LAHATSORATSY FIANARA 3
HIRA 124 Aza Mivadika Mihitsy!
Hanampy Anao Jehovah lafa Miatriky Raha Sarotsy Iha
‘Hataon’i Jehovah miory soa iha.’—1 PET. 5:10.
INO TY HIANARA ATO?
Ino ty azontsika atao laha ta handramby soa baka amy fanampean’i Jehovah tsika lafa miatriky raha sarotsy?
1-2. Ino ty raha sarotsy mety hatrehin’ny mpanompon’i Jehovah?
METY hiova tanteraky ty fiainantsika lafa misy loza miseho. Eritsereto, ohatsy, ty raha nahazo an’i Luis a, rahalahy tena tea an’i Jehovah. Nivola taminy ty dokotera fa afaky vola vitsivitsy le ho maty ie. Tena nazoto tamy fanompoa an’i Jehovah koa ranabavy Monika morovaly. Fe ndraiky andro, nihain’i Monika fa nanao fahotà valiny tanatin’ny tao maro fe navonivoniny avao. Anti-panahy moa valiny io. Tsy maintsy niala tan-tranony ao Olivia, ranabavy mpitovo zay satria hisy siklony mahery ho avy. Lafa nimpoly ie le nihitany fa nirava tranony iny. Tanatin’ny ndray mipỳ maso avao, le niova tanteraky ty fiainan’i Luis, Monika, noho Olivia. Fa nisy fotoa koa va iha niatriky raha sarotsy ka niova tampoky ty fiainanao?
2 Ndre mpanompon’i Jehovah tsy mivaliky aza tsika le mety hiatriky raha sarotsy noho harary, manahaky ty olo iaby. Mety hiaritsy fanohera na fanenjeha baka amin’olo malay ty vahoaki-Ndranahary rey koa tsika. Tsy miaro antsika tsy ho tratsini-raha manahaky ani-reo Jehovah. Fe ndre zay, le mampitamà ie fa hanampy antsika. (Isaia 41:10) Hanampy antsika ie ka afaky ho falifaly avao tsika, hahay hanapa-kevitsy, noho tsy hivaliky mihintsy ndre mafy aza ty raha mahazo antsika. Akory ty anampean’i Jehovah antsika lafa miatriky raha manahaky ani-zay tsika? Handiniky raha efatsy tsika ato. Hodinihintsika koa hoe ino ty tokony hataontsika laha teantsika hahasoa antsika ty raha ataony ho antsika.
HIAMBY ANAO JEHOVAH
3. Lafa mafy ty raha mahazo antsika, ino ty raha mety ho sarotsy amintsika?
3 Raha Sarotsy. Mety tsy hieritseritsy soa noho tsy hahay hanapa-kevitsy tsika lafa tena mafy ty mahazo antsika. Ino ty antony? Satria mety harary mafy ty fontsika amy fotoa rey. Mety hiasa loha marè tsika ka tsy haintsika ty hatao. Manahaky tsikoboky main-drano rey tsika ka tsy mahita tany hombà. Henteo moa hoe ino ty nitsapan’ny ranabavy niresahintsika taloha eroy rey, lafa niatriky raha sarotsy rozy. Hoy Olivia: “Lafa nirava tranoko iny, le nalahelo biby aho sady tena nikivy.” Hoy koa Monika lafa nivaliky taminy valiny: “Mbo tsy nidiso fanantenà manahaky ani-zay ndraiky aho. Tena narary mihintsy ty aiko ka tsy nizakako. Tsy nahavita nanao raha iaby aho. Tsy nino aho hoe handalo raha manahaky an’iny.” Ka lafa tsika kivy, ino ty raha ampitamanin’i Jehovah antsika fa hataony mba hanampea antsika?
4. Laha hentea ty Filipianina 4:6, 7, ino ty ampitamanin’i Jehovah antsika?
4 Akory ty hanampean’i Jehovah antsika? Mampitamà ie fa hameany ty “fiadana-Ndranahary” tsika. (Vakio Filipianina 4:6, 7.) Lasa milamin-tsay tsika lafa mana an’ny fiadana io satria mifandramby soa amy Jehovah. “Mihoatsy lavitsy mandilatsy ze raha iaby takatsin’ny sain’olombelo” fiadana io, zany hoe mihoatsy lavitsy mandilatsy ty raha eritseretintsika. Fa nisy fotoa va iha nivavaky mafy tamy Jehovah le bakeo tsy nampoizinao hoe lasa nilamin-tsay iha tafarani-zay? Raha tsapanao zay mihintsy “fiadana-Ndranahary” io.
