1-2. Manino tsika ro mety hieritseritsy hoe tsy mamaly ty vavaky ataontsika Jehovah?

 “MIFALIFALEA marè amy Jehovah, le hameany anao ze irini-fonao.” (Sal. 37:4) Tena soa fampitamana zay! Fe tokony hitamà va zany tsika hoe avy le hameani-Jehovah antsika iaby ze raha angatahintsika? Manino tsika ro mametraky ani-fanontanea zay? Diniho ohatsy manaraky retoa. Misy ranabavy raiky tsy manambaly mivavaky mba hanatriky Sekolini-Mpitory Fanjakà Iny. Fe mbo tsy nahazo fanasà avao ie tao vitsivitsy afara atoy. Rahalahy tanora raiky toy koa marary mafy, le mangataky amy Jehovah ie mba hanafaky ani-aretiny io amy zay mba hahavita hanampy soa ty fiangona. Fe tsy nety niova mihintsy ty fahasalamany. Ty ani-ray aman-dreny reto koa, mivavaky rozy mba tsy hiala amy fahamarina mihintsy ty anan-drozy. Fe lafa nandeha ty fotoa, le nanapa-kevitsy anan-drozy rey hoe hijano tsy hanompo ani-Jehovah.

² Mety fa nisy fotoa koa iha nangataky raha tamy Jehovah, fe tsy niazonao raha iny. Mety lasa mieritseritsy amy zay iha hoe ty vavaky ataon’olo hafa avao ro valeani-Jehovah fa ty ahinao tsy valeany. Na mety hieritseritsy koa iha hoe nisy raha raty nataonao vasa. Zay mihintsy ty nitsapani-ranabavy Janice. b Naniry mafy hanompo amy Betela rozy morovaly, le niresahin-drozy tamy Jehovah fanirian-drozy zay. Hoy ty asany: “Tena natoky aho hoe ho voakaiky amy Betela any zahay tsy ela tafarani-zay.” Fe mbo tsy nivoakaiky avao rozy, tao maro tafara atoy. Hoy Janice: “Nalahelo aho sady niasa loha. Nieritseritsy aho hoe hay ndre nisy raha nataoko nandiso fanantenà ani-Jehovah. Zaho mba fa nivavaky marerè mikasiky  fanompoa amy Betela any iny. Ka nanino ie ro tsy namaly ty vavaky nataoko?”

3. Ino ty hodinihintsika ato?

³ Mety hisalasala tsika kindraiky hoe vasa mba janjinini-Jehovah avao ty vavaky ataontsika. Ndre ty sisany amy mpanomponi-Jehovah taloha tsy nivaliky rey aza nametraky fanontanea manahaky ani-zay. (Joba 30:20; Sal. 22:2; Hab. 1:2) Ino ty hanampy anao hatòky hoe hijanjy ty vavaky ataonao Jehovah? (Sal. 65:2) Mba hahaizantsika ty valini-fanontanea zay, le ndao tse hovaleantsika fanontanea retoa: 1) Ino ty hataoni-Jehovah? 2) Ino ty raha teani-Jehovah hataontsika? 3) Manino tsika ro mila manova ty raha sisany angatahintsika?

4. Laha hentea ty Jeremia 29:12, ino ty raha ampitamanini-Jehovah?

⁴ Mampitamà Jehovah fa hojanjininy ty vavaky ataontsika. (Vakio Jeremia 29:12.) Tea antsika Ndranaharintsika iny satria tsika manompo azy sady tsy mivaliky aminy. Azo antoky zany hoe tsy maintsy hijanjy antsika ie lafa tsika mivavaky aminy. (Sal. 10:17; 37:28) Fe tsy midika zay hoe hameani-Jehovah antsika iaby ze raha angatahintsika. Mety amy tontolo vaovao any vo ho azontsika ty raha sisany angatahintsika. Mila mandiny zany tsika.

