1. Ino ty nianarantsika tamy fivoria fatao santao tamy 2023 iny?

 TENA niavaky ty fivoria fatao santao tamy 2023 iny! a Nahazo fanazavà vaovao mikasiky ty raha inoantsika sisany tsika tamin’iny sady naharè fampandrenesa sisany tena mahaliana mikasiky ty fanompoantsika. Nianarantsika, ohatsy, fa mety mbo ho afaky hiaraky amy vahoakin’i Jehovah ty olo sisany ndre lafa rava aza Babylona bevata. Nianarantsika koa fa nanomboky tamy Novambra 2023 iny, le tsy mila manao tatitsy ty raha nivitany tamy fanompoa eny sasy ty mpitory. Fe midika va zay hoe lasa tsy de manan-danja sasy ty fanompoantsika? Tsy zay mihintsy!

2. Manino ro vomaiky tena malisa ty fanompoantsika arakarakin’ny mampandeha ty andro kiraidraiky? (Marka 13:10)

² Saky mandalo ty andro kiraidraiky, le vomaiky tena malisa ty fanompoantsika. Ino ty antony? Satria mandeha marè ty fotoa. Diniho ty raha fa nivolanin’i Jesosy mikasiky ty asa fitoria amy andro farany. (Vakio Marka 13:10.) Nivola Jesosy amy bokin’i Matio ao fa hotorỳ amy tany toy iaby ty vaovao soa alohan’ny hiavian’ny “farany.” (Mat. 24:14) Ty hoe farany eto le manondro ty fandravà tanteraky an’ny tontolo ratin’i Satana toy. Fa nametraky “andro noho lera” Jehovah amy raha hiseho tsy ho ela reo. (Mat. 24:36; 25:13; Asa. 1:7) Fa mihamarìny mihamarìny avao fotoa io sanandro. (Rom. 13:11) Tsy tokony hieny hitory avao zany tsika zisiky hiavian’ny farany io.

3. Ino ty mandrisiky antsika hitory?

³ Toy misy fanontanea bevata mila dinihintsika mikasiky ty fanompoantsika: Manino tsika ro mitory ty vaovao soa? Satria  ty fitiava ro mandrisiky antsika. Lafa tsika mitory, le asehontsika hoe teantsika ty vaovao soa, ty mpiara-belo amintsika, fa ty tena vatan-draha, teantsika Jehovah noho ty anarany. Ndao hodinihintsika kiraidraiky raha reo.

MITORY TSIKA SATRIA TEA TY VAOVAO SOA

4. Ino ty tsapantsika lafa tsika maharè vaovao soa?

⁴ Mety tiaronao va hoe ino ty nitsapanao lafa iha naharè vaovao soa, ohatsy hoe nisy ajà vo nateraky taminareo ao, na nisy olo nanome asa tena nilànao? Azo antoky fa tsy nilininao ty hiresaky an’ny vaovao soa iny amy fianakavianao noho ty namanao. Nanahaky ani-zay koa va ty nitsapanao lafa iha naharè an’ny vaovao farani-ze soa iny, zany hoe ty vaovao soa mikasiky ty Fanjakà-Ndranahary?

5. Ino ty nitsapanao tamy iha vo nianatsy voalohany ty fahamarina amy Safà-Ndranahary ao? (Henteo koa sary reo.)

⁵ Eritsereto ty raha nitsapanao tamy iha vo nianatsy voalohany ty fahamarina amy Safà-Ndranahary ao. Nianaranao, ohatsy, fa tea anao azy Babanao an-danitsy any iny, le teany ho anisan’ny fianakaviany manompo azy rey iha. Nianaranao koa fa nampitamà ie fa hafahiny ty raha mampalahelo noho mampijaly antsika, sady ho afaky hahita ndraiky ty longonao fa nimaty rey iha, amy tontolo vaovao ao. (Mar. 10:29, 30; Jaona 5:28, 29; Rom. 8:38, 39; Apok. 21:3, 4) Tena nidosiky ty fonao fahamarina rey. (Lioka 24:32) Teanao fahamarina lafovily nianaranao rey ka tsy nivitanao ty nitanjaky azy ho anao raiky avao!​—Ampitovizo amy Jeremia 20:9.