5. Akory ty hiarovan’ny fiadana-Ndranahary ty saintsika noho ty fontsika?
5 Mbo mivola koa andininy io fa “hiamby”, na hiaro ‘ty fonao noho ty sainao’ ty fiadana-Ndranahary. Ty safà grika nadika hoe “miamby”, le nivolana tafiky maramila niamby tanà raiky mba tsy ho tafihin’ny fahavalo. Tena tsy natahotahotsy ty olo mipetraky amy tanà io ao fa miroro soa satria hain-drozy fa misy maramila miamby an-drozy. Manahaky ani-zay koa fa lafa miaro ty fo noho ty saintsika ty fiadana-Ndranahary, le lasa milamin-tsay tsika satria haintsika fa voaro tsika. (Sal. 4:8) Manahaky an’i Hana, le afaky hiadan-tsay avao tsika ndre tsy miova eo noho eo aza ty raha mahazo antsika. (1 Sam. 1:16-18) Ka lafa milamy amy zay ty saintsika, le mora amintsika matetiky ty hieritseritsy soa noho hahay hanapa-kevitsy.
Mivavaha zisiky hahatsapanao hoe miaro ty fonao noho ty sainao ty “fiadana-Ndranahary” (Fehintsoratsy 4-6)
6. Ino ty azontsika atao laha teantsika hahasoa antsika ty fiadana-Ndranahary? (Henteo koa sary io.)
6 Ino ty raha mila ataontsika? Lafa misy raha mampiasa loha anao, le kaiho mpiamby iny. Amy fomba akory ? Mivavaha zisiky ahatsapanao hoe mana ty fiadana-Ndranahary iha. (Lioka 11:9; 1 Tes. 5:17) Tsy mora tamy Luis, azy niresahintsika taloha eroy iny noho Ana valiny ty nahay hoe ho maty ie afaky vola vitsivitsy. Fe ino ty nanampy an-drozy? Nanazava Luis hoe: “Lafa tena anaty fahasahirana manahaky ani-zao, le lasa sarotsy amin-tena ty handramby fanapahan-kevitsy, ohatsy hoe mikasiky fahasalamà na raha hafa. Fe afaky niadan-tsay avao zahay ndre nimafy aza raha nahazo anay iny satria nivavaky zahay.” Nivola Luis morovaly fa nivavaky mafy sady matetitetiky tamy Jehovah rozy, le nangataky taminy mba hameany fiadanan-tsay, hampeany ho kalma, noho hahazo fahendrea mba hahavy an-drozy hahay hanapa-kevitsy. Nahatsapa rozy hoe nampean’i Jehovah vatany. Lafa iha miatriky raha sarotsy, le mivavaha matetiky. Hahazo ty fiadanan’i Jehovah iha amy zay mba hiamby ty fonao noho ty sainao.—Rom. 12:12.
HANAMPY ANAO HIORY SOA JEHOVAH
7. Ino ty mety ho tsapantsika lafa tsika miatriky raha sarotsy?
7 Raha sarotsy. Lafa tsika miatriky raha sarotsy, le mety hiova ty raha tsapantsika, eritseretintsika, na ataontsika fa tsy hanahaky ty mahazatsy. Manahaky sambo an-driaky eny atositosikin’ny tsioky rey tsika amy fotoa rey, ka mifamahofaho ty fihetseham-pontsika, farany tsy voafehintsika. Nivola Ana, azy niresahintsika taloha eroy iny fa niovaova ty fihetseham-pony, tafaran’ny nahafaty an’i Luis. Hoy ty asany: “Misy fotoa aho kivy tanteraky le mandiniky ani-raha nahazo ahy iny ka malahelo. Meloky koa aho satria tsy eo sasy ie.” Nahatiaro nangiky koa Ana. Lasa romodromotsy iaby ie satria tsy hainy hoe akory ty atao lafa misy fanapahan-kevitsy bevata. Luis avao moa lahy ro mpanao ani-zay tamy ie mbo nivelo ka. Misy fotoa ie mahatsapa hoe sahala anivo riaky miavotsavotsy rey any. Akory ty anampean’i Jehovah antsika lafa tsika manomboky mahatsapa raha manahaky ani-zay?
