1-2. Manino ro mifandramby amy asa fitoria ty vaovao soa ty Mpitoriteny 11:6?

LAFA maharè ty vaovao soa ty olo amy tany sisany, le tena mandramby soa. Avy amy ty nilàn-drozy azy raha zay! Fa amy tany hafa, tsy mahakinto olo ty resaky mikasiky a Ndranahary na ty Baiboly. Ino ty mpihita matetiky aminareo any? Ndre ino ndre ino ty fihetsikin’olo, le teani-Jehovah laha tapa-kevitsy hitory avao tsika zisiky ivitani-asa io.

² Lafa avy ty fotoa nifilini-Jehovah, le ho tampitsy ty asa fitoria bakeo “ho avy ty farany.” (Mat. 24:14, 36) Fe alohani-zay, akory ty hanorihantsika ani-fampirisiha iny hoe “ka aenieny ty tananao”? *​—Vakio Mpitoriteny 11:6.

3. Ino ty hodinihintsika amy lahatsoratsy toy ato?

³ Nihitantsika tamy lahatsoratsy taloha teo ty raha efatsy mila ataontsika mba hahavy antsika ho “mpihaza olo” mahay. (Mat. 4:19) Hodinihintsika amy lahatsoratsy toy ato ty fomba telo hanampy antsika ho tapa-kevitsy hitory avao, ndre ino ndre ino ty raha atrehintsika. Hianarantsika hoe manino ro tena ilà ty 1) mifantoky amy asa io, 2) mahaliny raha, noho 3) mana finoa matanjaky.

4. Manino tsika ro tokony hifantoky soa amy asa nampanaovini-Jehovah antsika iny?

⁴ Fa nambarani-Jesosy sandrany ty raha hiseho tena hampiavaky ty andro farany, sady mety hahavy ty mpanori-dia  azy ho tandrena ka tsy hifantoky amy asa fitoria. Nampirisihiny mpianatsiny reo hoe: “Miambena avao.” (Mat. 24:42) Manahaky ty tamy androni-Noa ty raha mahatandrena hitantsika amy andro henanizao. Nitandrena ty olo tamy zay, ka tsy nijanjy ty hafatsy fampitandrema nambarani-Noa. (Mat. 24:37-39; 2 Pet. 2:5) Zay ro mahavy antsika tokony hifantoky soa amy asa nampanaovini-Jehovah antsika io.

5. Manao akory ty ivolanani-​Asan’ny Apostoly 1:6-8 ty fiitarani-asa fitoria?

⁵ Tsy tokony hataontsika ambanin-draha mihintsy ty fitoria mikasiky Fanjakà iny amy andro henanizao. Fa nivola Jesosy fa mbo hanohy ani-asa io avao ty mpanori-dia azy ndre afarani-fahafatesany, sady mbo hahavita asa be mandilatsy ty nivitany tetoy. (Jaona 14:12) Lafa nimaty Jesosy, le nimpoly nihaza ndraiky mpianatsiny rey. Nanao fahagagà ie lafa nivelomy ndraiky. Nataony mahazo fia maro ty mpianatsiny sisany. Nanararaotsy ani-fotoa io Jesosy mba hanamafisa hoe mbo vatan-draha marè mandilatsy ty asa hafa iaby ty asa nampanaovy an-drozy mba ho mpihaza olo. (Jaona 21:15-17) Talohani-hiakarany an-danitsy any, le nambarany ani-mpianatsiny reo fa hiitatsy amy faritsy lavitsy ambalikini-Israely any asa fitoria natombokiny iny. (Vakio Asan’ny Apostoly 1:6-8.) Tao maro tafara tatoy, le natoroni-Jesosy ani-Jaona tanatini-fahità ty raha hiseho amy “androni-Tompo.” * Nahita raha maro Jaona, anatini-zay raha mahatseriky toy: Torỳ amy “firenena noho foko noho olo samby hafa fivolana voho vahoaky iaby” ty “vaovao soa zisiky farany”, le nisy anjely nitariky ani-asa io. (Apok. 1:10; 14:6) Hitantsika baka amin’io ty raha teani-Jehovah hataontsika henanizao. Teany handramby anjara amy asa bevata io tsika, zisiky hahavita azy.

