1-2. a) Manino apostoly Paoly ro nivola hoe toetsy “tena bevata” ty fitiava? b) Ino iaby ty fanontanea hodinihintsika?

 LAFA apostoly Paoly niresaky mikasiky finoa, fanantenà, noho fitiava, le nivola ie fa ty ‘fitiava ro bevata marè amy toetsy reo.’ (1 Kor. 13:13) Manino Paoly ro nivola ani-zay? Fa tsy hila finoa na fanantenà sasy tsika amy hoavy satria fa ho tanteraky raha tamanintsika mikasiky tontolo vaovao ampitamani-Ndranahary iny. Fe mbo mila tea ani-Jehovah noho ty olo hafa avao tsika. Hihamitombo avao zany ty fitiavantsika an-drozy mandrakizay.

² Mila manam-pitiava tsika ndre amy zao ndre amy hoavy. Fe manino tsika ro tokony hifankatea? Akory ty ampisehoantsika hoe tena mifankatea tsika? Le ino ty azontsika atao mba tsy hihena mihintsy ty fifankatiavantsika? Handiniky ani-fanontanea telo reo tsika ato.

3. Ino ty antony mahavy antsika tokony hifankatea?

³ Manino tsika ro tena mila mifankatea? Maromaro ty antony, fa anisani-zay toy: Fitiava io ro ahaiza fa tena Kristiana tsika. Nivola tamy apostoliny rey Jesosy hoe: “Laha mifankatea nareo, le zay ro hahaizan’olo iaby fa mpianatsiko nareo.” (Jaona 13:35) Ankoatsini-zay, lasa hiharo raiky koa tsika laha mifankatea. ‘Taly tena soa mampiharo antsika’ hoasani-Paoly ty fitiava. (Kol. 3:14) Fe ndre eo raha iaby reo, le mbo misy antony raiky tena bevata toy mahavy antsika tokony hifankatea. Ino zay? Zao ty nisoratini-apostoly Jaona ho ani-rahalahy  noho anabaviny rey: “Tsy maintsy tea ty rahalahiny koa ze tea a-Ndranahary.” (1 Jaona 4:21) Laha mifankatea zany tsika, le asehontsika hoe tea a-Ndranahary tsika.

4-5. Manomeza ohatsy mampiseho hoe mifandramby ty fitiavantsika a-Ndranahary noho ty fitiavantsika ani-rahalahy noho anabavintsika reo.

⁴ Ino ty ifandrambesani-fitiavantsika a-Ndranahary amy ty fitiavantsika ani-rahalahy noho anabavintsika reo? Toy misy ohatsy: Eritsereto moa ty fifandrambesani-fontsika noho ty faritsy hafa amy vatantsika. Lafa teani-dokotera ho hay hoe salama soa va ty fontsika sa marary, le amy tanantsika eo avao ie ro mijanjy ty fidobokini-fontsika. Ino ty ianarantsika baka amy ohatsy io?

⁵ Lafa mandiniky ty fidobokini-fontsika ty dokotera, le lasa hainy hoe manao akory zay ty fontsika. Manahaky ani-zay koa fa lafa tsika mandiniky ty fitiavantsika olo, le lasa haintsika hoe manao akory zay ty fitiavantsika a-Ndranahary. Laha hitantsika hoe nihena ty fitiavantsika ty mpiara-manompo, le mampiseho zay fa nihanihena koa ty fitiavantsika a-Ndranahary. Fe laha asehontsika avao hoe teantsika ty mpiara-manompo amintsika, le porofo bevata zay fa mbo tena tea a-Ndranahary tsika.

6. Manino tsika ro mila manao raha malaky lafa hitantsika hoe nihena ty fitiavantsika ani-rahalahy noho anabavintsika reo? (1 Jaona 4:7-9, 11)

⁶ Mila manao raha malaky tsika lafa hitantsika hoe nihena ty fitiavantsika ani-rahalahy noho anabavintsika reo. Ino ty antony? Satria midika zay fa tsy mifandramby soa amy Jehovah tsika. Manaporofo ani-zay ty raha nivolanini-apostoly Jaona lafa nampitiaro antsika ie hoe: “Ze tsy tea ty rahalahiny azy hitany io, le tsy afaky ho tea a-Ndranahary azy tsy hitany iny.” (1 Jaona 4:20) Ino ty ianarantsika baka amy zay? Tsy ho falifaly amintsika mihintsy Jehovah laha tsy ‘mifankatea’ tsika.​—Vakio 1 Jaona 4:7-9, 11.

