LAHATSORATSY FIANARA 21
HIRA 107 Tahafo ny Fitiavan’Andriamanitra
Akory ty Hahitanao Olo Mety Aminao?
“Ia ro nahita valy soa? Lafovily marè mandilatsy ty vatohara ty ampela manahaky ani-zay.”—OHAB. 31:10.
INO TY HIANARA ATO?
Hiresaky torolalan’ny Baiboly afaky manampy ty olo raiky hahita valy mety aminy noho ty raha azon’olo hafa amy fiangona eo atao mba hanampea ty mpitovo ta hanambaly.
1-2. a) Ino ty raha tokony hodinihin’ny Kristiana mpitovo alohan’ny hampiarahany amin’olo raiky? b) Ino ty atao hoe mampiaraky? (Henteo ty fanamariha ambany pejy.)
TA HANAMBALY va iha? Marina aloha hoe tsy voatery manambaly ty olo raiky vo ho sambatsy. Fe maro ty Kristiana mpitovo ta hanambaly, ndre tanora zay ndre fa zokinjokiny. Alohan’ny hiarahanao amin’olo raiky, le tokony ataonao azo antoky hoe mifandramby soa amy Jehovah iha, sady fa matotsy. Tokony ataonao azo antoky koa hoe parè iha lafa misy raha ilà drala amy tokantranonao ao. a (1 Kor. 7:36) Laha manao ani-zay iha, le ho sambatsy ty tokantranonao.
2 Fe tsy mora ty hahita olo mety soa aminao. (Ohab. 31:10) Ndre atao hoe fa mahita olo teanao aza iha, le mety ho sarotsy aminao ty hampiaraky aminy. b Ino ty hanampy ty Kristiana mpitovo hahita olo mety aminy noho hampiaraky amin’olo io? Akory ty azon’olo amy fiangona eo anampea ani-ze ta hanambaly? Handiniky ani-reo tsika ato.
INO TY HANAMPY ANAO HAHITA OLO METY AMINAO?
3. Ino ty raha tokony hodinihin’ny Kristiana mpitovo lafa ie hila olo ho valiny?
3 Laha ta hanambaly iha, le soa kokoa laha hainao hoe ino ty toetsy teanao hananan’olo raiky teanao ho valỳ, alohan’ny hiarahanao aminy. Laha tsy zay, le mety tsy ho dareanao hoe olo manao akory ro tena mety aminao, na mety hiaraky amin’olo tsy tena mety aminao iha. Mazava ho azy fa tokony ho Kristiana vita batisa ty olo ho valinao. (1 Kor. 7:39) Fe tsy midika zay hoe ho valy soa ho anao iaby lafa kila olo vita batisa. Eritsereto zany zao: ‘Ino ty raha kendreko amy fiaina? Ino ty toetsy teako hananani-ze olo ho valiko? Tsy no mila olo lavorary aho laha manao ani-zay?’
4. Ino ty raha resahin’olo sisany amy vavaky lafa ie mila olo ho valiny?
4 Laha ta hanambaly iha le azo antoky hoe fa nivavaky mikasiky ani-zay. (Fil. 4:6) Mazava ho azy fa tsy mampitamà ndre ia ndre ia Jehovah hoe ie ro hanome valy azy. Fe hainy soa ty raha ilànao noho ty raha tsapanao. Afaky manampy anao koa ie lafa iha mila olo ho valỳ. Resaho aminy avao zany ty fanirianao noho ty raha tsapanao. (Sal. 62:8) Mivavaha mba hanam-pahareta noho hana fahendrea. (Jak. 1:5) Ho zao ty raha resahin’i John, c rahalahy mpitovo mipetraky a Etazinỳ any lafa ie mivavaky: “Resahiko amy Jehovah ty toetsy teako hananani-ze olo ho valiko. Mivavaky aho mba hahita fomba hifankahitako amy ze olo tena mety amiko. Mivavaky amy Jehovah koa aho mba hanampy ahy hana ani-ze toetsy hanampy ahy ho valy soa.” Ho zao ty volanin’i Tanya, ranabavy mipetraky a Sri Lanka any: “Sady manentinenty ze olo ho valiko aho ro mivavaky amy Jehovah mba hanampy ahy tsy hivaliky aminy avao, hifantoky amy raha soa avao, noho ho falifaly avao.” Mety fa mandeha ty fotoa fe mbo tsy mahita olo mety aminao avao iha. Mety ho lasa eritseritsy amy zay iha hoe manao akory avao zaho toy. Laha zay ty raha mahazo anao, le mampitamà Jehovah fa hanome ze raha ilànao avao ie, ndre ara-bata zay ndre ara-pihetseham-po.—Sal. 55:22.
