1. Ino ty raha nivolanin’Isaia mpaminany tamy Israelita rey?

 NIVOLA Isaia mpaminany hoe “Ndranaharini-fahamarina” Jehovah. Laha adika ara-bakiteny ty safà hoe “fahamarina” le midika hoe “amena.” (Isaia 65:16, f.a.p.) Ty hoe “amena” le midika hoe “ho tanteraky vatany zay” na “ho tò vatany zay.” Mimpolimpoly amy Baiboly ao safà io mba hanomeza toky antsika hoe azo antoky ty raha volanini-Jehovah na Jesosy, le ho zay koa ty raha ataon-drozy. Zao zany ty tean’Isaia hambara tamy Israelita rey: Lafa mampitamà raha raiky Jehovah, le tsy maintsy tanteraky raha iny. Ty antony, satria tozoro mitanjaky ty safàny avao Jehovah.

2. Manino tsika ro afaky matoky fa ho tanteraky ty raha ampitamanini-Jehovah antsika amy hoavy, le ino ty fanontanea hodinihintsika?

² Afaky matoky koa va tsika hoe ho tanteraky ty raha ampitamanini-Jehovah mikasiky ty hoavy? Tokotokony ho 800 tao tafara ty niainan’Isaia, le nanazava apostoly Paoly hoe manino tsika ro afaky matoky fa ho tanteraky ty raha ampitamani-Ndranahary. Hoy ty asany: ‘Tsy mahay mavandy Ndranahary.’ (Heb. 6:18) Eritsereto tse zao. Tsy afaky hamoaky ranomamy noho masira ty loharano raiky. Fa na ie mamy na masira. Manahaky ani-zay koa Jehovah. Ie ro Loharanoni-fahamarina ka tsy afaky havandy mihintsy ie. Afaky matoky tanteraky ty raha volanini-Jehovah zany tsika, anatini-zay ty raha iaby ampitamaniny antsika amy hoavy. Handiniky ani-fanontanea retoa tsika ato: Ino ty raha nampitamanini-Jehovah hoe hameany antsika amy hoavy? Le akory ty nanomezani-Jehovah  toky antsika fa tsy maintsy ho tanteraky ty raha nampitamaniny?

3. a) Ino ty fampitamana tena teani-mpanomponi-Jehovah? (Apokalypsy 21:3, 4) b) Ino ty raha volanin’olo sisany lafa iresahantsika ani-fampitamana io?

³ Misy fampitamana raiky zay tena teani-mpanomponi-Jehovah iaby. Hodinihintsika moa raha io. (Vakio Apokalypsy 21:3, 4.) Mampitamà Jehovah hoe ndraiky andro any, le “tsy hisy sasy ty fahafatesa, sady tsy hisy sasy ty alahelo na ty fitaraina na ty raha mahararirary.” Mampiasa ani-andinin-teny io ty ankamaroantsika mba hampahereza ty olo itoriantsika, le asehontsika an-drozy hoe hanao akory ty fiaina amy Paradisa ao. Manao akory ty olo sisany lafa resahintsika amin-drozy fampitamana io? Mety hanao ho zao rozy hoe: “Soa biby aloha raha reo, fe hisy avao va zao?”

4. a) Ino ty raha fa nihaini-Jehovah hoe hiseho amy androntsika zao lafa ie nampitamà Paradisa? b) Ino koa ty nataoni-Jehovah ankoatsini-fampitamana nataony io?

⁴ Lafa Jehovah nampanoratsy ani-fampitamana Paradisa io ani-apostoly Jaona, le hainy fa hiresaky ani-raha io amin’olo hafa tsika lafa mitory ty hafatsy mikasiky Fanjakà iny. Hainy koa fa ho sarotsy amy ankamaroan’olo ty hino hoe tena hiova manahaky an’io ty fiaina amy hoavy. (Isaia 42:9; 60:2; 2 Kor. 4:3, 4) Ka manao akory ty hanampeantsika ty olo hafa mba hatòky hoe tena ho tanteraky fitahia resahini-Apokalypsy 21:3, 4 io? Le ino ty azontsika atao mba hahavy antsika tena hatòky ani-Jehovah noho ty raha ampitamaniny? Tsy nivola am-bava avao Jehovah lafa nampitamà ani-raha soasoa io. Nanome porofo koa ie mba hanampea antsika hatòky hoe ho tanteraky raha nampitamaniny io. Ino porofo nameany reo?

