikasiky ani-Jehovah rozy.—Efes. 4:11-13.
17. Manino tsika ro mila miresaky amin’olo mikasiky ani-Jehovah, laha hentea ty Romanina 10:10, 13, 14?
17 Miezaha hanampy ty olo hafa ho tea ani-Jehovah. Nirahini-Jesosy hampianatsy mikasiky ani-Jehovah mpianatsiny reo. (Mat. 28:19, 20) Azontsika atao aloha ty manoriky ani-zay satria hoe manoriky safà tsika. Fe lafa mitombo ty fitiavanao ani-Jehovah, le hahatsapa manahaky ani-apostoly Petera noho Jaona iha. Nivola rozy hoe: “Tsy azonay atao ty tsy hivola sasy mikasiky ty raha fa nihitanay noho nirenay.” (Asa. 4:20) Falifaly biby tsika lafa manampy olo ho tea ani-Jehovah. Mba eritsereto moa Filipo, azy mpitory ty vaovao soa iny. Azo antoky fa nifalifaly biby ie lafa nanampy ani-Etiopianina iny hahay ty marina amy Soratsy Masy ao noho hatao batisa! Laha manahaky ani-Filipo iha ka manoriky ty didini-Jesosy mba hitory, le atoronao hoe ta hanjary Vavolombeloni-Jehovah iha. (Vakio Romanina 10:10, 13, 14.) Mety hametraky fanontanea manahaky ani-Etiopianina iny iha amy zay hoe: “Ino ty misaka ahy tsy hatao batisa?”—Asa. 8:36.
18. Ino ty hodinihintsika amy lahatsoratsy manaraky?
18 Manao fanapahan-kevitsy farani-ze bevata amy fiainanao iha lafa manapa-kevitsy hatao batisa. Vatan-draha raha io ka mila dinihinao soa hoe ino iaby ty tafilitsy amy zay. Ino ty raha mila hainao mikasiky batisa? Ino ty tokony hataonao alohani-batisa noho afarani-zay? Hamaly ani-fanontanea rezay ty lahatsoratsy manaraky.
HIRA 2 Jehovah no Anaranao
^ feh. 5 Tea ani-Jehovah ty olo sisany, fe mbo tsy azony antoky hoe parè hatao batisa va ie mba hanjary Vavolombeloni-Jehovah. Laha zay ty tsapanao, le hanampy anao lahatsoratsy toy mba handiniky ndraiky ty raha azonao atao mba hitariky anao ho amy batisa.
^ feh. 5 Tsy mitovy ty olo, ka tsy voatery hanaraky ty filaharany amy lahatsoratsy toy ato ty fanorihany ani-soso-kevitsy atoa reo.
^ feh. 6 Mbo misy ohatsy maro hafa ty amy bokikely hoe Nisy Namorona Ve? noho Ahoana no Nampisy Antsika? Fanontaniana Dimy Mila Dinihina.
^ feh. 61 SARY: Ranabavy raiky manome taratasy mivalo ampela tanora raiky hitany am-bazary eny.
