1. Ino ty raha fa ampoizintsika, le ino ty azontsika antoky?

 FA AMPOIZINTSIKA hoe hisy hanohitsy tsika lafa mitory. Mety vomaiky hanjeky aza raha zay amy hoavy. (Dan. 11:44; 2 Tim. 3:12; Apok. 16:21) Fe ndre zay, le afaky matoky tsika fa hanome ze fanampea ilàntsika Jehovah. Ino ty antony? Fa nanampy ty mpanompony avao Jehovah bakany zay mba hahavitan-drozy ty asa nampanaoviny an-drozy, ndre sarotsy manao akory aza raha zay. Mba hahitantsika ani-zay, ndao tsika handiniky ty raha sisany niainani-Ezekiela mpaminany lafa ie nitory tamy Jiosy babo ta Babylona any rey.

2. Olo manao akory hoasani-Jehovah olo nitoriani-Ezekiela rey, le ino ty hodinihintsika amy lahatsoratsy toy ato? (Ezekiela 2:3-6)

² Olo manao akory ty nitoriani-Ezekiela? Nivola Jehovah fa olo “mpamingavinga” rozy, “mahery loha”, sady “mpizizo.” Mitsiboky mandilatsy fatiky rey rozy sady mampidi-doza mandilatsy ty hala. Zay nahavy ani-Jehovah nivola matetitetiky tamy Ezekiela io hoe: “Ka matahotsy!” (Vakio Ezekiela 2:3-6.) Nivitani-Ezekiela soa ty asa fitoria nampanaovy azy satria 1) Jehovah ro naniraky azy, 2) nanome hery azy ty fanahi-Ndranahary, le 3) nanatanjaky ty finoany ty safà-Ndranahary. Nanino raha telo reo ro nanampy ani-Ezekiela? Le manino ro afaky manampy antsika koa raha reo henanizao?

3. Ino ty safà nampahery ani-Ezekiela, le ino ty nataoni-Jehovah mba hanomeza antoky azy hoe hanoha azy ie?

³ Hoy Jehovah tamy Ezekiela: “Irahiko ... iha.” (Ezek. 2:3, 4) Azo antoky hoe nampahery ani-Ezekiela safà reo. Fa manino? Satria nitiarony hoe fa nivola raha manahaky ani-zay tamy Mosesy noho Isaia koa Jehovah lafa nanendry an-drozy ho mpaminaniny.  (Eks. 3:10; Isaia 6:8) Haini-Ezekiela koa fa nampeani-Jehovah handresy raha sarotsy mpaminany roe reo. Ka lafa nivola indroe tamy Ezekiela Jehovah hoe: “Irahiko ... iha”, le natoky mpaminany io fa tsy maintsy hanoha azy Jehovah. Matetiky koa Ezekiela nanoratsy hoe: “Nivola tamiko Jehovah.” (Ezek. 3:16; 6:1) Tena niresy lahatsy zany Ezekiela hoe Jehovah mihintsy ro naniraky azy. Ankoatsini-zay, mpisoro ty babani-Ezekiela. Azo antoky fa nampianariny ani-Ezekiela hoe nivola tamy mpaminaniny rey avao Jehovah hoe hanampy an-drozy ie. Ho zao, ohatsy, ty nivolanini-Jehovah tamy Isaka, Jakoba, noho Jeremia: “Hanampy anao aho.”​—Gen. 26:24; 28:15; Jer. 1:8.

4. Ino ty raha nivolanini-Jehovah ka nampahery ani-Ezekiela?

⁴ Hanao akory ty ankamaroani-Israelita rey lafa hitoriani-Ezekiela? Fa nivola Jehovah hoe: “Tsy hijanjy anao ty taranakini-Israely, satria tsy ta hijanjy ahy rozy.” (Ezek. 3:7) Ka lafa tsy mijanjy ani-Ezekiela vahoaky reo, le Jehovah mihintsy zany ro tsy janjinin-drozy. Nanome toky ani-Ezekiela safà reo fa tsy hoe tsy nahavita soa ty asani-mpaminany ie ndre tsy mijanjy azy aza olo reo. Mbo nanome toky azy koa Jehovah fa lafa tanteraky fanameloha nambarany rey, le “tsy maintsy ho hain-drozy hoe fa nisy mpaminany tamin-drozy teo.” (Ezek. 2:5; 33:33) Azo antoky fa nampahery ani-Ezekiela safà reo ka afaky nanatanteraky ty fanompoany ie.

