TANTARAM-PIAINA
“Ta Hiasa ho ani-Jehovah Aho”
BAKA nitsidiky olo vitsivitsy marìny ani-tanàni-Granbori teo zahay ndraiky zay. Lavitsy ani-alani-Suriname tanà io. Nifanelakela tana nanao veloma an’olo rey zahay, bakeo nandeha laka nanaraky ani-Vavaranoni-Tapanahoni. Lafa nandalo tamy faritsy somary mahery amy vavarano iny zahay, le nidofotsy amy vato elisini-moterani-laka nanday anay iny. Avy le nilentiky anaty rano ao lohani-laka iny, le nirendriky zahay. Nidobodoboky biby ty foko. Marina fa nivezivezy tamy vavarano io teo tanatini-tao maro aho tamy zaho nimpiandraikitsini-faritsy, fe tsy nahay nilano aho!
Alohani-hitantarako ty raha niseho, ndao tse horesahiko aminareo hoe ino ty nahavy ahy hanao fanompoa manontolo andro.
Nateraky ta Curaçao any aho, tamy 1942. A Karaiby any ty misy ani-nosy soasoa io. Baka a Suriname any babako, fe nafindrani-sefony tamy nosy io any ie mba hiasa any. Ie ro anisani-Vavolombeloni-Jehovah voalohandohany natao batisa ta Curaçao any, roe tao talohani-nahaterahako. a Nampianatsy Baiboly anay limy mianadahy avao ie sankerinandro, ndre tsy de nazoto nianatsy aza zahay. Nandesini-babako nifindra ta Suriname any zahay tamy zaho ni-14 tao, amy zay ie mba afaky nikarakara ani-reniny satria fa antitsy reniny.
NANAMPY AHY TY FANANA NAMA SOA
Nisy tanora maro nazoto nanompo ani-Jehovah tamy fiangona ta Suriname any, le ninama tamin-drozy aho. Somary fa zokiko rozy sady mpisava lala maharitsy. Tena nifalifaly rozy lafa nitantara ty raha nihitan-drozy tamy fanompoa eny. Saky baka nivory zahay, le niresadresaky foto-kevitsy baka amy Baiboly ao avao. Nisy fotoa zahay sady nanao ani-zay no nanenty basia an-danitsy eny. Nanampy ahy namako reo ka lasa nihaiko hoe ino ty raha teako hatao amy fiaina. Ta hiasa ho ani-Jehovah aho. Farany aho natao batisa lafa ni-16 tao. Nanomboky nanao mpisava lala maharitsy amy zay aho tamy zaho ni-18 tao.
NAHAZO FIANARA BEVATA
Tamy zaho mpisava lala ta Paramaribo
Maro ty raha nianarako lafa zaho nanao mpisava lala, le nanampy ahy avao raha rey lafa zaho nanao fanompoa manontolo andro manoka. Anisani-raha voalohany nianarako, ohatsy, hoe tena ilà ty mampiofana ty hafa. Lafa zaho nanomboky nanao mpisava lala, le nampiofana ahy misionera kaihy hoe Willem van Seijl zay. b Nampianariny raha maro mikasiky fikarakarà fiangona aho. Mbo tsy tsapako mihintsy tamy zay hoe tena nilàko fampiofana iny. Tao raiky tafarani-zay, nivoatendry ho mpisava lala manoka aho le nanomboky nitariky antoko-mpitory kelikely nipetraky tamy alani-Suriname any zay. Lavitsy ani-fiangona sisany rey ty nisy an-drozy. Soa avao aho fa nahazo fampiofana baka amy rahalahy maromaro, manahaky ani-Willem! Niezaky nanahaky an-drozy aho tafara atoy, le mba nanoka fotoa hampiofana ty hafa koa.
Ty raha faharoe nianarako le hoe tena soa ty mana fiaina tsotra noho voalamy soa. Saky voalohani-vola, le iezahanay amy namako iny hentea sandrany hoe ino ty raha tena ilànay anatini-herinandro vitsivitsy. Bakeo amy zay ty raiky aminay mandeha an-davily any mivily ani-raha rey. Ataonay ze hahavy ani-drala fanampea anay iny noho sakafo najarinay rey tsy ho lanilany fahatany, amy zay ho ampy anay zisiky amy fara vola. Satria laha lany ty hajarinay, le vitsy na tsy hisy mihintsy ty olo afaky hanampy anay anaty ala any. Mbo nitanora aho le fa nianatsy hana fiaina tsotra noho voalamy soa, le zay ro nanampy ahy hifantoky tamy asani-Jehovah avao.
