1. Ino ty hanampy antsika hazoto hianatsy ty faminaniani-Baiboly?

 “TEAKO ty mianatsy ani-faminania amy Baiboly ao rey.” Zay ty raha nivolanini-rahalahy tanora raiky mana anara Ben zay. Mitovy hevitsy aminy koa va iha? Sa iha mahatsapa hoe sarotsy azo ty faminaniani-Baiboly? Mety hahatsapa mihintsy aza iha hoe mahakamo ty mianatsy ani-faminania rey. Fe mety ho lasa teanao ty mandiniky azy lafa hainao hoe ino ty antony nahavy ani-Jehovah nampanoratsy ani-raha rey amy Safàny ao.

2. Ino ty hodinihintsika amy lahatsoratsy toy ato?

² Hodinihintsika amy lahatsoratsy toy ato hoe manino tsika ro tokony hianatsy ani-faminania amy Baiboly ao rey, le akory ty atao lafa tsika mianatsy ani-raha rey. Bakeo tsika handiniky faminania roe amy bokini-Daniela ao. Ho hitantsika hoe manino ty fahaiza ani-raha reo ro afaky manampy antsika henanizao.

3. Mila manao ino tsika laha ta hahay soa ty faminania amy Baiboly ao?

³ Mila mangataky fanampea tsika laha ta hahay soa ty faminania amy Baiboly ao. Toy misy ohatsy. Eritsereto hoe mandeha amy pilasy raiky mbo tsy nandehananao mihintsy iha, fe misy namanao miaraky aminao, le fa hainy soa pilasy andehananareo io. Hainy hoe aia ty hombà le manday manaia ty lala kiraidraiky. Azo antoky fa ho falifaly iha satria naneky hiaraky aminao namanao io! Manahaky ani-zay mihintsy Jehovah satria parè hanampy. Mahay soa ty hoavintsika ie. Ka laha teantsika zany ty hahay soa ty faminania amy Baiboly ao, le tokony hiambany tsika ka hangataky fanampea amy Jehovah.​—Dan. 2:28; 2 Pet. 1:19, 20.

4. Nanino Jehovah ro nampanoratsy faminania amy Safàny ao? (Jeremia 29:11) (Henteo koa sary io.)

⁴ Teani-ray aman-dreny hana hoavy soa ty anany. Manahaky ani-zay koa Jehovah. (Vakio Jeremia 29:11.) Fe ty ray aman-dreny  tsy afaky mahay ty hoavy. Tsy manahaky ani-zay Jehovah, satria afaky manambara amintsika ty raha hiseho amy hoavy ie, sady tena marina ty raha resahiny. Nampanoratsy faminania amy Safàny ao ie, amy zay ho haintsika sandrany ty raha bevata hiseho. (Isaia 46:10) Fanomeza baka amy Babantsika an-danitsy any iny ty faminania amy Baiboly ao. Hita baka amy zay hoe tea antsika ie. Fe akory ty ahazoanao antoky hoe tena ho tanteraky ty faminania resahini-Baiboly?

5. Ino ty azoni-tanora ianara baka amy tantarani-Max?

⁵ Tafiaraky amin’olo tsy de manaja Baiboly na tena tsy manaja Baiboly mihintsy matetiky tanorantsika reo lafa an-dakilasy any. Mety hahavy ty tanora Vavolombeloni-Jehovah hisalasala mikasiky ty raha inoan-drozy kindraiky ty raha volany noho ataon’olo rey. Henteo moa tantarani-rahalahy Max toy. Nivola ie hoe: “Nanomboky nisalasala aho tamy zaho mbo nianatsy hoe tena marina va fivavaha anandesani-ray aman-dreniko ahy toy, le tena baka amy Ndranahary vatany va ty Baiboly.” Ino ty nataoni-ray aman-dreniny rey? Hoy Max: “Haiko aloha fa niasa loha rozy, fe ndre zay le nikalma avao rozy.” Nivaleani-ray aman-dreniny rey tamy Baiboly ao iaby ty fanontanea napetrakini-Max. Nanao raha koa Max. Nivola ie hoe: “Nianatsy faminania amy Baiboly ao aho, le niresahiko tamy tanora hafa amy fiangona eo ze raha nianarako.” Ino ty vokany? Hoy ty asany: “Lasa niresy lahatsy aho hoe baka amy Ndranahary vatany ty Baiboly!”

6. Ino ty tokony hataonao laha misy raha mampisalasala anao, le ino ty antony?

⁶ Manahaky ani-Max koa va iha ka manomboky misalasala laha marina vatany ty raha resahini-Baiboly? Laha zay ie le ka menatsy. Fe mila manao raha malaky iha. Manahaky heriky io ty fisalasalà. Laha engànao eo avao ie le mety hanimba tsikelikely ze raha lafovily anananao. Ka mba hangalà ani-“heriky” mety hanimba ty finoanao io, le soa laha mieritseritsy iha hoe: ‘Inoako va ty raha resahini-Baiboly mikasiky ty hoavy?’ Laha tsy tena mino iha, le mila mianatsy ani-faminania fa nitanteraky amy Baiboly ao rey. Akory ty hanaovanao ani-zay?

