1. Laha hentea ty Malakia 3:16, ino ty anarani-boky anoratani-Jehovah iny, le ino ty raha anatini-boky io ao?

 FA AN’ARIVONY tao Jehovah ro nanoratsy amy boky manoka raiky zay. Lista anaran’olo ro anatini-boky io ao, le anarani-Abela, azy lahilahy tsy nivaliky voalohany iny ro voasoratsy voalohany ao. * (Lioka 11:50, 51) Nampeani-Jehovah avao ty anaran’olo amy listany io ao le fa an-tapitrisany ty anaran’olo ao henanizao. Maromaro ty anara ikaihani-Baiboly ani-boky io, anatini-zay ty hoe “boky fahatiarova”, “bokini-fiaina”, noho “boky mihoroni-fiaina.” Fe ty hoe “bokini-fiaina” ro hampiasantsika amy lahatsoratsy toy ato.​—Vakio Malakia 3:16; Apok. 3:5; 17:8.

2. Ty anaran’ia ro anatini-bokini-fiaina ao, le ino ty azontsika atao laha teantsika ho voasoratsy anaty boky io ao ty anarantsika?

² Voasoratsy anaty boky io ao iaby ty anarani-ze mpanomponi-Jehovah manaja azy noho tea ty anarany. Afaky hahazo fiaina mandrakizay zany rozy. Afaky ho voasoratsy anaty boky io ao koa ty anarantsika laha tsika miezaky mifandramby soa amy Jehovah noho mino ty sorom-panavota nataoni-Jesosy Kristy, azy Anakilahiny iny. (Jaona 3:16, 36) Samby ta ho voasoratsy anara anaty boky io ao iaby tsika, ndre mitamà ho an-danitsy any tsika ndre mitamà ho an-tany etoy.

3-4. a) Tsy maintsy hahazo fiaina mandrakizay va tsika laha voasoratsy anaty bokini-fiaina ao ty anarantsika henanizao? Hazavao. b) Ino ty hodinihintsika amy lahatsoratsy toy ato noho amy lahatsoratsy manaraky ao?

 ³ Midika va zay hoe tsy maintsy hahazo fiaina mandrakizay ze voasoratsy anara anaty boky io ao? Mamaly ani-fanontanea zay ty raha nivolanini-Jehovah tamy Mosesy amy Eksodosy 32:33 ao. Hoy Jehovah: “Ty anarani-ze nanota tamiko avao ro hofafako tsy ho anaty bokiko ao.” Mbo azo fafà zany ty anara anaty boky io ao. Sahala hoe mbo nisoratini-Jehovah amy kraion tse anara reo. (Apok. 3:5, f.a.p) Fe tsy hovoafafa sasy ie afara any, sahala hoe soratiny amy stilo amy zay. Tokony hataontsika ze hahavy ty anarantsika tsy hovoafafa anaty boky io ao zisiky hiaviani-zay.

⁴ Mety hieritseritsy amy zay tsika hoe: Ino ty raha volanini-Baiboly mikasiky ty olo voasoratsy anara anaty bokini-fiaina ao noho azy tsy voasoratsy anara ao rey? Ombia olo voasoratsy anara anaty bokini-fiaina ao rey ro hahazo fiaina mandrakizay? Ka manao akory olo fa nimaty fe tsy nahay ani-Jehovah rey? Mety mba ho anaty boky io ao koa va ty anaran-drozy? Hovaleantsika amy lahatsoratsy toy noho amy lahatsoratsy manaraky ao fanontanea reo.

TY ANARAN’IA RO ANATINI-BOKY INY AO?

5-6. a) Laha hentea ty Filipianina 4:3, ty anaran’ia ro voasoratsy amy bokini-fiaina ao? b) Ombia ty anaran-drozy vo tsy hifòtsy sasy baka amy bokini-fiaina ao?

