1. Ino ty raha nataoni-Jehovah laha vo nanota Adama noho Eva? (Genesisy 3:15)

 LAHA vo nanota Adama noho Eva, le niresaky faminania raiky tena bevata Jehovah mba hahavy ty taranakin-drozy hana raha tamany. Amy Genesisy 3:15 ao raha nivolaniny io.​—Vakio.

2. Manino ro miavaky ty faminania amy Genesisy 3:15 ao?

² Azy boky voalohany amy Baiboly ao iny ro miresaky ani-faminania io. Fe misy ifandrambesany amy raha io iaby ty boky hafa amy Baiboly ao. Sahala amy kôly mampipitiky pejy maro amy boky rey avao raha io. Lasa sahala raiky avao boky iny ndre misy taratasy maro aza. Manahaky ani-kôly io koa faminania amy Genesisy 3:15 ao io. Lafa tsika mamaky ani-safà ao reo, le hitantsika hoe miresaky hafatsy raiky avao ty boky iaby amy Baiboly ao. Ino hafatsy io? Handefa Mpanavotsy Ndranahary mba handrava ani-Devoly noho ze miaraky aminy. * Tena fitahia bevata raha zay ho ani-ze olo iaby tea ani-Jehovah!

3. Ino ty hodinihintsika amy lahatsoratsy toy ato?

³ Retoa misy fanontanea mikasiky ani-faminania amy Genesisy 3:15 io: Ia iaby resahiny ao reo? Akory ty nahatanteraky  ani-faminania io? Le manino ro mahasoa antsika raha io? Hamaly ani-reo tsika amy lahatsoratsy toy ato.

4. Ia “bibilava iny”, le akory ty ahaizantsika ani-zay?

⁴ Laha hentea ty Genesisy 3:14, 15 le miresaky “bibilava”, ‘taranakini-bibilava’ iny, “ampela”, noho ‘taranakini-ampela’ iny. Manampy antsika ty Baiboly mba hahay hoe ia rozy reo. * Ndao tse tsika hiresaky mikasiky ani-“bibilava iny.” Laha bibilava mpihitantsika rey avao aloha tsy hahay ani-raha nivolanini-Jehovah tamy zaridein Edena ao iny. Tsy maintsy zavaboary manan-tsay zany namoahani-Jehovah didim-pitsarà io. Ka ia zany io? Ambarani-​Apokalypsy 12:9 mazava soa hoe ia bibilava io. Volaniny ao hoe Satana Devoly, azy “bibilava tam-boalohany any iny.” Fe ia ty taranakini-bibilava io?

5. Ia ty taranakini-bibilava iny?

⁵ Mampiasa ty safà hoe “taranaky” kindraiky ty Baiboly mba hiresaha ani-ze olo mangala tahaky ty raha ataon’olo raiky. Ka tsy ia ty taranakini-bibilava iny fa anjely nivaliky rey miaraky amy ze olo manohitsy ani-Jehovah Ndranahary noho manenjiky ty vahoakiny, manahaky ty ataoni-Satana. Tafilitsy amy zay anjely nijotso baka an-danitsy any tamy androni-Noa rey, noho ty olo raty fanahy manahaky ani-Devoly baban-drozy iny.​—Gen. 6:1, 2; Jaona 8:44; 1 Jaona 5:19; Joda 6.

6. Akory ty ahaizantsika hoe tsy Eva “ampela iny”?

⁶ Ndao amy zay hodinihintsika hoe ia “ampela iny.” Tsy Eva aloha ie. Fa manino? Diniho tse moa toy: Mivola faminania iny fa “hanorotoro” ty lohani-bibilava iny  ty taranakini-ampela iny. Fa nihitantsika hoe Satana, azy anjely raty fanahy iny bibilava io. Fe tsy hisy olombelo tsy lavorary hahavita hanorotoro azy. Ka hanao akory ty handripaha ani-Satana?

