1. Laha hentea ty Hebreo 12:1, mila manao ino tsika laha ta hahavita ani-korsa mana amy fiaina any iny?

 AMPITOVIZINI-Baiboly amy korsa lay ty fiainantsika kristiana. Hahazo fiaina mandrakizay ze mahavita ani-korsa io zisiky farany. (2 Tim. 4:7, 8) Mila miezaky mafy hanohy ani-korsa iny avao tsika, satria tena fa mihamarìny ani-tsipiky farany iny. Fa nahavita ani-korsa iny zisiky farany, ohatsy, apostoly Paoly, le nivolaniny hoe ino ty hanampy antsika handresy amy raha io. Nanoro hevitsy antsika ie mba “hanafaky ani-ze raha iaby manavesatsy antsika noho ... hanohy ani-korsa lay ampanaovy antsika iny le haharitsy amy zay.”​—Vakio Hebreo 12:1.

2. Ino ty dikani-hoe ‘manafaky ani-ze raha iaby manavesatsy’?

² Ino ty teani-Paoly hovolany lafa ie nivola hoe tokony “hanafaky ani-ze raha iaby manavesatsy” antsika tsika? Ta hivola va ie hoe tsy misy andraikitsy tokony hataoni-Kristiana? Tsy zay. Ty teany hovolany le hoe mila ajanontsika ze raha manavesatsy kanefa tsy ilàntsika, satria mety hahavy antsika tsy hahalay raha rey sady mety hamozaky antsika. Laha teantsika ty hanohy avao ani-korsa iny, le tsy maintsy ataontsika ze hahaiza malaky hoe ino ty raha manavesatsy antsika bakeo avy le ajanontsika raha iny. Sady manao ani-zay zany tsika no manday ze raha tokony handesintsika. Laha ajanontsika raha tsy maintsy andesintsika reo, le tsy ho afaky hanohy ani-korsa iny tsika. (2 Tim. 2:5) Ino iaby ty raha tsy maintsy andesintsika?

3. a) Laha hentea ty Galatianina 6:5, ino ty raha tsy maintsy andesintsika? b) Ino ty hodinihintsika amy lahatsoratsy toy ato, le ino ty antony?

 ³ Vakio Galatianina 6:5. Niresaky raha tsy maintsy andesintsika Paoly. Hoy ty asany: “Samby handay ty entany iaby ty kiraidraiky.” Ta hivola mikasiky ty raha taki-Ndranahary amintsika kiraidraiky Paoly eto. Tsy misy olo hafa afaky manao ani-raha zay ho antsika fa tsika mihintsy ro mila manao azy. Ino iaby ty tafilitsy amy ‘entantsika’ io, le akory ty ahafahantsika manday azy? Handiniky ani-zay tsika amy lahatsoratsy toy ato. Horesahintsika koa hoe ino ty raha tsy ilà mety ho voafandaintsika, le akory ty hanariantsika ani-raha rey. Hahavita zisiky farany ani-korsa mana amy fiaina any iny tsika laha manday ty entantsika sady manary ze raha tsy ilà.

4. Manino ro tsy sarotsy marè ty manatanteraky ty voady nataontsika hoe hanompo ani-Jehovah mandrakizay? (Henteo koa sary io.)

⁴ Voady nataontsika tamintsika nanokam-bata. Lafa nanokam-bata ho ani-Jehovah tsika, le nanao voady hoe hanompo azy noho  hanao ty sitrapony. Tsy maintsy tanterahintsika voady nataontsika zay. Andraikitsy bevata aloha ty hoe manao ze raha iaby nampitamanintsika ani-Jehovah, fe tsy sarotsy marè koa. Ino ty antony? Satria niforonini-Jehovah hanao ty sitrapony tsika. (Apok. 4:11) Nataony anatintsika ao ty faniria ta hahay azy noho hanompo azy, sady nataony mitovy endriky aminy tsika. Vokatsini-zay, le lasa afaky mifandramby marìny aminy tsika sady falifaly manao ty sitrapony. (Sal. 40:8) Mahatiaro “velombelo” koa tsika lafa manao ty sitrapo-Ndranahary noho manoriky ty liani-Anakilahiny iny.​—Mat. 11:28-30.

