Nihitantsika tamy lahatsoratsy iny tao fa misy alihevitsy bevata raiky mahatafilitsy ty olombelo noho ty anjely iaby. Tsy ino zay fa ty fanamasina ty anarani-Jehovah. Tafilitsy amy alihevitsy io koa ty zoni-Jehovah handay, zany hoe Jehovah va ro tena mahay manday. Eo koa ty tsy fivalihan’olombelo amy Ndranahary. Samby misy ifandrambesany amy fanamasina ty anarani-Jehovah iaby raha reo.

Manino moa tsika henanizao ro mbo manamafy fa mikasiky ty anarani-Jehovah noho ty fanamasina ty anarany vatany alihevitsy bevata io? Ndao tsika handiniky antony telo.

Voalohany, nandratiraty ty anarani-Jehovah na ty lazany Satana, tamy zariday Edena tao. Nivola tamy Eva ie hoe: “Nivola taminareo vatany va Ndranahary hoe tsy mahazo mihina amy voani-hazo iaby amy zariday ato nareo?” (Gen. 3:1) Somary nampiasa fanontanea mamandriky Satana lafa nanontany ani-Eva. Ta hivola ie hoe matity Jehovah sady tsy rariny ty raha ampanaoviny. Bakeo ie nivola raha nifanohitsy tamy raha nivolanini-Jehovah iny. Nivola mihintsy ie hoe mpavandy Ndranahary. Hita hoe tena nandratiraty ty anarani-Jehovah Satana. Lasa nikaihy hoe “Devoly” ie, zany hoe “mpandratiraty.” (Jaona 8:44) Nino ani-vandini-Satana rey Eva ka tsy nanoriky ty safà-Ndranahary. Nasehony baka amy zay hoe tsy teany ho mpanday azy Ndranahary. (Gen. 3:2-6) Nanomboky teo, le tsy mieny Satana fa mbo mampiparitaky vandy mikasiky ani-Jehovah avao. Azo inoa fa tsy hanoriky ty safàni-Jehovah ze olo mino ani-vandy rey. Fe amy vahoaki-Ndranahary, le tena tsy rariny ty fandratiratia ty anara masini-Jehovah. Io ro tena fototsy mahavy ty fijalea noho ty raha raty iaby maneran-tany.

Faharoe, mba hahasoa ty zavaboary iaby manan-tsay, le harovani-Jehovah ty anarany, ka hataony ze hahavy azy tsy ho afa-baraka sasy. Tena vatan-draha amy Jehovah raha zay ka nivola ie hoe: “Tsy maintsy hohamasiniko ty anarako be voninahitsy.” (Ezek. 36:23) Nasehoni-Jesosy tamy raha nivolaniny koa hoe ino ty tokony ho vatan-draha amy mpanomponi-Jehovah tsy mivaliky lafa rozy mivavaky. Hoy ty asany: “Hohamasìny lahy ty anaranao!” (Mat. 6:9) Hamafisini-Baiboly matetiky fa tena ilà ty manome voninahitsy ty anarani-Jehovah. Henteo moa ohatsy vitsivitsy retoa: “Ameo voninahitsy Jehovah fa maeva ani-zay ty anarany.” (1 Tan. 16:29; Sal. 96:8) “Manaova hira fiderà ho ahi-ty anarany be voninahitsy.” (Sal. 66:2) “Hameako voninahitsy mandrakizay ty anaranao.” (Sal. 86:12) Tamy tempolini-Jerosalema tao koa, ohatsy, fa nisy raha manahaky ani-zay. Niresaky Jesosy tamy zay hoe: “Baba, ameo voninahitsy ty anaranao.” Namaly azy mivanta amy zay Jehovah hoe: “Fa nanome voninahitsy azy aho, le mbo hanome voninahitsy azy ndraiky.”​—Jaona 12:28. a

Fahatelo, tozoro mifandramby amy ty anarani-Jehovah, na ty lazany avao ty fikasàny. Mba eritsereto moa ty maha vatan-draha ani-anarani-Jehovah io lafa vita ty fitsapà farany amy farani-Fanjakà  Arivo Taoni-Kristy. Hanao akory ty fahitani-anjely noho ty olombelo iaby ty anarani-Jehovah amy fotoa zay? Mba hanampea antsika hahay ty valini-fanontanea zay, le ndao tse tsika hitiaro ani-raha roe mifandramby rey, tsy ino zay fa ty tsy fivalihan’olombelo noho ty zo-Ndranahary handay. Mbo hiatriky raha sarotsy mety hahavy an-drozy hivaliky va ty olo tsy mivaliky amy fotoa zay? Aha. Fa ho lavorary rozy amy zay sady fa baka niatriky fitsapà. Fa hahazo fiaina mandrakizay koa rozy. Ka manao akory mikasiky fomba fandaisani-Jehovah iny? Fa tsy hilà sasy amy fotoa zay ty hanaporofo hoe Jehovah ro tena mahay manday. Fa hiharo raiky ty raha iaby an-danitsy any noho an-tany etoy sady haneky ty fandaisani-Jehovah. Fe mbo ho vatan-draha amy vahoakini-Jehovah avao va ty anarany amy fotoa zay?

Fa hohamasìny tanteraky ty anarani-Jehovah amy fotoa zay sady fa tsy hisy handratiraty. Fe ndre zay, le mbo ho vatan-draha amy mpanomponi-Jehovah iaby avao ty anarany. Fa manino? Satria mbo hahita ani-Jehovah hanao raha miavaky avao rozy. Eritsereto zao: Satria hampolini-Jesosy amy Jehovah ty fanjakà iaby, le hanjary “raha iaby ho an’olo iaby” Ndranahary. (1 Kor. 15:28) Afarani-zay ty olombelo an-tany etoy, le hahazo tavy “ani-fahafaha miavaky ananani-anaki-Ndranahary iny.” (Rom. 8:21) Hotanterahini-Jehovah amy zay ty fikasàny hoe hampiharo ty zavaboary iaby an-danitsy any noho an-tany etoy mba ho lasa fianakavia raiky.​—Efes. 1:10.

Ino ty ho vokatsini-raha iaby rezay amy fianakaviani-Jehovah an-danitsy any noho an-tany etoy? Azo antoky hoe tena mbo haniry mafy hidera ty anarani-Jehovah tsika. Nahazo fanahy masy Davida mpanao salamo ka nanoratsy hoe: “Hoderà lahy Jehovah Ndranahary ... Hoderà mandrakizay lahy ty anarany be voninahitsy.” (Sal. 72:18, 19) Hahita antony vaovao noho antony soa maro hanaova ani-zay avao tsika mandrakizay.

Mampiseho ty raha iaby mikasiky ani-Jehovah ty anarany. Lafa tsika, ohatsy, mieritseritsy ty anarani-Jehovah le avy an-tsaintsika ao hoe be fitiava ie. (1 Jaona 4:8) Tsy ho halinontsika mihintsy ty fitiava nasehoni-Jehovah antsika tamy ie namoro antsika noho nanome ty vilim-panavota. Sady ho tiarontsika avao hoe ara-drariny noho feno fitiava ty fomba fandaisany. Fe mbo hahita ty fomba ampisehoani-Jehovah ty fitiavany ty zavaboariny avao tsika. Ho voatosiky hifandramby marìny amy Babantsika iny noho hihira fiderà ho ahi-ty anarany be voninahitsy tsika mandrakizay.​—Sal. 73:28.