1. Teani-ray aman-dreny hanao akory ty anan-drozy?

 NAREO ray aman-dreny, hainay fa ta hanampy ty ananareo hahay noho ho tea ani-Jehovah nareo. Fe tsy hita maso Ndranahary. Ka manao akory ty hanampeanareo ty ananareo hahatsapa hoe tena misy ie? Akory ty hanampeanareo an-drozy mba hamonjy azy?​—Jak. 4:8.

2. Ino ty azoni-ray aman-dreny atao mba hampianara ty anany mikasiky ty toetsini-Jehovah?

² Hifandramby soa amy Jehovah ty ananao laha miaraky mianatsy Baiboly amin-drozy iha. Zay ro anisani-fomba tena soa mba hanampea an-drozy. (2 Tim. 3:14-17) Fe miresaky raha hafa azoni-ray aman-dreny atao ty Baiboly mba hampianara ani-ajà reo hahay ani-Jehovah. Resahini-bokini-Ohabolana fa tokony hampitiaro ty anany ty raim-pianakavia mba hifantoky amy ty toetsini-Jehovah. Hita amy zavaboary rey moa toetsiny rezay. (Ohab. 3:19-21) Afaky mampiasa ty zavaboary ty ray aman-dreny mba hanampea ty anany hahay ty toetsini-Jehovah. Hodinihintsika hoe akory ty azon-drozy anaova ani-zay.

3. Ino ty tokony hataoni-ray aman-dreny mba hanampea ty anany?

³ Mivola ty Baiboly hoe ty ‘toetsi-Ndranahary tsy hita maso, le hita mazava soa liany namorona ani-zao tontolo zao. Hita amy ty raha nataony toetsiny rezay.’ (Rom. 1:20) Mety ho teanareo ray aman-dreny zao ty mitsangatsanga miaraky amy ty ananareo. Hararaoto fotoa rey mba hanampea ty ananareo hahita hoe ino ty toetsy soani-Jehovah hita amy “raha nataony” rey. Zay mihintsy ty nataoni-Jesosy lafa ie nampianatsy. Ndao hodinihintsika hoe akory ty azoni-ray aman-dreny atao mba hanahafa azy.

4. Akory ty nampiasani-Jesosy ty zavaboary mba hampianara ani-mpianatsiny rey? (Lioka 12:24, 27-30)

 ⁴ Henteo moa hoe akory ty nampiasani-Jesosy ty zavaboary lafa ie nampianatsy. Nampirisihiny, ohatsy, mpianatsiny rey ndraiky zay mba handiniky ty goaky noho ty folera. (Vakio Lioka 12:24, 27-30.) Afaky niresaky mikasiky zavaboary hafa Jesosy, fe naleony niresaky voro noho folera satria reo ro mpihitani-mpianatsiny rey. Mety nahita goaky nitily mbanabon-drozy eny noho folera soasoa mitiry an-tonda eny mpianatsy rey. Mba alao sary an’eritseritsy moa hoe sady mivola Jesosy no manondro ani-raha reo. Ka ino amy zay ty nataony lafa ie baka niresaky ani-raha reo? Nampianariny ani-mpianatsiny rey hoe matariky noho soa fanahy Baban-drozy an-danitsy any iny. Hameani-Jehovah hany noho akanjo ty mpanompony tsy mivaliky, manahaky ty ataony amy goaky noho folera rey.

5. Akory ty azoni-ray aman-dreny ampiasà ty zavaboary mba hampianara ty anany mikasiky ani-Jehovah?

⁵ Nareo ray aman-dreny, akory ty azonareo anahafa ani-Jesosy lafa nareo mampianatsy ty ananareo? Mety azonareo atao, ohatsy, ty miresaky mikasikasiky ty biby na ty raha mitiry teanareo. Tokony horesahinao amy fotoa zay hoe ino ty ampianarini-raha iny antsika mikasiky ani-Jehovah. Bakeo anontaneo ani-ananao iny koa hoe ino ty biby na raha mitiry tena teany. Laha raha tena teany iny ro resahinao, le hijanjy anao soa ananao iny lafa iha hampianatsy azy mikasiky ty toetsini-Jehovah.