6. Ino ty hanampy antsika hifantoky amy asa fitoria?

 ⁶ Afaky mifantoky soa amy asa fitoria tsika lafa mahatiaro ty raha iaby ataoni-Jehovah mba hanampea antsika. Manome hany ara-panahy maro biby ho antsika, ohatsy, ie amy alalani-boky vita printy na amy fitaova elektroniky, amy video noho raha nalà feo, le amy video alefa amy Internet ao. Mba eritsereto moa: Misy fanazavà amy safà mandilatsini-1 000 ty amy tranonkalantsika ao. (Mat. 24:45-47) Ndre mampizarazara ani-tontolo toy aza ty politiky, ty fivavaha, noho ty tsy fitoviza amy resaky hanana, le mbo miharo raiky manahaky mpirahalahy io ty mpanompo-Ndranahary valo tapitrisa mahery amy tany toy iaby. Tamy 19 Avrily 2019, ohatsy, le samby afaky nanenty video raiky ty Vavolombeloni-Jehovah amy tany toy iaby, lafa nandiniky ty andinin-teny ho ani-andro iny. Tamy harivan’io amy zay, le olo 20 919 041 ro niaraky nivory mba hankalaza ty Fahatiarova ty nahafatesani-Jesosy. Voatosiky hifantoky amy asani-Fanjakà iny tsika lafa mandiniky hoe tombontsoa bevata ho antsika ty mahita ani-raha miavaky io noho mandramby anjara aminy.

7. Manino ro manampy antsika hifantoky ty modelini-Jesosy?

⁷ Hifantoky amy fitoria koa tsika lafa manoriky ty modelini-Jesosy. Nifantoky amy fanambarà ty marina avao ie, fa tsy nisy raha nengany hahatandrè azy. (Jaona 18:37) Tsy naneky ho voatariky ie lafa nameani-Satana azy “ty fanjakà iaby amy zao tontolo zao noho ty voninahitsini-fanjakà rey”, sady tsy niresini-fakam-panahy lafa nisy olo ta hanao azy ho mpanjaka. (Mat. 4:8, 9; Jaona 6:15) Tsy voasarikini-faniria hanan-kanana ie, sady tsy niresy lafa nisy fanenjeha mahery. (Lioka 9:58; Jaona 8:59) Lafa misy raha mitsapa ty finoantsika, le ho vitantsika ty hifantoky lafa mahatiaro ani-torohevitsy nameani-Paoly iny tsika. Nampirisihiny ty Kristiana mba hanoriky ty modelini-Jesosy, amy zay “tsy ho kivy na ho vozaky!”​—Heb. 12:3.

8. Manao akory mana fahareta zao, le manino raha io ro tena ilà henanizao?

⁸ Mana fahareta tsika laha tsy taitsy lafa mandiny ty fiovàni-raha raiky. Ndre misy raha raty teantsika ho tampitsy, ndre misy raha soa fa nitamanintsika fa ela, le ilàntsika ty fahareta. Habakoka mpaminany, ohatsy, mba naniry hoe tsy hisy hasatà sasy ty a Joda ao. (Hab. 1:2) Mpianatsini-Jesosy reo, nitamà fa “hiseho eo noho eo” Fanjakà iny, le hanafaky an-drozy amy fandaisani-Romanina. (Lioka 19:11) Fa tsika, nainantsika fa halàni-Fanjakà-Ndranahary ty raha raty iaby, le hatsangany ty tontolo vaovao feno fahamarina. (2 Pet. 3:13) Fe mila mana fahareta tsika sady mandiny ty fotoa nifilini-Jehovah. Retoa misy fomba ampianarani-Jehovah antsika mba hahaliny raha.

9. Ino iaby ty ohatsy ahitantsika hoe mana fahareta Jehovah?

⁹ Jehovah ro modely farani-ze soa amy fahareta. Nameany fotoa ampy soa Noa ka afaky namboatsy ani-sambofiara iny noho ‘nitory ty fahamarina.’ (2 Pet. 2:5; 1 Pet. 3:20) Nijanjy soa ie, lafa nametraky fanontanea maro taminy Abrahama mikasiky ty fanapahan-kevitsiny hoe handripaky ty vahoaky raty fanahy tamy tanàni-Sodoma noho Gomora tao. (Gen. 18:20-33) Tanatini-fotoa lava biby, le nasehoni-Jehovah hoe tena nana fahareta tamy ty firenenani-Israely ie. (Neh. 9:30, 31) Hitantsika koa henanizao hoe manam-pahareta Jehovah satria ameany fotoa ze olo mamonjy azy “mba hibebaky.” (2 Pet. 3:9; Jaona  6:44; 1 Tim. 2:3, 4) Lafa mitory noho mampianatsy tsika, le ty modelini-Jehovah ro manampy antsika hahita ty antony tokony hananantsika fahareta. Nasiany fanohara koa amy Safàny ao mba hampianara antsika hana fahareta.