5. Lafa manao akory ty Kristiana mpitovo ro mety hifankahita amin’olo tea an’i Jehovah? (1 Korintianina 15:58) (Henteo koa sary io.)
5 Mampirisiky antsika ty Baiboly mba hiezaky “ho be atao avao amy asan’ny Tompo.” (Vakio 1 Korintianina 15:58.) Laha miezaky ho be atao avao amy fanompoa an’i Jehovah iha sady manoka fotoa hiaraha amy rahalahy noho anabavy sankarazany, le tsy hoe hahazo fampahereza avao, fa mety hahita Kristiana mpitovo manahaky anao koa, sady mifantoky amy fanompoa an’i Jehovah. Laha manao ze fara herinao iha mba hampifalifalea an’i Jehovah, le ho sambatsy biby.
Laha miezaky ho be atao amy fanompoa an’i Jehovah iha sady manoka fotoa hiaraha amy Kristiana sankarazany, le mety hifankahita amin’olo ta hanambaly (Fehintsoratsy 5)
6. Ino ty tokony hotiarovin’ny Kristiana mpitovo lafa ie mila valy?
6 Fe zao: Mitandrema mba tsy ho tandrena amy filà valy ka lasa zay koa ro vatan-draha marè aminao. (Fil. 1:10) Tsy mianky amy hoe manambaly iha na tsy mana ro tena hahasambatsy anao, fa mianky amy fifandrambesanao amy Jehovah. (Mat. 5:3) Sady mety ho afaky hampitombo ty fanompoanao koa iha satria mbo tsy manambaly. (1 Kor. 7:32, 33) Hararaoto soa zany ty fotoa. Fa ho 40 tao eo Jessica, ranabavy mipetraky a Etazinỳ any vo nanambaly, le zao ty nivolaniny: “Niezaky ho be atao tamy fanompoa avao aho tamy zaho mbo tsy nanambaly, le zay ro nanampy ahy ho afa-po noho falifaly ndre ta hanambaly aza aho.”
DINIHO ELAELA OLO INY
7. Manino ro hendry iha laha miezaky hahay kokoa ty olo raiky alohan’ny hivolanano aminy hoe teanao ie? (Ohabolana 13:16)
7 Manao akory laha hitanao hoe iano iny ro mety ho valy soa ho anao? Tokony avy le resahinao va ie hoe teanao? Mivola ty Baiboly fa miezaky hahay ty raha iaby ty olo hendry, zay vo manao raha. (Vakio Ohabolana 13:16.) Hendry zany iha laha miezaky hahay kokoa an’ny olo iny zay vo resahinao aminy hoe teanao ie. Hoy Adrian, rahalahy mipetraky a Holandy any: “Mora mitombo ty fihetseham-po fe tsielatsiela avao koa le fa manjavo. Ka laha iha manoka fotoa elaela mba handiniha olo raiky, le tsy taitairin’ny fihetseham-po avao iha lafa hiaraky aminy.” Sady zao koa, laha iha miezaky hahay kokoa olo raiky, le mety ho hitanao hoe tsy mety aminao ie.