5. Ino ty raha volanini-​Isaia 44:8 ka mampahery antsika?

⁵ Mahazo hery koa tsika satria haintsika hoe Jehovah ro maniraky antsika hitory. Manome voninahitsy antsika ie ka kaihiny hoe ‘vavolombelony’ tsika. (Isaia 43:10) Tena  tombontsoa bevata raha zay! Manahaky nataony tamy Ezekiela iny, le mivola amintsika koa Jehovah hoe: “Ka matahotsy.” Manino tsika ro tsy tokony hatahotsy ani-fahavalontsika rey? Satria manahaky ani-Ezekiela avao tsika. Jehovah ro maniraky antsika ka tsy maintsy ampeany tsika.​—Vakio Isaia 44:8.

6. a) Ino ty nivolanini-Jehovah mba hanomeza antoky antsika hoe manampy antsika ie? b) Ino ty raha mampahery antsika?

⁶ Mampitamà Jehovah hoe hampeany tsika. Lafa ho nivola, ohatsy, Jehovah hoe: “Nareo ro vavolombeloko”, le zao tse ty nivolaniny talohani-zay: “Hanampy anao aho lafa mitsàky rano iha. Tsy ho ampo noho tsy handentiky anao ty vavarano lafa mitsàky eny iha. Tsy ho may iha lafa mandeha amy afo, sady tsy handoro anao ty lelanafo.” (Isaia 43:2) Lafa tsika mitory, le mety ho maro ty raha manakasaka antsika sahala amy vavarano io. Mety ho tojiky raha sarotsy maro sahala amy afo io koa tsika. Fe hanampy antsika Jehovah ka tsy hieny tsika fa hitory avao. (Isaia 41:13) Manahaky tamy androni-Ezekiela iny, le maro ty olo tsy mijanjy ty hafatsy andesintsika henanizao. Fe tsy midika zay hoe tsy manao soa ty asa fitoria tsika. Mampahery antsika ty mahay hoe falifaly Jehovah lafa tsika tsy mivaliky fa manohy manambara ty hafatsiny avao. Nivola apostoly Paoly hoe: “Samby hahazo ty valisoany iaby [ty olo kiraidraiky] arakaraky ty asa mafy nataony.” (1 Kor. 3:8; 4:1, 2) Hoy amy zay ranabavy raiky mpisava lala fa elaela zay: “Tena mahafalifaly ahy ty mahay hoe mamaly soa ty ezaky ataontsika Jehovah.”

7. Nanao akory Ezekiela saky nandiniky ty raha nihitany? (Henteo sary amy fononi-gazety toy.)

⁷ Nieky Ezekiela hoe tena mahery ty fanahi-Ndranahary. Nanampy azy hahay ani-zay ty raha nihitany tamy fahità. Nihitany hoe nampeani-fanahy masy ty anjely mahery mba hanosiky kalesy raiky bevata biby. (Ezek. 1:20, 21) Nanao akory ty fihetsikini-Ezekiela? Nitantaraniny ty raha niseho. Hoy ty asany: “Lafa nahita ani-zay aho, le niankohoky.” Nitseriky marè Ezekiela, farany nilavo an-tany eo. (Ezek. 1:28) Saky nandiniky ani-raha miavaky nihitany iny Ezekiela tafarani-zay, le vomaiky natoky ie hoe ho vitany ty hanatanteraky ty fanompoany satria hanampy azy ty fanahi-Ndranahary.

