1-2. Manino iha ro tsy tokony ho kivy laha mbo tsy mahafeno fepetra hatao batisa? (Henteo sary amy fononi-gazety toy.)

 MIERITSERITSY hatao batisa va iha? Laha zay ie le tena soa ty raha kendrenao. Fa parè va iha amy zao? Laha hitanao hoe fa parè iha sady maneky koa ty anti-panahy, le ka misalasala hatao batisa lafa misy fomba azo anaova ani-zay amy manaraky. Maro ty fitahia ho azonao amy fanompoa ani-Jehovah lafa vita batisa iha.

² Fe manao akory laha nisy olo nivola taminao hoe mbo mila miezaky marerè iha laha ta hatao batisa? Na iha mihintsy ro mahatsapa ani-zay? Ka kivy laha zay ty tsapanao. Mbo afaky manao fandrosoa avao iha ndre tanora ndre fa be, sady tena ilà raha zay.

3. Ino ty raha nanontaneani-tandapa etiopianina iny ani-Filipo, le ino ty fanontanea mipetraky? (Asan’ny Apostoly 8:36, 38)

³ Vakio Asan’ny Apostoly 8:36, 38. Nanontany ani-Filipo tandapa etiopianina iny hoe: “Ino ty misaka ahy tsy hatao batisa?” Ta ho natao batisa lahilahy etiopianina iny, fe tena niparè va ie?

4. Akory ty nampisehoani-Etiopianina iny hoe mbo ta hianatsy avao ie?

⁴ ‘Nandeha a Jerosalema any lahilahy etiopianina io mba hivavaky.’ (Asa. 8:27) Olo niova ho amy Fivavaha Jiosy zany ie, zany hoe naneky hanaraky ty fivavahani-Jiosy. Azo antoky fa nahay raha maro mikasiky ani-Jehovah baka amy Soratsy Hebreo ao ie. Fe mbo ta hanohy hianatsy avao ie. Ino ty mampiseho ani-zay? Namaky ty bokini-Isaia mpaminany ie tamy fotoa nahitani-Filipo azy tan-dala eny iny. (Asa. 8:28) Tena fahamarina laliky raha nivakini-lahilahy io. Tsy nijano tamy fahamarina fototsy avao ie, fa mbo ta hianatsy avao.

5. Nataoni-lahilahy etiopianina iny akory ty raha nianarany?

⁵ Manam-pahefà tambany fahefàni-Kandasy Mpanjakavavini-Etiopia lahilahy io sady “niandraikitsy ty hananany iaby iaby.” (Asa. 8:27) Tsy maintsy nimaro raha atao zany ie sady nana andraikitsy maro. Fe ndre zay, le mbo nanoka fotoa hanompoa ani-Jehovah avao ie. Tsy hoe nianatsy fahamarina avao ie, fa nanoriky ty raha nianarany koa. Niala baka a Etiopia any mihintsy aza ie le nandeha amy tempoly a Jerosalema any mba hivavaky amy Jehovah. Tsy maintsy ho nandany fotoa noho drala lia io. Fe tsy nanaka ani-lahilahy io raha rezay satria ta hanompo ani-Jehovah ie.

6-7. Ino ty mampiseho fa nitombo ty fitiavani-lahilahy etiopianina iny ani-Jehovah?

⁶ Nianatsy fahamarina laliky vitsivitsy tamy Filipo lahilahy etiopianina io. Anatini-zay ty hoe Jesosy ro Mesia. (Asa. 8:34, 35) Azo antoky fa nifalifaly tandapa io lafa nahay hoe ino ty raha nataoni-Jesosy ho azy. Ino amy zay ty hataony? Fa niova ho amy fivavaha jiosy ie, le azony natao ty nijano amy zay avao. Fe nitombo ty fitiavany ani-Jehovah noho Anakilahiny iny. Farany ie nanapa-kevitsy hatao batisa, amy zay ho lasa mpanori-dia ani-Jesosy Kristy. Tena bevata fanapahan-kevitsy nataony zay. Lafa nihitani-Filipo hoe tena fa parè hatao batisa lahilahy iny, le nataony batisa.

⁷ Laha manoriky ty modely nengàni-lahilahy etiopianina io iha, le ho parè hatao batisa. Afaky hivola koa iha amy zay hoe: “Ino ty misaka ahy tsy hatao batisa?” Ndao hodinihintsika hoe akory ty azonao anahafa ani-raha nataoni-lahilahy etiopianina iny retoa: Nazoto nianatsy ie, nanoriky ty raha nianarany, sady niezaky nampitombo ty fitiavany a Ndranahary avao.