5. Ino ty hanampy anao hanatanteraky ty voady nataonao tamy iha nanokam-bata iny? (1 Jaona 5:3)

⁵ Akory ty ahafahanao manday ty entanao? Retoa misy raha roe afaky manampy. Voalohany, anovo avao ze hahavy anao ho tea marè ani-Jehovah. Manao ani-zay iha lafa mametsivetsy ty raha soa iaby nataony ho anao noho ty fitahia mbo hameany anao. Lafa mihamitombo ty fitiavanao a Ndranahary, le ho mora aminao ty manoriky ty safàny. Ho tsapanao hoe tsy manahaky enta mavesatsy io ty didiny. (Vakio 1 Jaona 5:3.) Faharoe, tahafo Jesosy. Nahavita nanao ty sitrapo-Ndranahary ie satria nangataky fanampea taminy sady nifantoky tamy raha soa ho azony. (Heb. 5:7; 12:2) Tahafo Jesosy ka mangataha hery amy Jehovah sady tiarovo avao fiaina mandrakizay tamanintsika iny. Laha tena tea a Ndranahary noho manahaky ani-Anakilahiny iny iha, le ho vitanao ty hanatanteraky ani-voady nataonao tamy iha nanokam-bata iny.

6. Manino tsika ro tsy maintsy manao ty andraikitsintsika amy fianakaviantsika? (Henteo koa sary io.)

⁶ Andraikitsy amy fianakaviantsika. Laha ta hahavita ani-korsa mana amy fiaina any iny tsika, le mila tea ani-Jehovah noho Jesosy mandilatsy ty fianakaviantsika. (Mat. 10:37) Fe tsy midika zay hoe tsy ho dareantsika ty andraikitsintsika amy fianakaviantsika eo. Mifanohitsy amy zay fa laha teantsika ty hampifalifaly a Ndranahary noho Kristy, le mila manao ty andraikitsintsika amy fianakaviantsika tsika. (1 Tim. 5:4, 8) Ho sambatsy tsika laha manao ani-zay. Sady haini-Jehovah hoe ho sambatsy ty fianakavia laha mifankatea noho mifanaja ty mpivaly, laha tea noho mampianatsy ty anany ty ray aman-dreny, le laha manoriky ty safàni-ray aman-dreniny ty ajà.​—Efes. 5:33; 6:1, 4.

7. Akory ty hanatanterahanao ty andraikitsinao amy fianakavianao?

⁷ Akory ty ahafahanao manday ty entanao? Ndre lahilahy iha, ndre ampela, ndre ajà, le oriho ty torohevitsy feno fahendrea amy Baiboly ao. Ka manao ze eritseretinao fa mety avao, na manaraky ty fomban-tany aminareo any, na manaraky ze raha volanini-manam-pahaiza. (Ohab. 24:3, 4) Ampiasao soa boky noho gazetintsika reo fa misy soso-kevitsy soa hanampy anao hahay hanoriky ty torolalani-Baiboly ty anatiny ao. Misy torohevitsy afaky manampy ty mpivaly, ty ray aman-dreny, noho ty tanora, ohatsy, amy bokikely hoe Afaky ho Sambatsy ty Fianakavianao, noho amy boky Ho Azonao Tavy ty Fiaina Zisiky Farany!, fianara 49 noho 50. b Miezaha hanoriky ze raha volanini-Baiboly, ndre tsy manao ani-zay aza ty sisany amin’olo an-trano ao. Laha manao ani-zay iha, le handramby soa ty fianakavianao. Ho falifaly koa iha satria hitahy anao Jehovah.​—1 Pet. 3:1, 2.

8. Ino ty vokatsini-fanapahan-kevitsintsika amintsika?

 ⁸ Ty vokatsini-fanapahan-kevitsy ataontsika. Nameani-Jehovah fahafaha hifily tsika, le teany ho falifaly tsika lafa nandramby fanapahan-kevitsy soa. Fe laha tsy nahay nanapa-kevitsy tsika, le engany hizaka ty vokany. (Gal. 6:7, 8) Tsika avao zany ro tompon’andraikitsy laha nisy vokany raty ty fanapahan-kevitsy nataontsika, ty raha nivolanintsika na nataontsika. Mianky amy ty raha nataontsika ro mety tsy hampilamy ty saintsika. Fe lafa haintsika hoe tsika avao ro tsy maintsy mibaby ty vokatsini-fanapahan-kevitsy nataontsika, le voatosiky hibebaky tsika, hanity ty raha tsy nety nataontsika, noho miezaky tsy hampimpoly ani-raha iny. Manampy antsika hanohy avao ani-korsa mana amy fiaina any iny ty fanaova raha manahaky ani-reo.

