1-2. a) Ino ty fanontanea hodinihintsika? b) Ino ty mampiseho hoe tena maniry hanampy antsika Jehovah?

 AFAKY manampy antsika hiaritsy raha sarotsy Jehovah sady afaky manampy antsika ho falifaly avao lafa manompo azy. Akory ty anaovany ani-zay? Le ino ty azontsika atao mba tena hahasoa antsika ty fanampea baka amy Jehovah? Ho hitantsika amy lahatsoratsy toy ato ty valini-fanontanea reo. Fe alohani-handinihantsika ani-reo, le ndao tse tsika handiniky ani-fanontanea toy: Tena maniry hanampy antsika vatany va Jehovah?

² Hanampy antsika hahay ty valini-fanontanea io ty safà nampiasani-apostoly Paoly lafa ie nanoratsy taratasy ho ani-Hebreo. Hoy ty asany: “Jehovah ro mpanampy ahy, ka tsy hatahotsy aho. Ino ty azon’olo atao amiko?” (Heb. 13:6) Mivola ty boky raiky mikasiky Baiboly fa ty safà hoe “mpanampy” amy andininy io, le manondro olo raiky lomay manampy olo raiky tena mila fanampea. Eritsereto hoe ingy Jehovah lomay manarombaky olo raiky tra-pasahirana. Azo antoky fa ekenao hoe tena mahavola ani-Jehovah safà io. Tena maniry hanampy antsika ie. Manampy antsika Jehovah ka afaky ho falifaly avao tsika ndre miatriky raha sarotsy.

3. Ino ty raha telo ataoni-Jehovah mba hanampea antsika ho falifaly avao ndre miatriky raha sarotsy?

³ Ino ty raha sisany ataoni-Jehovah mba hanampea antsika ho falifaly avao ndre miatriky raha sarotsy? Mba hahaizantsika ty valini-zay, le ndao tsika handiniky ty tampany amy bokini-Isaia. Fa manino? Satria mbo mahakasiky ty mpanomponi-Jehovah henanizao avao ty ankamaroani-faminania nivolaniny tamy Isaia mpaminany. Matetiky koa Isaia nampiasa safà mora azo lafa niresaky mikasiky ani-Jehovah. Misy ohatsy vitsivitsy mampiseho ani-zay amy Isaia toko faha-​30 ao. Soasoa biby ty fanohara  ampiasani-Isaia amy toko io ao, mampiseho ty fomba anampeani-Jehovah ty vahoakiny. Nivola ie fa manampy antsika Jehovah ka 1) mijanjy soa noho mamaly ty vavaky ataontsika, 2) mitari-dala antsika, le 3) manome fitahia antsika henanizao noho amy hoavy. Ndao hodinihintsika fomba telo anampeani-Jehovah antsika reo.

4. a) Olo manao akory hoasani-Jehovah Jiosy tamy androni-Isaia rey, le nengani-Jehovah hanao akory rozy? b) Ino ty raha nampitamanini-Jehovah ho ani-ze Jiosy tsy nivaliky? (Isaia 30:18, 19)

⁴ Amy safà fampilira ty Isaia toko faha-30 ao Jehovah mikaiky ani-Jiosy rey hoe “anaky mahery loha” ‘mampitombo ty fahotany.’ Mbo nivola koa ie hoe: “Vahoaky mpizizo rozy, ... tsy parè hijanjy ty lalànani-Jehovah.” (Isaia 30:1, 9) Satria tsy nety nijanjy ani-Jehovah vahoaky reo, le nivola Isaia hoe hengani-Jehovah hijalijaly rozy. (Isaia 30:5, 17; Jer. 25:8-11) Zay vatany ty raha niseho lafa nandesini-Babylonianina rey ho andevo ta Babylona any rozy. Fe nisy olo tsy nivaliky avao tamy Jiosy reo, ka nandefa hafatsy ho ahin-drozy Isaia mba hahavy an-drozy hana raha tamany. Nivola tamin-drozy ie hoe mbo hampolini-Jehovah a Jerosalema any ndraiky rozy, ndraiky andro any. (Vakio Isaia 30:18, 19.) Nitanteraky vatany raha zay. Nafahini-Jehovah tsy ho andevo baka Babylona any rozy. Fe tsy hoe nafahini-Jehovah teo noho eo rozy. Tao maromaro tafara atoy rozy vo nibototsy. Lafa nivola Isaia hoe “tsy vozaky mandiny avao Jehovah satria ta hiferinay anareo”, le hita baka amy zay hoe mbo ho elaela vo havota ze Jiosy tsy mivaliky. Niandevo 70 tao ta Babylona tany tse Israelita rey, zay vo nengà himpoly ta Jerosalema any ty sisany tamin-drozy. (Isaia 10:21; Jer. 29:10) Nitany avao Israelita rey tamy rozy niandevo ta Babylona any satria tena nalahelo rozy. Fe lafa nimpoly tan-tanindrazan-drozy tany rozy le nitany satria nifalifaly biby.

