1. Amy fotoa manao akory ro mety ho sarotsy ty manompo ani-Jehovah?

ARAKY ty hevitsinao, amy fotoa manao akory ro tena sarotsy ty manompo ani-Jehovah? Lafa misy raha manahira sa lafa mba milamindamy ty fiainanao? Lafa miatriky raha sarotsy tsika, le mora miantehitsy amy Jehovah. Fa manao akory tsika lafa somary milamindamy ty fiainantsika? Mety ho tandrena va tsika ka tsy hahavita soa ty fanompoa a Ndranahary? Zay mihintsy ty nampitandremani-Jehovah ani-Israelita reo.​—Deot. 6:10-12.

2. Nanino Asa ro modely soa?

² Tena modely soa Asa Mpanjaka satria nahay niantehitsy tanteraky tamy Jehovah. Tsy tamy fotoa sarotsy avao ie ro nanompo ani-Jehovah, fa ndre tamy fotoa nilamindamy koa. Fa “nivahatsy tanteraky tamy Jehovah ty foni-Asa” nanomboky tamy voalohany. (1 Mpanj. 15:14) Hita raha zay lafa niravani-Asa iaby ty fanompoa sampy ta Joda ao. Mivola ty Baiboly fa “nalàny ty alitarani-firenena reo noho ty pilasy anabo, le nipotepotehiny tsangambato masy rey sady nitapatapahiny ty tsato-kazo masy.” (2 Tan. 14:3, 5) Nalàny tsy ho mpanjakavavini-firenena iny mihintsy aza Maka bebeny. Nanino? Satria nampirisiky ty olo hanompo sampy ie.​—1 Mpanj. 15:11-13.

3. Ino ty hodinihintsika amy lahatsoratsy toy ato?

³ Niravàni-Asa fanompoa sampy rey, fe tsy zay avao ty nataony. Nampeany koa ty olo ta Joda tao mba hanompo ani-Jehovah ndraiky. Nitahini-Jehovah Asa noho Israelita reo, ka nasiany fotoa milamindamy * ty amin-drozy any. Tamy fotoa  nandaisani-Asa, le “nilamy tany iny” tanatini-folo tao. (2 Tan. 14:1, 4, 6) Hodinihintsika amy lahatsoratsy toy ato hoe ino ty nataoni-Asa tanatini-fotoa milamindamy io. Bakeo ho hitantsika koa ty modelini-Kristiana tamy taonjato voalohany reo. Nahay nanararaotsy ty fotoa milamindamy koa rozy, manahaky ani-Asa. Le farany, hovaleantsika fanontanea toy: Laha afaky manompo ani-Jehovah malalaky soa iha amy tany misy anao eo, akory ty azonao anararaota ani-fotoa milamindamy io?

4. Laha hentea ty 2 Tantara 14:2, 6, 7, nanao akory Asa lafa nisy fotoa nilamindamy?

⁴ Vakio 2 Tantara 14:2, 6, 7. Nivola tamy vahoaky reo Asa fa Jehovah ro nahavy an-drozy ‘hilamindamy’ amin’olo iaby manodidy an-drozy. Tsy nieritseritsy Asa hoe hipetrapetraky amy zay ie amy fotoa milamindamy io. Mifanohitsy amy zay, fa nanao raha ie, ka nanory tanà misy lakoro noho vavahady, sady namboatsy tilikambo. Hoy ty asany tamy vahoakini-Joda: “Mbo malalaky tany toy ka azontsika ampiasà soa.” Ino ty teani-Asa hovolany? Ta hivola ie hoe tsy misy fahavalo atahorani-vahoaky reo, fa afaky mandehandeha noho manory tanà rozy amy tany namea-Ndranahary an-drozy io ao. Nampirisihiny rozy mba hahay hanararaotsy ani-fotoa milamindamy iny.