Ty raha fahatelo nianarako koa le hoe tena soa ty mampianatsy olo amy fivolanan-drazany. Lafa nihabe aho, le nahay nivola safà holandè, anglè, papiamento, noho sranantongo. Fa Sranantongo (kaihy koa hoe Sranan) ro tena fivolanan’olo ta Suriname any. Fe hitako hoe nijanjy soa olo tanaty ala any rey lafa zahay nitory tamy safàn-drazan-drozy. Somary nisarotsy tamiko avao ty nahay ty sisany amy fivolana rey. Anisani-zay, ohatsy, ty fivolana saramaccan satria miovaova ty fareni-safà io, misy marè le misy moramora. Fe nisy vokany soa ty ezaky nataoko. Lafa nandeha ty fotoa, le nahavita nampianatsy fahamarina olo maro aho satria nahay ty fivolanan-drozy.
Mazava ho azy aloha fa nisy avao ty raha nahamenatsy. Nisy fotoa, ohatsy, aho ta ho nanontany ampela mpianatsy Baiboly manao fivolana saramaccan zay hoe: ‘Fa tsy marary kibo sasy va iha?’ Fe kay hondy tsy nety ty fomba nametrahako ani-fanontanea iny fa lasa hoe: ‘Bevoka va iha?’ Tsy nahafivola ie tamy zay fa nimenatsy. Marina fa nanao diso aho kindraiky, fe tsy nataoko hisaka ahy raha zay fa niezaky avao aho nampiasa ty fivolanan’olo tamy faritaninay eny.
NANEKY ANDRAIKITSY FANAMPINY
Nivoatendry ho mpiandraikitsini-faritsy aho tamy 1970. Tamy tao io aho le nampiseho ty fandahara hoe “Fitsidiha ty Foibeni-Vavolombeloni-Jehovah” tamy antoko-mpitory tan’ala any rey. Mba hitsidiha ani-rahalahy noho anabavy any rey, le niondra laka zahay amy rahalahy niaraky amiko rey. Nanday gropy zahay, bidon nisy esansy, jiro mandeha petroly, noho fitaova fandefasa video. Lafa niavy tany zahay, le tsy maintsy nitao ani-fitaova iaby reo tamy pilasy hanaova ani-fandahara iny any. Maro ty raha tiaroko tamy lia rey, fa ty tena tsy halinoko le hoe tena nitean’olo tamy pilasy mitoka rey tany fandahara rey. Nifalifaly biby aho satria nanampy olo hahay mikasiky ani-Jehovah noho ty tampany amy fandaminany an-tany etoy. Ndre ino ndre ino ty raha tsy maintsy nafoiko tamy fanaova ty asani-Jehovah, le tsy misy dikany raha zay laha ampitovizy amy fifalea tsapako lafa nanampy olo hifandramby marìny aminy.
HOSY TALITELO
Mariazinay amy Ethel, tamy Septambra 1971
Hitako hoe nimoramora tamiko ty nanatanteraky ty fanompoako tamy zaho mbo tsy nanambaly iny. Fe ndre zay, le ta hanambaly aho. Farany aho nivavaky tamy Jehovah, le nangataky aminy mba hahita valy parè hiaraky amiko hamita ani-fanendrea sarotsy tanaty ala any iny. Tao raiky eo ho eo tafarani-zay, le nanomboky nifanerasera tamy Ethel aho. Mpisava lala manoka ie sady tena mana fahafoizam-bata. Tena niteani-Ethel ty modelini-apostoly Paoly liany ie mbo nikely, ka ta hanao ze fara heriny manahaky azy koa ie amy fanompoa. Nifanambaly zahay tamy Septambra 1971, le nanomboky niaraky nanao ty asani-faritsy.
