1-2. Ino matetiky ty raha miseho lafa misy olo atao batisa, le ino ty hodinihintsika amy lahatsoratsy toy ato?

 FA NANENTY olo atao batisa va iha? Alohani-hanaova batisa an-drozy le misy fanontanea roe tse apetraky amin-drozy. Lafa mamaly ani-fanontanea reo rozy, le renao amy ty feon-drozy hoe tena tapa-kevitsy hatao batisa rozy. Hitanao hoe tena falifaly ty fianakavian-drozy noho ty naman-drozy. Lafa aboaky baka anaty rano ao amy zay olo atao batisa rey, le maharè tehaky iha sady hitanao amy tarehin-drozy hoe falifaly rozy. Sankerinandro, le olo an’arivony ro manokam-bata ho ani-Jehovah noho atao batisa ka lasa Vavolombelony.

² Ka manao akory iha? Laha mieritseritsy hatao batisa iha, le anisani-olo tena miavaky amy tontolo raty toy eto satria “mila ani-Jehovah.” (Sal. 14:1, 2) Natao ho anao mihintsy lahatsoratsy toy ndre tanora iha ndre be tao. Ka manao akory laha fa vita batisa tsika? Mbo teantsika avao ty hanompo ani-Jehovah mandrakizay. Maro ty antony mahavy antsika maniry ani-zay, fe handiniky antony telo avao tsika.

3. Manino ty mpanomponi-Jehovah ro tea ty fahamarina noho tea raha mahity? (Salamo 119:128, 163)

³ Nandidy ty vahoakiny Jehovah mba ho ‘tea ty fahamarina.’ (Zak. 8:19) Nampirisiky ty mpanori-dia azy Jesosy mba hila ty fahamarina. (Mat. 5:6). Midika zay fa mila maniry hanao ze raha volani-Ndranahary hoe mahity noho soa ty olo raiky. Ka iha? Tea fahamarina noho raha mahity va iha? Azo antoky fa manao ani-zay iha. Halanao ty vandy noho ze raha tsy marina na raty. (Vakio Salamo 119:128, 163.) Manahaky ani-Satana azy mpanday ani-zao tontolo zao iny ty olo mavandy. (Jaona 8:44; 12:31) Anisani-raha kendreni-Satana ty handratiraty ty anara masini-Jehovah Ndranahary. Nanaparitaky vandy mikasiky  ani-Ndranaharintsika iny Satana nanomboky tamy fizizoa ta Edena tany iny. Nataony ze hahavy ty olo hieritseritsy hoe tea tena Jehovah sady tsy manao ty marina. Misy raha soa hoasany tokony ho an’olombelo fe tsy ameany an-drozy. (Gen. 3:1, 4, 5) Nisy vokany tamin’olo vandini-Satana io satria lasa nieritseritsy raha raty mikasiky ani-Jehovah ty olo. Ka lafa misy olo tsy ‘tea ty fahamarina’, le ataoni-Satana ze hahavy an-drozy hanao ze kila raha raty iaby zao.​—Rom. 1:25-31.

4. Akory ty nampisehoani-Jehovah hoe “Ndranaharini-fahamarina” ie? (Henteo koa sary io.)

⁴ “Ndranaharini-fahamarina” Jehovah sady tena teany ty mampianatsy ty fahamarina ho ani-ze olo tea azy. (Sal. 31:5) Manao ani-zay ie, mba hanampea an-drozy tsy ho voafitakini-Satana sasy. Ampianarini-Jehovah koa ty mpanompony mba hivola noho hanao ty marina. Vokany, lasa atokisan’olo rozy sady milamin-tsay. (Ohab. 13:5, 6) Zay vatany va ty nataony taminao tamy iha nianatsy Baiboly? Nianaranao hoe tena mahasoa ty olombelo iaby ty lala-Ndranahary sady mahasoa anao koa. (Sal. 77:13) Farany lasa ta hanao ze raha volani-Ndranahary hoe soa iha. (Mat. 6:33) Ta hiaro ty fahamarina iha sady teanao haseho hoe tsy marina ty raha nivolanini-Satana mikasiky ani-Jehovah Ndranaharintsika. Akory ty hanaovanao ani-zay?

5. Akory ty ampisehoanao hoe tea ty fahamarina noho tea raha mahity iha?

⁵ Afaky asehonao amy fomba fiainanao hoe manohitsy ty vandini-Satana iha sady manoha ty fahamarina. Afaky asehonao hoe Jehovah ro teanao ho Mpanjakanao sady teanao ty hanao ze raha volaniny hoe soa. Akory ty hanaovanao ani-zay? Mivavaha amy Jehovah, le resaho aminy fa ta hanompo azy mandrakizay iha. Bakeo asehò amin’olo maro fanapahan-kevitsinao zay amy alalani-batisa. Laha tea ty fahamarina noho tea raha mahity iha, le zay ro tena handrisiky anao hatao batisa.