6. Ino ty ianaranao baka amy tantaran’i Ernest noho Rose?

⁶ Diniho tantara raiky toy. Vo folo tao teo ho eo rahalahy Ernest tamy babany nimaty. b Hoy Ernest: “Nieritseritsy aho hoe: ‘An-danitsy any va ie zay? Sa le fa tsy ho hita mandrakizay?’ Nialona an’ny ajà nana baba rey aho.”  Nandeha matetiky tan-dolo any Ernest, le nandohaliky tamy lolo nisy an’ny babany iny eo ie sady nivavaky hoe: “Azafady lahy Ndranahary, mba teako ho hay hoe aia babako henanizay.” Tokony ho 17 tao tafaran’ny nahafaty an’ny baban’i Ernest, le nisy mpitory nanasa azy hianatsy Baiboly. Avy le naneky Ernest. Nifalifaly biby ie lafa nahay hoe tsy mahatiaro raha sasy ty olo lafa maty, fa manahaky olo miroro marè io, sady mbo hovelomy ndraiky rozy araky ty ampitamanin’ny Baiboly. (Mpito. 9:5, 10; Asa. 24:15) Ela ty ela fa nihitany avao ty valin’ny fanontanea nampiasa loha azy rey! Tena nitean’i Ernest ty fahamarina nianarany tamy Baiboly ao. Nianatsy Baiboly niaraky taminy koa Rose valiny, sady niteany ty raha nianarany. Natao batisa rozy tamy 1978. Tena tean-drozy ty nitory tamy ty fianakavian-drozy, naman-drozy, noho ze olo nijanjy an-drozy. Vokany, fa 70 mahery ty olo nampean-drozy hahay mikasiky an’i Jehovah noho natao batisa.

7. Ino ty ho vokany laha tena teantsika ty fahamarina amy Baiboly ao? (Lioka 6:45)

⁷ Laha tena teantsika ty fahamarina amy Baiboly ao, le tsy ho vitantsika ty hitanjaky azy ho antsika raiky avao. (Vakio Lioka 6:45.) Mety hahatsapa manahaky an’ny mpianatsin’i Jesosy tamy taonjato voalohany rey tsika. Nivola rozy hoe: “Tsy azonay atao ty tsy hivola sasy mikasiky ty raha fa nihitanay noho nirènay.” (Asa. 4:20) Tena teantsika ty fahamarina ka teantsika ty hiresaky azy amin’olo maro araky ze azo atao.

MITORY TSIKA SATRIA TEA TY MPIARA-BELO AMINTSIKA

8. Ino ty mandrisiky antsika hitory ty vaovao soa amy ty hafa? (Henteo ty efajoro hoe “ Tiavo ty Olo ka Ampianaro.”) (Henteo koa sary io.)

⁸ Tea olo manahaky an’i Jehovah noho Anakilahiny iny tsika. (Ohab. 8:31; Jaona 3:16) Ferinesantsika rozy satria ‘tsy mana a-Ndranahary’ noho ‘tsy mana raha tamany.’ (Efes. 2:12) Atao raha anaty lavaky laliky rey ty fahatsapan-drozy ty vatan-drozy, satria miatriky raha sarotsy maro rozy. Fe mana ty vaovao soa mikasiky ty Fanjakà-Ndranahary tsika, ka io ro sahala taly hisintonantsika an-drozy ho afaky bakao. Teantsika rozy sady ferinesantsika, le zay ro mandrisiky antsika hanao ze azontsika atao mba hiresaha amin-drozy ty vaovao soa. Lasa hana raha tamany rozy lafa maharè an’ny hafatsy lafovily io. Tsy zay avao fa hana fiaina mahafa-po koa rozy henanizao, sady ho afaky hiay mandrakizay amy tontolo vaovao any.​—1 Tim. 6:19.