8. Ino ty raha tokony hataonao laha hentea ty Jaona 17:3?

⁸ Vakio Jaona 17:3. Nanampy anao hianatsy Baiboly va safàni-Jesosy reo? Maro amintsika ty mahatsapa ani-zay. Fe tsy hitanao koa va fa ilà ty mazoto mianatsy? Zay vatany. Tsy ho tampitsy mihintsy ‘ty raha hianarantsika mikasiky a Ndranahary marina iny.’ (Mpito. 3:11) Hianatsy mikasiky azy avao tsika mandrakizay. Le arakaraky ty ianarantsika mikasiky ani-Jehovah, le vomaiky tsika hifandramby marìny aminy.​—Sal. 73:28.

9. Ino ty raha mila ataontsika lafa baka nianatsy ty fampianara fototsy amy Baiboly ao tsika?

⁹ Tsy maintsy mianatsy ty fahamarina fototsy tse aloha tsika laha vo manomboky mianatsy mikasiky ani-Jehovah. Nikaihini-apostoly  Paoly hoe “raha fototsy” fampianara fototsy rey amy taratasy nisoratiny ho ani-Hebreo reo. Tsy ta hivola Paoly hoe tsy misy dikany “fampianara fototsy” rey. Nivola avao ie hoe sahala amy ronono fihanin’ajà io raha rey. (Heb. 5:12; 6:1) Nampirisiky ty Kristiana iaby koa ie mba tsy hijano amy fampianara fototsy rey avao, fa hianatsy ty fahamarina laliky amy Safà-Ndranahary ao. Fa nianatsy ani-fampianara laliky amy Baiboly ao rey va iha? Parè hampitombo ty raha hainao mikasiky ani-Jehovah noho ty raha teany hatao va iha?

10. Manino ro sarotsy amin’olo sisany ty mianatsy?

¹⁰ Mety sarotsy amy ankamaroantsika ty mianatsy. Ka manao akory iha? Tea namaky teny noho nazoto nianatsy va iha tan-dakilany any? Nahatsapa va iha hoe soasoa mianatsy zao? Sa lasa nihitanao hoe tsy de mety aminao ty mianatsy amy boky? Tsy iha raiky avao ty mahatsapa ani-zay. Fe ndre zay, le afaky manampy anao Jehovah. Lavorary ie sady Mpampianatsy tena mahay.

11. Akory ty ampisehoani-Jehovah hoe “Mpampianatsy Be Voninahitsy” ie?

¹¹ Mivola Jehovah hoe “Mpampianatsy Be Voninahitsy” ie. (Isaia 30:20, 21) Manam-pahareta ie, soa fanahy, sady mahay ty raha mahazo ty mpianatsiny. Mifantoky amy ze raha soa ataoni-mpianatsiny avao ie. (Sal. 130:3) Tsy mitaky raha tsy ho vitantsika koa ie. Tiarovo fa ie ro namoro ty atidohanao sady fanomeza miavaky raha io. (Sal. 139:14) Fa voajanahary amintsika ty hoe mianatsy. Teani-Mpamoro antsika iny hianatsy avao tsika mandrakizay sady ho falifaly lafa manao ani-zay. Hendry zany tsika laha mianatsy ty fahamarina “tsy misy fangarony” baka amy Baiboly ao avao henanizao. (1 Pet. 2:2) Manàna raha kendrè azonao tratsiry, le miezaha hamaky noho hianatsy Baiboly tsy tampaky. (Jos. 1:8) Hanampy anao Jehovah, ka ho teanao ty mamaky ty safàny noho hianatsy raha maro mikasiky azy.

12. Manino ro hendry tsika laha mianatsy ty fiainani-Jesosy noho ty fanompoany?

¹² Manokana fotoa tsy tampaky mba hametsevetsea ty fiainani-Jesosy noho ty fanompoany. Tena mila manoriky marìny ty liani-Jesosy tsika laha teantsika ty hanompo ani-Jehovah avao, sirtò amy andro sarotsy zao. (1 Pet. 2:21) Fa nivola tamy mpianatsiny rey Jesosy hoe hiatriky raha sarotsy rozy. (Lioka 14:27, 28) Fe natoky ie fa tsy hivaliky amy Ndranahary manahaky azy ty tena mpanori-dia azy. (Jaona 16:33) Ianaro amy an-tsipiriany zany ty fiainani-Jesosy, le anovo raha kendrè ty hanahaky azy amy fiainanao andavanandro.

13. Ino ty raha tokony angatahinao tsy tampaky amy Jehovah, le ino ty antony?

¹³ Tena ilà ty fahaiza satria manampy anao hahay ani-Jehovah, ho tea azy, noho hino azy. Fe tsy ampy ty hoe mana fahaiza avao. (1 Kor. 8:1-3) Mila mianatsy avao iha, le mangataky fanampea amy Jehovah mba hampitombo ty finoanao. (Lioka 17:5) Tena mamaly vavaky manahaky ani-zay ie. Mila mahay soa ani-Ndranaharintsika iny tsika laha ta hana finoa matanjaky noho ta handroso.​—Jak. 2:26.

