1. Akory ty ahaizantsika hoe teani-Jehovah hamonjy azy tsika?

 MANASA antsika hamonjy azy Jehovah. (Jak. 4:8) Teany laha rambesintsika ho Ndranaharintsika ie, Babantsika, sady Namantsika. Mamaly ty vavaky ataontsika ie sady manampy antsika lafa misy raha sarotsy. Mampiasa ty fandaminany koa ie mba hampianara antsika noho hiarova antsika. Fe misy raha tsy maintsy ataontsika laha teantsika ty hifandramby marìny amy Jehovah. Ino zay?

2. Ino ty azontsika atao mba hamonjea ani-Jehovah?

² Afaky mamonjy ani-Jehovah tsika lafa mivavaky aminy, mamaky ty Safàny, noho mametsivetsy. Laha manao ani-zay tsika le vomaiky ho tea azy noho hankasitraky azy. Ho voatosiky hanoriky ty safàny noho hidera azy tsika satria tena maeva ani-zay ie. (Apok. 4:11) Arakaraky ty ahaizantsika ani-Jehovah, le vomaiky tsika hatòky azy noho hatòky ani-fandamina ampiasany hanampy antsika iny.

3. Ino ty ataoni-Devoly mba hahavy antsika hiala amy Jehovah, fe ino ty hanampy antsika tsy hiala amy Ndranaharintsika iny noho ty fandaminany? (Salamo 31:13, 14)

³ Fe manao ze azony atao ty Devoly mba hahavy antsika hiala amy Jehovah, sirtò lafa miatriky raha sarotsy tsika. Ino ty ataony? Ataony ze hanimbà tsikelikely ty fatokisantsika ani-Jehovah noho ty fandaminany. Fe afaky miaro tena tsika. Amy fomba akory? Laha matanjaky ty finoantsika sady matoky tanteraky ani-Jehovah tsika, le tsy hiala amy Ndranaharintsika iny noho ty fandaminany mihintsy tsika.​—Vakio Salamo 31:13, 14.

4. Ino ty hodinihintsika amy lahatsoratsy toy ato?

 ⁴ Handiniky raha sarotsy telo mety hatrehintsika baka amin’olo ivelani-fiangona any tsika amy lahatsoratsy toy ato. Samby mety hanimba ty fatokisantsika ani-Jehovah noho ty fandaminany iaby raha reo. Manino raha reo ro mahavita mampiala antsika amy Jehovah? Le ino ty azontsika atao mba hampandamoka ty ezaky ataoni-Satana?

5. Manino ty raha sarotsy ro mety hanimba ty fatokisantsika ani-Jehovah noho ty fandaminany?

⁵ Miatriky raha sarotsy tsika kindraiky, ohatsy hoe manohitsy antsika ty fianakaviantsika na very asa tsika. Manino ro mety hahavy antsika tsy hatòky ty fandaminani-Jehovah noho hiala azy ty raha manahaky ani-reo? Lafa maharitsaritsy ty problemo mahazo antsika, le mety tsy hana raha tamany sasy tsika sady ho kivy. Hararaotini-Satana amy zay raha zay mba hahavy antsika hieritseritsy hoe tsy tea antsika Jehovah. Teani-Devoly hieritseritsy tsika hoe Jehovah ro nahavy antsika hijaly na ty fandaminany. Zay mihintsy ty raha nahazo ty Israelita sisany ta Ejipta any. Natoky tse rozy tamy voalohany hoe Mosesy noho Arona ro nitendreni-Jehovah hanafaky an-drozy tsy ho andevo. (Eks. 4:29-31) Fe tafara atoy lafa nampijalijalini-Farao rozy, le lasa nasaran-drozy ani-Mosesy noho Arona raha nahazo an-drozy rey. Nivola rozy hoe: “Nataonareo ze halainani-Farao miaraky amy mpanompony rey anay, le nasianareo sabatsy tan-tanany eny hamonoany anay.” (Eks. 5:19-21) Nanome tsiny ani-mpanompo-Ndranahary tsy nivaliky rey rozy. Tena nampalahelo raha zay! Laha tsy mety afaky ty problemo mahazo anao, ino ty azonao atao mba hahavy anao hatòky ani-Jehovah noho ty fandaminany avao?