7-8. Akory ty ampisehoantsika hoe mifankatea tsika?

⁷ Hitantsika mimpolimpoly amy Safà-Ndranahary ao avao didy toy: “Mifankatiava nareo.” (Jaona 15:12, 17; Rom. 13:8; 1 Tes. 4:9; 1 Pet. 1:22; 1 Jaona 4:11) Fe fihetseham-po anatintsika any ty fitiava ka tsy misy olo afaky mahita azy. Ka akory zany ty ampisehoantsika hoe teantsika rahalahy noho anabavintsika reo? Hita amy ty raha volanintsika noho ataontsika raha zay.

⁸ Maro ty fomba azontsika ampisehoa amy rahalahy noho anabavintsika reo hoe teantsika rozy. Retoa misy ohatsy vitsivitsy: “Samby ie mivola ty marina amy ty namany iaby.” (Zak. 8:16) “Milongoa soa avao nareo.” (Mar. 9:50) “Mifanomeza voninahitsy, le ao nareo ro ho voalohany hanome voninahitsy ty hafa.” (Rom. 12:10) ‘Rambeso soa ty hafa.’ (Rom. 15:7) “Mahaiza avao ... mifanenga hadisoa.” (Kol. 3:13) “Miezaha avao hifanampy lafa misy raha sarotsy manavesatsy.” (Gal. 6:2) “Miezaha avao hifampionona.” (1 Tes. 4:18) “Miezaha ... hifanampy avao.” (1 Tes. 5:11) “Mifampivavaha.”​—Jak. 5:16.

9. Manino ty fampahereza ty hafa ro anisani-fomba tena soa ampisehoa fitiava? (Henteo koa sary io.)

⁹ Ndao tsika handiniky fomba raiky azontsika ampisehoa hoe teantsika ty olo hafa. Nivola Paoly hoe: “Miezaha avao hifampionona.” Manino ty fampionona ty hafa ro anisani-fomba tena soa mba hampisehoa hoe teantsika rozy? Mivola ty boky raiky mikasiky Baiboly fa ty safà hoe “mampionona” nampiasani-Paoly io le midika hoe “mitsanga anilan’olo raiky eo mba hampahery azy lafa ie miatriky raha sarotsy.” Ka lafa mampahery  mpiara-manompo tratsini-raha sarotsy zany tsika, le manampy azy tsy ho kivy fa hanohy hanompo ani-Jehovah avao. Saky mampahery rahalahy na anabavy raiky tsika, le asehontsika aminy hoe teantsika ie.​—2 Kor. 7:6, 7, 13.

10. Ino ty ifandrambesani-hoe miferinay olo noho mampahery?

¹⁰ Tena mifandramby ty hoe miferinay olo noho manome fampahereza. Amy fomba akory? Lafa misy olo mahaferinay olo, le ta hampahery an’olo iny ie sady miezaky manao raha mba hanampea azy. Ka lafa miferinay olo zany tsika le lasa voatosiky hampahery azy. Nanazava mikasiky ani-zay mihintsy Paoly. Nivola ie fa miferinay olo Jehovah le zay ro mahavy azy mampahery an-drozy. Nivola mihintsy aza ie hoe “Babani-fiferinesa noho Ndranaharini-fampahereza iaby” Jehovah. (2 Kor. 1:3) Mampiasa ty safà hoe “fiferinesa” Paoly eto mba hivolana ty fihetseham-po tsapa lafa malahelo olo. Nikaihy hoe Baba na Loharanoni-fiferinesa zany Ndranahary satria tena miferinay olo ie. Le zay ro mahavy azy mampahery antsika “amy ty fijalea iaby mahazo antsika.” (2 Kor. 1:4) Mahatiaro velombelo ty olo raiky marandrano lafa mino rano malio baka amy loharano. Manahaky ani-zay koa Jehovah. Mamelombelo noho mampahery ani-ze mijaly ie. Ino ty azontsika atao mba hahay miferinay olo manahaky ani-Jehovah tsika sady hampahery an-drozy? Manao ani-zay tsika laha miezaky hana ani-ze toetsy hanampy antsika hahay miferinay olo noho hampahery an-drozy. Ino ty sisany amy toetsy reo?