Olo fa zatsy nana fiaina tsotra Ethel, le tsy nisarotsy taminy ty nanao ty asani-faritsy tanaty ala any. Lafa handeha hitsidiky fiangona anaty ala be any, ohatsy, zahay le tsy nanday enta maro. Nandro noho nanasa lamba tamy vavarano eny zahay. Nihaninay koa ze raha narosoni-rahalahy rey anay, anatini-zay ty androngo, karazam-pia atao hoe piranha zay, na ze raha niazon-drozy baka an’ala any na tamy vavarano eny. Lafa tsy nisy finga, le ravin-kida rey ro nihinananay. Lafa tsy nisy sotro le nihina amy tana zahay. Maro ty raha nafoinay tamy fanompoa ani-Jehovah. Fe tsapanay amy Ethel hoe nanampy anay hifankatea noho hifandramby soa amy Jehovah raha rey, zany hoe vomaiky nahavy anay ho lasa hosy talitelo. (Mpito. 4:12) Tsy hisy raha hatakalonay ani-zay mihintsy!
Ndraiky zay, lafa baka nitsidiky ani-mpiara-manompo rey tanaty ala any zahay, le nitratsini-raha niresahiko baka am-boalohany teroy iny. Lafa nandalo tamy faritsy somary mahery amy vavarano iny laka nanday anay iny, le nivaliky, fe nitsielatsiela avao. Soa avao zahay fa nanisy gillet, le tsy nilentiky tanaty rano any. Fe nifeno rano laka iny. Narianay anaty rano any iaby ze hany tanatini-raha fasianay hany rey, bakeo amy zay rey ro nampiasanay mba hanaria ani-rano tanaty laka ao iny.
Tsy nana hany mihintsy zahay, farany zahay naminta nanaraky ani-vavarano iny sady nandeha. Fe tsy nisy raha niazonay ndre raiky. Nivavaky tamy Jehovah amy zay zahay le nangataky taminy mba hanome ze hany hohaninay amy andro iny. Laha vo baka nivavaky zahay, le nandatsaky vinta ty raiky amy rahalahy niaraky aminay rey, le nahazo fia bevata biby. Niampy anay limy tamy haly iny raha iny le nivintsy zahay.
SADY VALY, BABA, NO MPIANDRAIKITSINI-FARITSY
Tsy nampoizinay mihintsy ty fitahia niazonay, limy tao tafarani-niarahanay nanao ty asani-faritsy. Lasa ray aman-dreny zahay. Nifalifaly aho lafa naharè ani-vaovao iny, ndre tsy tena haiko aza hoe hanao akory ty fiainanay afarani-zay. Mbo naniry mafy hanohy ty fanompoa manontolo andro zahay amy Ethel laha mbo niazo atao. Niteraky ani-Ethniël anakilahinay voalohany iny zahay, tamy 1976. Le roe tao noho tampany tafarani-zay, niavy koa Giovanni, azy anakilahinay faharoe iny.
Nanatriky batisa tamy Vavaranoni-Tapanahoni, marìny ani-Godo Holo a Suriname Antinana any, 1983
Tena nila fanampea ty ta Suriname any tamy fotoa zay, farany nekenini-biròni-sampana hanohy ty asani-faritsy avao zahay ndre fa nanan’anaky. Fiangona vitsivitsy avao ro nasà hotsidihiko tamy anakinay rey mbo nikely. Roe herinandro sambola avao zany aho ro nandeha nitsidiky, fa ty ankoatsini-zay aho nanao mpisava lala tamy fiangona nanendrea anay iny tao. Niaraky tamiko avao Ethel noho ananay rey lafa zaho nitsidiky fiangona marìny mbeny. Fe nandeha raiky aho lafa nitsidiky fiangona noho nanao fivoriambe tanaty ala any.
