Manino lahilahy kaihy hoe “Nahoda” iny ro nivola fa “ho voa mafy” ie laha manambaly ani-Rota? (Rota 4:1, 6)

Tamy androni-Baiboly, laha nisy lahilahy manambaly ka nimaty tsy nanan’anaky, le misy fanontanea vitsivitsy retoa mila hay ty valiny: Hanao akory ty taniny? Tsy hisy handay sasy va ty anarany? Mamaly ani-fanontanea reo ty Lalànani-Mosesy.

Laha misy lahilahy manan-tany fe nimaty, le afaky nandova ani-tany iny ty rahalahiny na ty longony marìny azy. Na laha lasa nahantra ty lahilahy raiky ka namarotsy ty taniny, le afaky nanavotsy na nivily ani-tany iny ty rahalahiny na ty longony marìny azy. Mbo ho ani-fianakavia iny avao zany tany iny.​—Lev. 25:23-28; Nom. 27:8-11.

Ka manao akory ty ahazoa antoky fa tsy ho halino ty anarani-lahilahy nimaty iny? Nisy fandahara mikasiky fanambalea natao, araky ty hitantsika tamy tantarani-Rota. Nampanambalỳ ani-rahalahini-lahilahy nimaty iny ampela valiny iny, mba hiteraky aminy. Fe ho kaihy amy anarani-lahilahy nimaty iny ajà iny sady ajà iny ro handova ty hananany. Natao hikarakarà ty ampela maty valy fandahara feno fitiava io.​—Deot. 25:5-7; Mat. 22:23-28.

Mba diniho moa ty ohatsini-Naomy. Nanambaly ani-lahilahy atao hoe Elimeleka zay ie. Lafa nimaty valiny io noho anakilahin-drozy roe rey, le tsy nisy mpikarakara sasy ie. (Rota 1:1-5) Lafa nimpoly ta Joda any Naomy noho Rota, le nivola tamy vinantony io ie mba hiangavy ani-Boaza mba hanavotsy ani-tanin-drozy iny. Longoni-Elimeleka marìny Boaza io. (Rota 2:1, 19, 20; 3:1-4) Fe haini-Boaza fa mbo misy lahilahy raiky kaihini-Baiboly hoe “Nahoda” zay ro tena longon-dry Elimeleka marìny. Tsy maintsy niresaky tamy lahilahy io tse zany Boaza mba hahaiza hoe afaky hanavotsy va ie sa tsy afaky.​—Rota 3:9, 12, 13.

Parè hanampy tse “Nahoda” io tamy voalohany. (Rota 4:1-4) Hainy fa ho lany drala ie mba hiviliana ani-tany io, fe hainy koa fa tsy afaky hanan’anaky handova ani-tanini-Elimeleka iny sasy Naomy satria fa antitsy. Ho azoni-“Nahoda” io zany tany iny ka ho lasa fananany sady mety hampilitsy drala aminy.

Fe lasa tsy tapa-kevitsy hivily ani-tany iny Nahoda io lafa nihainy hoe tsy maintsy hanambaly ani-Rota ie. Hoy ty asany: “Tsy afaky manavotsy aho laha zay ie, tsy no ho zaho koa ro ho voa mafy.” (Rota 4:5, 6) Manino ie ro niova hevitsy?

Laha nalàni-Nahoda io na olo hafa valy Rota ka niteraky anakilahy, le ajà zay ro handova ty tanini-Elimeleka. Ka manino zany raha zay ro hoe ‘hahavoa mafy’ ani-Nahoda io? Tsy miresaky ani-zay ty Baiboly. Fe retoa misy antony vitsivitsy mety ho nahavy ani-zay.

• Voalohany, ho lany drala hiviliana ani-tanini-Elimeleka iny avao ie, kanefa tsy ho azy tany iny lafa afarafara any, fa ho lasani-anakilahini-Rota iny.

• Faharoe, lasa hiampy ty andraikitsiny satria hamelo noho hikarakara ani-Naomy noho Rota ie.

• Fahatelo, laha mbo miteraky amy Nahoda io ndraiky Rota, le hifampizara lova amy anakini-Nahoda io, ajà naterany tamy Rota reo.

• Fahaefatsy, laha tsy nanan’anaky Nahoda io, le mana zo handova ani-tanini-Elimeleka iny noho tanini-Nahoda io anakilahini-Rota iny. Ka laha maty amy zay ie, le ho lasa fananani-ajà iny ty taniny, kanefa ajà iny manday ty anarani-Elimeleka fa tsy manday ty anarany. Tsy nahafoy ty lovany Nahoda io mba hanampea ani-Naomy. Naleony mpanavotsy hafa ro handramby ani-andraikitsy zay, zany hoe Boaza satria ie ro nanarakaraky azy. Tsy nampanino ani-Boaza raha zay satria teany “tsy ho trobo anara ty maty sady tsy ho trobo lova.”​—Rota 4:10.

Hita hoe teani-Nahoda io ho tanjahy ho azy avao ty anarany noho ty lovany. Tea tena Nahoda io. Niezaky mafy ie mba tsy ho trobo ty anarany. Fe ndre zay le nitrobo anarany io satria tsy haintsika mihintsy henanizao hoe ia marina ie. Tsy nahazo ani-tombontsoa miavaky niazoni-Boaza iny koa ie. Lasa anisani-razambeni-Mesia, zany hoe Jesosy Kristy Boaza. Tea tena Nahoda io ka nampalahelo ty vokany satria tsy niparè hanampy olo nila fanampea ie!​—Mat. 1:5; Lioka 3:23, 32.