5. Ino ty fanomezan-toky ameani-​Isaia 30:19 antsika?

⁵ Afaky mahazo fampahereza baka amy safà retoa koa tsika henanizao: “Hiferinay anao vatany [Jehovah] lafa maharè anao mitaray mila fanampea.” (Isaia 30:19) Manome toky antsika Isaia hoe tena hijanjy antsika Jehovah lafa tsika mitaray aminy, sady avy le hamaly ty vavaky ataontsika. Mbo nivola koa ie hoe: “Hamaly anao [Jehovah] laha vo maharè ani-zay.” Mampitiaro antsika safà feno toky reo hoe parè hanampy ani-ze mila fanampea Babantsika iny sady tena teany ty hanao ani-zay. Hanampy antsika ho falifaly avao ty fahaizantsika ani-zay, ndre mafy aza ty raha mahazo antsika.

6. Ino amy raha nivolanini-Isaia ro ahità hoe mijanjy ty vavaky ataontsika kiraidraiky Jehovah?

⁶ Ino koa ty raha azontsika ianara baka amy andininy io mikasiky ty vavaky ataontsika? Janjinini-Jehovah soa tsika kiraidraiky lafa mivavaky aminy. Manino tsika ro mivola ani-zay? Marina fa niresaky tamy vahoakiny rey amy fitambarany Jehovah amy Isaia toko faha-​30 io, fe amy andininy faha-19 eo ie mampiasa ty safà hoe “iha” na “anao”, zany hoe miresaky amin’olo kiraidraiky. Hoy Isaia: “Tsy hitàny sasy iha”; “hiferinay anao vatany ie”; “hamaly anao ie.” Baba be fitiava Jehovah ka tsy hivola amy ty anakilahiny na amy ty anakampelany kivy ie hoe: “Mba manahafa ani-rahalahy noho anabavinao reo, fa ka manao hon’io.” Tsy manao ani-zay ie. Hainy hoe tsy mitovy tsika iaby, fe samby lafovily aminy tsika kiraidraiky le tena mijanjy antsika ie lafa mivavaky aminy tsika.​—Sal. 116:1; Isaia 57:15.

7. Akory ty nampisehoani-Isaia noho Jesosy hoe tena vatan-draha ty hoe mivavaky tsy tampaky?

⁷ Lafa mivavaky amy Ndranahary tsika ka resahintsika aminy ty raha mampiasa loha antsika, le mety hameany hery tse tsika mba  hahavitantsika miaritsy. Lafa nivavaky tsika le mety nitamà hoe ho voavaha amy zay raha mahazo antsika iny. Fe manao akory laha tsy zay ty raha miseho? Mila mangataky hery amy Jehovah matetitetiky tsika mba hahavita hiaritsy. Zay mihintsy ty teany hataontsika. Mifanaraky amy raha nivolanini-Isaia toy raha zay: “Ka engà hieny mihintsy [Jehovah].” (Isaia 62:7) Ino ty teany hovolany? Tsy tokony hieny hivavaky amy Jehovah tsika, ka sahala hoe tsy engàntsika hipetrapetraky ie. Mampitiaro antsika ani-fanoharani-Jesosy mikasiky vavaky amy Lioka 11:8-10, 13 ao rey raha nivolanini-Isaia reo. Mampirisiky antsika Jesosy amy andininy reo hoe tsy tokony “hieny” hivavaky tsika sady tokony ‘hangataky fanahy masy avao.’ Afaky misoloho amy Jehovah koa tsika mba hanome tari-dala antsika, amy zay hahay hanapa-kevitsy.