9. Ino ty azonao atao laha tsy nety ty fanapahan-kevitsy nataonao? (Henteo koa sary io.)

⁹ Akory ty ahafahanao manday ty entanao? Ino ty azonao atao laha tsy nety ty fanapahan-kevitsy nataonao? Tiarovo hoe tsy afaky manova ty lasa iha. Ka mandany fotoa noho hery mba hanaporofoa hoe marina ty ahinao, na manome tsiny ty vatanao na ty olo hafa. Ekeo ty hadisoanao le miezaha hanao ze azonao atao mba hiatreha ani-raha iny. Laha mbo manome tsiny ty vatanao avao iha amy raha tsy nety nataonao iny, le miambanea ka mivavaha amy Jehovah, ekeo hoe nanao diso iha, le angataho ie hanenga ty hadisoanao. (Sal. 25:11; 51:3, 4) Mialà tsiny amin’olo nanaovanao raha mampalahelo iny, le mangataha fanampea amy anti-panahy laha azo atao. (Jak. 5:14, 15) Mandrambesa fianara baka amy hadisoa nataonao iny, sady miezaha tsy hampimpoly ani-raha iny sasy. Laha manao ani-reo iha, le afaky matoky fa hamindra fo aminao Jehovah sady hanome anao ze fanampea ilànao.​—Sal. 103:8-13.

10. Manino ty fitamàna raha mety tsy hisy ro manavesatsy antsika? (Galatianina 6:4)

¹⁰ Mitamà raha mety tsy hisy. Mety hanavesatsy ty vatantsika tsika laha mampitaha ty vatantsika amin’olo hafa. (Vakio Galatianina 6:4.) Laha mampitaha ty vatantsika amin’olo hafa avao tsika, le mety hanjary hialona noho hanao kirebaky amin’olo. (Gal. 5:26) Hoy fivolana zay hoe ka manaraky sinjan’olo tsy ho lavo, zany hoe laha miezaky manao ze raha ataon’olo tsika kanefa tsy ho vitantsika ty hanao ani-raha iny, le manimba ty vatantsika avao tsika. Eritsereto koa zao: Mivola ty Baiboly hoe mety hahakivy ty mandiny raha raiky anatini-fotoa ela. (Ohab. 13:12) Vomaiky mahakivy zany ty mandiny raha tsy ho tanteraky mihintsy! Laha manao ani-zay tsika le lasa ho vozaky ka tsy hana hery hanaova ani-korsa mana amy fiaina any iny.​—Ohab. 24:10.

11. Ino ty hanampy anao tsy hitamà raha mety tsy hisy?

¹¹ Akory ty hanarianao ani-raha zay? Ka mitaky raha be amy ty vatanao mandilatsy ty takini-Jehovah. Tsy mitamà mihintsy ie hoe hanome raha tsy anananao iha. (2 Kor. 8:12) Matokisa fa tsy mampitaha ty raha ataonao amy ty ahin’olo hafa Jehovah. (Mat. 25:20-23) Lafovily aminy ty fanompoa ataonao amy fo iaby, ty tsy fivalihanao, noho ty fiaretanao. Miambanea ka ekeo hoe voafetra avao ty raha azonao atao henanizao arakaraky ty taonao, ty fahasalamanao, noho ty raha iainanao. Tahafo Barzilay, le ka maneky lafa misy tombotsoa amea anao ka hitanao hoe tsy ho vitanao. (2 Sam. 19:35, 36) Tahafo koa Mosesy, le ekeo ze fanampea amea anao sady miezaha hizara andraikitsy laha mbo azo atao. (Eks. 18:21, 22) Laha miambany iha, le tsy hitamà raha mety hamozaky anao ka hahavy anao tsy hahavita ani-korsa mana amy fiaina any iny.

12. Tsika va ro tompon’andraikitsy amy fanapahan-kevitsin’olo hafa laha tsy nahay nanapa-kevitsy ie? Hazavao.

 ¹² Manome tsiny ty vatanao lafa tsy nahay nanapa-kevitsy ty olo hafa. Tsy afaky mandramby fanapahan-kevitsy ho ahi-ty hafa tsika, sady tsy afaky miaro an-drozy amy vokatsini-safidy raty ataon-drozy. Mety hanapa-kevitsy, ohatsy, ty ajà raiky hoe tsy hanompo ani-Jehovah sasy. Mety hiteraky alahelo ho ahi-ty ray aman-dreny raha zay. Fe tsy tokony hanome tsiny ty vatan-drozy rozy hoe rozy ro nahavy ani-anan-drozy iny tsy hahay hanapa-kevitsy. Laha manome tsiny ty vatan-drozy rozy le lasa manday enta-mavesatsy, kanefa tsy zay ty enta teani-Jehovah handesin-drozy.​—Rom. 14:12.

