Hoy Paoly amy 1 Korintianina 15:8 ao: “Farany marè, le niseho tamiko koa ie, sahala niseho tamy ajà ateraky tsy ampy vola rey.” Nivola tsika taloha fa ty raha niainany tamy ie nahita ani-Jesosy tamy voninahitsiny tan-danitsy any iny ro niresahini-Paoly eo. Sahala hoe namea voninahitsy ho teraky na nivelomy ho amy fiaina an-danitsy any talohani-fotoa zany ie, zany hoe taonjato maro taloha ty nisiani-fameloma ty maty ho an-danitsy any. Fe lafa nidinihy soa andininy io, le hita hoe mila areny ty fahazoantsika azy.

Tena niresaky ty raha niseho tamy ie nahita fahità iny aloha Paoly eo. Fe ino ty teany hovolany lafa ie nivola hoe sahala amy “ajà ateraky tsy ampy vola rey” ie? Mety ho raha vitsivitsy retoa vasa ty nahavy azy nivola ani-zay:

Tampoky azy raha nihitany iny sady nanday fahavoaza ho azy. Tsy ampoizy matetiky ty fotoa iteraha ani-ajà tsy ampy vola rey. Lafa Saoly (Paoly ty nahaiza azy tafara atoy) nandeha ta Damaskosy any mba hanenjiky ty Kristiana tany, le tsy nanampò ie hoe hahita ani-Jesosy tamy fahità, tafarani-nameloma azy iny. Nitampoky ani-Paoly fahità nihitany iny, fe tsy ie avao fa ndre Kristiana ho nenjehiny tamy tanà iny any rey koa tsy nanampò ani-zay. Tsy vitani-zay fa nanday fahavoaza ho azy raha niseho io satria tsy nahita ie tanatini-andro vitsivitsy.​—Asa. 9:1-9, 17-19.

Tampoky ty fiovàny. Ty safà grika nadika hoe “teraky tsy ampy vola” le azo adika koa hoe “teraky amy fotoa tsy ampoizy.” Ho zao ty andikani-Baiboly Jerosalema ani-andininy io: “Sahala hoe nateraky tamy fotoa tsy nampoizin’olo aho.” Fa tan-danitsy any Jesosy tamy fahità nihitani-Paoly io. Tsy nanahaky olo niresahiny amy andininy aloha eo reo Paoly, satria fa tan-danitsy any Jesosy vo nihitany. (1 Kor. 15:4-8) Fe afaky nahita ani-Jesosy tafarani-nameloma azy iny Paoly lafa niseho taminy Jesosy, ndre tamy fotoa tsy nampoizy aza ty nisehoani-raha zay.

Niambany ie lafa niresaky ty mikasiky azy. Mivola ty manam-pahaiza sisany fa atao raha nampiasa safà manambany ty vatany Paoly eo. Laha zay vatany ro tan-tsaini-Paoly ao, le nieky ie hoe tsy maeva azy ty tombontsoa namea azy. Nivola mihintsy aza ie hoe: “Zaho ro farani-kelikely amy apostoly, le tsy maeva hokaihy hoe apostoly aho, satria nanenjiky ty fiangona-Ndranahary.”​—1 Kor. 15:9, 10.

Lafa nivola ani-safà io zany Paoly le atao raha ta hivola ty fomba nisehoani-Jesosy taminy tampoky, ty fotoa tsy nampoizy niovàny, na ta hampitoro hoe tsy maeva azy ty nahita ani-raha niavaky iny. Fe ndre ino ino antony, le tena nivatan-draha tamy Paoly raha niseho io. Nanampy azy tsy hisalasala raha io hoe tena nivelomy vatany Jesosy. Tsy mahatseriky laha niresaky ani-raha niseho io avao ie lafa niresaky tamin’olo mikasiky ty nameloma ani-Jesosy.​—Asa. 22:6-11; 26:13-18.