7. Akory ty nataoni-Daniela lafa nianatsy faminania? (Daniela 12:10) (Henteo koa sary io.)

⁷ Nanome modely soa ho antsika Daniela satria natorony hoe akory ty atao lafa mianatsy faminania. Antony soa ro nahavy ani-Daniela nianatsy ani-faminania rey. Ta hahay ty marina ie. Niambany koa Daniela. Hainy hoe hanampy azy hahay soa ani-faminania rey Jehovah laha miezaky hifandramby soa aminy avao ie sady manoriky ty safàny. (Dan. 2:27, 28; vakio Daniela 12:10.) Nasehony hoe niambany ie ka nangataky fanampea tamy Jehovah. (Dan. 2:18) Nianatsy soa koa Daniela. Nanao fikaroha ie ka nampiasàny ze Soratsy Masy fa nisy tamy androny. (Jer. 25:11, 12; Dan. 9:2) Akory ty azonao anahafa ani-Daniela?

8. Manino ty olo sisany ro mianatsy ty faminaniani-Baiboly, fe ino ty tokony hataontsika?

⁸ Eritsereto hoe ino ty antony mahavy anao mianatsy ani-faminania rey. Tena ta hahay ty marina va iha? Laha zay ie, le hanampy anao  Jehovah. (Jaona 4:23, 24; 14:16, 17) Fe tsy zay ty antony mahavy ty olo sisany mianatsy ani-faminania rey. Ta hila porofo avao rozy hoe tsy baka amy Ndranahary ty Baiboly. Mieritseritsy amy zay rozy hoe laha tsy baka amy Ndranahary zany ty Baiboly, le afaky manao ze eritseretin-drozy hoe soa noho raty rozy. Fe tsy tokony hanao ho zay tsika. Tokony ho antony soa ro mahavy antsika hianatsy ani-faminania rey. Ankoatsini-zay, misy toetsy raiky tena bevata koa mila ananantsika laha teantsika ty hahay soa ty faminania amy Baiboly ao.

9. Ino ty toetsy mila ananantsika laha teantsika ty hahay soa ty faminania amy Baiboly ao? Hazavao.

⁹ Miezaha hiambany. Mampitamà Jehovah hoe hampeany ze olo miambany. (Jak. 4:6) Mila mangataky fanampea aminy amy vavaky zany tsika laha teantsika ty hahay soa ty faminania amy Baiboly ao. Tokony hekentsika koa ty fanampea baka amy mpanompo azo atokisa noho mahihitsy, satria mpanompo io ro ampiasani-Jehovah mba hanome hany ara-panahy antsika amy fotoa mety. (Lioka 12:42) Ndranaharini-filamina Jehovah ka rariny laha mampiasa fomba raiky avao ie mba hanampea antsika hahay soa ty fahamarina amy Safàny ao.​—1 Kor. 14:33; Efes. 4:4-6.

10. Ino ty ianaranao baka amy tantarani-Esther?

¹⁰ Manaova fikaroha. Mifiliana faminania raiky mahakinto anao le manaova fikaroha. Zay mihintsy ty nataoni-ranabavy Esther. Teany ty hahay soa ani-faminania miresaky mikasiky fiaviani-Mesia rey. Nivola ie hoe: “Lafa zaho ni-15 tao le nanomboky nila porofo aho hoe tena nisoraty talohani-androni-Jesosy vatany va faminania rey.” Lasa niresy lahatsy ie lafa baka namaky mikasiky ty Boky Mihoroni-Riaky Maty. Hoy ty asany: “Nisoraty talohani-androni-Kristy ty sisany amy boky mihoro rey. Baka amy Ndranahary vatany zany ty faminania anatiny ao.” Nivola Esther hoe: “Nampolimpoliko nivakỳ raha rey vo niazoko soa.” Fe falifaly ie nanao ani-ezaky zay. Hoy ty asany lafa baka nianatsy faminania maromaro tamy Baiboly ao: “Ty vatatenako mihintsy henanizao ro mahita hoe marina ty raha volanini-Baiboly!”