6. Ino ty azontsika ianara baka amy modelini-mamani-Christopher?

⁶ Tsy maintsy manao fikaroha laliky mikasiky biby na raha mitiry raiky va ty ray aman-dreny alohani-hiresahany amy ty anany hoe ino ty azo ianara baka amy raha iny mikasiky ani-Jehovah? Tsy voatery. Tsy nila nanazava raha maro Jesosy lafa niresaky mikasiky goaky noho folera. Tsy niresahiny hoe manao akory ty ahitani-goaky rey hany na manao akory ty fomba fitomboani-folera rey. Marina fa mety ta hahay amy an-tsipiriany mikasiky ty raha niforonini-Jehovah ty ananao. Fe valin-teny na fanontanea tsotra avao le fa ampy kindraiky mba hanampea azy hahazo ty raha teanao hampianary azy. Mahatiaro tamy ie mbo nikely rahalahy kaihy hoe Christopher zay, le zao ty raha nivolaniny: “Niresaky raha tsotra avao mamanay mba hanampea anay hankasitraky ty zavaboary nanodidy anay. Lafa zahay, ohatsy, nahita vohitsy, le nivola mama hoe: ‘Henteonareo moa vohitsy reroa, abo biby rozy sady soasoa! Tsy hitanareo va hoe mahay raha Jehovah?’ Na lafa zahay tamoron-driaky teny, le nivola ie hoe: ‘Mba henteonareo moa ty fidobokini-lozoky reroy! Tsy hitanareo va hoe tena mahery Ndranahary?’ ” Nivola Christopher hoe: “Tsotra avao raha nivolaniny reo fe tena nisy vokany bevata taminay.”

7. Akory ty azonao ampiofana ty ananao mba handiniky ty zavaboary?

⁷ Lafa mihabe ty ananao, le azonao ampiofany rozy mba hanomboky handiniky ty zavaboary noho ty raha azo ianara mikasiky ani-Jehovah. Afaky miresaky ty raiky amy raha niforonini-Jehovah rey iha, bakeo azonao anontanea rozy hoe: “Laha hentea raha io, ino ty ianaranao mikasiky ani-Jehovah?” Mety ho tseriky iha sady ho falifaly lafa maharè ty hevitsini-ananao iny.​—Mat. 21:16.

8. Afaky nanao ino ty ray aman-dreny israelita lafa rozy ‘tan-dala eny’?

⁸ Nampirisihy ty ray aman-dreny israelita mba hampianatsy ty anan-drozy ty didini-Jehovah ndre mandeha “an-dala eny” rozy. (Deot. 11:19) Nisy lala maro tambanivohitsin’Israely tany. Tsy sarotsy zany ty nahita biby sankarazany, voro, noho folera. Lafa nandeha  tamy lala rey ty fianakavia israelita, le nana fahafaha hiresaky ty raha niforonini-Jehovah amy ty anany ty ray aman-dreny. Mety mana fahafaha hampiasa ty zavaboary koa nareo ray aman-dreny mba hampianara ty ananareo. Mba diniho moa hoe akory ty nahavitani-ray aman-dreny sisany ani-zay.

9. Ino ty azonao ianara baka amy Punitha noho Katya?

⁹ Zao ty nivolanini-Punitha, renim-pianakavia mipetraky amy vily raiky an’Inde any: “Lafa namangy fianakavia tambanivohitsy tany zahay, le nana fahafaha hanampy ty ananay hianatsy ty raha soasoa niforonini-Jehovah. Tsapako fa lasa mahay soa ty zavaboary anako reo lafa zahay tsy an-davily any.” Nareo ray aman-dreny, tsy ho halinoni-ananareo reo mihintsy ty fotoa niarahanareo amy pilasy soasoa rey. Hoy Katya, ranabavy baka a Moldovỳ any zay: “Tena tsy halinoko mihintsy fotoa niarahako tamy ray aman-dreniko tambanivohitsy any tamy zaho mbo nikely rey. Tena mankasitraky an-drozy aho satria mbo kely aho le fa nampianarin-drozy handiniky ty raha niforonini-Jehovah noho hahita ty toetsiny baka amy raha rey.”

10. Ino ty azoni-ray aman-dreny atao laha sarotsy amin-drozy ty mandeha ambanivohitsy any? (Henteo ty efajoro hoe  “Ho ani-Ray Aman-dreny.”)