5. Nanino ro nihatanjahini-Asa ty tafikiny?

⁵ Nampiasa ani-fotoa milamindamy iny koa Asa mba hanatanjaha ty tafikiny. (2 Tan. 14:8) Tsy natoky ani-Jehovah va ie kanao nanao ani-zay? Aha. Haini-Asa hoe tokony hampioma ani-vahoaky reo amy ze raha sarotsy mety hatrehin-drozy ie, satria andraikitsini-mpanjaka raha zay. Nino koa ie fa mety tsy haharitsy zisiky farany fotoa milamindamy ta Joda ao iny, sady zay vatany ty raha niseho.

6. Ino ty nataoni-Kristiana voalohany rey lafa nisy fotoa nilamindamy?

⁶ Nitratsini-fanenjeha matetiky ty Kristiana tamy taonjato voalohany, fe nisy fotoa koa rozy mba nilamindamy. Akory ty nanararaotan-drozy ani-fotoa zay? Nifantoky tamy fitoria ty vaovao soa lahilahy noho ampela tsy nivaliky reo. Mitantara ty bokini-Asan’ny Apostoly fa “nandeha tamy fatahora ani-Jehovah” rozy. Nazoto nitory rozy, farany “nihanitombo avao.” Tena hita hoe nitahini-Jehovah ty ezaky nataon-drozy tanatini-fotoa nilamindamy iny.​—Asa. 9:26-31.

7-8. Ino ty nataoni-Paoly noho ty namany laha vo afaky nanao raha rozy? Hazavao.

⁷ Nahay nanararaotsy ani-ze fotoa nananan-drozy mpianatsy tamy taonjato voalohany rey mba hitoria ty vaovao soa. Ohatsy raiky amy zay apostoly Paoly. Lafa nihitany hoe nisy varavara bevata nivoha ho azy ta Efesosy tao, le nihararaotiny raha zay, ka nitory noho nanao mpianatsy tamy tanà io tao ie.​—1 Kor. 16:8, 9.

⁸ Afaky nanararaotsy nitory tamin’olo maro koa Paoly noho ty Kristiana namany lafa nilamy resaky savatsy iny tamy tao 49. (Asa. 15:23-29) Lafa baka nivakỳ tamy fiangona iaby fanapahan-kevitsy iny, le niezaky marè ty mpianatsy mba hitory “ty vaovao soa mikasiky ty safàni-Jehovah.” (Asa. 15:30-35) Ino ty vokany? Mivola ty Baiboly fa “nihanatanjaky ty finoani-fiangona reo, sady nihamaro sanandro ty olo taminy teo.”​—Asa. 16:4, 5.

9. Manao akory henanizao ty asa fitoria amy tany maro any, le ino ty fanontanea azontsika eritserety?

⁹ Maro henanizao ty tany ahafahantsika mitory malalaky soa. Mipetraky amy tany manahaky ani-zay va iha? Eritsereto hoe: ‘Akory ty azoko anararaota ani-fahalalaha zay?’ Tena miavaky andro farany toy, satria manao asa fitoria noho fampianara farani-ze bevata ty vahoakini-Jehovah. Mbo tsy nisy manahaky ani-zao mihintsy bakany bakany zay. (Mar. 13:10) Maro ty raha azontsika atao amy asa io.

10. Mampirisiky antsika hanao ino ty 2 Timoty 4:2?

¹⁰ Akory ty azonao anararaota ani-fotoa milamindamy rey? (Vakio 2 Timoty 4:2.) Azonao atao va ty mandiniky laha afaky mampitombo ty fanompoanao iha na ty fianakavianao, ka afaky manao mpisava lala mihintsy ohatsy? Tsy henanizao mihintsy ty fotoa hamoria hanana, satria tsy hanampy antsika ho avotsy amy fijalea bevata raha rey.​—Ohab. 11:4; Mat. 6:31-33; 1 Jaona 2:15-17.

11. Ino ty nataon’olo sisany mba hitoria ty vaovao soa amin’olo farani-ze maro?

¹¹ Maro ty mpitory nianatsy fivolana hafa mba ho azony ampiasà lafa mitory noho mampianatsy. Manoha an-drozy ty fandamina-Ndranahary, satria misy amy safà vaovao maro ty fitaova mifotosy amy Baiboly aboakiny. Tamy 2010, ohatsy, le nisy tamy safà 500 eo ho eo ty boky naboakintsika. Fa niakatsy ho 1 000 mahery raha zay henanizao!