⁵ Ty anaran’ia ro voasoratsy anaty bokini-fiaina ao? Mba hamalea ani-fanontanea zay, le ndao tsika handiniky antokon’olo limy samby hafa. Ty anarani-sisany amin-drozy voasoratsy anaty bokini-fiaina ao, fa ty sisany tsy voasoratsy ao. Ia iaby rozy reo?

⁶ Voalohany, ze nivoafily hiaraky manjaka amy Jesosy an-danitsy any. Voasoratsy anaty bokini-fiaina ao va ty anaran-drozy? Eka.  Laha hentea ty raha nivolanini-apostoly Paoly tamy “mpiaraky miasa” aminy ta Filipy any, le fa amy bokini-fiaina ao ty anarani-azy voahosotsy reo, zany hoe azy hiaraky manjaka amy Jesosy rey. (Vakio Filipianina 4:3.) Fe laha tean-drozy ho amy boky io ao avao ty anaran-drozy, le mila tsy mivaliky mihintsy rozy. Lafa asia tampô farany amy zay rozy vo tsy hifòtsy sasy baka amy boky iny ao ty anaran-drozy. Alohani-hahafatesan-drozy ty hisehoani-zay na alohani-fijalea bevata.​—Apok. 7:3.

7. Laha hentea ty Apokalypsy 7:16, 17, ombia ty anarani-vahoaky be anisani-aondry hafa vo tsy hifòtsy sasy baka amy bokini-fiaina ao?

⁷ Faharoe, “ty vahoaky be.” Voasoratsy amy bokini-fiaina ao va ty anaran-drozy? Eka. Mbo ho amy bokini-fiaina ao avao va ty anaran-drozy lafa tafiboaky velo baka amy Aramagedona rozy? Eka. (Apok. 7:9, 14) “Hahazo fiaina zisiky farany” olo manahaky aondry reo hoasani-Jesosy. (Mat. 25:46; Jaona 10:16) Fe ndre zay, tsy avy le hahazo fiaina zisiky farany rozy ndre tsy nimaty tamy Aramagedona aza. Sahala mbo misoratsy amy kraion avao ty anaran-drozy anaty bokini-fiaina iny ao. “Hiarakandro an-drozy” Jesosy amy Fanjakà Arivo Tao le “hitariky an-drozy ho amy loharanoni-ranon’ay.” Ze maneky hotarihini-Kristy noho tsy mivaliky amy Jehovah zisiky am-parany any ro tsy hifòtsy amy bokini-fiaina ao ty anarany.​—Vakio Apokalypsy 7:16, 17.

8. Ty anaran’ia ro tsy anaty bokini-fiaina ao, le hanao akory ty hiafaran-drozy?

⁸ Fahatelo, ty aosy, zany hoe azy haripaky amy Aramagedona rey. Tsy anaty bokini-fiaina ao ty anaran-drozy. “Haripaky mandrakizay rozy” hoasani-Jesosy. (Mat. 25:46) Nivola koa Paoly hoe: “Hotsarà rozy rey ka hosazỳ, zany hoe haripaky mandrakizay.” (2 Tes. 1:9; 2 Pet. 2:9) Misy olo sisany koa kinahiny azy mihintsy ty manota amy fanahy masy, zany hoe fa mahay ty sitraponi-Jehovah ie fe asany azy mihintsy ty tsy manaraky ani-raha iny. Hanahaky ani-aosy rey avao koa ty hiafarani-ze nanao ho zay. Tsy hahazo fiaina zisiky farany rozy fa haripaky mandrakizay. Mazava ho azy fa tsy hovelomy sasy rozy lafa maty. (Mat. 12:32; Mar. 3:28, 29; Heb. 6:4-6) Fe misy antokon’olo roe rezay hovelomi-Ndranahary le hiay an-tany etoy. Handiniky ty mikasiky an-drozy tsika henanizao.

AZY HOVELOMY NDRAIKY REY

9. Miresaky antokon’olo roe hovelomy ndraiky ty Asan’ny Apostoly 24:15. Ia iaby rozy reo, le ino ty tsy mampitovy an-drozy?