8. Ino ty azon’ny Kristiana mpitovo atao lafa ie mandiniky ty olo raiky teany ho valỳ? (Henteo koa sary io.)
8 Akory ty ahafahanao mandiniky ty olo raiky fe tsy voatery ho hainy? Mety hahavoamariky raha mikasiky azy iha lafa am-pivoria any na amy fiaraha-mikorana rey, ohatsy hoe ty ara-panahiny, ty toetsiny, noho ty fandaisam-batany. Mety ho hainao koa hoe ia ty namany, le ino ty raha resahiny. (Lioka 6:45) Mitovy amy ty ahinao va ty raha kendreny? Afaky miresaky amy anti-panahy amy fiangona misy azy iha na miresaky amy Kristiana matotsy hafa, tena mahay azy soa. (Ohab. 20:18) Azonao atao ty manontany hoe manao akory ty lazan’olo iny noho ty toetsiny. (Rota 2:11) Fe lafa mandiniky azy iha, le ka atao ze hahaizany hoe mandiniky azy iha. Hajao ty fihetseham-pony noho ty raha mahakasiky azy manoka. Tsy mety koa laha orihinao mbaombao ze misy azy na arahinao maso ze raha ataony.
Diniho soa tse ty olo raiky alohan’ny hivolananao aminy hoe teanao ie (Fehintsoratsy 7-8)
9. Tokony ho resy lahatsy amy ino iha alohan’ny hiresahanao amin’olo raiky teanao ho valỳ?
9 Zisiky ombia iha ro tokony handiniky ty olo raiky zay vo hovolaninao hoe teanao ie? Laha tsy mandiny elaela iha fa avy le miresaky aminy, le mety hieritseritsy ie hoe taitaitsy avao iha fa tsy mandiniky soa. (Ohab. 29:20) Ka manao akory laha mandiny ela marè koa iha vo miresaky aminy hoe teanao ie? Mety hieritseritsy ie hoe tsy de tena tea azy iha fa nisalasala marè zay vo niresaky aminy. (Mpito. 11:4) Tiarovo fa lafa iha hiresaky amin’olo raiky, le tsy tokony hieritseritsy hoe tsy maintsy ho lasanao ie. Fe tokony ho resy lahatsy iha hoe fa parè hanambaly sady mety ho valy soa ho anao olo io.
10. Ino ty tokony hataonao laha arakarakinao hoe misy olo tea anao kanefa tsy teanao?
10 Fe manao akory laha arakarakinao hoe misy olo tea anao? Laha tsy tea azy iha, le asehò amy ty raha ataonao noho ty fihetsikinao hoe tsy ta hiaraky aminy iha. Tsy mety laha ataonao ze hahavy azy hieritseritsy hoe mety hisy fanantenà avao ty aminareo, kanefa iha tsy maniry hiaraky aminy mihintsy.—1 Kor. 10:24; Efes. 4:25.
11. Ino ty raha tokony hodinihinao soa laha iha ro manampy olo roe hiaraky na hifanambaly?
11 Amy tany sisany, le ty ray aman-dreny na olobe hafa ro mifily valy ho an’ny longony mbo tsy manambaly. Amy tany hafa koa, le ty fianakavia na ty nama ro mila valy ho an’olo mbo tsy manambaly, le ataon-drozy ze hifankahitan’olo reo amy zay ho hitan-drozy laha tena mifankatea rozy. Laha iha ro asà hanao ze hahavy ty lahilahy raiky noho ampela raiky hiaraky na hifanambaly, le diniho hoe ino ty raha tean-drozy roe noho ilàn-drozy. Laha hitanao hoe mety ho valy soa amy namanao na longonao iny olo iny, le miezaha hahay azy soa. Anovo hay ty toetsiny, fa ty tena vatan-draha, diniho laha mifandramby soa amy Jehovah ie. Mbo vatan-draha mandilatsy ty drala, fianara, na fari-piaina ty hoe mifandramby soa amy Jehovah. Fe tiarovo fa rahalahy noho anabavy iny ro tokony hanapa-kevitsy farany hoe hifanambaly va rozy sa tsy hifanambaly.—Gal. 6:5.