5. Ino ty andinin-teny mahavy antsika hatòky ty fampitamana-Ndranahary, le ino ty volanini-andininy reo?

⁵ Hitantsika amy tohini-andinin-teny iny retoa ty antony mahavy antsika matoky hoe ho tanteraky ty fampitamanani-Jehovah Paradisa. Ho zao ty volaniny ao: “Hoy Azy nipetraky tanabo sezim-panjakà teo iny: ‘Ataoko vaovao ty raha iaby.’ Hoy koa ie: ‘Sorato fa azo antoky sady marina safà reo.’ Mbo nivola tamiko koa ie hoe: ‘Fa tanteraky raha reo! Zaho ro Alfa noho Omega, ty fanomboha noho fiafarà.’”​—Apok. 21:5, 6a.

6. Manino fanomezan-toky amy Apokalypsy 21:5, 6 ao reo ro mahavy antsika tena hatòky ty fampitamana-Ndranahary?

⁶ Manino safà reo ro mahavy antsika tena hatòky ty raha ampitamani-Ndranahary? Ho zao ty volanini-boky Apokalypsy mikasiky andinin-teny reo: “Sahala manao sonia antoky raiky Jehovah, mikasiky ani-fitahia ho avy reo.” b Amy Apokalypsy 21:3, 4 ao io ty raha ampitamani-Ndranahary. Le manao sonia ie amy andininy faha-5 noho 6 eo, mba hanomeza antoky antsika hoe tena ho tanteraky ty raha nampitamaniny. Ndao hodinihintsika soa hoe akory ty anomezani-Jehovah antoky antsika fa azontsika atokisa ie.

7. Ia ty mivola voalohany amy andininy faha-5 ao, le manino ro miavaky raha zay?

⁷ Ho zao ty volani-Ndranahary amy fanombohani-andininy faha-5 eo, lafa nanome toky antsika: “Hoy Azy nipetraky tanabo sezim-panjakà teo iny.” (Apok. 21:5a) Tena miavaky safà reo! Fa manino? Satria intelo avao Jehovah ro miresaky amy bokini-Apokalypsy ao, le raiky amy zay azy eto toy. Tsy naniraky  anjely Jehovah mba hiresaky ani-fanomezan-toky io. Ndre Jesosy aza tsy nampivolaniny ani-raha io. Ty vatatenani-Jehovah mihintsy ro nivola azy! Porofo io fa tena azo atokisa ty raha volaniny afarani-zay. Fa manino? Satria “tsy mahay mavandy” Jehovah. (Tit. 1:2) Hitantsika baka amy zay fa tena ho tanteraky safà vakintsika amy Apokalypsy 21:5, 6 ao io.

8. Ino ty raha volanini-Jehovah mba hanamafisa fa ho tanteraky ty raha nampitamaniny? (Isaia 46:10)

⁸ Bakeo nivola Ndranahary hoe: “Ataoko vaovao ty raha iaby.” (Apok. 21:5) Henteo fa nivola Jehovah hoe “ataoko vaovao ty raha iaby”, fa tsy hoe “hataoko vaovao ty raha iaby.” Amy hoavy aloha Jehovah vo hanova ty raha iaby ho vaovao. Fe laha hentea raha volaniny io le atao raha fa nanova ty raha iaby ie, satria azony antoky fa ho tanteraky ty raha nampitamaniny.​—Vakio Isaia 46:10.

9. a) Ino ty teani-Jehovah hovolany lafa ie nivola hoe “ataoko vaovao ty raha iaby”? b) Hatao akory “lanitsy” noho “tany” henanizao reo?