5. Ino ty raha dinihini-Jehovah lafa ie mijanjy ty vavaky ataontsika? Hazavao.

⁵ Dinihini-Jehovah hoe ino ty ifandrambesani-raha angatahintsika iny amy ty fikasàny. (Isaia 55:8, 9) Ino moa ty fikasàni-Jehovah? Teany, ohatsy, laha feno olo mankatò azy noho maneky azy ho Mpitondra ty an-tany etoy. Fe mivola Satana fa tena ho sambatsy ty olombelo laha rozy avao ro manday ty fiainan-drozy. (Gen. 3:1-5) Ka mba hanaporofoa hoe diso raha nivolanini-Devoly zay, le nengani-Jehovah hifanday ty olombelo samby olombelo. Fe lasa miatriky problemo maro tsika henanizao vokatsini-fandaisan’olombelo zay. (Mpito. 8:9) Haintsika fa mbo tsy hangalaky ani-problemo iaby reo Jehovah henanizao. Laha manao ani-zay ie, le mety hieritseritsy ty olo sisany hoe tena soa ty fanjakàn’olombelo satria mahavita mamaha ty problemo mahazo antsika.

6. Manino tsika ro mila matoky hoe tozoro manao raha am-pitiava avao Jehovah sady manao ty rariny?

⁶ Mety tsy hitovy ty fomba amaleani-Jehovah ty vavaky ataontsika, ndre mitovy aza ty raha angatahintsika. Lafa narary mafy, ohatsy, Hezekia Mpanjaka, le nisoloho tamy Jehovah ie mba hanampy azy ho salama soa ndraiky. Namaly azy Jehovah ka nijanga vatany ie. (2 Mpanj. 20:1-6) Fe lafa apostoly Paoly nisoloho tamy Jehovah mba hangalaky “fatiky amy nofotsiny” ao, mety ho arety nampijaly azy vasa io, le tsy nalàni-Jehovah raha iny. (2 Kor. 12:7-9) Eritsereto koa ty raha niseho tamy apostoly Jakoba noho Petera. Samby niteani-Heroda Mpanjaka hovonoa rozy roe lahy. Nivavaky ho an-drozy ty fiangona. Fe nimaty Jakoba, fa Petera navotani-anjely raiky zay. (Asa. 12:1-11) Mety hieritseritsy amy zay tsika hoe: ‘Nanino zany Petera ro navotani-Jehovah fa tsy Jakoba?’ Tsy miresaky ani-zay ty Baiboly. c Ty raha azontsika antoky avao le hoe mety iaby ze raha ataoni-Jehovah sady “sanatria azy ty hanao raha tsy rariny.” (Deot. 32:4) Haintsika koa hoe samby nahazo hatò tamy Jehovah, Petera noho Jakoba. (Apok. 21:14) Mety tsy araky ty ieritseretantsika azy kindraiky ty fomba amaleani-Jehovah ty vavaky ataontsika. Fe ndre zay, le tsy ataontsika mampiasa loha antsika marè ty fomba teani-Jehovah hamalea ty vavaky ataontsika, satria matoky tsika hoe tozoro manao raha am-pitiava avao Jehovah sady manao ty rariny.​—Joba 33:13.

7. Ino ty raha tokony iezahantsika, le ino ty antony?

 ⁷ Miezaky tsika mba tsy hampitaha ty raha iainantsika amy ty ahin’olo hafa. Mety hangataky amy Jehovah, ohatsy, tsika mba hanampy antsika amy fomba miavaky, fe mety tsy hanao ani-zay ie. Rentsika anefa lafa afara atoy hoe nisy olo hafa nangataky raha mitovy amy nangatahintsika iny, fe nameani-Jehovah. Zay mihintsy ty raha nahazo ani-ranabavy Anna. Nivoani-kansera Matthew valiny, le nivavaky Anna mba ho afaky aretini-valiny io. Nisy ranabavy roe fa be mandilatsy ani-valiny io koa nivoani-kansera tamy fotoa zay. Nivavaky mafy ho an-drozy koa Anna sady nivavaky ho ani-Matthew. Lafa nandeha ty fotoa le nijanga ranabavy roe rey, fa Matthew nimaty. Nieritseritsy amy zay Anna hoe Jehovah mihintsy ro nanampy ani-ranabavy roe rey ho salama soa. Fe laha zay ie, nanino zany ie ro tsy namaly ty vavaky nataoni-Anna ho ani-valiny? Mazava ho azy fa tsy haintsika hoe ino ty tena nahavy ani-ranabavy roe rey ho janga. Fe haintsika fa hanafaky ty raha iaby mampijaly antsika Jehovah, sady fa tsy lininy ty hamelo ani-namany fa nimaty rey.​—Joba 14:15.