11. Laha hentea ty Kolosianina 3:12 noho 1 Petera 3:8, ino koa ty toetsy tokony hananantsika mba hahavy antsika ho tea olo noho hampahery an-drozy avao?

¹¹ Ino ty hanampy antsika hifankatea avao ka ‘hifampahery avao’ sanandro? Mila miezaky hahay hiara-ory amin’olo tsika, hifankatea manahaky mpirahalahy, sady ho soa fanahy. (Vakio Kolosianina 3:12; 1 Petera 3:8.) Manino toetsy reo ro hanampy antsika? Lafa tsika mahay miferinay ani-mpiara-manompo amintsika reo noho tena midary an-drozy, le lasa tsy linintsika ty hampahery an-drozy lafa rozy miatriky raha sarotsy. Zay mihintsy nivolanini-Jesosy iny hoe: “Ze mameno ty fon’olo ro volanini-vavany. Ty olo soa le mamoaky ze raha soa hajariny am-pony ao.” (Mat. 12:34, 35) Tokony hampahery ani-ze rahalahy noho anabavintsika mila fampahereza zany tsika. Zay ty fomba tena soa ampisehoantsika hoe teantsika rozy.

12. a) Manino tsika ro mila mitandrina avao mba tsy hihena ty fifankatiavantsika ? b) Ino ty fanontanea hodinihintsika?

¹² Teantsika laha ‘mifankatea avao’ tsika. (1 Jaona 4:7) Fe soa ho tiarontsika fa nampitandrina Jesosy hoe “hihamanintsy ty fitiavan’olo maro.” (Mat. 24:12) Tsy nivola aloha Jesosy hoe lasa tsy hifankatea sasy ty ankamaroani-mpianatsiny. Fe tokony hitandrina avao tsika satria tsy manam-pitiava ty olo amy tontolo toy eto ka mety hifindra amintsika raha zay. Tokony hotiarovintsika avao raha zay lafa tsika mandiniky ani-fanontanea bevata toy: Akory ty hahaizantsika hoe mbo tena tea ani-rahalahy noho anabavintsika reo avao tsika?

13. Akory ty hahaizantsika hoe mbo tena tea ani-rahalahy noho anabavintsika reo avao tsika?

¹³ Akory ty hahaizantsika hoe mbo tena tea ani-rahalahy noho anabavintsika reo avao tsika? Soa laha dinihintsika hoe manao akory ty fihetsikintsika lafa misy raha sisany miseho. (2 Kor. 8:8) Niresaky ty raiky amy raha rezay, ohatsy, apostoly Petera. Hoy ty asany:  “Mandilatsy ty raha iaby, le mifankatiava marè, satria mandimboky fahotà maro biby ty fitiava.” (1 Pet. 4:8) Manao akory zany ty fihetsikintsika lafa misy mpiara-manompo manao hadisoa na manao raha mampalahelo antsika? Mianky amy zay ro ahaizantsika laha mbo tena tea an-drozy tsika.

14. Laha hentea ty 1 Petera 4:8, karaza fitiava manao akory ro mila ananantsika? Manomeza ohatsy.

¹⁴ Ndao moa hodinihintsika soa raha nivolanini-Petera reo. Resahiny amy tampany voalohany amy andininy faha-8 io zao hoe karaza fitiava manao akory ro mila ananantsika. Mila ‘mifankatea marè’ hoasany tsika. Laha adika ara-bakiteny ty safà hoe “marè” nampiasani-Petera eto le midika hoe “manampatsy.” Asehony amy tampany faharoe amy andininy io amy zay hoe ino ty vokany laha tena tea ty olo hafa tsika. Manampy antsika handimboky ty fahotàni-rahalahy noho anabavintsika reo raha zay. Eritsereto hoe misy latabatsy raiky feno loadoaky. Azo atao zao ty mangalaky tapatapa-kazo le manampitampy ani-raha rey. Tsy raiky na roe avao ty tampenantsika fa iaby. Manahaky ani-zay koa fa laha tea marè ani-rahalahy noho anabavintsika reo tsika, le afaky  handimboky na hanenga ty hadisoan-drozy. Tsy hadisoa raiky na roe avao ro engantsika fa “fahotà maro biby” mihintsy.