⁹ Mivola ty Baiboly hoe misy antokon’olo roe hovelomy ndraiky le afaky mitamà ho velo zisiky farany an-tany etoy. Kaihiny hoe “ty marina” noho “ty tsy marina” rozy reo. (Vakio Asan’ny Apostoly 24:15.) Ze olo nanompo ani-Jehovah noho tsy nivaliky taminy ro kaihy hoe “ty marina.” Fa ze olo tsy nanompo azy ro atao hoe “ty tsy marina”, le amy ankapobeny tsy nisoa ty fandaisam-batan-drozy. Samby hovelomi-Ndranahary “ty marina” noho “ty tsy marina” lafa maty, ka afaky mivola va zany tsika hoe fa voasoratsy amy bokini-fiaina ao ty anaran-drozy? Ndao hodinihintsika kiraidraiky ty mikasiky an-drozy reo soa ho haintsika ty valini-zay.

10. Manino “ty marina” ro hovelomi-Ndranahary ndraiky, le ino ty tombontsoa ho azoni-sisany amin-drozy? (Henteo amy gazety toy ato koa ty “Fanontaneani-Mpamaky” mikasiky fameloma ty maty an-tany etoy.)

¹⁰ Fahaefatsy, “ty marina.” Fa nisoraty tanaty bokini-fiaina ao ty anaran-drozy talohani-hahafatesan-drozy. Fe nifafà tao va anaran-drozy io lafa rozy nimaty? Aha, tsy zay mihintsy satria mbo “velo” avao rozy amy Jehovah. “Tsy Ndranaharini-maty [Jehovah], fa ahi-ty velo satria aminy le velo rozy iaby  reo.” (Lioka 20:38) Dikani-zay, lafa hovelomy an-tany etoy ndraiky “ty marina”, le fa anaty bokini-fiaina ao ty anaran-drozy, fe mbo azo fafà. (Lioka 14:14) Azo antoky fa hahazo andraikitsy bevata ty sisany amin-drozy satria ho lasa “anakilahini-mpanjaka amy tany toy iaby.”​—Sal. 45:16.

11. Ino ty raha tsy maintsy ataoni-azy “tsy marina” rey laha tean-drozy ho anaty bokini-fiaina ao ty anaran-drozy?

¹¹ Fahalimy farany, “ty tsy marina.” Mety mbo tsy nahay ty lalànani-Jehovah vasa rozy ka farany tsy nanao raha soa talohani-nahafaty an-drozy. Tsy ho anaty bokini-fiaina ao zany ty anaran-drozy. Fe hovelomi-Ndranahary ndraiky rozy ka afaky manao raha mba hahavy ty anaran-drozy hisoratsy anaty bokini-fiaina ao. Tsy moramora ty hanampy ani-azy “tsy marina” reo satria nanao raha farani-ze raty ty sisany amin-drozy talohani-nahafatesan-drozy. Tsy maintsy ampianary manoriky ty fitsipikini-Jehovah zany rozy. Ka akory ty hanaova ani-zay? Handamy ty fampianara an-drozy ty Fanjakà-Ndranahary. Tena hiavaky raha io, satria mbo tsy nisy manahaky an’io mihintsy tan-tany etoy.

12. a) Ia ty hampianatsy ani-azy tsy marina rey? b) Hanao akory ze tsy mety manoriky ty raha ampianary azy?