8. a) Laha hentea ty Isaia 43:2, akory ty anampeani-Jehovah antsika? b) Manino ty vavaky ro manampy antsika lafa miatriky raha sarotsy tsika? (Henteo ty video hoe Manampy Anay Hiaritsy ty Vavaky.)

⁸ Hanampy antsika avao Jehovah. Be fitiava Jehovah Babantsika ka tsy teany ty mahita antsika mijaly. (Isaia 63:9) Fe ndre zay, le tsy sakanany raha sarotsy mahazo antsika rey. Azo ampitovizy amy vavarano na lelanafo raha rey. (Vakio Isaia 43:2.) Fe mampitamà ie hoe hampeany ‘hitsàky’ ani-raha rey tsika. Sady ndre ino ndre ino raha sarotsy mahazo antsika henanizao, le hataony ze hahavy antsika ho afaky manompo azy avao. Ameani-Jehovah antsika koa ty fanahiny mahery mba hanampea antsika hiaritsy. (Lioka 11:13; Fil. 4:13) Afaky matoky zany tsika fa hameany antsika ze raha tena ilàntsika mba hahavitantsika miaritsy noho tsy mivaliky mihintsy. d

9. Laha hentea ty Jakoba 1:6, 7, manino tsika ro mila matoky hoe hanampy antsika Jehovah?

⁹ Teani-Jehovah hatòky azy tsika. (Heb. 11:6) Mety mahatsapa tsika kindraiky hoe sarotsy marè ty raha mahazo antsika ka atao raha tsy ho vitantsika ty hiaritsy azy. Mety hanomboky hisalasala mihintsy aza tsika hoe tena hanampy antsika vatany va Jehovah. Fe manome toky antsika ty Baiboly fa afaky ‘hahavita hanganiky lakorobe’ tsika lafa eo ty fanahi-Ndranahary. (Sal. 18:29) Soa zany laha tsy engantsika hitombo anatintsika ao ty fisalasalà, fa tokony hivavaky tsika sady hatòky tanteraky hoe hamaly ty vavaky ataontsika Jehovah.​—Vakio Jakoba 1:6-8.

10. Manomeza ohatsy mampiseho hoe mila manao raha mifanaraky amy vavaky ataontsika tsika.

¹⁰ Teani-Jehovah tsika laha manao raha mifanaraky amy vavaky ataontsika iny. Eritsereto, ohatsy, hoe misy rahalahy raiky mangataky amy Jehovah mba hanampy azy hahazo andro tsy hiasà mba hahafahany manatriky fivoriambeni-vondrom-paritsy. Akory ty mety hamaleani-Jehovah ani-vavaky io? Mety hameany ze herim-po ilàny rahalahy io mba hahafahany miresaky amy ty mpampiasa azy. Fe mety mbo mila mamonjy ani-mpampiasa azy iny tse rahalahy io, le mangataky aminy. Mety mila mampimpolimpoly ty fangatahany ie. Mety hifanakalo andro iasà amy mpiaraky miasa aminy mihintsy aza ie. Laha ilà aza, le mety azony atao ty mifanaraky hoe tapahy ty karamany amy fotoa tsy iasàny reo.