15. Afaky hahavita ino tsika laha tena tea ani-rahalahy noho anabavintsika reo? (Kolosianina 3:13)

¹⁵ Tsy tokony hihena mihintsy ty fitiavantsika ty mpiara-manompo. Hahavita hanalino ty hadisoan-drozy tsika laha manao ani-zay ndre mety ho sarotsy amintsika aza. (Vakio Kolosianina 3:13.) Laha manenga hadisoa tsika, le asehontsika hoe tena tea an-drozy tsika sady ta hampifalifaly ani-Jehovah. Ino koa ty hanampy antsika hahavita hanenga hadisoa sady tsy ho mora meloky lafa misy manao raha tsy mety amintsika?

16-17. Ino koa ty hanampy antsika tsy hifantoky amy ty hadisoa kelikely nataoni-hafa? Manomeza ohatsy. (Henteo koa sary io.)

¹⁶ Mifantoha amy toetsy soa ananani-rahalahy noho anabavinao fa ka mifantoky amy toetsy ratin-drozy. Diniho zao. Eritsereto hoe miaraky amy rahalahy noho anabavy maromaro iha. Tena soasoa fiarahanareo iny. Lafa tampitsy amy zay raha iny, le miaraky mangalaky sary nareo. Tsy soa sary voalohany iny, farany nangalaky sary roe fanampiny iha. Lasa mana sary telo zany iha. Fe lafa manenty ani-raha rey iha, le ambinao hoe misy rahalahy raiky tsy homehy amy sary raiky. Hataonao akory sary iny? Azo antoky fa hofafànao raha iny satria mbo mana sary roe hafa miaraky  amin-drozy iaby iha, le homehy rahalahy iny anatini-sary rey ao.

¹⁷ Azontsika ampitovizy amy sary ajarintsika rey ty fitiarovantsika raha. Soasoa avao matetiky ty fotoa iarahantsika amy rahalahy noho anabavintsika reo. Fe manao akory laha misy rahalahy na anabavy mivola na manao raha mampalahelo antsika, tamy raiky amy fotoa rey? Ino ty tokony hataontsika? Tokony hiezaky hamafa ani-raha zay tsika, manahaky ty ataontsika amy sary tsy nety iny. (Ohab. 19:11; Efes. 4:32) Afaky manalino ty hadisoa kelikely ataoni-mpiara-manompo amintsika tsika satria mbo misy raha soasoa maro tiarontsika hoe niarahantsika taminy. Teantsika laha reo avao ro tiarontsika.

18. Ino ty hevitsy bevata nidinihintsika tamy lahatsoratsy toy ato mikasiky fitiava?

¹⁸ Manino ro tsy teantsika hihena mihintsy ty fifankatiavantsika? Nihitantsika tato fa laha tea ty rahalahy noho anabavintsika tsika, le porofo zay hoe tea ani-Jehovah tsika. Ka akory ty ampisehoantsika hoe teantsika ty mpiara-manompo? Manao ani-zay tsika laha mampahery an-drozy. Hahavita ‘hifampahery avao’ tsika laha miferinay olo. Ka ino ty azontsika atao mba tsy hihena mihintsy ty fifankatiavantsika? Manenga ty hadisoani-rahalahy noho anabavintsika reo tsika ndre mety ho sarotsy amintsika aza.

19. Manino ro tena ilà ty mifankatea henanizao?

¹⁹ Henanizao mihintsy tsika ro tena mila mifankatea. Ino ty antony? Nivola Petera hoe: ‘Fa marìny ty farani-raha iaby zao. Soa nareo laha ... mifankatea marè.’ (1 Pet. 4:7, 8) Satria fa marìny ty farani-tontolo raty toy, ino ty raha fa ampoizintsika? Zao ty nivolanini-Jesosy lafa ie niresaky tamy mpianatsiny rey: “Ho halani-firenena iaby nareo satria manday ty anarako.” (Mat. 24:9) Mba hahafahantsika miaritsy fankalaina zay, le mila miezaky hiharo raiky avao tsika. Laha tsika tea ani-rahalahy noho anabavintsika reo avao, le tsy ho vitani-Satana mihintsy ty hampizarazara antsika satria ‘taly tena soa mampiharo antsika’ ty fitiava.​—Kol. 3:14; Fil. 2:1, 2.