⁹ Nivola Jehovah hoe: “Ataoko vaovao ty raha iaby.” Ino ty teany hovolany? Laha hentea toko io le misy raha roe hataoni-Jehovah. Voalohany, handrava ani-tontolo raty toy tse Jehovah. Bakeo ie hanory tontolo vaovao. Zao ty volanini-Apokalypsy 21:1: “Fa lasa ty lanitsy taloha noho ty tany taloha.” Ty hoe “lanitsy taloha” le manondro ty fanjakàn’olombelo ambany fahefàni-Satana noho ty demoniany. (Mat. 4:8, 9; 1 Jaona 5:19) Matetiky ty Baiboly mampiasa ty safà hoe “tany” mba hivolana ty olombelo. (Gen. 11:1; Sal. 96:1) Ty hoe “tany taloha” zany le manondro ty olo raty fanahy amy zao. Tsy hanasoa ty “lanitsy” noho ty “tany” henanizao io Jehovah. Horavany tanteraky raha reo. Bakeo hosoloany “lanitsy vaovao noho tany vaovao” rozy, zany hoe fanjakà vaovao hanjaka amy ty olo marina.

10. Ino hataoni-Jehovah vaovao io?

¹⁰ Mivola Jehovah fa hataony vaovao ty raha iaby. (Apok. 21:5) Amy fomba akory? Hitaha ty tany noho ty lanitsy ie, amy zay ho lavorary rozy. Fa nivola Isaia hoe hataoni-Jehovah soasoa manahaky ani-zaridaini-Edena iny tany toy iaby. Hataony vaovao koa tsika ka hafahiny tanteraky ty raha mahararirary antsika. Ho afaky handehandeha ty kilemaina, hahita ty jiky, le haharè ty mareny. Hovelomy mihintsy aza ty maty.​—Isaia 25:8; 35:1-7.

11. Ino ty raha nampanaovini-Jehovah ani-Jaona, le ino ty antony?

¹¹ Ino koa ty raha nivolani-Ndranahary mba hanomeza antoky antsika fa afaky matoky azy tsika? Hoy Jehovah tamy Jaona: “Sorato fa azo antoky sady marina safà reo.” (Apok. 21:5) Tsy nandidy avao Jehovah hoe “sorato”, fa niresahiny koa ty antony hanorata ani-raha rey. Hoy ty asany: “Fa azo antoky sady marina safà reo.” Azo atokisa zany ty raha volani-Ndranahary. Soa avao fa nanoratsy vatany Jaona lafa nampanoraty. Lasa afaky mamaky ty fampitamana-Ndranahary Paradisa tsika henanizao sady afaky mametsivetsy ty fitahia maro mandiny antsika amy hoavy.

12. Nanino Jehovah ro nivola hoe: “Fa tanteraky raha reo”?

¹² Ino ty raha nivolani-Ndranahary tafarani-zay? Nivola ie hoe: “Fa tanteraky raha reo!” (Apok. 21:6) Nanino Jehovah ro nivola hoe fa tanteraky raha nampitamaniny reo? Satria tsy misy mahavita misaka azy tsy hanatanteraky ty sitrapony. Nisy raha zay koa nivolanini-Jehovah mba hanomeza toky antsika fa tena ho tanteraky ty raha nampitamaniny. Ino zay?

13. Nanino Jehovah ro nivola hoe: “Zaho ro Alfa noho Omega”?

¹³ Fa niresahintsika taloha eroy hoe intelo mihintsy Jehovah ro niresaky tamy Jaona tamy fahità. (Apok. 1:8; 21:5, 6; 22:13) Saky niresaky tamy Jaona, Jehovah, le zao avao ty nivolaniny: “Zaho ro Alfa noho Omega.” Alfa io ty safà voalohany amy abidy grika, le omega ty farany. Ka lafa nivola Jehovah hoe “zaho ro Alfa noho Omega”, le teany ho haintsika hoe lafa manomboky manao raha raiky ie, le tsy maintsy ho vitàny zisiky farany raha iny.

14. a) Ombia Jehovah ro nivola hoe “Alfa”, le ombia ie ro sahala hivola hoe “Omega”? Manomeza ohatsy. b) Ino ty fanomezan-toky hita amy Genesisy 2:1-3 ao?