9. Ino ty fampitandrema resahintsika mikasiky ty hoavy, le ino ty antony? (Ezekiela 33:7, 8)

⁹ Tea olo koa tsika le zay ro mahavy antsika mampitandrina an-drozy hoe kely sisa le ho rava tontolo raty toy. (Vakio Ezekiela 33: 7, 8.) Ferinesantsika ty mpiara-belo amintsika noho ty longontsika tsy manompo an’i Jehovah. Manohy ty fiainany andavanandro avao ty ankamaroan-drozy fa tsy hain-drozy hoe hisy “fijalea bevata mbo tsy nisy tetoy ndraiky, liany nampisy ani-zao tontolo zao zisiky henanizao, sady fa tsy hisy hanahaky azy sasy” ho avy. (Mat. 24:21) Teantsika ho hain-drozy hoe ino ty raha hiseho amy fotoa fitsarà io. Horavà tse ty fivavahan-diso amy voalohany. Bakeo horavà tontolo raty toy iaby amy Aramagedona. (Apok. 16:14, 16; 17:16, 17; 19:11, 19, 20) Mivavaky tsika mba ho maro biby ty olo hanaraky an’ny fampitandrema io ka hanaraky ty fivavaha malio miaraky amintsika henanizao. Fe manao akory laha misy olo tsy manaraky an’ny fampitandrema io henanizao, ohatsy hoe ty fianakaviantsika?

10. Manino tsika ro tena mila mampitandrina ty olo avao mikasiky ty raha hiseho amy hoavy?

¹⁰ Nihitantsika tamy lahatsoratsy taloha teo fa mety hovonjen’i Jehovah ze olo miova ka lasa mino azy lafa mahita hoe rava Babylona Bevata. Vomaiky zany tsika mila mampitandrina an-drozy henanizao. Eritsereto zao: Mety ho tiaron-drozy amy fotoa zay ze raha resahintsika amin-drozy henanizao. (Ampitovizo amy Ezekiela 33:33.) Mety ho tiaron-drozy hoe fa nampitandrina an-drozy tsika ka mety hanapa-kevitsy hanaraky ty fivavaha malio rozy, tany mbo tsy tara marè. Mety hiova manahaky mpiamby prizon ta Filipỳ tany iny rozy. Avy le niova lahilahy io laha vo nihitany hoe “nihozonkozo marè ty tany.” Mety hanahaky ani-zay koa ty olo sisany lafa mahita hoe rava Babylona bevata. Tsy mijanjy antsika aloha rozy amy zao, fe hiova rozy laha vo mahita ani-zay.​—Asa. 16:25-34.

MITORY TSIKA SATRIA TEA AN’I JEHOVAH NOHO TY ANARANY

11. Akory ty ampisehoantsika hoe manome voninahitsy, haja, noho hery an’i Jehovah tsika? (Apokalypsy 4:11) (Henteo koa sary reo.)

¹¹ Ty fitiavantsika an’i Jehovah noho ty anarany masy ro tena antony bevata mahavy antsika mitory ty vaovao soa. Amintsika, le anisan’ny fomba iderantsika an’ny Ndranahary teantsika iny ty fanompoantsika. (Vakio Apokalypsy 4:11.) Mieky tanteraky tsika hoe: Maeva hamean’ny mpanompony voninahitsy noho haja voho hery Jehovah Ndranahary. Manome voninahitsy noho manaja azy tsika laha manampy ty olo hahay hoe ie ro “namoro ty raha iaby”, sady tsy ho nivelo tsika laha tsy ie. Manome an’i Jehovah ty herintsika tsika laha mampiasa ty fotoantsika noho ty fananantsika mba hitoria ty vaovao soa araky ze vitantsika. (Mat. 6:33; Lioka 13:24; Kol. 3:23) Laha ty marina zany, teantsika ty miresaky mikasiky an’ny  Ndranahary teantsika iny. Tsy linintsika koa ty hiresaky amin’olo ty anarany noho ty toetsiny. Fa manino?

12. Akory ty ataontsika mba hanamasìna ty anaran’i Jehovah lafa manompo?

¹² Teantsika Jehovah le zay ro mahavy antsika manamasy ty anarany. (Mat. 6:9) Midika zay fa ta hambarantsika amin’olo hoe tsy marina ty raha tena raty niresahin’i Satana mikasiky azy. (Gen. 3:1-5; Joba 2:4; Jaona 8:44) Lafa manompo tsika le tena teantsika ty hiaro an’ny Ndranaharintsika iny, ka ambarantsika ani-ze olo mijanjy antsika ty marina mikasiky azy. Teantsika ho hain’olo iaby fa ty fitiava ro toetsy mampiavaky azy, manao ty marina noho ty rariny ie lafa manday, sady kely sisa le hanafaky ty fijalea iaby ty Fanjakàny ka hiada noho ho sambatsy ty olombelo. (Sal. 37:10, 11, 29; 1 Jaona 4:8) Manamasy ty anaran’i Jehovah tsika laha resahintsika amin’olo raha reo. Falifaly koa tsika satria haintsika hoe manao raha mifanaraky amy anarantsika hoe Vavolombelon’i Jehovah tsika. Manino tsika ro mivola ani-zay?