8-9. a) Nanao akory Ezekiela lafa nivolanini-Jehovah mba hitsanga? b) Ino koa ty nataoni-Jehovah mba hampahereza ani-Ezekiela?

⁸ Hoy Jehovah tamy Ezekiela: “Nao anak’olo, mitsangàna fa hivola aminao aho.” Lafa nivolanini-Jehovah Ezekiela, le nanome hery azy ty fanahi-Ndranahary ka afaky nitsanga ndraiky ie. Zao ty nisoratiny: “Niasa tamiko ty fanahy ka nampitsanga ahy.” (Ezek. 2:1, 2) Nitariky ani-Ezekiela avao ty ‘tana-Ndranahary’, zany hoe ty fanahy masi-Ndranahary tafarani-zay, noho tamy fotoa iaby nanompoany. (Ezek. 3:22; 8:1; 33:22; 37:1; 40:1, f.a.p) Nanome hery ani-Ezekiela ty fanahi-Ndranahary mba hahavitàny ty asa nampanaovy azy, tsy ino zay fa ty fitoria amin’olo “mahery volany noho mahery loha” amy faritaniny iny. (Ezek. 3:7) Fa nivola tamy Ezekiela Jehovah hoe: “Ataoko mahery manahaky ty tarehin-drozy ty tarehinao, le ataoko mahery manahaky ty handrin-drozy ty handrinao. Ataoko mahery manahaky diamondra io ty handrinao, zany hoe mahery mandilatsini-vatoafo. Ka matahotsy an-drozy na mangitikitiky amy ty tarehin-drozy.” (Ezek. 3:8, 9) Sahala nivola tamy Ezekiela Jehovah hoe: ‘Ka atao mahakivy anao ty herilohani-vahoaky reo. Hanatanjaky anao aho.’

⁹ Nanampy ani-Ezekiela avao ty fanahi-Ndranahary tafarani-zay ka vitany ty nitory  tamy faritaniny iny. Hoy ty asany: “Tsapako fa tena niasa tamiko ty herini-Jehovah.” Herinandro eo vo tena niazoni-mpaminany iny soa ty hafatsy hambarany, ka lasa nahasaky nitory soa ie. (Ezek. 3:14, 15) Tafarani-zay, le nivolanini-Jehovah ie mba handeha amy sakasaka raiky zay any, soa ‘hiasa aminy ty fanahy.’ (Ezek. 3:23, 24) Lasa niparè hanomboky ty fanompoany amy zay Ezekiela.

10. Ino ty fanampea ilàntsika mba hahavitantsika ty asa fitoria, le ino ty antony?

¹⁰ Ino ty fanampea ilàntsika mba hahavitantsika ty asa fitoria? Mba hamalea ani-zay, le diniho ty raha niainani-Ezekiela. Nanome hery azy ty fanahi-Ndranahary talohani-nanombohany hanao ty asa fitoria. Manahaky ani-Ezekiela, le tsy hahavita hitory koa tsika laha tsy manampy antsika ty fanahi-Ndranahary. Ino ty antony? Satria mialy amintsika Satana, soa tsika hijano tsy hitory sasy. (Apok. 12:17) Maro ty olo mieritseritsy hoe mahery Satana ka tsy afaky handresy azy tsika. Fe mandresy azy tsika lafa manao ty asa fitoria! (Apok. 12:9-11) Amy fomba akory? Lafa tsika mitory le mampiseho hoe tsy atahorantsika ty fangorohoroa ataoni-Satana. Saky mitory tsika le mangonotsy Satana satria resy. Mahavita mitory avao tsika ndre manohitsy antsika aza ty fahavalontsika. Ka ino ty raha lasa haintsika? Lasa haintsika hoe manome hery antsika Jehovah sady mahazo hatò aminy tsika.​—Mat. 5:10-12; 1 Pet. 4:14.

