1. Ino ty avy an-tsainao ao lafa iha mandiniky an’i Jehovah?

 MBA fa nieritseretinao va hoe manao akory Jehovah zao? Ino ty avy an-tsainao ao lafa iha mivavaky aminy? Marina fa tsy afaky mahita an’i Jehovah tsika, fe maro ty raha resahin’ny Baiboly mikasiky azy. Kaihy hoe “masoandro”, “ampinga”, noho “afo miroaroa” Jehovah. (Sal. 84:11; Heb. 12:29) Nampitovizin’i Ezekiela tamy vato safira, metaly mamirapiratsy, noho sadiananahary mamirapiratsy Jehovah. (Ezek. 1:26-28) Mety ho tseriky biby tsika lafa mandiniky an’ny fampitahà resahin’ny Baiboly reo ka mety hahatsapa hoe tsy misy dikany.

2. Manino ro mety ho sarotsy amintsika ty hifandramby marìny amy Jehovah?

² Tsy hitantsika maso Jehovah ka mety ho sarotsy amintsika ty hino hoe tea antsika ie. Mety hieritseritsy ty olo sisany hoe tena tsy tea azy mihintsy Jehovah satria nijalijaly avao ie tamy androm-piainany. Vasa mety tsy nana baba ie ka nahatsapa hoe tsy misy mpitea. Hain’i Jehovah soa ty raha tsapantsika sady hainy koa hoe manino ro lasa sarotsy amintsika ty hifandramby aminy. Fe mba hanampea antsika, le nampahafantariny antsika amy Baiboly ao hoe Ndranahary tena be fitiava ie.

3. Manino tsika ro tokony handiniky marìny ty fitiavan’i Jehovah?

³ Maro ty toetsy soa ananan’i Jehovah, fe ty fitiava ro tena mampiavaky azy. (1 Jaona 4:8) Io ro tena mahavola azy. Ahità an’io ty raha iaby ataony. Matariky Jehovah lafa mampiseho fitiava. Mahery koa ty fitiavany satria tsy misy fetrany ka ampisehoany ani-raha io ndre ty olo tea azy ndre ty olo tsy tea azy. (Mat. 5:44, 45) Handiniky marìny an’i Jehovah noho ty fitiavany tsika amy lahatsoratsy toy ato. Arakaraky ty ahaizantsika ani-Ndranaharintsika iny ro vomaiky hahavy antsika ho tena tea azy.

TENA TEA ANTSIKA JEHOVAH

4. Ino ty tsapanao lafa hainao hoe tea anao Jehovah? (Henteo koa sary io.)

⁴ “Tena be fitiava Jehovah.” (Jak. 5:11) Ampitoviziny amy reny be fitiava rey ty vatany, amy Baiboly ao. (Isaia 66:12, 13) Mba eritsereto moa ty ampela raiky mikarakara soa ty anany kelikely.  Alàny anany iny le trotroany, bakeo apetrakiny am-potronany eo. Mihatihaty azy ie sady manambitamby lafa miresaky aminy. Lafa tomany ie na misy raha maharary azy, le ataony azo antoky hoe mahazo ze raha ilàny ie. Lafa kivy tsika, le afaky matoky hoe tea antsika Jehovah. Hoy ty mpanao salamo: “Lafa maro marè ty raha nampiasa loha ahy, le nampionona noho nanambitamby ahy iha.”​—Sal. 94:19.