13. Manino ro voninahitsy ho antsika ty kaihy hoe Vavolombelon’i Jehovah? (Isaia 43:10-12)

¹³ Kaihin’i Jehovah hoe “vavolombelony” tsika. (Vakio Isaia 43:10-12.) Ho zao ty niresahin’ny taratasy raiky baka amy Filan-kevi-pitantana, tao maromaro lasa zay: “Kaihy hoe Vavolombelon’i Jehovah tsika, le tsy misy voninahitsy bevata mandilatsy ani-zay.” c Fa manino vatany moa ro voninahitsy bevata raha zay? Eritsereto zao: Ndao atao hoe asaran’olo nanao raha raty iha. Mazava ho azy fa tsy maintsy mila olo iha mba hijoro vavolombelo hiaro anao. Olo io amy zay ro hivola amin’olo hoe vandy raha iny sady olo soa iha ka tsy hanao raha manahaky ani-zay mihintsy. Olo manao  akory ro hofilìnao mba hisolo vava anao? Azo antoky fa olo hainao noho atokisanao sady olo malaza hoe manao ty marina, amy zay hino ty raha volaniny ty olo. Manahaky ani-zay koa Jehovah lafa nifily antsika mba ho Vavolombelony. Asehony hoe hainy soa tsika sady atokisany mba hanambara amin’olo hoe ie raiky avao ro Ndranahary marina. Mana tombotsoa bevata tsika satria Vavolombelony, ka manao ze azontsika atao mba hanambarà ty anarany. Miezaky koa tsika manaporofo fa tsy marina ty raha raty iaby nasara azy bakany zay. Laha manao ani-zay tsika, le asehontsika hoe tena teantsika vatany ty anarantsika hoe Vavolombelon’i Jehovah!​—Sal. 83:18; Rom. 10:13-15.

HITORY AVAO TSIKA ZISIKY HIAVIAN’NY FARANY

14. Ino ty raha miavaky hiseho tsy ho ela?

¹⁴ Tena fa tsy linintsika ty hahita ty raha hiseho afarafara ao! Mitahy antsika Jehovah, ka mitamà tsika fa hihamaro ty olo haneky ty fahamarina alohan’ny hanombohan’ny fijalea bevata. Falifaly biby koa tsika fa ndre amy fotoa tena sarotsy amy tantaran’olombelo io aza, zany hoe amy fijalea bevata, le mety mbo hisy olo maro hiala amy tontolon’i Satana ka hiaraky amintsika hidera an’i Jehovah!​—Asa. 13:48.

15-16. Mila manao ino avao tsika, le zisiky ombia tsika ro hanao ani-zay?

¹⁵ Fe zisiky hiaviani-zay, le misy asa tokony hataontsika. Mana tombotsoa handramby anjara amy asa tsy himpoly sasy io tsika, tsy ino zay fa ty fitoria ty vaovao soan’ny Fanjakà-Ndranahary maneran-tany. Tsy maintsy mampitandrina ty olo avao koa tsika mikasiky ty raha hiseho tsy ho ela. Mila hain’olo hoe fa mihamarìny mihamarìny avao ty fotoa handravà an’ny tontolo raty toy. Ka lafa avy amy zay fotoa fitsarà io, le ho hain-drozy hoe baka amy Jehovah Ndranahary vatany ty hafatsy nitorintsika.​—Ezek. 38:23.

¹⁶ Tapa-kevitsy hanao ino zany tsika? Tapa-kevitsy hitory avao tsika satria teantsika ty vaovao soa, ty mpiara-belo amintsika, fa ty tena bevata, le tea an’i Jehovah Ndranahary noho ty anarany tsika. Tsy hieny mihintsy tsika fa hazoto hitory avao sady hafana fo zisiky ivolanan’i Jehovah hoe: “Vita zay!”