6. Ino ty ianarantsika baka amy ty raha nataoni-Habakoka mpaminany lafa ie niatriky raha sarotsy? (Habakoka 3:17-19)

⁶ Aboraho amy Jehovah ze am-ponao ao, le matokisa hoe hanampy anao ie. Maro ty raha sarotsy natrehini-Habakoka mpaminany. Nisy fotoa, ohatsy, ie atao raha nisalasala hoe mikarakara azy va Jehovah. Farany ie nivavaky le naborany tamy Jehovah iaby ze raha tanaty fony ao. Hoy ty asany: “Jehovah a, zisiky ombia lahy aho ro hikoiky vonjy fe tsy janjininao? ... Manino ro henteanao avao ty olo manjakazaka?” (Hab. 1:2, 3) Nivaleani-Jehovah ty vavaky baka am-po nataoni-mpanompony tsy nivaliky io. (Hab. 2:2, 3) Lasa nifalifaly ndraiky Habakoka lafa baka nandiniky soa ty fomba nanavotani-Jehovah ty mpanompony. Nanjary resy lahatsy ie hoe nikarakara azy Jehovah sady hanampy azy hiaritsy ze raha sarotsy miseho. (Vakio Habakoka 3:17-19.) Ino ty ianarantsika? Lafa miatriky raha sarotsy iha, le mivavaha amy Jehovah. Resaho aminy ze raha tsapanao. Bakeo matokisa hoe hanampy anao ie. Laha manao ani-zay iha, le afaky matoky fa hameani-Jehovah hery mba hiareta. Lafa tsapanao hoe manampy anao ie, le vomaiky hihamatanjaky ty finoanao azy.

7. Ino ty nataoni-longoni-Shirley mba handresea lahatsy azy, le ino ty nanampy azy tsy hiala ani-Jehovah?

⁷ Anovo avao ze hahavy anao hifandramby soa amy Jehovah. Zay mihintsy ty nataoni-Shirley, ranabavy mipetraky a Papouasie-Nouvelle-Guinée any zay lafa ie niatriky raha sarotsy. b Nahantra ty fianakaviani-Shirley, le sahira rozy kindraiky vo nahita hany ampy an-drozy. Nataoni-lahilahy longon-drozy zay amy zay ze hahavy ani-Shirley tsy hatòky ani-Jehovah. Hoy ty asany: “Mivola iha hoe manampy anao ty fanahy masi-Ndranahary, kanefa aia eo? Mbo mahantra avao nareo. Lanilanìnao  amy fitoria zao avao ty fotoanao.” Hoy Shirley: “Lasa nieritseritsy aho hoe: ‘Tena mikarakara anay vatany va Ndranahary?’ Farany aho nivavaky tamy Jehovah malaky le niresahiko taminy iaby ze raha tanaty saiko ao. Niezaky namaky Baiboly noho boky noho gazetintsika rey avao aho, sady tsy nieny nitory noho namonjy fivoria.” Tsy ela tafarani-zay, le lasa tsapany hoe mikarakara ty fianakaviany vatany Jehovah. Nana raha hohany avao ty fianakaviany sady nifalifaly. Hoy Shirley: “Hitako hoe namaly ty vavaky nataoko Jehovah.” (1 Tim. 6:6-8) Laha miezaky hana fahazara soa ara-panahy avao koa iha, le tsy henganao hampiala anao amy Jehovah ty raha sarotsy na ty fisalasalà.