10. Ino ty azontsika resahy mikasiky ty mpamboly lafa hentea ty raha voasoratsy amy Jakoba 5:7, 8 ao?

¹⁰ Vakio Jakoba 5:7, 8. Manampy antsika hana fahareta fanohara mikasiky mpamboly io. Malaky mitombo aloha ty raha mitiry sisany lafa ambolè. Fe mila fotoa lavalava ty ankamaroany zay vo mamokatsy, sirtò azy misy voany fihany rey. Enim-bola eo fotoa itomboany io a Israely any. Nampitseliky ty mpamboly laha vo manomboky avy ty ora, le mamory vokatsy ie amy fotoa faramparany iavian’ora. (Mar. 4:28) Hendry tsika laha mana fahareta manahaky ani-mpamboly io. Fe mety ho sarotsy raha zay.

11. Manino ro manampy antsika ty fahareta amy fanompoa eny?

¹¹ Tean’olombelo tsy lavorary ho hita eo noho eo ty vokatsini-ezaky nataony. Kanefa laha teantsika hamokatsy ty raha nambolentsika, le mila karakarantsika soa. Mila mandavaky, ohatsy tsika, mamboly, miava, noho manondraky. Mila manao ezaky mitohy koa tsika lafa mampianatsy. Laha mora mitsaratsara, ohatsy, ty olo ampianarintsika na tsy midary, le mety ho elaela vo ho vitantsika ty manombotsy ani-zay baka am-pony ao. Laha mana fahareta tsika, le tsy ho kivy ndre miatriky raha sarotsy aza. Mbo mila mana fahareta koa tsika ndre mahita vokatsy soa aza. Tsy azontsika foroseva hitombo ty finoani-mpianatsy iny. Ndre mpianatsini-Jesosy reo koa aza, nisy fotoa tsy nahatakatsy soa ty raha nampianariny. (Jaona 14:9) Ka halino hoe afaky mamboly noho manondraky tsika, fa Ndranahary avao ro mampitombo.​—1 Kor. 3:6.

12. Akory ty hampisehoantsika hoe mana fahareta tsika lafa mitory amy ty longontsika tsy Vavolombeloni-Jehovah?

 ¹² Mety ho sarotsy amintsika ty mana fahareta lafa mitory amy ty longontsika tsy Vavolombeloni-Jehovah. Afaky manampy antsika ty torolala resahini-​Mpitoriteny 3:1, 7. Hoy ty asany: “Misy fotoa itsìna, le misy fotoa ivolana.” Ty fandaisam-batantsika ro engantsika hitory amin-drozy, fe hararaotintsika koa ze fotoa mety soa mba hivolana ty fahamarina amin-drozy. (1 Pet. 3:1, 2) Tokony hafana fo tsika lafa mitory noho mampianatsy, fe mila mana fahareta amin’olo iaby koa tsika, anatini-zay ty longontsika.

13-14. Miresaha modely azontsika tahafy amy resaky fahareta.

¹³ Hana fahareta koa tsika lafa mianatsy ty modelin’olo tsy mivaliky amy Baiboly ao noho amy andro henanizao rey. Nirini-Habakoka tsy hisy sasy ty raha raty, fe ho zao ty toky nananany: “Hitsanga amy pilasy fiambenako eo avao aho.” (Hab. 2:1) Tena teani-Paoly ho “vita” koa ty fanompoany. Fe nandiny avao ie sady ‘nitory amy fomba feno ty vaovao soa.’​—Asa. 20:24.

¹⁴ Mba diniho moa ty tantarani-mpivaly retoa. Nivoatendry ho amy tanà raiky tsy maro Vavolombeloni-Jehovah rozy lafa baka nanao sekolini-Gileada. Tsy maro mpanaraky koa ty fivavaha kristiana amy tany io any. Vitsivitsy avao ty olo tea mianatsy Baiboly. Manompo an-tany hafa any azy niaraky nianatsy amin-drozy tamy Gileada rey, le mitantara hoe mitariky fampianara Baiboly maro rozy. Fe ndre tsy maro mijanjy aza ty amy faritanini-mpivaly retoa, le miezaky avao rozy mitory. Lafa baka nitory tanatini-valo tao tamy faritany atao raha tsy mamokatsy io rozy, le tena nifalifaly satria natao batisa ty olo raiky nampianarin-drozy Baiboly. Ino ty mampitovy ani-modely tamy andro taloha noho henanizao reo? Tsy nimokotsy rozy sady tsy nampieny ty tanan-drozy. Nana fahareta rozy ka nahazo fitahia baka amy Jehovah. Loniky lahy tsika mba “hanahaky ty olo nanam-pinoa noho fahareta ka mandova ty fampitamana.”​—Heb. 6:10-12.