AKORY AMY ZAY TY HIVOLANANAO AMINY HOE TEANAO IE?
12. Akory ty hivolananao amin’olo raiky hoe ta hiaraky aminy iha?
12 Laha iha ta hampiaraky amin’olo raiky, akory ty hivolananao aminy hoe tea azy iha? d Azonao atao ty mandamy fotoa mba hiresahanao aminy, ndre amy pilasy maro olo zay na an-telefony. Volano aminy mazava soa hoe teanao ie. (1 Kor. 14:9) Laha mety, le volano ie hoe afaky mieritseritsy tse ie fa tsy voatery mamaly eo noho eo. (Ohab. 15:28) Ka manao akory laha mivola ie hoe tsy tea anao ie? Laha zay ie, le hajao ty fihetseham-pony.
13. Ino ty azonao atao laha misy mivola aminao hoe tea anao ie? (Kolosianina 4:6)
13 Manao akory laha misy olo mivola aminao hoe teany iha? Mazava ho azy fa nisiky herim-po ie vo nahavita nivola ani-zay taminao, ka miezaha ho soa fanahy noho hanaja azy. (Vakio Kolosianina 4:6.) Laha mbo handiniky iha le volano aminy raha zay. Fe ka atao ela laha mbo azo atao. (Ohab. 13:12) Laha tsy teanao ie, le resaho aminy moramora raha zay sady anovo mazava soa. Henteo moa hoe akory ty navalin’i Hans, rahalahy mipetraky an’Ostralỳ any lafa nivola taminy ranabavy raiky zay hoe tea azy. Hoy ty asany: “Nisoa fanahy aho lafa nivola ty fanapahan-kevitsiko, fe tsy niviombio aho lafa nivola ani-zay. Avy le nanao ani-zay aho satria tsy teako hieritseritsy ie hoe mbo haneky avao aho ndraiky andro any. Lafa niresahiko ani-zay ie, le nitandrina soa aho mba tsy ho hitany amy raha volaniko na ty fihetsikiko hoe mbo hiova hevitsy aho.” Fe laha teanao ie le resaho aminy raha zay. Resaho koa ie hoe ino ty raha teanao hatao lafa miaraky nareo. Mety tsy hitovy amy ty azy raha zay, arakaraky ty kolontsainareo na misy antony hafa.
AKORY TY AZON’OLO HAFA ANAMPEA TY KRISTIANA MPITOVO?
14. Akory ty azontsika ampahereza noho anampea ty Kristiana mpitovo?
14 Akory ty azontsika iaby ampahereza noho anampea ani-ze Kristiana maniry hanambaly? Manao ani-zay tsika laha mitandrina soa ty raha volanintsika. (Efes. 4:29) Afaky mieritseritsy tsika hoe: ‘Manao somonga sary leha amy azy ta hanambaly rey va aho? Laha mahita rahalahy mpitovo noho anabavy mpitovo miresaky aho, avy le mieritseritsy va aho hoe mifankatea rozy?’ (1 Tim. 5:13) Ankoatsini-zay, tsy tokony hataontsika mihintsy ze hahavy ty Kristiana mpitovo hahatsapa hoe misy raha manky aminy ao satria hoe tsy manambaly ie. Hoy Hans, azy niresahintsika taloha teo iny: “Misy mpiara-manompo mivola an-tena hoe: ‘Manino iha tsy manambaly io? Iha anè fa tsy ajà sasy.’ Vokatsini-zay, le lasa mahatsapa amy zay tena hoe tsy misy mankasitraky, sady vomaiky mety hahavy an-tena hahatsapa raha zay hoe mila manambaly tena.” Tena soa zany laha mila fomba tsika mba hiderà an’ny Kristiana mpitovo rey!—1 Tes. 5:11.