¹⁰ Fe manao akory laha tsy afaky mandeha ambanivohitsy any iha? Hoy Amol, rahalahy mipetraky an’Inde any: “Tsy maintsy miasa anatini-lera maro ty ray aman-dreny aminay atoy, sady mety handany drala ty mandeha ambanivohitsy any. Fe ndre zay, le afaky mahita ty raha niforonini-Jehovah iha lafa mandeha amy zariday kelikely rey na manenty baka an-davaranga eny, sady afaky miresaky ty toetsiny.” Laha mandiniky soa iha, le azo inoa koa fa hahita zavaboary maro anilani-tranonareo mbeny azonao atoro ty ananao. (Sal. 104:24) Mety hahita voro iha, hahita bibikely, raha mitiry, na raha hafa. Hoy Karina baka an’Alemaigny  any: “Tea folera mamako. Tamy zaho mbo nikely, le matetiky natorony folera soasoa rey avao aho ndre mbaia mbaia ty nandehananay.” Afaky mampiasa video noho raha naboakini-fandamina rey koa nareo ray aman-dreny, mba hampianara ty ananareo. Ndre aia ndre aia ty misy anao, le afaky manampy ty ananao avao iha mba handiniky ty raha niforonini-Jehovah. Ndao tsika henanizao handiniky ty sisany amy toetsini-Jehovah azonao resahy amy ty ananao.

11. Ino ty azoni-ray aman-dreny atao mba hanampea ty anany hahay hoe be fitiava Jehovah?

¹¹ Mba hanampea ty ananao hahay hoe be fitiava Jehovah, le azonao resahy ty fomba ampisehoani-biby fitiava ty anany. (Mat. 23:37) Azonao resahy koa ty raha miavaky sankarazany tena teantsika amy zavaboary. Hoy Karina, azy niresahintsika taloha eroy iny: “Lafa mandehandeha rey zahay, le volanini-mamako aho mba hijano le handiniky ty raha mampiavaky ze folera hitanay, noho handiniky hoe manino raha rey ro mampiseho fa be fitiava Jehovah. Tao vitsivitsy tafara atoy, le mbo mandiniky soa ty folera avao aho. Lasa hitako hoe manino ro miavaky ty lokoni-raha rey noho ty fomba nanamboara azy kiraidraiky. Mbo mampitiaro ahy avao folera rey hoe tena tea antsika Jehovah.”

12. Ino ty azoni-ray aman-dreny atao mba hanampea ty anany hahay hoe hendry Ndranahary? (Salamo 139:14) (Henteo koa sary io.)

¹² Ampeo ty ananao hahita hoe hendry Ndranahary. Tsy misy olo hendry mandilatsy ani-Jehovah. (Rom. 11:33) Azonao resahy, ohatsy, hoe akory ty ahafahani-rano ho lasa rahona noho mahavy ani-rahona rey hihafo le afaky mifindrafindra pilasy. (Joba 38:36, 37) Azonao resahy koa ty raha mampiavaky ty vatan’olombelo. (Vakio Salamo 139:14.) Mba henteo moa hoe akory ty nanaovani-loham-pianakavia raiky toy ani-zay. Vladimir ty anarany. Hoy ty asany: “Nilavo tamy bisiklety anakilahinay iny ndraiky zay, le naratsy. Andro vitsivitsy tafara atoy avao le niafaky fery iny. Nihazavaninay morovaly taminy hoe lafa namboatsy ty vatantsika Jehovah le nataony mahay mitaha ty vatany avao ty vatantsika. Niresahinay hoe tsy manahaky ani-zay ty raha namboarin’olombelo. Laha misy tomabily simba, ohatsy, le tsy afaky manamboatsy ty vatany ie. Nanampy  ani-ananay iny hahita raha zay hoe tena hendry Jehovah.”

13. Ino ty azoni-ray aman-dreny atao mba hanampea ty anany hahay hoe mahery Ndranahary? (Isaia 40:26)

¹³ Manasa antsika Jehovah mba hanenty ty lanitsy, le hametsivetsy hoe tena mahery ie kanao mipetraky soa amy pilasiny iaby ty raha an-danitsy eny. (Vakio Isaia 40:26.) Azonao ampanentea amy lanitsy eny ty ananao, le ampirisiho ie handiniky ze raha hitany. Misy raha tiaroni-ranabavy baka a Taïwan any zay tamy ie mbo nikely, le hoy ty asany: “Nandesini-mamako nitsangatsanga anaty ala any aho ndraiky zay. Lafa haly ty andro, le niaraky nanenty lanitsy zahay. Tsy voaelingelini-jiro lanitsy iny lafa any, tsy manahaky ty an-davily any. Niasa loha mikasiky ty fitaomani-nama aho tamy zay, sady nisalasala hoe mbo ho vitako avao va ty tsy hivaliky amy Jehovah. Nampirisihini-mamako aho hametsivetsy hoe tena mahery Jehovah kanao nahavita namoro ani-basia iaby reo. Le nampirisihiny koa aho mba tsy hanalino hoe afaky mampiasa ani-heriny zay koa Jehovah mba hanampea ahy ndre ino ndre ino ty raha sarotsy atrehiko. Lafa baka nandiniky ty zavaboary aho tamy lianay iny, le vomaiky ta hahay ani-Jehovah sady tapa-kevitsy hanompo azy avao.”