5. Be fitiava Jehovah sady tsy mivaliky, ino ty vokatsini-raha zay aminao?

⁵ Tsy mivaliky Jehovah. (Sal. 103:8) Tsy hoe lasa tsy tea antsika sasy ie lafa tsika manao raha tsy mety. Eritsereto Israelita rey. Nanao raha nampalahelo an’i Jehovah avao rozy matetiky. Fe lafa nibebaky rozy sady niala tamy raha raty nataon-drozy iny, le nanome toky an-drozy ie fa mbo tea an-drozy. Zao, ohatsy, ty nivolaniny tamin-drozy: “Lasa lafovily tamasoko eo iha, le nihajà, sady teako.” (Isaia 43:4, 5) Tsy niova Jehovah fa mbo tea antsika avao koa. Afaky matoky ani-zay tsika. Ndre manao hadisoa bevata aza tsika, le tsy manary antsika Jehovah. Lafa mibebaky tsika sady mimpoly amy Jehovah, le ho tsapantsika fa mbo tea antsika ie. Mampitamà ie fa “tena manenga hadisoa tanteraky.” (Isaia 55:7) Lafa engàny ty hadisoantsika, le mivola ty Baiboly fa “hisy fotoa mamelombelo baka amy Jehovah” ho azontsika.​—Asa. 3:19.

6. Ino ty ampianarin’ny Zakaria 2:8 antsika mikasiky an’i Jehovah?

⁶ Vakio Zakaria 2:8. Tea antsika Jehovah ka avy le takatsiny ty fihetseham-pontsika, le parè hiaro antsika ie. Malahelo ie lafa mijalijaly tsika. Avy le matoky zany tsika fa hamaly ie lafa mivavaky aminy tsika hoe: “Arovo manahaky anakandriamasonao aho.” (Sal. 17:8) Mora simba ty maso sady anisani-raha tena lafovily am-batantsika eny. Ka lafa mampitaha antsika amy anakandriamasony Jehovah, le sahala mivola ie hoe: ‘Hitanareo! Vahoakiko nareo, ka ze manisy raty anareo, le manimba ze raha tena lafovily amiko.’

7. Manino tsika ro mila miezaky hatòky kokoa hoe tea antsika Jehovah?

⁷ Tean’i Jehovah ho resy lahatsy iha hoe tea anao ie. Hainy fa misy vokany aminao ty raha niainanao taloha tany, ka mety hisalasala iha laha tea antsika ie. Na mety miatriky raha sarotsy iha henanizao ka lasa misalasala hoe tea anao Jehovah. Ino ty hanampy anao vomaiky hatòky hoe tea anao ie? Diniho hoe akory ty  nampisehoan’i Jehovah hoe teany Jesosy, ty voahosotsy, noho tsika kiraidraiky.

AKORY TY AMPISEHOAN’I JEHOVAH HOE TEANY TSIKA?

8. Nanino Jesosy ro natoky hoe tea azy Babany?

⁸ Jehovah noho Anakilahiny iny avao ro niaraky nipetraky tan-danitsy any bakany zay. Fa an-tapitrisa tapitrisany tao ty niarahan-drozy tany, ka vomaiky lasa tena nifankatea noho nifandramby am-po rozy. Resahin’i Jehovah mazava soa amy Matio 17:5 ao ty fitiavany an’i Jesosy. Afaky nivola ho zao Jehovah: ‘Io ro olo ankasitrahako.’ Fe nikaihiny hoe “Anako teako” Jesosy satria teany ho haintsika hoe tena teany ie. Tena natoky an’i Jesosy Jehovah, sirtò moa lafa parè hanome ty ainy ie. (Efes. 1:7) Jesosy koa moa tsy nisalasala hoe tea azy Babany sa tsy tea azy. Tena natoky ie fa tea azy Babany. Nampolimpoliny avao matetiky hoe tea azy Babany.​—Jaona 3:35; 10:17; 17:24.

9. Ampitovizy amy ino ty fitiavan’i Jehovah ty voahosotsy? Hazavao. (Romanina 5:5)

⁹ Tena tean’i Jehovah koa ty voahosotsy. (Vakio Romanina 5:5.) Henteo fa mivola andininy io hoe “natao.” Mivola diksionera mikasiky Baiboly zay fa manahaky “rano mandeha mamonjy antsika io” raha io. Hitantsika baka amy sarin-teny io fa tena tean’i Jehovah ty voahosotsy! Hain’ny voahosotsy reo fa “tea” an-drozy Ndranahary. (Joda 1) Zao ty nivolanin’ny apostoly Jaona lafa ie niresaky ty raha tsapan-drozy: “Mba eritsereto moa ty fitiava nasehon’ny Baba antsika! Nikaihiny hoe anany mihintsy tsika.” (1 Jaona 3:1) Fe ty voahosotsy avao va ro tean’i Jehovah? Aha! Fa nasehon’i Jehovah hoe teany koa tsika iaby.