15. a) Laha hentea ty torolala amy Romanina 15:2 ao, ino ty tokony hodinihintsika alohan’ny hanampea olo hila valy? (Henteo koa sary io.) b) Ino ty raha bevata nianaranao baka amy video io? (Henteo koa ty fanamariha ambany pejy.)
15 Manao akory laha mieritseritsy tsika hoe atao raha ho soa laha iano noho iano ro mpivaly? Mivola ty Baiboly fa tokony hieritseritsy ty fihetseham-pon’olo hafa tsika. (Vakio Romanina 15:2.) Tsy tean’ny ankamaroan’ny mpitovo laha misy olo hafa mampirisiky azy hiaraky amin’olo, ka tokony hohajàntsika raha zay. (2 Tes. 3:11) Mety hisy avao aloha hoe teany laha misy olo manampy azy, fe tsy tokony hilitsilitsy avao tsika laha tsy hoe ie mihintsy ro nivola antsika. e (Ohab. 3:27) Tean’ny Kristiana mpitovo sisany zao laha tsy avy le ampirisihy hiaraky amin’olo ie. Hoy Lydia, ranabavy mpitovo mipetraky an’Alemaigny any: “Azonao asà miaraky amin’olo maromaro ranadahy noho rahavavy iny. Anovo avao ze hifankahitan-drozy, fa engao rozy ro hanapa-kevitsy amy ze hataon-drozy.”
Mety hahita olo mety aminy ty Kristiana mpitovo laha miaraky amin’olo maromaro (Fehintsoratsy 15)
16. Ino ty tokony hotiarovin’ny Kristiana mpitovo?
16 Afaky ho sambatsy noho hankafỳ fiaina tsika, ndre mpitovo ndre manambaly! (Sal. 128:1) Ka laha ta hanambaly iha fe mbo tsy mahita, le miezaha hifantoky amy fanompoanao an’i Jehovah avao. Hoy Sonya, ranabavy mipetraky a Macao any: “Tena kelikely ty fotoa ijanonanao ho mpitovo laha ampitovizy amy ty fotoa mety hiarahanao amy valinao amy Paradisa any. Ankafizo zany fotoa io sady hararaoto soa.” Fe manao akory laha fa nahita olo mety aminao iha le fa manomboky mampiaraky nareo? Akory ty hahavy anareo hanao raha amim-pahendrea avao? Handiniky ani-zay tsika amy lahatsoratsy manaraky ao.
HIRA 137 Vehivavy Manam-pinoana sy Tsy Mivadika
a Henteo amy jw.org ao ty lahatsoratsy hoe “Mampiaraka—Fizarana 1: Efa Afaka Mampiaraka ve Aho?”, mba hahaizanao laha fa parè hanambaly iha.
b Miresaky ty fotoa iarahan’ny lahilahy raiky noho ampela raiky mba hahavy an-drozy hifankahay soa lahatsoratsy toy noho azy manaraky io. Ho hitan-drozy amy zay laha ho afaky hifanambaly rozy. Manomboky miaraky ty lahilahy raiky noho ampela raiky lafa samby nifaneky hoe mifankatea rozy, le mitohy avao raha zay zisiky hanapahan-drozy hevitsy hoe hifanambaly rozy na hajano ty fiarahan-drozy. Io amy zay ro kaihy hoe fiaraha alohan’ny fanambalea na mampiaraky.
c Novà ty anara sisany.
d Amy kolontsay sisany, le ty rahalahy matetiky ro mivola amy ty ranabavy hoe ta hiaraky aminy. Fe mety ho soa koa laha ty ranabavy ro manao dingana mba hiresaha amy rahalahy. (Rota 3:1-13) Laha mila fanazavà misimisy kokoa, le henteo amy Mifohaza! 8 Novambra 2004, ty lahatsoratsy hoe “Manontany ny Tanora hoe ... Tokony Holazaiko Aminy ve fa Tiako Izy?”
e Henteo amy jw.org ao ty video hoe Mpialy Mahavita Miaro ty Finoany: Ty Olo Tsy Manambaly.