12. Manino ro misy vokany soa amin’olo ty maharè vaovao soa amy fivolanany? Manomeza ohatsy.

¹² Ino ty vokany lafa maharè ty fahamarina baka amy Safà-Ndranahary ao amy fivolanany ty olo? Diniho ty tantarani-ranabavy raiky toy. Nanatriky fivoriambeni-vondrom-paritsy ta Memphis, a Etazinỳ any ie. Natao tamy safà kinyarwanda fivoriambe iny. Safà ampiasan’olo a Rwanda, Congo (Kinshasa), noho a Ouganda any raha io. Nivola ho zao ranabavy manao safà kinyarwanda iny, lafa nivita fivoriambe iny: “Fa 17 tao zay ty nifindrako ta Etazinỳ eto, fa tamy toy aho vo nahazo soa  ty raha iaby niresahy tanatini-fandahara ara-panahy raiky.” Tena nidosiky ty foni-ranabavy iny ty nijanjy ani-fandahara io tamy fivolanany. Afaky mianatsy safà hafa va iha, laha mbo azonao atao, mba hanampea olo amy faritaninareo eo? Tsy mihafahafa va ty olo sisany amy faritanini-fiangonanareo eo lafa iresaha amy safà hafa? Azo antoky fa handrisiky anao hianatsy safà hafa raha zay. Tsy ho matiantoky mihintsy iha.

13. Ino ty nataoni-rahalahy noho anabavintsika a Russie any reo lafa nisy fotoa milamindamy?

¹³ Tsy ty rahalahintsika iaby ro afaky mitory malalaky soa. Voararani-fanjakà ty asa fitoria amy tany sisany, ka vitsivitsy avao ty raha azontsika atao. Anatini-zay rahalahintsika a Russie ao reo. Tratsini-fanenjeha tanatini-tao maro tse rozy, bakeo nengani-fanjakà hanompo ani-Jehovah malalaky soa tamy Marsa 1991. Niisaky 16 000 eo ty mpitory ta Russie tany tamy zay. Roapolo tao tafarani-zay, le fa nandilatsini-160 000 ty mpitory any! Hita hoe nahay nanararaotsy vatany rahalahy noho anabavintsika reo laha mbo afaky nitory malalaky. Tsy naharitsy fotoa nilamindamy io, fe tsy nihena ty zotom-pon-drozy amy fanompoa ani-Jehovah ndre teo fiovà zay. Mbo manao ze azon-drozy atao avao rozy mba hanompoa ani-Jehovah.

14-15. Akory ty nampiasani-Jehovah ty heriny mba hanampea ani-Asa?

¹⁴ Nitampitsy avao fotoa nilamindamy tamy androni-Asa iny tamy farany. Nisy maramila rai-tapitrisa eo niavy baka Etiopỳ any. Natoky Zera mpitariky an-drozy fa afaky mandresy ani-Joda ie noho ty maramilany. Fe Asa Mpanjaka, tsy niantehitsy tamy hamaroani-maramilany, fa tamy Jehovah Ndranahariny. Nivavaky ie hoe: “Mba ampeo lahy zahay Jehovah Ndranaharinay, satria iha ro ianteheranay, le  amy ty anaranao ro iavianay etoa mba hialy amy vahoaky io.”​—2 Tan. 14:11.

¹⁵ Antsasakini-maramila etiopianina reo ty maramilani-Asa, fe nihainy hoe mahery Jehovah sady mahay miaro ty vahoakiny. Tsy nandiso fanantenà azy Jehovah satria niresy Etiopianina rey.—2 Tan. 14:8-13.