6. Ino ty raha volanini-​Salamo 45:4 ka mahavy anao ho tea ani-Jesosy Kristy?

⁶ Manino iha ro tea ani-Jesosy Kristy? Henteo moa fa miresaky antony vitsivitsy ty Salamo 45:4. (Vakio.) Tea ty fahamarina ie, miambany, noho tea raha mahity. Laha tea ty fahamarina noho tea raha mahity iha, le midika zay hoe teanao koa Jesosy Kristy. Diniho hoe akory ty nampisehoani-Jesosy fa  tsy navaka ie lafa niaro ty fahamarina noho ty fahitia. (Jaona 18:37) Fe nampianarini-Jesosy antsika koa hoe ilà ty miambany. Akory ty nanaovany ani-zay?

7. Ino ty raha hitanao hoe mampiavaky ty fiambaneani-Jesosy?

⁷ Nasehoni-Jesosy tamy ty raha nataony hoe niambany ie. Tsy ty vatany, ohatsy, ro nameany voninahitsy fa Babany raiky avao. (Mar. 10:17, 18; Jaona 5:19) Ino ty tsapanao lafa hainao hoe niambany Jesosy? Tsy mandrisiky anao ho tea ani-Anakilahi-Ndranahary iny noho hanori-dia azy va raha zay? Azo antoky fa ta hanao ani-zay iha. Fa manino Jesosy ro niambany? Satria tea ani-Babany ie sady ta hiambany manahaky azy. (Sal. 18:35; Heb. 1:3) Tena nanahaky ty toetsini-Jehovah Jesosy. Tsy mahavy anao ta hamonjy azy va raha zay?

8. Manino Jesosy ro teantsika ho Mpanjakantsika?

⁸ Teantsika ho Mpanjakantsika Jesosy satria tsy misy Mpitondra manahaky azy. Jehovah mihintsy ro nampianatsy ani-Anakilahiny io noho nanendry azy ho mpanjaka. (Isaia 50:4, 5) Diniho koa ty raha nataoni-Jesosy. Be fitiava ie sady nahafoy ty vatany. (Jaona 13:1) Jesosy ro Mpanjakanao ka tena maeva hotiavinao ie. Nivola ie fa kaihiny hoe namany ze olo tena tea azy ka mampiseho ani-zay amy fanoriha ty didiny. (Jaona 14:15; 15:14, 15) Tena tombontsoa bevata ty hoe namani-Anakilahini-Jehovah iny!

9. Ino ty mampitovy ty batisani-Kristiana amy ty batisani-Kristy?

⁹ Anisani-raha nandidiani-Jesosy ty mpanori-dia azy ty hoe atao batisa. (Mat. 28:19, 20) Nanome modely amy raha zay ie. Misy raha sisany tsy mampitovy ty batisany amy ty batisani-mpanori-dia azy. (Henteo ty efajoro hoe “ Ino ty Tsy Mampitovy ty Batisani-Jesosy amy ty Batisani-Mpanori-dia Azy?”) Fe misy raha itovizany koa. Lafa natao batisa Jesosy, le nasehony hoe ta hanao ty sitraponi-Babany ie. (Heb. 10:7) Manahaky ani-zay koa ty mpanori-dia ani-Kristy. Lafa atao batisa rozy, le asehon-drozy amin’olo maro hoe nanoka ty vatan-drozy ho ani-Jehovah Ndranahary rozy. Manomboky eo amy zay, le tsy sitrapon-drozy sasy ro vatan-draha amin-drozy fa ty fanaova ty sitrapo-Ndranahary. Hita hoe manahaky ty modelini-Tompon-drozy iny vatany rozy.

10. Ino ty antony mahavy anao tea ani-Jesosy, le tokony handrisiky anao hanao ino raha zay?

¹⁰ Mino iha fa Jesosy ro Anaky lahitokani-Jehovah, le falifaly iha satria ie ro nitendreny ho Mpanjakantsika. Hainao fa niambany Jesosy sady tena nanahaky ani-Babany. Nianaranao fa nanome hany ho an’olo mosarè ie, nampahery ty kivy, noho nitaha ze narary. (Mat. 14:14-21) Nihitanao ty fomba itarihany ty fiangonany henanizao. (Mat. 23:10) Hainao koa fa handay raha soa maro ho antsika ie amy hoavy satria Mpanjakani-Fanjakà-Ndranahary. Akory ty ampisehoanao hoe teanao ie? Manao ani-zay iha laha manahaky ty modeliny. (Jaona 14:21) Anisani-raha raiky mila ataonao ty hoe manoka ty vatanao ho ani-Jehovah noho atao batisa.