8. Akory ty nahatanteraky ty raha volanini-​Isaia 30:20, 21 taloha tany?

⁸ Vakio Isaia 30:20, 21. Lafa nitoby nanodidy ani-Jerosalema maramila babylonianina rey tanatini-tao raiky noho tapany, le nijaly biby vahoaky rey ka sahala rey ty mofo noho ranon-drozy. Fe amy andininy faha-20 noho 21 ao Jehovah nampitamà ani-Jiosy rey hoe laha mibebaky noho miova rozy, le havotany. Nikaihini-Isaia hoe Mpampianatsy an-drozy Be Voninahitsy Jehovah, le nampitamà ani-vahoaky rey Isaia hoe hampianarini-Jehovah an-drozy ty fomba tokony hanompoan-drozy Azy. Nitanteraky safà reo lafa nafaha tsy ho andevo Jiosy rey. Nasehoni-Jehovah hoe Mpampianatsy Be Voninahitsy ho ani-vahoakiny reo ie, sady lafa mitariky an-drozy ie le ho vitan-drozy ty hampimpoly ndraiky ty fivavaha marina. Falifaly biby koa tsika henanizao satria Mpampianatsy Be Voninahitsy ho antsika Jehovah.

9. Ino ty fomba raiky ahazoantsika ty tari-dalani-Jehovah henanizao?

⁹ Nampitovizini-Isaia amy mpianatsy tsika amy andininy reo, le misy fomba roe ampianarani-Jehovah antsika. Voalohany, nivola Isaia hoe: “Ty masonao mihintsy ro hahita ani-azy Mpampianatsy Be Voninahitsy iny.” Amy fanohara io le mivola Isaia hoe mitsanga alohani-mpianatsy rey eo Mpampianatsy iny. Tena mana tombontsoa bevata tsika henanizao satria ampianari-Ndranahary. Akory ty ampianarani-Jehovah antsika? Mampiasa ty fandaminany ie. Tena misaotsy azy tsika satria mahazo toromariky mazava soa baka amy fandaminany! Mahazo tari-dala tsika lafa mivory noho manatriky fivoriambe, le misy koa amy boky noho gazety, amy fandahara Tele JW rey, noho amy fitaova hafa. Manampy antsika ho falifaly  avao raha rey lafa miatriky raha sarotsy tsika.

10. Amy fomba akory ty ‘haharezantsika feo baka afarantsika ao’?

¹⁰ Nivola ty fomba faharoe ampianarani-Jehovah antsika Isaia, le hoy ty asany: “Ty sofinao mihintsy ro haharè safà baka afaranao ao.” Nampitovizini-mpaminany io amy mpampianatsy mitsanga afara any rey Jehovah eto, le manenty soa ani-mpianatsiny rey ie, sady atorony an-drozy ze raha tokony hataon-drozy. Maharè ty feo-Ndranahary baka afarantsika ao koa tsika henanizao. Amy fomba akory? Baka amy fanahy masi-Ndranahary ty Baiboly, le fa taloha biby tany ty nanorata azy. Ka lafa mamaky azy tsika le sahala hoe maharè ty feo-Ndranahary baka afarantsika ao.​—Isaia 51:4.