15. Manino ty finoa ro manampy antsika ho tapa-kevitsy hitory?

¹⁵ Inoantsika ty hafatsy torintsika ka teantsika hozarà amin’olo maro araky ze vitantsika. Atokisantsika ty fampitamana amy Safà-Ndranahary ao. (Sal. 119:42; Isa. 40:8) Fa hitantsika hoe tanteraky amy androntsika ty faminaniani-Baiboly. Fa nihitantsika koa hoe nihasoa ty fiainani-ze olo nanoriky ty torohevitsini-Baiboly. Raha iaby rezay ro mahavy antsika hatòky hoe tokony haharè ty vaovao soa mikasiky Fanjakà iny ty olo iaby.

16. Laha hentea ty Salamo 46:1-3, manino ty finoa ani-Jehovah noho Jesosy ro manampy antsika ho tapa-kevitsy hitory?

¹⁶ Mino ani-Jehovah koa tsika. Baka aminy ty hafatsy torintsika. Fanampini-zay, le mino ani-Jesosy tsika. Nameani-Jehovah fahefà ho Mpanjaka amy Fanjakà iny ao ie. (Jaona 14:1) Ndre ino ndre ino ty raha atrehintsika, le ho fialofa noho hery ho ahintsika avao Jehovah. (Vakio Salamo 46:1-3.) Fanampini-zay, le matoky tsika hoe mampiasa ty hery noho fahefà nameani-Jehovah azy Jesosy ka mitariky ty asa fitoria baka an-danitsy any.​—Mat. 28:18-20.

17. Manino tsika ro mila mitory avao? Manomeza ohatsy.

¹⁷ Lafa manam-pinoa tsika, le vomaiky hatòky hoe hotahini-Jehovah ty ezaky ataontsika, sady mety tsy hampoizintsika ty fomba hanaovany ani-zay. (Mpito. 11:6) Olo an’arivony, ohatsy, ro mandalo alohani-boky noho gazety  ataontsika amy fitaova fitoria anjavalala rey. Nahità vokatsy va fomba fitoria io? Eka! Mitantara mikasiky ampela tanora raiky nianatsy amy iniversitè eny ty Fanompoantsika Ilay Fanjakana, Novambra 2014. Nisy devoara nataony tan-dakilasy tany, ka ta hanoratsy fanazavà mikasiky Vavolombeloni-Jehovah ie. Tsy afaky nahita Efitrano Fanjakà ie, fe nahita latabatsy fitoria tamy iniversitè teny ka niazony ty fanazavà nilany. Nanjary Vavolombeloni-Jehovah vita batisa ie tafara tatoy, le mpisava lala maharitsy henanizao. Mandrisiky antsika hanohy hitory avao ty tantara manahaky ani-reo, satria ahitantsika hoe mbo maro ty olo mila maharè ty hafatsy mikasiky Fanjakà iny.

18. Manino tsika ro afaky matoky hoe ho vita mifanaraky amy ty itiavani-Jehovah azy ty asa fitoria mikasiky Fanjakà iny?

¹⁸ Afaky matoky tsika fa ho vita amy fotoa mety soa ty asa fitoria mikasiky Fanjakà iny. Mba diniho ty raha niseho tamy androni-Noa. Tena hita hoe Jehovah ro mahay ty fotoa mety hanaova raha. Mbo 120 tao talohani-fanombohani-Safodrano iny, le fa nifaritany ty fotoa hiaviani-raha zay. Tao maro tafara tatoy, le nirahini-Jehovah Noa mba hamboatsy Sambofiara. Tokony ho 40 na 50 tao teo talohani-hiaviani-Safodrano, le mbo nanohy niasa mafy Noa. Ndre tsy nijanjy azy aza ty olo, le niezaky avao ie nanambara ty hafatsy fampitandrema zisiky amy fotoa nivolanani-Jehovah hoe tokony ampiliry anaty sambofiara biby rey. Tamy fotoa mety amy zay, le “nahilini-Jehovah varavara iny.”​—Gen. 6:3; 7:1, 2, 16.

19. Afaky mitamà ino tsika laha tsy mampieny ty tanantsika mihintsy?

¹⁹ Kely sisa, le hotamperini-Jehovah ty asa fitoria mikasiky Fanjakà iny. Bakeo horavany tontoloni-Satana toy, le handesiny amy tontolo vaovao ao ze olo manoriky ty safàny. Ka zisiky iaviani-zay, loniky lahy tsika hanahaky ani-Noa, Habakoka, noho olo hafa tsy nampieny ty tanan-drozy rey. Soa tsika laha mifantoky amy ty asa fitoria avao, mana fahareta, le manatanjaky ty finoantsika ani-Jehovah noho ty raha ampitamaniny.