11. Ino ty soa ho azontsika lafa tsika mihintsy ro mahita porofo hoe marina ty Baiboly?

¹¹ Lafa haintsika ty fomba nahatanteraky ty faminania sisany amy Safà-Ndranahary ao, le vomaiky tsika hatòky tanteraky ani-Jehovah noho ty tari-dala ameany. Misy faminania mikasiky ty raha tamanintsika amy hoavy koa ty amy Baiboly ao, ka lafa tsika mianatsy ani-raha rey, le lasa tsy kivy ndre eo aza ty raha sarotsy atrehintsika henanizao. Ndao moa tsika handiniky kelikely faminania roe niresahini-Daniela, fa tanteraky amy androntsika zao. Hahay hanapa-kevitsy tsika laha mahay soa ty dikani-raha reo.

12. Manondro ino tomboky “vy nifangaro tanimanga” iny? (Daniela 2:41-43)

¹² Vakio Daniela 2:41-43. “Vy nifangaro tanimanga” ty tombokini-sarivonga bevata nihitani-Nebokadnezara Mpanjaka tamy nofy, nihazavanini-Daniela iny. Lafa ampitovizintsika amy faminania hafa amy bokini-Daniela noho  Apokalypsy ao faminania io, le afaky mivola tsika hoe manondro ty fanjakà Anglè-Amerikein tomboky iny, le io ro fanjakà farani-ze matanjaky amy androntsika zao. Zao ty nivolanini-Daniela mikasiky ani-fanjakà matanjaky io: “Hisy ampahany amy fanjakà iny hatanjaky, le hisy ampahany halemy.” Fa manino ty ampahany ro halemy? Satria tsy hatanjaky manahaky vy io fanjakà iny vokatsy ty raha ataoni-vahoaky, ohary amy tanimanga iny. b

13. Ino ty fahamarina bevata haintsika baka amy faminania io?

¹³ Misy fahamarina bevata maromaro ianarantsika baka amy sarivonga niresahini-Daniela iny, sirtò amy tombokini-sary iny. Ino iaby rezay? Voalohany, fa nasehoni-Firenena Matanjaky Anglè-Amerikein hoe mahery vatany ie. Anisani-firenena nandresy, ohatsy, Etazinỳ noho Grande-Bretagne tamy Aly Bevata I noho Aly Bevata II iny. Fe lasa nihanalemy fanjakà matanjaky io sady mbo hihamalemy avao satria tsy manoha azy tanteraky ty vahoaky andesiny. Faharoe, ty Firenena Matanjaky Anglè-Amerikein ro fanjakà matanjaky farany, hanjaka aloha ty handravani-Fanjakà-Ndranahary ty fanjakàn’olombelo iaby. Maromaro ty firenena manohitsy ty Firenena Matanjaky Anglè-Amerikein, fe tsy hisolo azy mihintsy rozy. Haintsika raha zay satria mivola ty Baiboly fa hisy “vato” hamotipotiky ty tombokini-sarivonga iny. Fa nihitantsika teo moa fa manondro ty Firenena Matanjaky Anglè-Amerikein tomboky iny, le “vato” io amy zay manondro ty Fanjakà-Ndranahary.​—Dan. 2:34, 35, 44, 45.

14. Manino ty fahaiza soa ani-faminania mikasiky tomboky vy mifangaro tanimanga iny ro manampy antsika hahay hanapa-kevitsy?

¹⁴ Resy lahatsy va iha hoe marina faminaniani-Daniela mikasiky tomboky vy mifangaro tanimanga iny? Laha zay ie, le ho hita amy fomba fiainanao raha zay. Tsy hifantoky amy filan-drala noho hanana lisatsy marè iha satria hainao hoe kely sisa le horavà tontolo raty toy. (Lioka 12:16-21; 1 Jaona 2:15-17) Lafa azonao soa koa faminania io, le lasa ho hitanao ty maha vatan-draha ty asa fitoria noho fampianara. (Mat. 6:33; 28:18-20) Lafa baka nianatsy ani-faminania io iha, le eritsereto zao: ‘Hita amy fanapahan-kevitsy ataoko va fa tena resy lahatsy aho hoe kely sisa ty Fanjakà-Ndranahary le handripaky ty fanjakàn’olombelo iaby?’

15. Ia “ty mpanjakani-avaratsy” noho “ty mpanjakani-antimo” henanizao? (Daniela 11:40)

¹⁵ Vakio Daniela 11:40. Miresaky mpanjaka roe, na fanjakà roe mifanohitsy ty Daniela toko faha-​11. Lafa ampitovizintsika amy faminania hafa amy Baiboly ao faminania io, le lasa haintsika hoe Russie noho ty mpanoha azy ro “mpanjakani-avaratsy” henanizao, le ty Firenena Matanjaky Anglè-Amerikein ro “mpanjakani-antimo.” c