11. Ino ty raha mila ataontsika laha teantsika ty ho falifaly avao ndre miatriky raha sarotsy tsika, le ino ty antony?

¹¹ Mampiasa ty fandaminany noho ty Safàny Jehovah mba hanomeza tari-dala antsika. Ino ty azontsika atao mba tena hahasoa antsika tari-dala ameany rey? Henteo fa nivola ani-raha roe retoa Isaia. Voalohany, “toy ro lala.” Faharoe, “andehano.” (Isaia 30:21) Tsy ampy zany ty mahay ani-“lala” iny fa mila ‘mandeha’ mbeo koa tsika. Atoroni-Jehovah antsika amy Safàny ao noho amy fanazavà ameani-fandaminany rey ty raha teany hataontsika. Atoro antsika koa hoe akory ty hanorihantsika ty raha ianarantsika. Mila manoriky ani-raha roe reo tsika laha teantsika ty ho falifaly avao amy fanompoa ani-Jehovah. Lafa mianatsy noho manoriky ty raha ianarantsika avao tsika vo hahazo fitahia baka amy Jehovah.

12. Laha hentea ty Isaia 30:23-26, akory ty fomba hitahiani-Jehovah ty vahoakiny?

¹² Vakio Isaia 30:23-26. Akory ty fomba nahatanterahani-faminania io tamy Jiosy nimpoly tan’Israely any rey, lafa baka nandevozini-Babylonianina rey rozy? Nameani-Jehovah raha maro rozy mba hiveloman-drozy noho hanampea an-drozy hahavita hanompo azy avao. Nameani-Jehovah hany maro biby rozy. Fe ty tena vatan-draha, nameany ze raha nilan-drozy rozy mba hahavy an-drozy hifandramby marìny aminy noho hanompo azy amy fomba itiavany azy ndraiky. Mbo tsy nahazo raha soa maro manahaky ani-zay ndraiky ty vahoaki-Ndranahary tamy fotoa io. Mivola ty andininy faha-26 hoe nameani-Jehovah hazavà maro rozy, zany hoe nampeany mba hahazo soa ty Safàny. (Isaia 60:2) Nitahy ty vahoakiny Jehovah ka lasa nazoto nanompo azy avao rozy sady nahazo hery ‘satria falifaly ty fon-drozy.’​—Isaia 65:14.

13. Akory ty fomba nahatanterahani-faminania mikasiky fampimpolia ty fivavaha marina iny henanizao?

 ¹³ Mbo mahakasiky antsika avao koa va faminania mikasiky fampimpolia ty fivavaha marina iny? Eka! Amy fomba akory? Nanomboky tamy tao 1919, le olo maro biby ro nafahy tsy ho andevo sasy baka amy Babylona Bevata ao, zany hoe baka amy fivavahan-diso iaby amy tany toy. Nampipetrahy amy tany mbo soa biby mandilatsy ani-Tany Nampitamany nipetrahani-Israelita iny rozy. Napetraky amy paradisa ara-panahy ao rozy. (Isaia 51:3; 66:8) Ino paradisa ara-panahy zao?

14. Ino paradisa ara-panahy zao, le ia ty mipetraky ao henanizao? (Henteo Fanazavà io.)

¹⁴ Nanomboky tamy 1919, le fa niay noho nahazo tavy ani-paradisa ara-panahy io ty voahosotsy. b Lafa nandeha ty fotoa le nilitsy amy tany io ao koa ty “aondry hafa”, zany hoe ty olo mitamà hiay an-tany etoy. Falifaly rozy satria mahazo fitahia maro baka amy Jehovah.​—Jaona 10:16; Isaia 25:6; 65:13.

15. Aia ty misy ani-paradisa ara-panahy io henanizao?

¹⁵ Aia ty misy ani-paradisa ara-panahy io henanizao? Miparitaky amy tany toy iaby ty mpanomponi-Jehovah. Misy ani-paradisa ara-panahy io iaby koa zany amy ze tany ipetrahan-drozy. Ka ndre aia ndre aia ty misy antsika, le afaky hiay amy paradisa ara-panahy io tsika laha mbo manoha ty fivavaha marina avao.