13. Ino ty azoni-ray aman-dreny atao laha nanao safidy raty ty anany?

¹³ Akory ty hanarianao ani-raha zay? Tiarovo hoe samby nameani-Jehovah fahafaha hifily tsika iaby. Engàny hanapa-kevitsy ty olo kiraidraiky. Tafilitsy amy zay ty fanapahan-kevitsy hoe hanompo azy. Haini-Jehovah hoe tsy lavorary nareo ray aman-dreny, fe teany avao laha mba manao ze fara herinareo nareo. Laha nanao safidy raty ty ananareo, le ie ro tompon’andraikitsy amy zay fa tsy nareo. (Ohab. 20:11) Fe mety hahatiaro ty raha tsy nety nataonao tamy iha niteza azy iha. Laha zay ie, resaho amy Jehovah ze raha tsapanao le angataho ie mba hanenga ty hadisoanao. Hainy hoe tsy afaky hanova ty lasa iha sady tsy afaky hanova ty raha niseho. Fe tsy teany koa laha miaro ty anakinareo tsy hibaby ty vokatsini-raha nataon-drozy nareo. Tiarovo hoe laha miezaky himpoly amy Jehovah ty ananao, le parè handramby azy ndraiky Ie.​—Lioka 15:18-20.

14. Anisani-enta mavesatsy tokony hariantsika ty hoe meloky marè amy ty vatantsika, ino ty antony?

¹⁴ Meloky marè amy ty vatanao. Ara-dalàna laha manea antsika ty eritserintsika lafa nisy raha tsy nety nataontsika. Fe tsy teani-Jehovah laha meloky marè ty vatantsika tsika. Anisani-enta mavesatsy tokony hariantsika raha zay. Laha fa nieky ty hadisoantsika tsika, nibebaky, sady nanao ze azontsika atao mba tsy hampimpolia ani-raha tsy nety nataontsika iny, le  afaky matoky tsika hoe fa nengani-Jehovah ty hadisoantsika. (Asa. 3:19) Tsy teani-Jehovah laha mbo meloky ty vatantsika avao tsika laha fa baka nanao ani-raha iaby reo. Hainy fa hanimba antsika raha zay. (Sal. 31:10) Laha lasa malahelo marè tsika, le mety tsy hahavita ani-korsa mana amy fiaina any iny.​—2 Kor. 2:7.

15. Ino ty hanampy anao laha meloky marè amy ty vatanao iha? (1 Jaona 3:19, 20) (Henteo koa sary io.)

¹⁵ Akory ty hanarianao ani-raha zay? Laha mbo meloky marè amy vatanao avao iha, le tiarovo hoe ‘tena manenga hadisoa’ Ndranahary. (Sal. 130:4) Lafa manenga ty hadisoani-ze olo tena mibebaky ie, le mampitamà hoe: “Tsy hotiaroviko sasy ty fahotany.” (Jer. 31:34) Ino ty teany hovolany? Tsy hieritseritsy ani-raha tsy nety nataontsika iny sasy Jehovah satria fa nengany ty hadisoantsika. Ka mieritseritsy zany hoe tsy nanenga ty hadisoanao ie kanao iha mijalijaly vokatsini-raha nataonao iny. Ka helofa marè koa ty vatanao satria mety hamoy tombotsoa sisany amy fiangona eo iha. Tsy eritseretini-Jehovah sasy fahotanao iny, ka tokony hanao manahaky ani-zay koa iha.​—Vakio 1 Jaona 3:19, 20.

16. Ino ty tokony ho haintsika mandramby anjara amy korsa lay iny?

¹⁶ Manao ani-korsa lay mana amy fiaina any iny tsika ka tokony ‘hilay mba hahazoantsika loka.’ (1 Kor. 9:24) Akory ty hahavitantsika ani-zay? Mila haintsika hoe ino ty enta tsy maintsy andesintsika le ino ty tsy maintsy ariantsika. Niresaky ohatsy vitsivitsy avao tsika tamy lahatsoratsy toy ato. Fe mbo misy hafa ankoatsini-reo. Nivola Jesosy hoe mety ‘hanavesatsy antsika ty fihinana lisatsy marè noho ty fiboboha toaky voho ty fiasan-doha marè amy fiaina.’ (Lioka 21:34) Afaky manampy anao andinin-teny io noho ty andininy hafa mba hahay hoe ino ty fanovà mbo mila ataonao amy korsa lay mana amy fiaina any iny.

17. Manino tsika ro afaky matoky fa handresy amy korsa mana amy fiaina iny?

¹⁷ Manino tsika ro afaky matoky fa handresy amy korsa mana amy fiaina iny? Satria hanome ze hery ilàntsika Jehovah. (Isaia 40:29-31) Fe ndre zay, le ka mandeha moramora! Tahafo apostoly Paoly. Nanao ze fara heriny ie mba hahazoa ani-loka natao talohany eo iny. (Fil. 3:13, 14) Tsy misy olo afaky manao ani-lay io amy pilasinao. Fe ho vitanao ty hanao ani-raha io satria manampy Jehovah. Afaky manampy anao handay ty entanao noho hanary ze raha tsy ilà Jehovah. (Sal. 68:19) Satria manampy anao Jehovah, le ho vitanao ty hiaritsy noho handresy amy korsa lay ataonao iny!