11. Ino ty antony bevata tokony hanosiky anao hatao batisa, le manino iha ro mivola ani-zay?

¹¹ Ino ty antony bevata tokony hanosiky anao hatao batisa? Nisy didy farani-ze bevata zay nivolanini-Jesosy. Hoy ty asany: “Tiavo Jehovah Ndranaharinao amy ty fonao iaby noho ty vatanao iaby noho ty sainao iaby voho ty herinao iaby.” (Mar. 12:30) Manahaky ani-zay vatany va ty fitiavanao a Ndranahary?

12. Manino iha ro tea ani-Jehovah? (Henteo koa sary io.)

¹² Maro ty antony tokony hahavy antsika ho tea ani-Jehovah. Lasa nihainao, ohatsy, hoe ie ro “loharanoni-ay” sady baka aminy “ty fanomeza  soa iaby noho ty fanomeza tsy misy handrany iaby.” (Sal. 36:9; Jak. 1:17) Baka amy Ndranaharintsika be fitiava iny ze raha soa iaby anananao.

13. Manino ty vilim-panavota ro fanomeza tena soa?

¹³ Ty vilim-panavota ro anisani-fanomeza tena soa nameani-Jehovah antsika. Manino tsika ro mivola ani-zay? Eritsereto hoe nanao akory ty fifandrambesani-Jehovah noho Anakilahiny io. Nivola Jesosy hoe: “Tea ahy Baba”, le ‘zaho koa tea azy.’ (Jaona 10:17; 14:31) Fa an’arivony tapitrisa tao ty niarahan-drozy nipetraky ka vomaiky rozy tena nifankatea. (Ohab. 8:22, 23, 30) Mba eritsereto amy zay hoe nanao akory Ndranahary lafa nengàny hijalijaly noho ho maty Anakilahiny iny. Azo antoky fa tena nalahelo biby ie. Tena teani-Jehovah ty olombelo iaby, le anatini-zay koa iha. Zay ro nahavy azy parè hanome ani-Anakilahiny iny mba hatao soro mba hahavy anao noho ty olo hafa hiay mandrakizay. (Jaona 3:16; Gal. 2:20) Io ro antony bevata mahavy antsika tea a Ndranahary.

14. Ino ty raha tena soa azonao atao raha kendrè amy fiainanao?

¹⁴ Lasa nitombo ty fitiavanao ani-Jehovah satria nahay raha maro mikasiky azy iha. Azo antoky fa ta hifandramby marìny aminy iha, le tsy hoe henanizao avao, fa ho mandrakizay mihintsy. Tena ho vitanao ty hanao ani-zay.  Soa fanahy ie ka mampirisiky anao mba hanao raha mampifalifaly ty fony. (Ohab. 23:15, 16) Tsy hoe amy ty raha volaninao avao ty anaovanao ani-zay fa amy raha ataonao koa. Ho hita amy fomba fiainanao amy zay hoe tena teanao Jehovah. (1 Jaona 5:3) Zay ty raha tena soa azonao atao raha kendrè amy fiainanao.

15. Akory ty ampisehoanao hoe teanao Jehovah?

¹⁵ Akory ty ampisehoanao hoe teanao Jehovah? Voalohany, manaova vavaky mitoka le resaho amy Ndranahary marina iny hoe hatokanao ho azy raiky avao ty vatanao. (Sal. 40:8) Bakeo atao batisa iha mba hampisehoanao amin’olo maro hoe nanokam-bata ho a Ndranahary iha. Niresahintsika taloha eroy hoe anisani-raha tena mahafalifaly noho miavaky amy fiainanao ty batisanao. Manomboky fiaina vaovao amy zay iha, zany hoe tsy manao ty sitraponao sasy, fa manao ty sitraponi-Jehovah. (Rom. 14:8; 1 Pet. 4:1, 2) Mety tsy ho mora aloha ty hanao ani-zay fa mitaky ezaky bevata. Fe zay ro hanampy anao hana fiaina tena soa. Amy fomba akory?