11. Ino ty hataoni-fanahi-Ndranahary ho antsika, le ino ty azontsika atao mba hahazoa azy?

¹¹ Ino koa ty ianarantsika lafa tsika mandiniky ty fomba nanomezani-Jehovah hery ani-Ezekiela? Afaky manome hery antsika ty fanahi-Ndranahary mba hahafahantsika miatriky ze raha sarotsy mety ho hitantsika lafa tsika manompo. (2 Kor. 4:7-9) Ino ty azontsika atao mba ho azo antoky hoe mahazo ty fanahi-Ndranahary avao tsika? Mila mangataky ani-raha io tsy tapaky tsika, le matoky hoe hijanjy ty vavaky ataontsika Jehovah.  Nampianatsy ty mpianatsiny Jesosy hoe: “Mangataha avao. ... Milà avao. ... Paipaiho avao.” ‘Hameani-Jehovah fanahy masy ze mangataky aminy.’​—Lioka 11:9, 13; Asa. 1:14; 2:4.

12. Laha hentea ty Ezekiela 2:9–3:3, baka aia boky mihoro io le ino ty anatiny ao?

¹² Nanome hery ani-Ezekiela ty fanahi-Ndranahary ka lasa nahasaky nitory ie. Fe tsy zay avao. Nanatanjaky ty finoani-Ezekiela koa ty safà-Ndranahary. Nahita tana nitanjaky boky mihoro Ezekiela tamy fahità. (Vakio Ezekiela 2:9–3:3.) Baka aia boky mihoro io? Ino ty raha tanatiny ao? Manino raha io ro nanatanjaky ty finoani-Ezekiela? Ndao moa hodinihintsika. Baka amy sezi-mpanjakà-Ndranahary eo boky mihoro io. Mety ho ty raiky amy anjely efatsy nihitani-Ezekiela taloha teo rey ro nampiasani-Jehovah mba hanome azy ani-boky mihoro iny. (Ezek. 1:8; 10:7, 20) Ty safà-Ndranahary ro tanatini-boky mihoro iny tao, zany hoe hafatsy fanameloha lava biby hambarani-Ezekiela ani-vahoaky mpizizo natao sesitany rey. (Ezek. 2:7) Samby nisy ani-hafatsy io ty alohani-boky mihoro iny ao noho ty tafarany ao.

13. Ino ty raha nampanaovini-Jehovah ani-Ezekiela tamy boky mihoro iny, le manino raha io ro mamy?

¹³ Nivolanini-Jehovah mpaminaniny iny mba hihina ani-boky mihoro iny noho ‘hameno ty kibony amy raha iny.’ Naneky Ezekiela ka nihaniny iaby boky mihoro iny. Ino ty dikani-tampany amy fahità io? Nila nahazo soa ani-hafatsy hambarany iny Ezekiela. Tsy maintsy nino ani-raha iny ie amy zay ho voatosiky hitory. Bakeo nisy raha nahatseriky niseho. Tsapani-Ezekiela hoe “mamy manahaky tantely io” boky mihoro iny. (Ezek. 3:3) Ino ty antony? Satria tamy Ezekiela, le voninahitsy bevata ty hoe misolo tena ani-Jehovah ka tsy misy raha soa mandilatsy ani-zay. (Sal. 19:8-11) Nifalifaly ie hoe nengani-Jehovah hanao ty asani-mpaminany.

14. Ino ty nanampy ani-Ezekiela ho parè hanao ty asa nampanaovy azy?

¹⁴ Tafarani-zay, nivolanini-Jehovah Ezekiela hoe: “Janjino ty safà iaby hovolaniko aminao le alatsaho am-ponao ao.” (Ezek. 3:10) Amy toromariky reo, le nivola tamy Ezekiela Jehovah mba tsy hanalino ze raha misoratsy amy boky mihoro io ao noho handiniky soa ani-raha rey. Laha manao ani-zay Ezekiela le hihamatanjaky ty finoany. Nanampy azy hahay ani-hafatsy hambarany ani-olo rey koa raha zay. (Ezek. 3:11) Laha azoni-Ezekiela soa noho inoany hafatsi-Ndranahary io, le ho parè hanao ani-asa nampanaovy azy iny avao ie zisiky mahavita azy.​—Ampitovizo amy Salamo 19:14.