¹² Ia ty hampianatsy ani-azy tsy marina reo? Ty vahoaky be noho azy marina hovelomi-Ndranahary ndraiky rey. Laha ta ho voasoratsy anara amy bokini-fiaina ao azy tsy marina reo, le tsy maintsy miezaky mifandramby soa amy Jehovah noho manoka ty vatan-drozy ho azy tse. Hanenty soa baka an-danitsy any Jesosy Kristy noho voahosotsy reo amy fotoa zay, le ho hitan-drozy hoe manao akory ty fandrambesani-azy tsy marina reo ani-raha ampianary an-drozy rey. (Apok. 20:4) Tsy hengà ho velo amy tontolo vaovao ao ze olo tsy maneky ty raha ampianary an-drozy ndre fa niay ao 100 tao aza. (Isaia 65:20) Mahita ty am-po any Jehovah noho Jesosy, ka hain-drozy hoe tsy hisy hanimba ani-tontolo vaovao iny mihintsy ze olo ao.​—Isaia 11:9; 60:18; 65:25; Jaona 2:25.

 HOVELOMY MBA HAHAZO FIAINA NOHO HOVELOMY MBA HOTSARÀ

13-14. a) Nanao akory ty fahazoantsika ani-safàni-Jesosy amy Jaona 5:29 ao reo taloha? b) Ino ty raha mila henteantsika soa amy safàni-Jesosy reo?

¹³ Niresaky mikasiky olo hovelomy an-tany etoy koa Jesosy. Nivola, ohatsy, ie hoe: “Ho avy ty fotoa haharezani-ze an-dolo any ty feony, le hiboaky rozy. Ka ze nanao ty soa, le hovelomy mba hahazo fiaina, fa ze zatsy nanao raha raty, le hovelomy mba hotsarà.” (Jaona 5:28, 29) Ino ty teani-Jesosy hovolany?

¹⁴ Nieritseritsy tsika taloha hoe miresaky ty raha hataon’olo rey afarani-hameloma an-drozy Jesosy amy andininy reo eo, zany hoe lafa hovelomy olo reo le hanao raha soa ty sisany fa hanao raha raty ty sisany. Fe henteo fa tsy nanao ho zao Jesosy hoe hanao raha soa na hanao raha raty azy niboaky baka an-dolo ao rey. Nivola raha fa lasa ie. Miresaky ani-azy “nanao ty soa” noho “nanao raha raty” rey ie. Raha nataon’olo reo talohani-nahafatesan-drozy zany volaniny eo reo. Zay ro tena marina satria amy tontolo vaovao any anè fa tsy misy olo hengà hanao raha raty sasy! Tsy maintsy fa talohani-nahafatesany zany azy tsy marina reo, ro nanao ani-raha raty reo. Ka manao akory amy zay safàni-Jesosy hoe “hovelomy mba hahazo fiaina” noho “hovelomy mba hotsarà” iny?

15. Ia ty “hovelomy mba hahazo fiaina”, le ino ty antony?

¹⁵ Fa nanao raha soa azy kaihy hoe marina rey talohani-nahafatesan-drozy. ‘Nivelomy mba hahazo fiaina’ zany rozy satria fa misoratsy anaty bokini-fiaina ao ty anaran-drozy. Dikani-zay, mitovy avao zany fameloma ani-“ze nanao ty soa” volanini-​Jaona 5:29 iny noho fameloma “ty marina” resahini-​Asan’ny Apostoly 24:15 io. Mifanaraky amy raha volanini-​Romanina 6:7 fanazavà zay. Zao ty volanini-andininy io: “Ze maty le afaky maliolio amy fahotàny.” Lafa nimaty zany azy kaihy hoe marina reo le fa nengani-Jehovah ty fahotan-drozy, fe mbo tiarony iaby ze raha soa nataon-drozy tamy rozy mbo nivelo. (Heb. 6:10) Fe ndre zay, tsy maintsy miezaky tsy hivaliky avao rozy laha tean-drozy tsy hovoafafa baka anaty bokini-fiaina ao ty anaran-drozy.