10. Ino ty porofo bevata ahità hoe tena tea anao Jehovah?

¹⁰ Ino ty porofo bevata mampiseho hoe tea antsika Jehovah? Nanome ty vilim-panavota ie. Nasehon’i Jehovah baka amy raha io fa tena tea antsika ie. Tsy misy olo zany tea antsika mandilatsy an’i Jehovah. (Jaona 3:16; Rom. 5:8) Nameany antsika Anakilahiny tena teany iny. Nengany ho maty ho an’olombelo iaby ie, amy zay tsika hahazo fanengà hadisoa sady afaky hinama aminy. (1 Jaona 4:10) Tena nahafoy raha bevata ho antsika Jehovah noho Jesosy. Ka arakaraky ty ametsivetseantsika ani-raha zay, le vomaiky tsika hatòky hoe tena tea antsika kiraidraiky ie. (Gal. 2:20) Tsy hoe nanome ty vilim-panavota Jehovah satria zay ro ampisehoany hoe manao ty rariny ie. Nanome ani-raha io koa ie satria tena tea antsika. Nahafoy ani-raha lafovily aminy mihintsy ie, zany hoe Jesosy mba hampisehoany ani-zay. Nengany hijalijaly noho ho maty ho antsika Anakilahiny io.

11. Ino ty ianarantsika baka amy Jeremia 31:3?

¹¹ Fa nihitantsika teo moa fa tsy mivola avao Jehovah hoe teany tsika, fa volaniny amintsika koa hoe manao akory ty haben’ny fitiavany antsika. (Vakio Jeremia 31:3.) Nitaomin’i Jehovah hamonjy azy tsika satria tea antsika ie. (Ampitovizo amy Deoteronomia 7:7, 8.) Tsy misy raha na olo hahavita hampisaraky antsika aminy ka hahavy azy tsy ho tea antsika sasy. (Rom. 8:38, 39) Ino ty tsapanao lafa hainao hoe tea anao ie? Vakio ty Salamo 23, le henteo hoe ino ty nitsapan’i Davida lafa nihainy hoe tea azy Jehovah. Hanampy anao koa raha zay.

INO TY TSAPANAO LAFA HAINAO HOE TEA ANAO JEHOVAH?

12. Akory ty hamintinanao ty Salamo 23?

¹² Vakio Salamo 23:1-6. Resahini-Davida amy Salamo 23 io ao fa tena natoky ie hoe tea azy Jehovah sady nidary azy. Mpinama biby rozy amy Jehovah ka nampitoviziny amy Mpiarakandro azy io ie. Tsy natahotahotsy mihintsy Davida lafa nengany hitari-dala azy Jehovah, le ie koa moa niantehitsy tanteraky taminy. Hainy fa hampiseho fitiava azy avao Jehovah sanandro,  zisiky amy andro iaby iainany. Fa nanino ie ro tena natoky ani-zay?

13. Nanino Davida ro natoky fa hikarakara azy Jehovah?

¹³ “Tsy hisy raha hijaleako.” Tsapan’i Davida fa voakarakara soa ie satria tozoro nanome ze raha nilany avao Jehovah. Hain’i Davida koa fa mpinama rozy amy Jehovah sady nankasitraky azy Ie. Zay nahavy azy natoky fa ndre ino ino hahazo azy amy hoavy, le hanome ze raha ilàny avao Jehovah. Natoky Davida hoe tea azy Jehovah sady hikarakara azy, le zay ro nanampy azy tsy hiasa loha. Vomaiky aza ie nifalifaly sady niafa-po tamy ze raha nananany.​—Sal. 16:11.