8. Ino ty raha mety hahazo ty rahalahy mana andraikitsy amy fandaminani-Jehovah eo?

⁸ Mampiparitaky vandy amy vaovao noho amy internet ao ty fahavalontsika mba handratiratia ani-rahalahy mana andraikitsy amy fandaminani-Jehovah eo reo. (Sal. 31:13) Nisambory ty rahalahy sisany le natao manahaky olo mpamono olo noho mpangalatsy rey. Niatriky raha mitovy amy zay ty Kristiana tamy taonjato voalohany, lafa nasara nanao raha raty apostoly Paoly ka nisambory. Ino ty nataon-drozy?

9. Ino ty nataoni-Kristiana sisany lafa nigadrà apostoly Paoly?

⁹ Tsy nanampy ani-apostoly Paoly sasy ty Kristiana sisany tamy taonjato voalohany lafa ie nigadrà ta Roma any. (2 Tim. 1:8, 15) Ino ty antony? Nimenatsy va rozy satria sahala amin’olo mpanao raty rey ty fahitan’olo ani-Paoly? (2 Tim. 2:8, 9) Sa natahotsy rozy hoe tsy no henjehy koa? Ndre ino ino antony nahavy an-drozy nanao ani-zay, le eritsereto hoe nanao akory ty fihetseham-poni-Paoly. Niatriky raha sarotsy maro ie sady niparè hamoy ty ainy ho an-drozy mihintsy. (Asa. 20:18-21; 2 Kor. 1:8) Fe tsy nanampy ani-Paoly rozy lafa tena nila fanampea ie. Tsy teantsika mihintsy ty hanahaky an’olo reo! Ino ty tokony hotiarovintsika avao lafa misy rahalahy mana andraikitsy enjehy?

10. Ino ty tokony hotiarovintsika lafa enjehy rahalahy mana andraikitsy rey, le ino ty antony?

 ¹⁰ Tiarovo hoe manino tsika ro enjehy le ia ty ambalikini-raha zay. Mivola ty 2 Timoty 3:12 hoe: “Henjehy koa ze olo iaby ta hampiseho amy fiainany hoe mahafoy ty vatany ho a-Ndranahary sady tafiharo amy Kristy Jesosy.” Tsy tokony ho tseriky zany tsika laha rahalahy mana andraikitsy rey ro tena kendreni-Satana. Teany laha mijano tsy manompo ani-Jehovah sasy rahalahy rey, le ta hampitahotsy antsika koa ie.​—1 Pet. 5:8.

11. Ino ty ianarantsika baka amy Onesiforosy? (2 Timoty 1:16-18)

¹¹ Tohano avao ty mpiara-manompo aminao le ka ialà. (Vakio 2 Timoty 1:16-18.) Hafa mihintsy ty fihetsikini-Kristiana raiky mana anara Onesiforosy zay lafa Paoly nigadrà. “Tsy mba nahamenatsy azy ty rojo vy nandrohiza [ani-Paoly].” Vomaiky aza Onesiforosy nila ani-Paoly mbaombao. Lafa nihitany amy zay Paoly le nila fomba ie mba hanampea azy. Nety ho namoy ty ainy ie lafa nanao ani-zay. Ino ty ianarantsika? Tsy tokony hengantsika hanaka antsika tsy hanampy ani-rahalahintsika enjehy rey ty fatahora olo. Tokony hanao ze azontsika atao aza tsika mba hanampea an-drozy. (Ohab. 17:17) Mila fitiava noho fanohana baka amintsika rozy.

12. Ino ty ianarantsika baka amy raha ataoni-rahalahy noho anabavintsika a Russie any reo?

¹² Diniho ty raha ataoni-rahalahy noho anabavintsika a Russie any. Manampy ty mpiara-manompo amin-drozy gadra rey rozy. Lafa mandalo fitsarà, ohatsy, ty sisany le maro ty rahalahy noho anabavy avy any mba hanoha an-drozy. Ino ty ianarantsika? Ka matahotsy lafa misy rahalahy mana andraikitsy asara hoe nanao raha raty, sambory, na enjehy. Mivavaha ho an-drozy, ampeo ty fianakavian-drozy, le milà fomba hafa hampisehoa hoe manoha an-drozy iha.​—Asa. 12:5; 2 Kor. 1:10, 11.