16. Ino ty teany hovolany amy hoe “hovelomy mba hotsarà”?

¹⁶ Ka manao akory azy zatsy nanao raha raty talohani-nahafatesany rey? Marina fa fa niafaky tamy fahotan-drozy rozy lafa nimaty, fe tsy nanompo ani-Jehovah rozy tamy rozy mbo nivelo ka tsy misoratsy anaty bokini-fiaina ao ty anaran-drozy. Mitovy amy fameloma ty “tsy marina” resahini-​Asan’ny Apostoly 24:15 iny avao zany fameloma ani-“ze zatsy nanao raha raty” io. “Hovelomy mba hotsarà” rozy. * Hotsarà azy tsy marina reo, zany hoe hodinihini-Jesosy soa. (Lioka 22:30) Lafa mandeha ty fotoa le ho hitani-Jesosy hoe maeva hisoratsy anaty bokini-fiaina ao va ty anaran-drozy sa tsy maeva. Laha miala amy ty raha raty fataon-drozy noho manoka ty fiainan-drozy ho ani-Jehovah rozy vo hosoraty amy bokini-fiaina ao ty anaran-drozy.

17-18. Mila manao ino ze olo iaby nivelomy mba hahazo fiaina an-tany etoy, le manondro ino “raha nataon-drozy” resahini-​Apokalypsy 20:12, 13 io?

¹⁷ Hisy boky mihoro vaovao hosokafy amy Fanjakà Arivo Tao io. Ka ndre tanatini-marina rey ty olo raiky ndre tanatini-tsy marina rey,  le tsy maintsy manaraky ani-ze lalàna anaty boky io ao. Manahaky ani-zao hoasani-Jaona ty raha nihitany: “Nihitako ty maty, ndre ty be ndre ty kelikely, nitsanga talohani-sezi-mpanjakà teo, le nisy boky mihoro nisokafy. Fe nisy boky mihoro raiky hafa koa nisokafy, tsy ino zay fa ty boky mihoroni-fiaina. Le nitsarà arakarakini-ze raha voasoratsy tamy boky mihoro reo ao ty maty, arakarakini-ze raha nataon-drozy.”​—Apok. 20:12, 13.

¹⁸ Ino “raha nataon-drozy” hitsarà ani-azy nivelomy ndraiky reo io? Ty raha nataon-drozy talohani-nahafatesan-drozy va io? Aha! Tiarovo fa afaky maliolio tamy fahotà nataon-drozy taloha tany rozy lafa nimaty. Tsy ty “raha nataon-drozy” talohani-nahafatesan-drozy zany resahiny eo io, fa ty raha nataon-drozy lafa rozy baka nampianary, amy tontolo vaovao ao. Ndre olo tsy nivaliky manahaky ani-Noa, Samoela, Davida, noho Daniela rey aza tsy maintsy mbo hianatsy mikasiky ani-Jesosy Kristy noho hampiseho finoa ty sorom-panavota nataony. Ka laha rozy aza mbo maro ty raha hianaran-drozy, tsy vo handraky azy tsy marina rey!

19. Hanao akory ty hiafarani-ze olo tsy maneky ty raha ampianary azy?

¹⁹ Hanao akory ty hiafarani-ze olo tsy maneky ty raha ampianary azy? Hoy ty Apokalypsy 20:15: “Natoraky marè tamy ranovory afo ao koa ze tsy voasoratsy anara tamy bokini-fiaina ao.” Ho ripaky mandrakizay zany rozy. Tena tokony hataontsika mihintsy ze hahavy ty anarantsika ho voasoratsy anaty bokini-fiaina ao noho tsy hifafa sitao!

20. Ino ty asa soasoa hatao amy Fanjakà Arivo Tao? (Henteo sary amy fononi-gazety toy.)

²⁰ Tena ho soasoa vatany aloha Fanjakà Arivo Tao io! Hisy fampianara miavaky hataoni-mpanomponi-Jehovah an-tany etoy amin’io. Amy fotoa io koa ro handiniha noho hitsarà ty raha ataoni-azy marina noho tsy marina rey. (Isaia 26:9; Asa. 17:31) Akory ty hanaova ani-fampianara io? Hanampy antsika hahay ani-zay ty lahatsoratsy manaraky. Vomaiky ho teantsika fandahara io amy zay.