16. Manao akory ty fomba anandesani-“mpanjakani-avaratsy” ty vahoaki-Ndranahary?

¹⁶ Miatriky fanenjeha ty vahoaki-Ndranahary mipetraky amy tany ambany fahefàni-“mpanjakani-avaratsy” io. Nikabokabohy noho nigadrà ty Vavolombeloni-Jehovah sisany satria manompo ani-Jehovah. Fe tsy mampatahotsy ani-rahalahintsika reo ty fanenjeha ataoni-“mpanjakani-avaratsy”, fa vomaiky manatanjaky ty finoan-drozy. Ino ty antony? Satria haini-mpiara-manompo amintsika reo hoe manatanteraky faminania amy bokini-Daniela ao iny ty fanenjeha ty vahoaki-Ndranahary. d (Dan. 11:41)  Manampy antsika hanan-draha tamany avao ty fahaiza ani-raha zay sady manampy antsika tsy hivaliky amy Jehovah mihintsy.

17. Ino ty raha sarotsy atrehini-vahoaki-Ndranahary mipetraky amy tany ambany fahefàni-“mpanjakani-antimo”?

¹⁷ Fa nanenjiky ty vahoakini-Jehovah koa “ty mpanjakani-antimo” taloha tany. Niseho, ohatsy, raha zay tamy Aly Bevata I noho Aly Bevata II. Maro ty mpiara-manompo nigadrà tamy fotoa zay satria tsy nety nandeha nialy. Nivoaroaky baka an-dakilasy any koa ty ajà sisany satria tsy nety nanangan-tsaina. Fe tato ho ato zay, le niatriky raha sarotsy hafa mety hahavy an-drozy hivaliky amy Jehovah koa mpanomponi-Jehovah mipetraky amy tany ambany fahefàni-mpanjakani-antimo any rey. Lafa avy, ohatsy, ty fotoa fifidiana, le mety ho ta hanoha antoko politiky raiky na kandidà ty Kristiana raiky. Mety tsy handeha hifily ie, fe mety hanao ho zao an-tsainy ao hoe soa laha kandidà ho zao iny ro lany eo. Fe laha teantsika ty tsy hivaliky mihintsy, le tsy maintsy mitandrina tsika amy ze raha ataontsika noho eritseretintsika!​—Jaona 15:18, 19; 18:36.

18. Manao akory ty tokony ho fihetsikintsika amy aly ataoni-“mpanjakani-avaratsy” noho “mpanjakani-antimo” io? (Henteo koa sary io.)

 ¹⁸ Mety hiasa loha marè ze olo tsy mino ty faminania amy Baiboly ao lafa mahita “ty mpanjakani-antimo” mialy amy “mpanjakani-avaratsy.” (Dan. 11:40, f.a.p.) Samby mana bomba nikleera tena mahery mpanjaka roe reo ka afaky mandripaky ty raha mananay iaby an-tany etoy. Fe haintsika fa tsy hengani-Jehovah hiseho mihintsy raha zay. (Isaia 45:18) Tsy tokony ataontsika mampiasa loha antsika zany ty tsy fifanaraha misy amy “mpanjakani-avaratsy” noho “mpanjakani-antimo”, fa vomaiky tokony hanatanjaky ty finoantsika. Porofo raha zay hoe fa marìny ty farani-tontolo toy.

19. Ino ty raha tokony ho haintsika mikasiky ty faminaniani-Baiboly?

¹⁹ Tsy haintsika hoe akory ty fomba hahatanteraky ty faminania sisany amy Baiboly ao. Ndre Daniela mpaminany aza tsy nahay ty dikani-raha iaby nisoratiny. (Dan. 12:8, 9) Fe ndre tsy haintsika soa aza ty fomba hahatanteraky ty faminania raiky, le tsy midika zay hoe tsy ho tanteraky raha iny. Afaky matoky tsika fa hanampy antsika hahay ze raha tokony ho haintsika Jehovah amy fotoa mety, manahaky ty fa nataony taloha tany.​—Amosa 3:7.

20. Ino ty faminaniani-Baiboly tena miavaky ho tanteraky tsy ho ela ka ho hitantsika, le tokony hanao ino avao tsika?

²⁰ Hisy fanambarà hoe “fiadana noho filamina” hataoni-firenena reo. (1 Tes. 5:3) Bakeo ty fanjakà iaby an-tany etoy hanafiky noho handrava ty fivavahan-diso. (Apok. 17:16, 17) Lafa rava ty fivavahan-diso, le ho tafihin-drozy koa ty vahoaki-Ndranahary. (Ezek. 38:18, 19) Hanomboky amy zay ty aly farany Aramagedona. (Apok. 16:14, 16) Afaky matoky tsika fa kely sisa le hiseho raha iaby reo. Fe zisiky iaviani-zay, le loniky lahy tsika mba hankasitraky avao ani-Babantsika be fitiava an-danitsy iny, ka hazoto hianatsy ty faminaniani-Baiboly sady hanampy ty hafa hanao manahaky ani-zay koa.