14. Ino ty azoni-ray aman-dreny atao mba hanampea ty anany hahay hoe Ndranahary falifaly Jehovah?

¹⁴ Hita amy raha niforonini-Jehovah rey hoe Ndranahary falifaly ie sady teany ho falifaly koa tsika. Hitani-mpahay siansy maro hoe tea mihisa ty ankamaroani-biby, anatini-zay, ohatsy, ty voro noho ty fia. (Joba 40:20) Fa nisy fotoa va ty ananareo nihehy lafa nanenty biby mihisa? Mety nahita anaka piso nihisahisa laboly, ohatsy, rozy na nahita anaka alika mifampitolotolo. Lafa hitanareo hoe mihehy ty ananareo amy manaraky lafa manenty ty raha ataoni-biby raiky, le ampitiarovo rozy hoe Ndranahary falifaly Jehovah azy tompoentsika iny.​—1 Tim. 1:11.

15. Ino ty azoni-ray aman-dreny atao mba hahaiza ty raha an-tsaini-anan-drozy any? (Ohabolana 20:5) (Henteo koa sary io.)

¹⁵ Mety ho sarotsy amy ray aman-dreny kindraiky ty hanampy ty anan-drozy hiresaky  ty raha sarotsy mahazo an-drozy. Laha zay ty raha mahazo anao, le mila mahay ty raha an-tsaini-ananao any iha. (Vakio Ohabolana 20:5.) Misy ray aman-dreny sisany mahita hoe moramora kokoa aminy ty manao ani-zay lafa rozy mandiniky zavaboary miaraky amy ty anan-drozy. Ino ty antony? Satria amy fotoa rey tsy de misy raha manelingely an-drozy moroanaky. Niresaky antony hafa koa Masahiko, raim-pianakavia mipetraky a Taïwan any. Hoy ty asany: “Mitsangatsanga miaraky amy ananay reo zahay, le manganiky vohitsy na mandehandeha amoron-driaky eny. Tena tsy mihafahafa rozy amy fotoa rey. Lasa mora aminay ty miresaky amin-drozy sady lasa hainay ty raha an-tsain-drozy any.” Hoy Katya, azy niresahintsika taloha eroy iny: “Matetiky aho nandesini-mamako amy zariday soasoa feno biby rey saky baka nianatsy. Soasoa noho milamindamy amy pilasy rey, le lasa tsy misalasala aho miresaky aminy ty raha niseho tan-dakilasy any na ze raha nampiasa loha ahy.”

16. Manino ty fandiniha ty zavaboarini-Jehovah ro manampy ty fianakavia ho kalma noho ho falifaly?

¹⁶ Laha tea mandiniky ty raha niforonini-Jehovah ty fianakavia, le hahatiaro kalma sady ho falifaly. Hanampy an-drozy hifankatea noho hifandramby am-po raha zay. Mivola ty Baiboly hoe “misy fotoa iheheza”, le “misy fotoa itsinjaha.” (Mpito. 3:1, 4) Namoro pilasy soasoa an-tany eto Jehovah mba hahafahantsika manao ze raha teantsika. Maro ty fianakavia tea mitsangatsanga amy pilasy misy zariday rey, na ambanivohitsy any, na amy tanà misy riaky rey. Misy ajà sisany tea milailay noho mihisa lafa amy zariday rey. Ty sisany koa tea manenty biby na milano amy vavarano, na amy ranovory, na riaky. Maro ty raha azontsika atao mba hankafiza ty raha namboarini-Jehovah!

17. Manino ty ray aman-dreny ro tokony hanampy ty anany ho tea mandiniky ty raha niforoni-Ndranahary?

¹⁷ Tena hankafỳ ty raha niforonini-Jehovah ty ray aman-dreny noho ty anaky lafa amy tontolo vaovao. Tsy hatahotsy biby tsika amy zay, sady tsy hatahotsy antsika koa rozy. (Isaia 11:6-9) Afaky handiniky ty raha niforonini-Jehovah avao tsika mandrakizay. (Sal. 22:26) Fe ka mandiny amy tontolo vaovao any nareo ray aman-dreny zay vo hanampy ty ananareo ho tea mandiniky ty zavaboary. Laha mampiasa zavaboary iha mba hampianara ty ananao mikasiky ani-Jehovah, le hieky manahaky ani-Davida Mpanjaka rozy hoe: “Tena maro biby vatany ty raha vitanao lahy Jehovah!”​—Sal. 104:24.