15. Ino ty raha mila ‘alatsakintsika am-po’ laha teantsika ty hanohy hanompo avao?

¹⁵ Tokony engantsika hanatanjaky ty finoantsika koa ty safà-Ndranahary laha teantsika ty hanohy hanompo avao. Mila ‘alatsakintsika am-po’ ze raha iaby volanini-Jehovah amintsika. Mampiasa ty safàny, zany hoe ty Baiboly Jehovah henanizao mba hiresaha amintsika. Ino ty azontsika atao mba hisy vokany amy eritserintsika, fihetseham-pontsika, noho ty raha ataontsika avao ty Safà-Ndranahary?

16. Tokony hataontsika akory ty Safà-Ndranahary, le akory handatsahantsika azy am-pontsika ao?

¹⁶ Lasa mihamatanjaky ty vatantsika lafa tsika mihina hany noho mihota soa. Manahaky ani-zay koa fa lafa tsika mianatsy noho mametsivetsy ty Safà-Ndranahary, le hihamatanjaky ty finoantsika. Zay ty raha teani-Jehovah hampianary antsika. Teani-Jehovah  ‘hofenoantsika ty Safàny ty kibontsika’, zany hoe teany ho azontsika soa ty Safàny. Afaky manao ani-zay tsika lafa mivavaky, mamaky, noho mametsivetsy. Mivavaky tse tsika amy voalohany mba hanomàna ty fontsika handramby ty hevitsi-Ndranahary. Bakeo tsika mamaky andinin-teny amy Baiboly ao. Mijano amy zay tsika mba hametsivetsy ani-raha nivakintsika iny. Hanao akory ty vokany? Vomaiky hihamatanjaky ty finoantsika lafa haintsika soa ty raha teany hovolany.

17. Manino tsika ro tokony hametsivetsy ze raha vakintsika amy Baiboly ao?

¹⁷ Manino ro tena ilà ty mamaky Baiboly noho mametsivetsy? Laha manao ani-zay tsika, le hahazo hery hitoria ty hafatsy mikasiky Fanjakà iny henanizao sady tsy hatahotsy hanambara didim-pitsarà henja mety hotorintsika amy hoavy. Lafa mametsivetsy ty toetsy soani-Jehovah koa tsika, le vomaiky hifandramby soa aminy. Ho falifaly tsika amy zay, satria hilamin-tsay sady ho afa-po.​—Sal. 119:103.

18. Ino ty raha tsy maintsy ho hain’olo amy faritanintsika eny, le ino ty antony?

¹⁸ Mpaminany Ezekiela fa tsy manahaky ani-zay tsika. Fe ndre zay, le tapa-kevitsy hanambara ty hafatsy voasoratsy anatini-Safàni-Jehovah ao avao tsika zisiky ivolanani-Jehovah hoe vita ty asa fitoria. Lafa avy ty fotoam-pitsarà, le tsy misy afaky hivola ty olo amy faritanintsika eny hoe tsy nahazo fampitandrema rozy na tsy nidarea-Ndranahary. (Ezek. 3:19; 18:23) Vomaiky aza rozy hieky hoe tena baka amy Ndranahary vatany ty hafatsy nitorintsika.

19. Ino ty hanome hery antsika hahafahantsika hanatanteraky ty fanompoantsika?

¹⁹ Ino ty hanome hery antsika hahafahantsika hanatanteraky ty fanompoantsika? Raha telo nanatanjaky ani-Ezekiela rey avao. Tsy mieny mitory tsika satria haintsika hoe Jehovah ro naniraky antsika, manome hery antsika ty fanahy masi-Ndranahary, le manatanjaky ty finoantsika ty Safà-Ndranahary. Manampy antsika Jehovah ka voatosiky hanatanteraky ty fanompoantsika tsika sady parè hiaritsy avao “zisiky farany.”​—Mat. 24:13.