8. Laha hentea ty 1 Petera 5:10, ino ty fanomezan-toky amean’i Jehovah antsika?
8 Akory ty hanampean’i Jehovah antsika? Manome toky antsika ie fa hataony miory soa tsika. (Vakio 1 Petera 5:10.) Lafa misy tsioky be an-driaky eny, le hiliran-doza ty sambo raiky satria mety hivalibaliky. Ka mba hisoroha ani-zay, le nasia vombony ty ankamaroan’ny sambo, le amy sisiny roe ambany ao ty misy azy. Lasa tsy mihilankila marè amy zay sambo iny. Lasa tsy matahotsy koa olo anatiny ao rey satria mahatiaro voaro. Fe vomaiky miasa soa vombon-tsambo rey arakaraky ty andehanany. Manahaky ani-zay koa fa hanampy antsika tsy hihozonkozo Jehovah lafa tsika miezaky tsy mivaliky aminy avao, amy tsika miatriky raha sarotsy iny.
Anovo ze hampiory soa anao ka ampiasao fitaova fanaovantsika fikaroha rey (Fehintsoratsy 8-9)
9. Manino fitaova fanaovantsika fikaroha rey ro manampy antsika hahay hifehy ty fihetseham-pontsika? (Henteo koa sary io.)
9 Ino ty raha mila ataontsika? Lafa iha miatriky raha sarotsy ka manaly tsy voafehinao ty fihetseham-ponao, le miezaha hivavaky, hivory, noho hitory avao. Mazava ho azy fa tsy hitovy amy ty taloha ty raha vitanao henanizao. Fe tiarovo fa tsy mitaky raha tsy ho vitantsika Jehovah. (Ampitovizo amy Lioka 21:1-4.) Manokana koa fotoa hanaova fianara am-bata noho hametsivetsea. Fa manino? Mampiasa ty fandaminany Jehovah mba hanomeza antsika lahatsoratsy noho video afaky manampy antsika hahay hifehy ty fihetseham-pontsika, lafa tsika miatriky raha sarotsy. Afaky mampiasa ze fitaova fikaroha misy amy fivolananao iha mba hahitanao ze fanampea ilànao. Anisani-zay, ohatsy, ty JW Library®, Fanondroana Bokin’ny Vavolombelon’i Jehovah, noho Fitaovana Fikarohana. Nivola Monika, azy niresahintsika taloha eroy iny fa nampiasa an’ny fitaova reo ie lafa nitsapany hoe nanaly nihananjeky raha nahazo azy iny. Nataony fikaroha, ohatsy, ty hoe “fahatezerana.” Nisy fotoa koa nataony fikaroha ty hoe “fivadihana” na “tsy fivadihana.” Bakeo nivakiny avao raha iny zisiky nahatsapany hoe fa tsy manahy ie. Hoy ty asany: “Mbo niasa loha biby avao aho tamy zaho nanao fikaroha iny. Fe lafa nanomboky nivakiko raha iny, le nahatsapa aho hoe tena nandrakoky ahy Jehovah. Lafa zaho namaky iny, le nitsapako fa hain’i Jehovah fihetseham-po nifamahofaho tanatiko ao rey, farany nampeany aho.” Hanampy anao koa Jehovah ka ho vitanao ty hifehy ty fihetseham-ponao zisiky hahatsapanao hoe tsy miasa loha sasy iha.—Sal. 119:143, 144.
HANOHA ANAO JEHOVAH
10. Ino ty mety ho tsapantsika lafa miatriky raha tena mahakivy tsika?
10 Raha sarotsy. Lafa miatriky raha tena mahakivy tsika, le mety hahatiaro malemy, na ara-bata zay na ara-pihetseham-po. Mety hahatsapa manahaky atlety maratsy rey tsika. Nahalay avao ie bakany zay, fe lasa mitsongatsongay ie henanizao. Manahaky ani-zay koa fa mety ho sarotsy amintsika ndre ty hanao ty asa nimora tamintsika taloha, na mety lasa kamokamo hanao raha raiky tsika, ndre niteantsika ty nanao azy taloha. Manahaky an’i Elia, le mety tsy ta hiala am-pandria eo tsika fa nainantsika hiroro avao. (1 Mpanj. 19:5-7) Ino ty raha ampitamanin’i Jehovah fa hataony ho antsika lafa mahatsapa malemy tsika?
