MISY ranabavy telo rezay mipetraky amy nosy kelikely atao hoe Sangir Besar, a Indonezỳ any. Tao vitsivitsy lasa zay le niaraky niasa tamoron-driaky eny rozy. Maro mpahay rozy satria mazoto mitory, zany hoe manampy olo hahay ty raha volanini-Baiboly. Fe nisy asa hafa nataon-drozy tamy fotoa zay. Somary tsy de mahazatsy asa io.

Nila vato an-driaky eny tse rozy, bakeo nandesin-drozy an-tety eny raha rey. Bevata mandilatsy laboly io amin’io ty sisany amy vato rey. Bakeo rozy nipetraky tamy seza kely, le namaky ani-vato rey tamy martò mba ho lasa kaiasy. Lafa vita zay, le nataon-drozy tanaty sihò plastiky vato rey, bakeo lolohazin-drozy an-tanà any. Nailin-drozy anaty gony be amy zay raha rey lafa tany, mba ho azoni-kamion andesy. Nampiasà hanamboara lala vato rey.

Raiky amy ranabavy reo Hulda. Somary malalaky ty fotoany laha ampitovizy amy ahini-namany rey. Lasa afaky miasa anatini-lera maromaro amy zay ie. Asa io ro amelomany ty fianakaviany, le matetiky ivilianany ze raha ilan-drozy ze drala azony. Fe nanomboky namory drala amy zay ie satria nisy raha teany ho azo. Ta hana tablety ie, amy zay afaky mampiasa JW Library^®. Haini-Hulda hoe hanampy azy video noho raha amy JW Library^® ao rey lafa ie manompo noho mianatsy Baiboly.

Niasa lera roe saky maray Hulda, tanatini-vola raiky noho tampany mba hahazoa kaiasy maro mahafeno kamion kelikely. Niampy hivilia tablety avao dralany iny tamy farany.

Nivola Hulda hoe: “Marina fa nigonagona noho nivontovonto ty tanako tratsini-namaipaiky vato rey. Fe nihalinoko iaby fijalea niaretako rey lafa zaho nampiasa ani-tablety vaovao toy. Tena manampy ahy amy fanompoa raha toy sady lasa moramora amiko ty manoma fivoria.” Nivola koa ie hoe tena nanampy azy tablety iny tamy arety mandripaky COVID-19 iny, satria natao tamy vidéoconférence iaby ty fivoriani-fiangona noho ty fitoria. Miaraky falifaly amy Hulda tsika satria nahatratsy ty raha kendreny ie.