¹⁴ Lafa baka namoro ani-Adama noho Eva, Jehovah, le nambarany an-drozy ty raha teany hatao ho ahin’olombelo noho amy tany toy. Zao ty volanini-Baiboly: “Nitso-drano an-drozy Ndranahary, ka nivola tamin-drozy hoe: ‘Miteraha maro, le mihamaroa ka mamenoa ty tany.’” (Gen. 1:28) Nivolanini-Jehovah tamy fotoa zay hoe ino ty fikasàny ho ani-tany toy noho ho ahin’olombelo. Nanomboky teo ty fikasàny, na “Alfa.” Lafa ho vita tanteraky ty fikasàny, zany hoe fa mameno ani-tany toy ty taranakini-Adama noho Eva mankatò sady fa lasa Paradisa tany toy, le zay ro ho “Omega.” Lafa baka namoro “ty lanitsy noho ty tany voho ty raha iaby aminy eo” Jehovah, le nisy raha zay nivolaniny mba hampisehoa hoe tena ho tanteraky vatany ty fikasàny. Amy Genesisy 2:1-3 ao raha nivolaniny io. (Vakio.) Nivola Jehovah fa masy ty andro fahafito. Ino ty teany hovolany? Midika raha zay fa natokany andro fahafito io mba hanatanteraha ty fikasàny ho ahin’olombelo noho tany toy. Ka lafa nivola ie hoe masy ty andro fahafito, le sahala nivola ie hoe tsy maintsy ho tanteraky ty fikasàny lafa tampitsy andro io.

15. Mety ino ro nahavy ani-Satana hieritseritsy hoe ho vitany ty hisaka ani-Jehovah tsy hanatanteraky ty fikasàny?

 ¹⁵ Lafa tsy nanoriky ty safàni-Jehovah, Adama noho Eva, le lasa mpanota rozy ka namindra ota noho fahafatesa amy ty taranakin-drozy. (Rom. 5:12) Vokany, lasa atao raha nivitani-Satana ty nisaka ani-fikasàni-Jehovah iny hoe hameno ani-tany toy ze olo mankatò sady ho lavorary. Tena nivitani-Satana vatany va ty nisaka ani-Jehovah tsy hanatanteraky ty fikasàny? Mety nieritseritsy Satana hoe tsy ho vitani-Jehovah ty hanatanteraky ty raha nampitamaniny. Mety nieritseritsy koa ie fa hovonoani-Jehovah, Adama noho Eva, le bakeo hamoro mpivaly lavorary hafa ie mba hanatanteraky ty fikasàny ho ahin’olombelo. Fe laha nanao ani-zay Ndranahary, le ho nivola ty Devoly hoe mpavandy ie. Fa manino? Satria fa nivola tamy Adama noho Eva, Jehovah amy Genesisy 1:28 ao hoe hameno ani-tany toy ty taranakin-drozy.

16. Mety ino ro nahavy ani-Satana hieritseritsy hoe ho vitany ty handratiraty ani-Jehovah hoe tsy hahavita hanatanteraky ty fikasàny ie?

¹⁶ Ino koa ty raha mety nieritseretini-Satana hoe hatao-Ndranahary? Mety nieritseritsy vasa ie hoe hengani-Jehovah hanan’anaky avao Adama noho Eva, fe tsy ho lavorary zao mihintsy anany reo. (Mpito. 7:20; Rom. 3:23) Laha zay vatany ty nataoni-Jehovah, le afaky hivola ty Devoly hoe tsy nivitani-Jehovah ty nanatanteraky ty fikasàny. Tsy ho feno olo lavorary zao ambony tany etoy.

17. Akory ty nandaminani-Jehovah ty fanohera nataoni-Satana noho olombelo voalohany rey, le hanao akory ty vokany? (Henteo koa sary io.)