16. Akory ty ahaizantsika fa tsy haharitsy ty fotoa milamindamy iainantsika?

¹⁶ Marina fa tsy haintsika soa hoe ino ty raha hiseho amintsika kiraidraiky afarafara ao. Fe haintsika fa tsy haharitsy ty fotoa milamindamy iainani-vahoaki-Ndranahary. Fa nivola Jesosy fa “ho halani-firenena iaby” ty mpianatsiny amy andro farany. (Mat. 24:9) Mbo nivola koa apostoly Paoly hoe “ze olo iaby ta hiay anatini-fahafoizam-bata ho a-Ndranahary sady miharo amy Kristy Jesosy le henjehy avao koa.” (2 Tim. 3:12) “Meloky marè” Satana, ka mamita-bata tsika laha mieritseritsy hoe tsy hisy vokany amintsika ty haromotany.​—Apok. 12:12.

17. Ino iaby ty raha mety hitsapa ty finoantsika?

¹⁷ Hiatriky fitsapà tsika kiraidraiky amy hoavy. Tsy ho ela, le ho avy ty “fijalea bevata mbo tsy nisy nanahaky azy nanomboky tamy fotoa nampisy ani-zao tontolo zao zisiky henanizao.” (Mat. 24:21) Amy fotoa zay, le mety hanenjiky antsika ty fianakaviantsika na ho voarara ty asantsika. (Mat. 10:35, 36) Hanahaky ani-Asa va tsika kiraidraiky amy fotoa zay, ka hatòky hoe hanampy noho hiaro antsika Jehovah?

18. Laha hentea ty Hebreo 10:38, 39, ino ty hanampy antsika ho parè lafa tampitsy ty fotoa milamindamy?

¹⁸ Manampy antsika Jehovah mba ho parè amy ze raha hiseho afarafara ao. Mampiasa “ty mpanompo azo atokisa noho mahihitsy” ie mba hanomeza antsika ‘hany ara-panahy amy fotoa mety’, mba hampatanjaky antsika. (Mat. 24:45) Fe mila manao raha koa tsika mba tsy ho voahozonkozo ty finoantsika ani-Jehovah.​—Vakio Hebreo 10:38, 39.

19-20. Laha hentea ty 1 Tantara 28:9, ino iaby ty fanontanea mila eritseretintsika, le manino tsika ro mila mametraky ani-fanontanea reo?

¹⁹ Tokony “hila ani-Jehovah” manahaky ani-Asa Mpanjaka tsika. (2 Tan. 14:4; 15:1, 2) Manomboky manao ani-zay tsika lafa mianatsy mikasiky ani-Jehovah noho atao batisa.  Manao ze azontsika atao koa tsika mba hitombo avao ty fitiavantsika ani-Jehovah. Mety hieritseritsy ho zao tsika mba hahità ty ezaky fa nivitantsika: ‘Manatriky fivoria tsy tampaky va aho?’ Mahazo famelombeloma ara-panahy tsika lafa mivory sady mahazo fampahereza baka amy rahalahy noho anabavintsika reo. (Mat. 11:28) Mety hieritseritsy koa tsika hoe: ‘Mazoto mandiniky ty Safà-Ndranahary va aho?’ Laha miaraky mipetraky amy ty fianakavianao iha, manoka fotoa hanaova fotoam-pivavahani-fianakavia va nareo? Na laha mipetraky raiky iha, mbo manoka fotoa manahaky miaraky amy fianakavia io va iha? Manao ze azonao atao koa va iha mba hitoria noho hanaova mpianatsy?

²⁰ Manino tsika ro mila mametraky ani-fanontanea reo? Mivola ty Baiboly fa mandiniky ty eritseritsintsika noho ty fontsika Jehovah, ka tokony manao manahaky ani-zay koa tsika. (Vakio 1 Tantara 28:9.) Laha tsapantsika hoe mila ovà ty raha kendrentsika, ty toe-tsaintsika, na ty eritseritsintsika, le tokony hangataky amy Jehovah tsika mba hanampy antsika hanao ani-zay. Henanizao ty fotoa tokony hiomanantsika amy ty fitsapà ho avy tsy ho ela. Ka ndre ino ndre ino raha miseho, le mahaiza manararaotsy ty fotoa milamindamy!