11. Manino tsika ro tokony hivavaky matetitetiky mikasiky ty raha mampiasa loha antsika?

 ¹¹ Teani-Jehovah tsika laha mivavaky matetiky mikasiky ty raha mampiasa loha antsika. (1 Tes. 5:17) Hitantsika tamy raha nivolanini-Jesosy iny fa mety tsy avy le hivaly eo no ho eo ty sisany amy raha angatahintsika. (Lioka 11:9) Ka kivy zany! Mivavaha amy fo le anovo matetitetiky raha zay. (Lioka 18:1-7) Laha tsy mieny mivavaky mikasiky ani-raha iny tsika, le asehontsika amy Jehovah hoe tena vatan-draha amintsika raha angatahintsika iny. Asehontsika koa amy zay fa matoky tsika hoe mahavita manampy antsika Jehovah.

12. a) Ino ty raiky amy fanontanea tokony hoeritseretintsika mikasiky ty raha angatahintsika, le ino ty antony? b) Ino ty azontsika atao mba hahazoa antoky hoe manaja ani-Jehovah tsika lafa mivavaky? (Henteo ty efajoro hoe “ Hita amy ty Raha Angatahiko va hoe Manaja ani-Jehovah Aho?”)

¹² Laha tsy azontsika raha nangatahintsika tamy vavaky iny, le mety azontsika atao ty mametraky ani-fanontanea telo retoa. Voalohany: ‘Nety avao va raha nangatahiko iny?’ Mieritseritsy tsika matetiky hoe haintsika ze hahasoa antsika. Fe mety tsy tena mahasoa antsika raha angatahintsika iny. Laha mivavaky mikasiky problemo raiky, ohatsy, tsika le mety mbo misy vahaolana soa marè mandilatsy ani-azy nangatahintsika iny ty any. Mety tsy hifanaraky amy sitraponi-Jehovah koa ty raha sisany angatahintsika. (1 Jaona 5:14) Eritsereto ndraiky moa ohatsini-mpivaly niresahintsika taloha teny iny. Nangataky amy Jehovah rozy mba tsy hiala amy fahamarina mihintsy ty anan-drozy. Atao raha nety soa raha nangatahin-drozy io. Fe tsy hiforosè olo hanompo azy Jehovah. Teany laha tsika kiraidraiky mihintsy ro mifily hanompo azy, tafilitsy amy zay koa anakintsika reo. (Deot. 10:12, 13; 30:19, 20) Soa kokoa zany  ty ray aman-dreny laha mangataky amy Jehovah mba hanampy an-drozy hahay hidosiky ty foni-anan-drozy, amy zay ajà iny mba ho tea ani-Jehovah noho ta hinama Aminy.​—Ohab. 22:6; Efes. 6:4.

13. Laha hentea ty Hebreo 4:16, ombia Jehovah ro hanampy antsika? Hazavao.

¹³ Ty fanontanea faharoe tokony hoeritseretintsika le hoe: ‘Zao va ty fotoa mety amy Jehovah mba hamalea ani-vavaky nataoko iny?’ Mety mahatsapa tsika hoe mila valiny malaky vavaky nataontsika iny. Fe laha ty marina, haini-Jehovah ty fotoa mety hanampea antsika. (Vakio Hebreo 4:16.) Lafa tsika tsy avy le mahazo valiny, le mety hieritseritsy tsika hoe ‘Aha’ ty valin-tenini-Jehovah. Kanefa mety ta hanao ho zao ie hoe ‘Linaso tse.’ Eritsereto ndraiky moa ohatsini-rahalahy raiky tanora narary mafy taloha eny iny. Nivavaky ie mba hafahini-Jehovah arety mahazo azy iny. Laha nanao fahagagà Jehovah mba hitahà ani-rahalahy iny, le mety hivola Satana hoe: ‘Aia fa ie nitahànao io mahavy azy mbo manompo anao io!’ (Joba 1:9-11; 2:4) Ankoatsini-zay, fa nanondro fotoa Jehovah mba hanafahany ty arety iaby. (Isaia 33:24; Apok. 21:3, 4) Ka zisiky hiaviani-fotoa zay, le tsy afaky mitamà tsika hoe hanao fahagagà Jehovah mba hanafaha ty aretintsika. Zao zany ty tokony ho nangatahini-rahalahy iny amy Jehovah: Mangataky aminy mba hanome hery noho fiadanan-tsay azy mba hahafahany miaritsy ani-arety mahazo azy iny, sady hahavitany tsy hivaliky fa hanompo a-Ndranahary avao.​—Sal. 29:11.