14. Ino ty raha nivolanini-apostoly Petera ka ahità hoe tena mila manoriky ty raha ianarantsika tsika? (Henteo koa sary io.)

¹⁴ Nihamafisini-apostoly Petera hoe manino ty mpanori-dia ani-Kristy ro tena mila manoriky ty raha ianarany avao. Niresaky mikasiky ty tantarani-Noa ie tamy zay. Nivola tamy Noa Jehovah hoe handefa ranobe ie mba handripaha ty olo raty fanahy tamy fotoa zay. Haini-Noa noho ty fianakaviany zany  hoe hisy ranobe ho avy. Fe tsy ampy mba hahavotsy an-drozy ty fahaiza ani-zay. Henteo fa nivola ty raha niseho talohani-ranobe iny Petera, zany hoe “laha mbo namboary sambofiara iny.” (1 Pet. 3:20) Nanoriky ty raha nampianari-Ndranahary an-drozy zany ry Noa ka namboatsy sambofiara. (Heb. 11:7) Bakeo nampitovizini-Petera amy batisa ty raha nataoni-Noa, le hoy ty asany: “Misy mifanandrify amy zay koa amy zao, le ty batisa. Manavotsy anareo ty batisa.” (1 Pet. 3:21) Niasa mafy tanatini-tao maro ry Noa mba hanamboara ani-sambofiara iny. Azo ampitovizy amy raha nataon-drozy zay koa ty raha ataonao henanizao mba hiomana amy batisa. Ino ty raha mila ataonao mba hahavy anao hahafeno fepetra ho amy batisa?

15. Akory ty ampisehoantsika hoe tena mibebaky tsika?

¹⁵ Ty raha raiky voalohany tsy maintsy ataontsika, le hoe mibebaky amy ty fahotà ataontsika. (Asa. 2:37, 38) Miova tanteraky ty hoe tena mibebaky. Fa tsy manao ani-raha mampalahelo ani-Jehovah rey va iha, ohatsy hoe mijangajanga, mitroky sigara noho mihina paraky, na manao safà raty? (1 Kor. 6:9, 10; 2 Kor. 7:1; Efes. 4:29) Laha mbo manao ani-raha reo iha, le miezaha mafy mba hiova. Miresaha amin’olo mampianatsy Baiboly anao iny, na mangataha fanampea noho tari-dala amy anti-panahy anivoni-fiangona eo. Laha tanora iha sady mbo miaraky mipetraky amy ray aman-dreninao, le angataho rozy mba hanampy anao hiala amy fahazaran-draty mety misaka anao tsy hatao batisa.

16. Ino ty tokony ataontsika laha teantsika ty hanompo ani-Jehovah avao?

¹⁶ Tena soa koa laha mana fahazara soa amy lafiny ara-panahy tsika. Anatini-zay, ohatsy, ty fanatreha fivoria, fe tsy hoe mivory avao fa mandramby anjara koa. (Heb. 10:24, 25) Lafa mahafeno fepetra hitory koa iha, le miezaha manompo tsy tampaky. Laha mazoto mitory iha, le vomaiky hahita fifalea amy fanompoa. (2 Tim. 4:5) Laha tanora iha sady mbo miaraky mipetraky amy ray aman-dreninao, le eritsereto zao: ‘Mbo mila ampitiarovini-ray aman-dreniko va aho vo mivory na mitory? Sa zaho mihintsy ro mahatsapa hoe tokony hanao ani-raha reo?’ Laha tsy miamby fampitiarova baka amin’olo iha, le asehonao hoe  manam-pinoa iha sady tea ani-Jehovah noho mankasitraky ty raha nameany anao. Asehonao hoe ‘mahafoy tena ho a Ndranahary’ iha laha manome ani-reo ani-Jehovah. (2 Pet. 3:11; Heb. 13:15) Ho falifaly Ndranaharintsika iny laha ataontsika an-tsitrapo ze raha iaby ameantsika azy, fa tsy hoe forosè. (Ampitovizo amy 2 Korintianina 9:7.) Laha manao ani-reo tsika, le ho falifaly satria manome ze farani-soa ho ani-Jehovah.