11. Ino koa ty ataon’i Jehovah mba hanampea antsika? (Salamo 94:18)
11 Akory ty hanampean’i Jehovah antsika? Mampitamà ie fa hanoha antsika. (Vakio Salamo 94:18.) Mila mpanoha zao atlety naratsy iny mba hahafahany hanohy handeha. Mety mila fanampea koa tsika mba hahafahantsika hanompo an’i Jehovah avao. Amy fotoa rey, le manome toky antsika ie hoe: “Zaho Jehovah Ndranaharinao ro mitanjaky anao marè amy tananao ankavana, le azy mivola aminao iny hoe: ‘Ka matahotsy fa manampy anao aho.’” (Isaia 41:13) Nahazo an’ny fanampea zay mihintsy Davida Mpanjaka. Ho zao ty nivolaniny tamy Jehovah lafa ie niatriky raha sarotsy noho fahavalony rey: “Manoha ahy ty tananao ankavana.” (Sal. 18:35) Fe akory ty fomba anampean’i Jehovah antsika?
Rambeso soa ze fanampea amean’ny fianakavianao, namanao, noho ty anti-panahy (Fehintsoratsy 11-13)
12. Ia ty mety hampiasàn’i Jehovah mba hanampy antsika lafa malemy tsika?
12 Matetiky Jehovah mampiasa olo hafa mba hanampea antsika. Nisy fotoa, ohatsy, Davida nahatiaro nalemy, le niavy taminy any Jonatana namany mba hanatanjaky noho hampahery azy. (1 Sam. 23:16, 17) Manahaky ani-zay koa ty nataon’i Jehovah tamy Elia. Nifily an’i Elisa ie mba hanampy azy. (1 Mpanj. 19:16, 21; 2 Mpanj. 2:2) Mety hampiasa ty fianakaviantsika, ty namantsika, na ty anti-panahy koa Jehovah henanizao mba hanampy antsika. Fe lafa kivy tsika, le mety tsy ta hiarakaraky amin’olo hafa. Teantsika laha mba tsika raiky avao ro eo. Fihetseham-po ara-dalàna zay. Ka ino ty azontsika atao mba hahazoa ty fanampean’i Jehovah?
13. Mila manao ino tsika laha teantsika hahasoa antsika ty fanampean’i Jehovah? (Henteo koa sary io.)
13 Ino ty raha mila ataontsika? Miezaha mafy mba tsy hihatakataky amin’olo. Laha tsy miarakaraky amin’olo hafa tsika, le mety hanomboky hieritseritsy ty vatantsika avao noho ty problemo mahazo antsika. Vokany, mety lasa tsy hahay hanapa-kevitsy tsika. (Ohab. 18:1) Mazava ho azy fa misy fotoa tsika iaby mba ta hijano raiky, sirtò moa lafa misy raha tena mampalahelo mahazo antsika. Fe laha mijano raiky avao tsika anatin’ny fotoa lavalava, le mety handà ty fanampeani-ze olo ampiasan’i Jehovah mba hanampea antsika. Ka ndre mafy aza raha zay amy fotoa sarotsy atrehinao iny, le ekeo lafa manampy anao ty fianakavianao, ty namanao, noho ty anti-panahy amy fiangona eo. Rambeso sahala fanampean’i Jehovah anao raha ataon-drozy iny.—Ohab. 17:17; Isaia 32:1, 2.