¹⁷ Tsy azoni-Satana sary an’eritseritsy mihintsy ty raha hataoni-Jehovah. Nahita vahaolana tena soa Jehovah mba hanatanteraha ty fikasàny ndre nivaliky aza Satana miaraky amy Adama noho Eva. (Sal. 92:5) Nengani-Jehovah hiteraky avao Adama noho Eva. Nitanteraky raha nivolanini-Jehovah iny lafa nanao ani-zay ie. Tsy mpavandy zao ie. Nasehoni-Jehovah koa hoe lafa misy raha raiky volaniny hoe hataony, le tsy misy afaky misaka azy tsy hanao ani-raha iny. Nataony azo antoky hoe tsy maintsy ho tanteraky ty fikasàny. Amy fomba akory? Nampitamà ie fa hisy “taranaky” hanavotsy ze taranakini-Adama noho Eva tsy mivaliky. (Gen. 3:15; 22:18) Hanome ty ainy taranaky io mba hanavota ty olombelo. Tsy nampoizini-Satana mihintsy raha nataoni-Jehovah io! Fa manino? Satria anisani-fandahara tena feno fitiava ty vilim-panavota.  (Mat. 20:28; Jaona 3:16) Tsy mana ani-toetsy io Satana. Tea tena ie. Ka ino zany ty raha hiseho satria nanao ani-vilim-panavota io Jehovah? Lafa tampitsy ty Fanjakà Arivo Taoni-Kristy, le ho lasa lavorary ze taranakini-Adama noho Eva nanoriky ty safàni-Jehovah sady hipetraky amy paradisa an-tany eto. Zay moa fikasàni-Jehovah baka am-boalohany any iny. Amy fotoa zay, le hivola Jehovah hoe “Omega.”

18. Ino ty raha telo nivolani-Ndranahary mba hanomeza toky antsika? (Henteo koa ty efajoro hoe “ Antony Telo Mahavy Antsika Hatòky ty Fampitamanani-Jehovah.”)

¹⁸ Lafa nandiniky ani-lahatsoratsy toy tsika le nahita antony vitsivitsy mahavy antsika matoky hoe ho lasa Paradisa vatany tany toy. Ka ino ty azontsika volany amin’olo hafa laha misalasala rozy hoe tena ho tanteraky vatany raha nampitamani-Ndranahary io? Voalohany, Jehovah mihintsy ro mampitamà ani-raha io. Mivola ty bokini-Apokalypsy hoe: “Hoy Azy nipetraky tanabo sezim-panjakà teo iny: ‘Ataoko vaovao ty raha iaby.’” Hendry ie, mahery, sady maniry hanatanteraky ty raha ampitamaniny. Faharoe, azoni-Jehovah antoky hoe tsy maintsy ho tanteraky ty raha nivolaniny, ka atao raha fa miseho mihintsy ty fahitany ani-raha rey. Zay ty antony nahavy azy nivola hoe: “Azo antoky sady marina safà reo. ... Fa tanteraky raha reo!” Fahatelo, lafa misy raha ataoni-Jehovah, le tsy maintsy vitàny zisiky farany raha iny. Zay ro nahavy azy nivola hoe: “Zaho ro Alfa noho Omega.” Hoporofoeni-Jehovah fa mpavandy Satana sady tsy ho vitani-Satana mihintsy ty hisaka azy tsy hanatanteraky ty fikasàny.

19. Ino ty azonao atao laha misy olo misalasala hoe ho tanteraky avao va Paradisa ampitamani-Ndranahary iny?

¹⁹ Tiarovo zao: Vomaiky hatòky ani-Jehovah iha saky miresaky amin’olo hafa ty raha nivolaniny mba hanomeza antoky antsika. Ka manao akory laha mamaky ani-fampitamana soasoa amy Apokalypsy 21:4 ao iny iha amy manaraky, le misy mivola aminao hoe: “Soa biby aloha raha reo, fe hisy avao va zao?” Ino ty azonao atao? Azonao vakỳ aminy ty andininy faha-5 noho 6 le bakeo hazavao. Atorò azy hoe nataoni-Jehovah sonia mihintsy raha nampitamaniny io mba hanomeza antoky antsika hoe ho tanteraky raha io.​—Isaia 65:16.