14. Ino ty ianaranao baka amy tantarani-Janice?

¹⁴ Eritsereto ndraiky moa tantarani-Janice, azy nivavaky satria naniry hanompo amy Betela any iny. Dimy tao tafara atoy ie vo nahay hoe kay namaly ty vavaky nataony avao Jehovah fe tamy fomba hafa fa tsy nifanaraky amy ty nieritseretany azy. Hoy ty asany: “Nampiasani-Jehovah  fotoa io mba hampianara ahy raha maro noho hanampea ahy hana toetsy tena soa. Nila nampitombo ty fatokisako azy aho. Nila nanasoa ty fianara am-batako koa aho, sady nila nahatiaro hoe afaky ho falifaly avao aho ndre aia aia ty anompoako ani-Jehovah.” Nasà hanao ty asani-faritsy Janice morovaly tafarani-zay. Hoy Janice lafa ie mandiniky ty lasa: “Namaly ty vavaky nataoko Jehovah, fe tsy araky ty nieritseretako azy. Elaela vo nihitako ty hasoani-valim-bavaky nameani-Jehovah ahy. Tena misaotsy azy aho satria afaky nahatsapa ty fitiavany noho ty hasoam-panahiny.”

15. Manino tsika kindraiky ro tsy de mila miresaky raha voafaritsy loatsy lafa mivavaky? (Henteo koa sary reo.)

¹⁵ Toy ty fanontanea fahatelo tokony hoeritseretintsika: ‘Mangataky raha voafaritsy marè va aho lafa mivavaky?’ Soa aloha ty miresaky raha voafaritsy soa lafa tsika mivavaky. Fe mety ho soa koa kindraiky laha mba tsy de faritantsika marè ty raha angatahintsika, amy zay ho haintsika hoe ino marina ty teani-Jehovah ho antsika. Diniho moa ohatsini-ranabavy tsy manambaly nivavaky satria ta hanatriky Sekolini-Mpitory Fanjakà iny. Maniry hanatriky ani-sekoly io ie amy zay mba afaky manompo amy faritsy mila mpitory maro. Fe tsy hoe hivavaky mba ho voasa amy sekoly io avao ie, fa azony atao koa ty mangataky amy Jehovah mba hanampy azy hahita fomba hafa hampitomboany ty fanompoany. (Asa. 16:9, 10) Bakeo ie afaky manao raha mifanaraky amy vavaky ataony iny ka manontany mpiandraikitsini-faritsy vasa mba misy fiangona mila mpitory fanampiny avao ty marìny eny. Na azony atao koa ty manoratsy amy biròni-sampana any, le manontany hoe aia ty faritany mila mpitory maro. e

16. Ino ty raha azontsika atokisa?

¹⁶ Nihitantsika tato fa afaky matoky tsika hoe hamaly ty vavaky ataontsika Jehovah, sady hataony araky ty rariny noho am-pitiava raha zay. (Sal. 4:3; Isaia 30:18) Kindraiky, le mety tsy hahazo ani-valiny tamanintsika iny tsika. Fe tsy midika zay hoe tsy dareani-Jehovah ty vavaky ataontsika. Tsy hanao ani-zay mihintsy ie. Tena tea antsika ie ka tsy hanary antsika mihintsy. (Sal. 9:10) Miezaha ‘hatoky azy avao’ zany, le aboraho aminy ty am-ponao ao.​—Sal. 62:8.