17-18. Ino ty toetsy tena hanampy anao ho vita batisa, le ino ty antony? (Ohabolana 3:3-6)

¹⁷ Hiatriky raha sarotsy iha lafa mieritseritsy hatao batisa. Mety hikizakizaky anao, ohatsy, ty olo sisany na mety hanohitsy anao mihintsy aza. (2 Tim. 3:12) Mety fa miezaky mafy miala amy fahazaran-draty iha, fe mety mbo hanao ani-raha iny avao kindraiky. Na mety tsy hanam-pahareta iha na ho kamo satria atao raha mbo ela vo ho tratsinao ty raha kendrenao. Fe ino ty hanampy anao hiaritsy avao? Ty fitiava ani-Jehovah. Tena ilà toetsy io.

¹⁸ Ty fitiavanao ani-Jehovah ro anisani-toetsy farani-ze soa anananao. (Vakio Ohabolana 3:3-6.) Laha tena tea a Ndranahary iha le hahavita hiatriky raha sarotsy. Matetiky ty Baiboly mivola hoe tea ty mpanompony Jehovah sady tsy mivaliky amin-drozy. Asehoni-Jehovah hoe be fitiava noho tsy mivaliky ie, ka tsy engàny mihintsy ty mpanompony. (Sal. 100:5) Afaky mampiseho fitiava manahaky a Ndranahary koa iha satria natao mitovy soraky aminy. (Gen. 1:26) Akory ty ampisehoanao ani-zay?

19. Akory ty azonao ampisehoa fa ankasitrahanao ty raha nataoni-Jehovah ho anao? (Galatianina 2:20)

¹⁹ Miezaha hahay hankasitraky. (1 Tes. 5:18) Eritsereto avao zao sanandro: ‘Akory ty nampisehoani-Jehovah fa tea ahy ie?’ Lafa hitanao hoe nisy raha nataony ho anao, le ka halino ty misaotsy azy amy vavaky le anovo voafaritsy soa raha zay. Tiarovo fa kanao Jehovah manome raha soa ho anao, le satria tea anao ie. Nahatsapa ty fitiavani-Jehovah azy zao apostoly Paoly. (Vakio Galatianina 2:20.) Eritsereto zao: ‘Akory ty ampisehoako fa tea ani-Jehovah aho?’ Laha tea ani-Jehovah iha, le hahavita hanohitsy fakam-panahy noho hiaritsy lafa misy raha sarotsy. Ankoatsini-zay, laha tea ani-Babanao iny koa iha, le ho voatosiky hampiseho ani-zay aminy avao  sanandro ka tsy hanapatapaky ty fahazara ara-panahy anananao.

20. Ino ty tafilitsy amy hoe manokam-bata ho ani-Jehovah, le manino raha io ro fanapahan-kevitsy bevata?

²⁰ Lafa mandeha ty fotoa, le handrisiky anao hanao vavaky manoka amy Jehovah ty fitiavanao azy. Lasa hanoka ty vatanao ho a Ndranahary iha. Tiarovo fa lafa manoka ty vatanao ho ani-Jehovah iha, le afaky mitamà ani-raha miavaky toy: Ho lasa fananani-Jehovah mandrakizay iha. Lafa mivoady amy Jehovah iha, le mampitamà fa hanompo azy avao ndre amy mora ndre amy sarotsy. Tsy mila ampolimpoly voady nataonao io. Tena fanapahan-kevitsy bevata zany ty hoe manokam-bata. Mba eritsereto moa zao: Handramby fanapahan-kevitsy maro iha amy fiainanao, le misy amy raha rey tena soa. Fe ty fanokananao ty vatanao ho ani-Jehovah ro fanapahan-kevitsy farani-ze soa. (Sal. 50:14) Hataoni-Satana ze hampihena ty fitiavanao ani-Babanao iny, amy zay iha hivaliky aminy. Fe ka engà handresy mihintsy ie! (Joba 27:5) Laha tena tea ani-Jehovah iha le ho vitanao ty hitanjaky ani-voady nataonao iny ka hanompo azy mandrakizay iha. Vomaiky hifandramby marìny amy Babanao an-danitsy any iny koa iha.

21. Manino tsika ro afaky mivola fa vo fanombohani-fanompoantsika ani-Jehovah ty batisa fa tsy fiafarany?

²¹ Lafa baka nanokam-bata ho ani-Jehovah iha, le miresaha amy anti-panahy amy fiangonanareo eo mba hahafahanao manao ty dingana manaraky. Ka halino mihintsy fa vo fanombohani-fanompoantsika ani-Jehovah ty batisa fa tsy fiafarany. Manomboky eo le hanompo ani-Jehovah avao iha. Manomboky amy zao zany, le fa hatanjaho ty fitiavanao ani-Babanao iny. Mametraha raha kendrè, soa hitombo ty fitiavanao azy sanandro. Laha manao ani-zay iha, le ho voatosiky hatao batisa. Tena fotoa miavaky ho anao io. Fe vo fanombohany avao io. Enga anè ka hitombo avao ty fitiavanao ani-Jehovah noho Anakilahiny iny.