16. Ino ty azontsika atao mba hahavy antsika hahita avao ty hasoani-paradisa ara-panahy iny?

¹⁶ Laha teantsika ty ho anatini-paradisa ara-panahy io avao, le misy raha tsy maintsy ataontsika. Tokony hankasitraky ty fiangona kristiana amy tany toy iaby tsika. Akory ty hanaovantsika ani-zay? Mila mifantoky amy ty toetsy soa ananani-rahalahy noho anabavintsika reo tsika, fa tsy amy ty tsy fahalavorarian-drozy. (Jaona 17:20, 21) Manino ro tena vatan-draha raha zay? Diniho tse toy. Lafa mandeha amy ala soasoa rey na amy zariday rey tsika le mitamà hoe hahita karazan-kazo maro biby. Manahaky ani-zay koa ty amy fiangona eo henanizao. Misy olo sankarazany manahaky hazo io ty eo. (Isaia 44:4; 61:3) Mila ataontsika azo  antoky hoe mifantoky amy ty hasoani-“ala” iny tsika fa tsy amy ty handrani-“hazo” kiraidraiky marìny antsika eo. Tsy lavorary tsika le manahaky ani-zay koa ty olo hafa amy fiangona eo. Fe tsy tokony hengantsika hanimba ty fiharoa raiky amy fiangona amy tany toy iaby raha zay.

17. Ino ty azontsika kiraidraiky atao mba hiharo raiky avao ty fiangona?

¹⁷ Ino ty azontsika kiraidraiky atao mba hiharo raiky avao ty fiangona? Mila miezaky ho tea filongoa tsika. (Mat. 5:9; Rom. 12:18) Saky manao raha mba hilongoa amin’olo amy fiangona eo tsika le manao ze hahasoasoa ani-paradisa ara-panahy io avao. Tokony hotiarovintsika avao hoe Jehovah ro nitao ty olo kiraidraiky anatini-paradisa ara-panahy io mba hanompo azy. (Jaona 6:44) Tena lafovily aminy zany mpanompony reo. Ka mba eritsereto amy zay ty ho hafaleany lafa mahita antsika miezaky mafy mba hampisy filongoa noho hiharo raiky avao amy mpanompony reo!​—Isaia 26:3; Hag. 2:7.

18. Ino avao ty raha tokony hovetsevetsentsika, le ino ty antony?

¹⁸ Maro biby ty raha soasoa ameani-Jehovah ty mpanompony. Ka ino ty azontsika atao mba tena hahasoa antsika raha ameany reo? Afaky dinihintsika soa ze raha ianarantsika amy Safà-Ndranahary ao noho amy boky noho gazetintsika rey. Hanampy antsika hana toetsy kristiana ty fianara noho fametsevetsea manahaky ani-zay. Lasa ‘hifankatea manahaky mpirahalahy’ io tsika amy fiangona eo amy zay sady ‘hifankahazo am-po.’ (Rom. 12:10) Laha mametsivetsy ty fitahia nameani-Jehovah antsika tato ho ato tsika, le vomaiky hifandramby soa aminy. Le laha mifantoky amy ty raha soa hameany antsika amy hoavy tsika, le ho afaky hitamà avao hoe hanompo azy zisiky farany. Hanampy antsika ho falifaly hanompo ani-Jehovah avao raha reo henanizao.

19. a) Laha hentea ty Isaia 30:18, ino ty azontsika atokisa? b) Ino ty hanampy antsika ho falifaly avao ndre miatriky raha sarotsy?

¹⁹ “Hitsanga” hanampy antsika Jehovah lafa horavàny tontolo raty toy. (Isaia 30:18) Matoky tsika hoe “Ndranahary manao ty rariny” Jehovah ka tsy hengàny ho eo avao tontoloni-Satana toy fa tsy maintsy horavàny. (Isaia 25:9) Mandiny ani-Jehovah avao tsika zisiky hiaviani-fotoa hanafahany antsika zay. Fe zisiky hiaviani-zay, le tokony hanohy hivavaky avao tsika, hianatsy noho hanoriky ty Safà-Ndranahary, sady hametsivetsy ty fitahia azontsika. Laha manao ani-zay tsika, le hampeani-Jehovah ka ho falifaly avao manompo azy ndre miatriky raha sarotsy.