14. Ino ty mety hataon’i Jehovah mba hanomeza ze raha ilàntsika?

¹⁴ Tena mikarakara antsika Jehovah, sirtò lafa miatriky raha sarotsy tsika. Eritsereto, ohatsy, ranabavy Claire a, fa nanompo tamy Betela ao tanatin’ny 20 tao mahery. Niatriky problemo bevata nifanesisesy ty fianakaviany ka tsy hitany ty ho rambesy mba hanampeany an-drozy. Nitapaky lalan-drà babany, le nivoaroaky rahavaviny zay. Tsy nanan-drala koa ty fianakaviany satria nirava anaka asa mba niveloman-drozy zay, le nafoin-drozy tranon-drozy iny. Akory ty nampisehoan’i Jehovah hoe nikarakara an-drozy ie? Hoy Claire: “Nataon’i Jehovah azo antoky hoe nahazo ze raha nilany ty fianakaviako sanandro. Matetiky aza ie nanome mihoatsy ani-ze raha nilanay! Vetsevetseko avao raha rey, ka tsy halinoko mihintsy hoe tena tea anay ie. Nanampy ahy tsy hivaliky amy Jehovah raha zay fa ho falifaly avao manompo azy, lafa zaho miatriky raha sarotsy.”

15. Nanino Davida ro nahatsapa hoe velombelo? (Henteo koa sary io.)

¹⁵ “Mamelombelo ahy ie.” Nikorontan-tsay Davida kindraiky satria nimaro ty raha sarotsy  natrehiny. (Sal. 18:4-6) Fe lasa nahatiaro velombelo ie lafa nahita hoe tea azy Jehovah sady nikarakara azy. Nitarihin’i Jehovah ho amy pilasy “feno akata maintso” noho amy pilasy “fitofà azon-drano soa”, namany reraky io. Ino ty vokany? Lasa nahazo hery Davida sady afaky nanohy nanompo an’i Jehovah avao sady nifalifaly.​—Sal. 18:28-32.

16. Manino ro mamelombelo anao ty fitiavan’i Jehovah?

¹⁶ Manahaky ani-zay koa henanizao. Tea antsika Jehovah sady tsy mivaliky amintsika ka vitantsika ty miaritsy lafa miatriky raha sarotsy tsika. (Fitom. 3:22; Kol. 1:11) Diniho ty ohatsin’i Rachel. Tena nikivy biby ie tanatin’ny arety mandripaky COVID-19 iny satria tsy vitani-hoe niala tamy Jehovah valiny fa mbo nanenga azy koa. Ino ty nataon’i Jehovah mba hanampea azy? Hoy ty asany: “Nataon’i Jehovah ze hahatsapako hoe misy mpitea aho. Nameany nama maro biby aho, le nanoka fotoa rozy mba hiaraha amiko. Nanatitsy hany koa rozy, nandefa mesazy noho andinin-teny mampahery, nitsiky tamiko, sady nanome toky ahy avao hoe mikarakara ahy Jehovah. Tena misaotsy an’i Jehovah avao aho fa nameany fianakavia tena tea ahy.”

17. Manino Davida ro nivola hoe “tsy misy loza hatahorako”?

¹⁷ “Tsy misy loza atahorako, satria anilako eo iha.” Niatriky raha mety ho nahafaty azy Davida matetiky. Nimaro biby koa ty fahavalony sady tena nahery. Fe ndre zay, nahatiaro voaro ie satria tea azy Jehovah. Nahatsapa Davida fa anilany eo avao Jehovah saky ie niatriky raha sarotsy, ka nanome toky azy raha zay. Zay nahavy azy nihira io hoe: “Nanafaky ahy tamy tahotsiko iaby [Jehovah.]” (Sal. 34:4) Ara-dalàna aloha laha natahotsy Davida. Fe afaky nandresy ani-raha nampatahotsy azy rey ie satria hainy hoe tea azy Jehovah.