7. Laha hentea ty Apokalypsy 12:1, 2, 5, 10, ia ampela amy Genesisy 3:15 ao io?

⁷ Ambarani-boky farany amy Baiboly ao amintsika hoe ia ampela amy Genesisy 3:15 ao iny. (Vakio Apokalypsy 12:1, 2, 5, 10.) Tsy olombelo raha io! Nipetraky tambany tombokiny eo ty vola, le nisy satroboninahitsy basia 12 tamy lohany eo. Niteraky ie fe tsy manahaky ajà mpihitantsika rey ty anany. Tsy ia ajà naterany io fa ty Fanjakà-Ndranahary. An-danitsy any Fanjakà io, le tsy maintsy an-danitsy any koa zany ampela io. Manondro ty tampany amy fandaminani-Jehovah an-danitsy any, ahità ty anjeliny tsy mivaliky ampela io.​—Gal. 4:26.

8. Ia ty voalohany amy taranakini-ampela iny, le nombia ie ro nilasa taranakiny? (Genesisy 22:15-18)

⁸ Manampy antsika koa ty Safà-Ndranahary mba hahay hoe ia ty voalohany amy taranakini-ampela iny. Ho baka amy Abrahama taranaky io. (Vakio Genesisy 22:15-18.) Nivola ty faminania fa baka amy taranakini-lahilahy tsy nivaliky io Jesosy. (Lioka 3:23, 34) Fe tokony mbo hahery mandilatsy olombelo taranaky io satria ie hanorotoro ani-Satana Devoly. Ka lafa ni-30 tao eo ho eo Jesosy, le nihosora fanahy masy. Lafa nivoahosotsy amy zay Jesosy, le lasa voalohany amy taranakini-ampela iny. (Gal. 3:16) Lafa nimaty Jesosy le nivelomy ndraiky. Tafarani-zay ie ‘nisatrohi-Ndranahary haja noho voninahitsy’ sady nameany azy “ty fahefà iaby an-danitsy any noho an-tany etoy”, anatini-zay ty fahefà “handrava ty asani-Devoly.”​—Heb. 2:7; Mat. 28:18; 1 Jaona 3:8.

9-10. a) Ia koa ty anisani-taranakini-ampela iny, le ombia rozy ro lasa taranakiny? b) Ino ty hodinihintsika henanizao?

⁹ Fe tsy Jesosy raiky avao ty taranakini-ampela iny fa mbo misy olo hafa koa. Niresaky mikasiky an-drozy apostoly Paoly lafa nivola tamy Kristiana voahosotsy jiosy noho hafa firenena rey hoe: “Laha ani-Kristy ... nareo, le tena taranakini-Abrahama sady handova ani-ze nampitamany azy.” (Gal. 3:28, 29) Lafa hosorani-Jehovah fanahy masy ty Kristiana raiky, le lasa anisani-taranakini-ampela iny ie. Ka tsy ia zany taranakini-ampela iny io fa Jesosy noho olo 144 000 hiaraky manjaka aminy rey. (Apok. 14:1) Miezaky manahaky ani-Jehovah Ndranahary, azy baban-drozy iny rozy.

¹⁰ Haintsika henanizao hoe ia iaby voaresaky amy Genesisy 3:15 ao rey. Hodinihintsika amy zay hoe nanao akory ty nanatanterahani-Jehovah ani-faminania io, le manino raha io ro mahasoa antsika.

11. Ino ty teani-faminania iny hovolany amy hoe haràtsy ty ‘tomitsini-taranakini-ampela’ iny?

¹¹ Mivola faminania amy Genesisy 3:15 io hoe hamparatsy ty ‘tomitsini-taranakini-ampela’ iny bibilava iny. Nitanteraky raha zay lafa nampiasa ani-Jiosy noho Romanina reo Satana mba hamono ani-Anaki-Ndranahary iny. (Lioka 23:13, 20-24) Lafa maratsy ty tomitsin’olo raiky, le tsy afaky mandeha tse ie anatini-fotoa kelikely. Manahaky ani-zay mihintsy Jesosy, satria tsy afaky nanao ino ino ie lafa nimaty tan-dolo ao tanatini-telo andro.​—Mat. 16:21.