Nandeha laka avao aho matetiky lafa nitsidiky fiangona tamy faritsy mitoka rey
Tsy maintsy nalamiko soa ty raha nataoko, amy zay ho vitako soa ty andraikitsiko iaby. Nataoko azo antoky hoe nanao fotoam-pivavahani-fianakavia zahay sankerinandro. Lafa zaho nitsidiky fiangona tanaty ala any, le Ethel ro nitariky ty fotoam-pivavahani-fianakavia niaraky amy anakilahinay rey. Fe laha mbo niazo atao, le niaraky nanao raha matetiky avao zahay mianakavy. Niaraky nanao fialam-boly tamy ananay rey koa zahay amy Ethel. Nihisa jeu zahay na nitsangatsanga amy pilasy soasoa narìny anay eny. Fa haly biby avao aho matetiky vo niroro satria nanoma anjara. Le Ethel nanao manahaky ani-valy soa resahy amy Ohabolana 31:15 ao iny. Nifoha maray ie, le nataony azo antoky hoe niaraky nanao teny vakina zahay sady niaraky nihina maray alohani-handehanani-anakilahinay rey nianatsy. Tena falifaly aho fa mana valy mana fahafoizam-bata manahaky ani-zay! Nanampy ahy avao ie mba hahafahako hanatanteraky soa ty andraikitsy iaby nameani-Jehovah ahy.
Niezaky mafy zahay nanampy ani-ananay rey ho tea ani-Jehovah noho ho tea manompo. Teanay laha mba mifily hanao fanompoa manontolo andro anakilahinay rey, fe tsy hoe satria zay ty teanay hataon-drozy, fa rozy mihintsy ro mifily hanao ani-zay. Niresahinay tamin-drozy avao matetiky hoe tena mahafalifaly ty manompo manontolo andro. Marina hoe niatriky raha sarotsy zahay, fe ty fomba nanampeani-Jehovah anay noho nitahiany ty fianakavianay ro tena niresahinay. Nataonay azo antoky koa hoe ninama tamy mpiara-manompo nanao voaloha lista ty fanompoa ani-Jehovah rey anakilahinay rey.
Nameani-Jehovah ze raha iaby nilànay avao zahay liany nitezànay ani-ananay reo. Mazava ho azy fa niezaky nanao ze vitako koa aho. Nampianatsy ahy tsy handanilany drala fahatany ty raha niainako tanaty ala any tamy zaho nimpisava lala manoka sady mbo tsy nanambaly. Fe ndre niezaky nanao akory aza zahay, le tsy nana avao koa kindraiky. Lafa amy fotoa rey, le natoky aho hoe hanampy anay Jehovah. Nisy aly, ohatsy, ta Suriname tao tanelanelani-1986 noho 1992. Tena sarotsy ty nahazo ty raha nilà tamy fiaina andavanandro tamy fotoa zay. Fe nanome ze raha nilànay avao Jehovah.—Mat. 6:32.
LAFA MANDINIKY TY FIAINAKO AHO
Ankavia mana ankavana: Zahay amy Ethel valiko
Ethniël, anakilahinay voalohany iny, miaraky amy Natalie valiny
Giovanni, anakilahinay faharoe iny, miaraky amy Christal valiny
Nikarakara anay avao Jehovah tamy fiainanay, sady nanampy anay ho falifaly noho ho afa-po. Tena fitahia bevata ho anay ananay reo, sady falifaly zahay fa afaky niteza an-drozy hanompo ani-Jehovah. Falifaly koa zahay satria nifily hanao fanompoa manontolo andro rozy. Samby nahazo diplômy tamy sekoly ara-baiboly Ethniël noho Giovanni (Sekolini-Mpitory Fanjakà Iny moa ty ikaiha ani-sekoly io henanizao). Samby manompo amy biròni-sampani-Suriname ao rozy henanizao, miaraky amy ty valin-drozy.
Fa antitsy zahay amy Ethel henanizao, fe mbo mazoto miasa ho ani-Jehovah avao satria mpisava lala manoka. Mbo maro raha atao zahay, ka mbo mila fotoa hianara milano avao aho zisiky amy zao! Fe tsy maneny aho. Lafa mandiniky ty fiainako aho, le mieky hoe tena soa ty fanapahan-kevitsy nataoko lafa zaho nifily hanompo manontolo andro tamy zaho mbo nitanora.
a Henteo ty Diarin’ny Vavolombelon’i Jehovah 2002, p. 70.
b Niboaky tamy Mifohaza! 8 Oktobra 1999 ty tantaram-piainani-Willem van Seijl hoe “Mihoatra Noho Izay Nantenaiko ny Zava-misy”