18. Manome toky antsika Jehovah hoe teany tsika. Manino raha zay ro mety hanatanjaky anao lafa iha matahotsy?

¹⁸ Haintsika hoe tea antsika Jehovah. Manino raha zay ro manome hery antsika lafa tsika miatriky raha mampatahotsy? Eritsereto ty raha niainan’ny ranabavy mpisava lala atao hoe Susi zay. Lafa namono fo anakilahin-drozy iny, le nivola ty raha tsapan-drozy morovaly ie. Hoy ranabavy Susi: “Lafa misy loza tampoky mahazo anao, le tena misy vokany aminao raha iny. Lasa matahotahotsy avao tena tsy no mbo hisy raha raty avao hiseho. Fe tena tea anay Jehovah ka lasa nahatsapa zahay hoe voaro.” Hoy koa Rachel, azy niresahintsika taloha eroy iny: “Lafa nalahelo biby aho ndraiky haly zay sady niasa loha no natahotsy, le nitany marè biby aho nivavaky tamy Jehovah. Tsy ela tafarani-zay, le  tsapako hoe nanambitamby ahy Jehovah sady nataony ze hahavy ahy hilamin-tsay. Manahaky ataon’ny reny amy anany kelikely rey ty nataony tamiko, farany niazon-droro aho. Tsy ho halinoko mihintsy ty raha niseho tamy fotoa io.” Nigadra tanatini-efatsy tao koa anti-panahy raiky zay satria tsy naneky hanao maramila. Nahatsapa ie hoe tea azy Jehovah sady nikarakara azy. Tamy fomba akory? Hoy ty asany: “Nanome ze raha nilako Jehovah, sady tsy araky ty nieritseretiko ty raha nameany. Vomaiky aho niresy lahatsy hoe tena afaky matoky azy aho. Namean’i Jehovah ty fanahiny koa aho ka lasa nifalifaly, ndre nampijaly aza prizon nisy ahy iny. Nihitako baka amy raha zay hoe arakaraky ty atokisako azy le vomaiky aho hahatsapa hoe tea ahy ie. Farany nanao mpisava lala maharitsy aho ndre mbo tam-prizon tao.”

MIEZAHA HIFANDRAMBY MARÌNY AMY NDRANAHARINAO BE FITIAVA INY

19. a) Lasa manao akory tsika lafa mivavaky lafa haintsika hoe tea antsika Ndranahary? b) Ino ty fa nataon’i Jehovah mba hampisehoa hoe tea anao ie? (Henteo ty efajoro hoe “ Safà Manampy Antsika Hahatsapa hoe Tena Tea Antsika Jehovah.”)

¹⁹ Hitantsika tamy raha niainan’ny rahalahy noho anabavintsika nidinihintsika tato rey fa manampy antsika Jehovah, azy “Ndranaharin’ny fitiava” iny! (2 Kor. 13:11) Tena midary antsika kiraidraiky ie. Matoky tsika fa ‘manodidy antsika ty fitiavany noho ty tsy fivalihany.’ (Sal. 32:10) Arakaraky ty ametsivetseantsika ty fomba nampisehoany fitiava tamintsika, le vomaiky hino tsika hoe tena mikarakara antsika ie sady mifandramby marìny amintsika. Afaky mivavaky aminy tsika sady tsy matahotahotsy lafa manao ani-zay, le azontsika resahy aminy hoe tena mila ty fitiavany tsika. Azontsika resahy aminy ze raha iaby mampiasa loha antsika, satria matoky tsika fa hainy ty raha iainantsika sady tena ta hanampy antsika ie.​—Sal. 145:18, 19.

20. Manino ty fahaizantsika hoe tea antsika Jehovah ro manosiky antsika hifandramby marìny aminy?

²⁰ Manahaky afo mampafana antsika amy andro manintsy rey ty fitiavan’i Jehovah satria mampionona antsika lafa tsika miatriky raha sarotsy. Mifalifalea zany satria tea anao Jehovah. Enga anè tsika iaby hamaly an’ny fitiavany zay ka hivola hoe: “Teako Jehovah”!​—Sal. 116:1.