12. Manao akory ty hanorotoroa ani-lohani-bibilava iny, le ombia ty hanorotoroa azy?

¹² Asehoni-faminania amy Genesisy 3:15 ao io hoe tsy hijano an-dolo ao avao Jesosy.  Fa manino? Satria laha hentea faminania io, le mivola fa hanorotoro ty lohani-bibilava iny taranakini-ampela iny. Midika raha zay fa hovelomy ndraiky Jesosy. Zay vatany ty raha niseho! Telo andro tafarani-nahafatesany iny, le nivelomy ho lasa fanahy an-danitsy any ie. Amy fotoa voatondro-Ndranahary, le hotorotoroani-Jesosy Satana ka tsy hisy sasy. (Heb. 2:14) Haripakini-Kristy noho azy hiaraky manjaka aminy rey ty fahavalo-Ndranahary iaby, zany hoe ty taranakini-bibilava iny.​—Apok. 17:14; 20:4, 10. *

13. Manino ro mahasoa antsika ty fahatanterahani-faminania io?

¹³ Laha fa nanokam-bata ho ahi-Ndranahary iha, le mahasoa anao ty fahatanterahani-faminania io. Niavy tan-tany etoy Jesosy le nanjary olombelo. Nanahaky tanteraky ty toetsini-Babany ie. (Jaona 14:9) Laha mianatsy mikasiky ani-Jesosy zany tsika le hahay ani-Jehovah Ndranahary sady ho tea azy. Mandramby soa baka amy fampianarani-Jesosy noho ty fomba itarihany ty fiangona kristiana henanizao koa tsika. Nampianariny antsika, ohatsy, hoe fomba fiaina manao akory ro mampifalifaly ani-Jehovah. Mahasoa antsika iaby ty nahafatesani-Jesosy, na ty namparatsy ty tomitsiny. Fa manino? Satria lafa nimaty Jesosy le nivelomini-Jehovah ndraiky. Tafarani-zay, le nekeni-Jehovah soro lafovily nataony iny mba ‘hampalio antsika ho afaky amy ota iaby.’​—1 Jaona 1:7.

14. Akory ty ahaizantsika fa tsy nitanteraky eo noho eo faminania nivolanini-Jehovah ta Edena any iny? Hazavao.

¹⁴ Nasehoni-safàni-Jehovah amy faminania nivolaniny ta Edena any iny hoe tsy nitanteraky eo noho eo faminania iny. Tsy maintsy mandiny elaela zay vo ho teraky ani-taranaky nampitamany iny ampela iny, mitaky fotoa ty hamoriani-Devoly ani-mpanaraky azy rey, le ho zay koa ty hisiani-fifankalaina amin-drozy roe reo. Mahasoa antsika ty mahay ani-faminania io satria mampitandrina antsika hoe ho hejini-tontolo ambany fahefàni-Satana toy ze olo iaby manompo ani-Jehovah. Nameani-Jesosy fampitandrema mitovy amin’io koa ty mpianatsiny tafara atoy. (Mar. 13:13; Jaona 17:14) Azo antoky fa nahita ty fahatanterahani-tampany amy faminania io tsika, sirtò tanatini-100 tao farany tato zay. Akory ty nisehoani-zay?