13. Manino ty kizakizaky ro mety hanimba ty fatokisantsika ani-Jehovah noho ty fandaminany?

¹³ Mety hikizakizaky antsika ty longontsika tsy Vavolombeloni-Jehovah, ty mpiaraky miasa, na ty mpiaraky mianatsy amintsika lafa mahita antsika mitory, na manaraky ty fitsipikini-Jehovah. (1 Pet. 4:4) Mety hivola rozy hoe: “Teako iha satria olombelo manahaky ahy, fa fivavahanareo tia, maneritery loatsy sady fa tsy lamody.” Mety hivolambola antsika ho zao rozy lafa mahita antsika tsy mifandramby amin’olo voaroaky: “Ataoko iha manao tea olo zao?” Mety hiteraky fisalasalà an-tsaintsika ao ty raha manahaky ani-reo. Mety lasa hieritseritsy amy zay tsika hoe: ‘Mitaky raha maro marè amiko va Jehovah? Maneritery marè va ty fandaminany?’ Laha tratsini-raha manahaky ani-zay iha, ino ty azonao atao mba hahavy anao tsy hiala ani-Jehovah noho ty fandaminany avao?

14. Mety ho kizakizahin’olo tsika satria manoriky ty fitsipikini-Jehovah, fe tokony hanao akory ty fihetsikintsika? (Salamo 119:50-52)

¹⁴ Miezaha ho tapa-kevitsy hanoriky ty fitsipikini-Jehovah avao. Nanoriky ty fitsipikini-Jehovah avao Joba ndre nisy nikinokino aza. Niezaky nandresy lahatsy azy mihintsy aza ty raiky amy lahilahy nanao kisary namany rey hoe tsy ahoa-Ndranahary ino Joba, ndre manoriky ty fitsipikiny ndre tsy manoriky. (Joba 4:17, 18; 22:3) Fe tsy nety nino ty vandy manahaky ani-zay Joba. Hainy fa mety soa ty fitsipikini-Jehovah mikasiky ty soa noho ty raty ka tapa-kevitsy hanoriky ani-zay avao ie. Tsy nengany hampivaliky azy amy Jehovah ty raha nataon’olo hafa. (Joba 27:5, 6) Ino ty ianarantsika? Ka engà hahavy anao hisalasala mikasiky ty fitsipikini-Jehovah ty kizakizaky ataon’olo. Eritsereto ty raha fa niainanao. Azo antoky fa tsy indraiky avao iha ro nahita  hoe lasa nihasoa ty fiainanao lafa iha nanoriky ze raha volanini-Jehovah hoe soa. Miezaha avao koa hanoha ani-fandamina manoriky ani-fitsipiky reo iny. Ka ndre ho kizakizahin’olo manao akory tsika amy zay, le tsy hiala ani-Jehovah mihintsy.​—Vakio Salamo 119:50-52.

15. Nanino Brizit ro nikinokinoan’olo?

¹⁵ Eritsereto ty raha niainani-Brizit, ranabavy mipetraky an’Inde any. Nikinokino azy ty fianakaviany satria manompo ani-Jehovah ie. Tafara kelikelini-batisany tamy 1997, le nivery asa valiny. Tsy Vavolombeloni-Jehovah valiny io. Farany nanapa-kevitsy lahilahy iny hoe hifindra amy ray aman-dreniny rey any rozy amy Brizit noho anakampelan-drozy rey. Mipetraky amy tanà hafa any ray aman-dreniny reo. Vomaiky nitombo ty raha sarotsy natrehini-Brizit. Satria valiny tsy an’asa, le tsy maintsy niasa tontolo andro ie mba hameloma ty fianakaviany. Ankoatsini-zay, lavitsy biby ty pilasy nisy fiangona satria 350 kilomety eo ho eo miala baka amin-drozy eo. Nampalahelo fa nanohitsy azy koa fianakaviani-valiny rey. Vomaiky nihananjeky avao fanohera nahazo azy iny, farany niala tao Brizit mianakavy le nandeha nifindra. Fe bakeo nimaty tampoky valini-Brizit iny. Tafarani-zay, le nimatini-kansera anakampelany raiky 12 tao zay. Vomaiky niraty aza satria nasarani-longoni-Brizit rey hoe ie ro nahavy ani-raha reo. Nivola rozy hoe laha tsy nilasa Vavolombeloni-Jehovah ie, le tsy ho niseho raha raty iaby nahazo an-drozy reo. Fe ndre zay aza, le mbo natoky ani-Jehovah avao Brizit sady nijano amy fandaminany ao.