16. Ino ty raha volanini-​Salamo 41:12 fa hataoni-Jehovah amy ze olo manompo azy?

¹⁶ Tena matariky Jehovah. Ndre be ndre kely ty raha nafoinao ho azy, le tozoro hanome mandilatsy ani-raha nafoinao iny avao ie. (Mar. 10:29, 30) Laha manoka ty fiainanao hanompoa ani-Jehovah iha, le hameany raha tena soa. Hataony koa ze hahavy anao hana fiaina soa ndre mbo miay amy tontolo raty toy eto aza iha. Fe vo fanombohany avao zay. Tsy tampitsy amy batisanao eo ty lala ombanao fa mbo mitohy. Afaky hanompo ani-Baba teanao iny mandrakizay iha. Tsy hihena mihintsy ty fifankatiavanareo fa vomaiky hitombo avao, sady ho velo mandrakizay manahaky azy koa iha.​—Vakio Salamo 41:12.

17. Ino ty raha mbo tsy nananani-Jehovah ka azonao amea azy?

¹⁷ Lafa iha manoka ty vatanao ho a Ndranahary noho atao batisa, le mana fahafaha hanome raha tena lafovily ho ani-Babanao iny. Nameany raha soa maro iha, raha mbo tsy nihitanao tamy fiainanao mihintsy. Ka ino zany ty azonao amea azy? Afaky manome raha  mbo tsy nananani-Azy Tomponi-lanitsy noho ty tany iny iha. Tsy ino zay fa ty fanokananao ty fiainanao mba hanompoa azy. (Joba 1:8; 41:11; Ohab. 27:11) Zay ro fomba fiaina tena soa azonao ampiasà ty fiainanao! Azo antoky fa ty fitiavanao ani-Jehovah ro tena tokony handrisiky anao hatao batisa.

18. Ino ty fanontanea azonao eritserety?

¹⁸ Akory amy zay ty hamaleanao ani-fanontanea toy: Hatao batisa va iha? Tsy misy olo afaky mamaly ani-zay laha tsy iha raiky avao. Fe mety hanampy anao laha manontany ty vatanao iha hoe: ‘Ino ty misaka ahy tsy hatao batisa?’ (Asa. 8:36) Tiarovo antony telo nidinihintsika tato rey. Voalohany, tea ty fahamarina noho tea raha mahity iha. Eritsereto zao: ‘Teako ho hita va ndraiky andro any hoe miresaky ty fahamarina noho manao raha mahity ty olo iaby?’ Faharoe, tea ani-Jesosy Kristy iha. Eritsereto zao: ‘Teako ho Mpanjakako va Anakilahi-Ndranahary iny? Teako va ty hanahaky ty modeliny?’ Fahatelo, sady tena bevata, tea ani-Jehovah iha. Eritsereto zao: ‘Teako va ty hanao raha mahafalifaly ty foni-Jehovah ka hanompo azy aho?’ Laha eka ty navalinao ani-fanontanea reo, ino ty misaka anao tsy hatao batisa henanizao?​—Asa. 16:33.

19. Manino iha ro tsy tokony hisalasala hatao batisa? Manomeza ohatsy. (Jaona 4:34)

¹⁹ Laha misalasala hatao batisa iha le eritsereto fanohara raiky niresahini-Jesosy iny. (Vakio Jaona 4:34.) Henteo fa nampitovizini-Jesosy tamy sakafo ty fanaova ty sitraponi-Babany. Ino ty antony? Satria mahasoa antsika ty sakafo. Haini-Jesosy fa mahasoa antsika koa ty raha iaby ampanaovini-Jehovah antsika. Tsy mampanao raha mety hanimba antsika mihintsy Jehovah. Ka ino ty raha teani-Jehovah hataonao? Teany hatao batisa iha. (Asa. 2:38) Afaky matoky zany iha fa tena hahasoa anao ty fanoriha ty didy hoe atao batisa. Laha iha tsy misalasala hihina ty hany farani-ze teanao, manino iha ro misalasala hatao batisa?

20. Ino ty hodinihintsika amy lahatsoratsy manaraky ao?

²⁰ Manino ty olo sisany ro mbo tsy atao batisa? Mety maro ty hanao ani-zao hoe: “Mbo tsy parè aho.” Fa manino? Satria anisani-fanapahan-kevitsy bevata ty hoe hanokam-bata ho ani-Jehovah noho hatao batisa. Mila mandiniky soa zany iha vo mandramby fanapahan-kevitsy, sady mitaky fotoa noho ezaky bevata raha zay mba hahavy anao hahafeno fepetra ho amy batisa. Fe laha fa maniry hatao batisa iha, ino ty azonao atao henanizao mba hiomana amy raha zay? Hodinihintsika amy lahatsoratsy manaraky ao ty valini-fanontanea zay.