15. Manino tontolo toy ro vomaiky malay antsika, fe manino tsika ro tsy tokony hatahotsy ani-Satana?

¹⁵ Lasa Mpanjaka Jesosy tamy 1914. Tafara kelikelini-zay, le niroasy baka an-danitsy any Satana. Natoraky amy manodidy an-tany etoy ie, mandiny ty handripaha azy. (Apok. 12:9, 12) Fe tsy miamby amy zao avao Satana. Romotsy ie le tafihiny ty vahoaki-Ndranahary. (Apok. 12:13, 17) Zay ty antony mahavy ani-tontoloni-Satana toy malay antsika marè. Fe tsy tokony hatahotsy ani-Satana noho ze miaraky aminy tsika. Vomaiky aza tsika resy lahatsy manahaky ani-apostoly Paoly hoe: “Laha manoha antsika Ndranahary, ia ty hahavita hanohitsy antsika?” (Rom. 8:31) Afaky matoky tanteraky ani-Jehovah tsika satria nihitantsika hoe fa nitanteraky iaby ty ankamaroani-faminania amy Genesisy 3:15 ao rey.

16-18. Ino ty soa niazoni-Curtis, Ursula, noho Jessica lafa niazon-drozy soa ty Genesisy 3:15?

¹⁶ Manampy antsika hiaritsy avao ty fampitamanani-Jehovah amy Genesisy 3:15 ao, ndre ino ndre ino ty raha sarotsy atrehintsika. Hoy Curtis, rahalahy misionera a Guam any zay: “Nisy fotoa aho niatriky raha tena  sarotsy ka lasa nisarotsy amiko ty tsy hivaliky tamy Jehovah. Fe lafa zaho nametsivetsy ani-faminania amy Genesisy 3:15 ao iny, le lasa natoky ani-Babako an-danitsy any iny avao.” Fa tsy linini-Curtis ty fotoa hanafahani-Jehovah ty raha iaby mampijaly antsika.

¹⁷ Nivola ranabavy Ursula, mipetraky a Bavière any zay fa lafa niazony soa faminania amy Genesisy 3:15 ao iny, le vomaiky ie niresy lahatsy hoe Safà-Ndranahary ty Baiboly. Nihitany hoe mifandramby amy faminania io iaby ty faminania hafa amy Baiboly ao, le tena nidosiky ty fony raha zay. Hoy ty asany: “Vomaiky nitea ani-Jehovah aho lafa nahay hoe avy le nanao raha ie mba hahavy antsika hana raha tamany.”

¹⁸ Hoy Jessica, ranabavy baka a Mikronezỳ any zay: “Le mbo tiaroko avao ty hafaleako lafa zaho nahay hoe nahita fahamarina! Tanteraky faminania amy Genesisy 3:15 ao iny. Nampitiaro ahy raha io hoe tsy zao mihintsy ty fiaina teani-Jehovah ho antsika. Mbo nanampy ahy hatòky avao koa faminania io hoe ty fanompoa ani-Jehovah ro mahavy ahy hana fiaina soa henanizao noho fiaina farani-ze soa amy hoavy.”

19. Manino tsika ro afaky matoky fa ho tanteraky ty tampany farany amy faminania iny?

¹⁹ Hitantsika teo fa tanteraky tsikelikely henanizao ty Genesisy 3:15. Fa hay soa hoe ia ty taranakini-ampela iny, le ia ty taranakini-bibilava iny. Fa nijanga ty tomitsini-Jesosy, azy voalohany amy taranakini-ampela iny, le fa Mpanjaka mahery noho tsy mety maty ie henanizao. Fa presky voafilini-Jehovah iaby henanizao olo hiaraky manjaka amy Anakilahiny iny an-danitsy any rey, zany hoe ty faharoe amy taranakini-ampela iny. Fa nitanteraky ty tampany voalohany amy faminania io, ka afaky matoky tsika fa tsy maintsy ho tanteraky koa azy tampany farany iny, zany hoe ty fanorotoroa ty lohani-bibilava iny. Tena ho falifaly ty mpanompo-Ndranahary lafa haripaky Satana! Fe miareta avao zisiky iaviani-fotoa zay. Azo atokisa Ndranaharintsika iny. Hampiasa ty taranakini-ampela iny ie mba hanomeza raha soa maro “ty firenena iaby ambony tany” etoy.​—Gen. 22:18.