HAMPIONONA ANAO JEHOVAH
14. Ino ty raha mety hampatahotsy antsika?
14 Raha sarotsy. Mety hisy fotoa tsika hatahotsy. Misy mpanompo-Ndranahary tsy nivaliky amy Baiboly ao miresaky ty raha sarotsy noho nampatahotsy nahazo an-drozy. Mety ho baka amy ty fahavalon-drozy zay na nisy raha sarotsy hafa. (Sal. 18:4; 55:1, 5) Mety hiatriky raha manahaky ani-zay koa tsika. Mety hiatriky fanohera, ohatsy, tsika an-dakilasy any noho am-piasà any. Mety hanohitsy antsika ty fianakaviantsika, na ty manam-pahefà. Mety hatahotsy koa tsika tsy no ho maty satria marary. Amy fotoa rey, le mety hahatsapa manahaky anakajà tsy misy mpanampy rey tsika. Akory ty anampean’i Jehovah antsika lafa tsika miatriky raha manahaky ani-reo?
15. Ino ty hataon’i Jehovah ho antsika laha hentea ty Salamo 94:19?
15 Akory ty hanampean’i Jehovah antsika? Mampionona antsika ie sady manambitamby antsika. (Vakio Salamo 94:19.) Lafa mandiniky an’ny salamo io tsika le mety hieritseritsy ajà ampela raiky kelikely matahotsy noho tsy mety azon-droro, amy andro misy hotroky marè noho varatsy rey. Iny amy zay babany mamonjy azy, le mitrotro azy sady tsy engàny ie zisiky hampiroro azy. Marina fa mbo eo avao hotroky noho varatsy rey, fe lasa tsy matahotsy sasy ie satria fa mitrotro azy babany sady manambitamby azy. Lafa miatriky raha mampatahotsy tsika le mety hila an’ny Babantsika an-danitsy any iny hitrotro antsika, zisiky hampilamy ty saintsika. Ino ty azontsika atao mba hahazoantsika ty fampionona baka aminy?
Engao hampionona noho hanambitamby amy alalan’ny Soratsy Masy, Babanao an-danitsy any iny (Fehintsoratsy 15-16)
16. Ino ty azontsika atao laha teantsika hahasoa antsika ty fampionona amean’i Jehovah? (Henteo koa sary io.)
16 Ino ty raha mila ataontsika? Manokana fotoa mba hiaraha amy Jehovah tsy tampaky, ka mivavaha aminy le vakio ty Safàny. (Sal. 77:1, 12-14) Laha zatsy manao ani-reo iha, le azo antoky fa avy le hila fanampea amy Babanao an-danitsy any iny iha lafa miatriky raha sarotsy. Resaho amy Jehovah ze raha mampatahotsy noho mampiasa loha anao. Bakeo janjino ie ka vakio ty Safàny. Ho hitanao amy zay ty fomba ampiononany anao. (Sal. 119:28) Mety hampahery anao ty mamaky boky sisany amy Baiboly ao, lafa iha matahotsy. Mety hampahery anao, ohatsy, ty bokin’i Joba, Salamo, noho Ohabolana. Mety hampahery anao koa raha nivolanin’i Jesosy amy Matio toko faha-6 ao rey. Laha mivavaky amy Jehovah noho mamaky ty Safàny iha, le ho tsapanao hoe mampionona anao ie.
17. Ino ty toky ananantsika?
17 Afaky matoky tsika fa hanampy antsika avao Jehovah lafa tena mafy ty mahazo antsika. Tsy raiky zao mihintsy tsika. (Sal. 23:4; 94:14) Mampitamà Jehovah fa hiamby antsika ie sady hataony ze hahavy antsika hiory soa. Mampitamà koa ie fa hanoha antsika noho hampionona antsika. Zao ty volanin’Isaia 26:3 mikasiky an’i Jehovah: “Harovanao ze miantehitsy tanteraky aminao. Hampiadaninao avao rozy, satria iha ro atokisan-drozy.” Matokisa an’i Jehovah zany, le anovo ze azonao atao mba hahavy anao handramby soa baka amy ty fanampeany. Laha manao ani-zay iha, le hahazo hery ndraiky ndre miatriky raha sarotsy aza.
AKORY TY HAMALEANAO ANI-RETOA?
-
Amy fotoa manao akory tsika ro tena mila ty fanampean’i Jehovah?
-
Ino ty raha efatsy anampean’i Jehovah antsika lafa tsika miatriky sarotsy?
-
Ino ty azontsika atao laha ta handramby soa baka amy ty fanampean’i Jehovah tsika?
HIRA 12 Jehovah Tompo, Ilay Avo Indrindra
a Novà ty anara sisany.