16. Ino ty fitahia niazoni-Brizit lafa ie tsy niala tamy Jehovah noho ty fandaminany?

¹⁶ Lavitsy biby ani-Efitrano iny ty nipetrahani-Brizit, farany nampirisiky azy mpiandraikitsini-faritsin-drozy iny hoe afaky mitory mban-tanàn-drozy mbeny ie, le azony atao koa ty mitariky fivoria an-tranony ao. Nahatsapa tse Brizit tamy voalohany hoe tsy ho vitany zay. Fe norihiny avao soso-kevitsy namea azy iny. Nizara vaovao soa tamin’olo ie, nivory tan-tranony ao, le nanao fotoam-pivavahani-fianakavia tsy tampaky niaraky tamy anakampelany rey. Nanao akory ty vokany?  Nahavita nitariky fampianara Baiboly maro Brizit, le natao batisa ty ankamaroani-mpianatsiny rey. Nanomboky nanao ty asani-mpisava lala maharitsy ie tamy 2005. Nahazo fitahia ie satria natoky ani-Jehovah noho tsy nivaliky tamy fandaminany avao. Lasa mpanomponi-Jehovah tsy mivaliky anakampelany rey, le lasa misy fiangona roe koa henanizao amy faritsy misy an-drozy eny. Resy lahatsy Brizit hoe nanome hery azy Jehovah ka afaky niatriky ty raha sarotsy nahazo azy noho niaritsy ty kizakizaky nataoni-longony rey ie.

17. Tapa-kevitsy hanao ino tsika?

¹⁷ Teani-Satana hino tsika hoe engani-Jehovah tsika lafa misy raha sarotsy sady tsy ampeany. Teany hino avao koa tsika hoe vomaiky manasarotsy ty fiainantsika ty fanohanantsika ty fandaminani-Jehovah. Teani-Satana hatahotsy tsika lafa misy rahalahy mana andraikitsy asara hoe nanao raha raty, enjehy, na gadrà. Mampiasa olo hikizakizaky antsika koa ie, satria teany laha tsy matoky ty fitsipikini-Jehovah noho ty fandaminany sasy tsika. Fe haintsika soa ty teti-dratiny ka tsy voafitaky tsika. (2 Kor. 2:11) Miezaha ho tapa-kevitsy hanohitsy ty vandini-Satana sady tsy hivaliky amy Jehovah noho ty fandaminany mihintsy. Tiarovo fa tsy hanenga anao mihintsy Jehovah. (Sal. 28:7) Ka engà hisy raha hampisaraky anao amy Jehovah zany!​—Rom. 8:35-39.

18. Ino ty hodinihintsika amy lahatsoratsy manaraky ao?

¹⁸ Nandiniky ty raha sarotsy mety hatrehintsika baka amin’olo ivelani-fiangona any tsika tamy lahatsoratsy toy tato. Fe mety ho baka amin’olo amy fiangona eo avao koa ty raha sarotsy sisany, ka mety lasa tsy hatòky ani-Jehovah noho ty fandaminany tsika. Akory ty hahavitantsika hiatriky raha sarotsy manahaky ani-zay? Handiniky ani-zay tsika amy lahatsoratsy manaraky ao.