1. Engàni-Jehovah hivavaky aminy tsika. Manao akory ty tokony ho fahitantsika ani-zay?

 ENGÀNI-Mpamoro ty lanitsy noho ty tany iny hivavaky aminy tsika. Tena fanomeza lafovily raha zay. Mba eritsereto tse moa: Afaky mivola ty raha am-pontsika ao amy Jehovah tsika ndre ombia ndre ombia, ndre ino ino fivolanantsika, sady tsy mila manao randevò. Afaky mivavaky aminy avao tsika ndre an-dapotaly any, ndre am-prizon any, sady afaky matoky tsika hoe hijanjy antsika Babantsika be fitiava iny. Tena misaotsy azy tsika fa nahazo ani-fanomeza io.

2. Akory ty nampisehoani-Davida Mpanjaka hoe tena lafovily taminy ty vavaky?

² Nirambesini-Davida Mpanjaka ho tombontsoa bevata ty vavaky. Nihira ho ani-Jehovah ie hoe: “Enga ane ty vavaky ataoko mba hanahaky emboky manitsy voaoma soa anatrehanao eo!” (Sal. 141:1, 2) Tamy androni-Davida, le nomanini-mpisoro rey soa emboky manitsy nampiasà tamy fivavaha marina rey, sady nataon-drozy azo antoky hoe voakarakara soa. (Eks. 30:34, 35) Teani-Davida laha manahaky raha nataoni-mpisoro nikarakara emboky manitsy rey ty ataony lafa mivavaky, zany hoe teany laha voaoma soa ty raha hovolaniny amy Jehovah. Ho zay koa ty faniriantsika. Teantsika hahafalifaly ani-Jehovah ty vavaky ataontsika.

3. Tokony hanao akory ty fihetsikintsika lafa tsika mivavaky amy Jehovah, le ino ty antony?

³ Tena tokony hanaja ani-Jehovah tsika lafa mivavaky aminy. Mba eritsereto tse moa ty fahità naseho tamy Isaia, Ezekiela, Daniela, noho Jaona. Samby hafa fahità reo fe nisy raha nampitovy an-drozy. Samby nampiseho fahità rey hoe Mpanjaka be voninahitsy Jehovah. Isaia, ohatsy, nahita ani-“Jehovah nipetraky tamy sezi-mpanjakà anabo noho misy hajany.” (Isaia 6:1-3) Ezekiela, nahita ani-Jehovah nipetraky tanaboni-kalesiny  an-danitsy any, le nisy raha ‘mazava biby manahaky hazavani-sadiananahary rey’ ty nanodidy azy. (Ezek. 1:26-28) Daniela, nahita ani-“Azy Fa Nisy Fa Ela Biby Iny” nisiky akanjo foty biby, sady nisy afo miroaroa niboaky baka amy sezi-mpanjakàny eo. (Dan. 7:9, 10) Le Jaona, nahita ani-Jehovah nipetraky tamy sezi-mpanjakàny teo, le nisy sadiananahary soasoa manahaky emerôdy maintso io ty nanodidy azy. (Apok. 4:2-4) Tsy misy olo be voninahitsy mandilatsy ani-Jehovah vatany! Mampitiaro antsika raha zay fa tena mana tombontsoa bevata tsika satria engàny hivavaky aminy, le tokony hanaja azy tsika lafa manao ani-zay. Fe ino ty tokony horesahintsika amy vavaky?

4. Ino ty ianarantsika baka amy raha nivolanini-Jesosy voalohany tamy vavaky modely amy Matio 6:9, 10 ao io?

⁴ Vakio Matio 6:9, 10. Tamy Toriteny tamy Vohitsy teo iny, le nampianarini-Jesosy ani-mpianatsiny rey hoe vavaky manao akory ro tea-Ndranahary. Lafa baka nivola Jesosy hoe ‘mivolàna ho zao lafa mivavaky’, le niresaky raha bevata mikasiky ty sitraponi-Jehovah tse ie. Nivavaky mikasiky ty fanamasìna ty anarani-Jehovah noho ty hiaviani-Fanjakàny ie, satria io ro handripahany ani-ze manohitsy a Ndranahary. Nivavaky mikasiky ty raha soa hatao-Ndranahary amy tany toy noho ho an’olombelo amy hoavy koa ie. Laha miresaky raha manahaky ani-reo tsika lafa mivavaky, le asehontsika hoe tena vatan-draha amintsika ty sitrapo-Ndranahary.

5. Mijanjy antsika va Jehovah lafa tsika mivavaky aminy mikasiky ty raha ilàntsika manoka?

⁵ Tamy tohini-vavaky iny, le nasehoni-Jesosy hoe azo atao ty mivavaky mikasiky ty raha ilàntsika manoka. Azontsika atao ty mivavaky amy Jehovah mba hanome ze hany ilàntsika sanandro, hanenga ty hadisoantsika, hiaro antsika amy fakam-panahy, noho hanafaky antsika amy azy raty iny. (Mat. 6:11-13) Laha mangataky raha manahaky ani-reo amy Jehovah tsika, le asehontsika azy fa mieky tsika hoe mila ty fanampeany sady ta hanao raha mahafalifaly azy.

6. Raha voaresaky tamy vavaky modely iny ao rey avao va ty azontsika resahy lafa mivavaky? Hazavao.

⁶ Tsy teani-Jesosy hangala tahaky ani-raha nivolaniny tamy vavaky modely iny ty  mpanori-dia azy. Nisy fotoa, ohatsy, ie niresaky raha tena nampiasa loha azy tamy vavaky hafa nataony. (Mat. 26:39, 42; Jaona 17:1-26) Afaky mivavaky mikasiky ty raha mampiasa loha antsika koa tsika, manahaky ty nataoni-Jesosy. Laha misy fanapahan-kevitsy hataontsika, le afaky mangataky fahendrea noho fahaiza mandiniky tsika. (Sal. 119:33, 34) Laha voatendry hanao andraikitsy sarotsy tsika, le afaky mivavaky tsika mba hahaizantsika hoe akory ty hanaova ani-raha iny. (Ohab. 2:6) Afaky mivavaky ho ani-anan-drozy, ohatsy, ty ray aman-dreny, le afaky mivavaky ho ani-ray aman-drenin-drozy koa ty anaky. Tokony hivavaky ho an’olo ampianarintsika Baiboly noho ze olo itoriantsika koa tsika iaby. Fe tsy hangataky fanampea avao ty tokony hataontsika lafa mivavaky amy Jehovah.

7. Manino tsika ro tokony hidera ani-Jehovah lafa mivavaky?

⁷ Tsy tokony ho halinontsika ty midera ani-Jehovah lafa tsika mivavaky. Tsy misy olo maeva hoderà mandilatsy ani-Ndranaharintsika iny. “Soa toetsy noho parè hanenga hadisoa” ie. “Mamindra fo noho miferinay” koa ie, “tsy mora meloky, tena be fitiava noho tsy mivaliky, sady azo atokisa.” (Sal. 86:5, 15) Tena tokony hidera ani-Jehovah zany tsika satria haintsika hoe manao akory ie le ino ty ataony.

8. Ino ty raha sisany azontsika isaora ani-Jehovah? (Salamo 104:12-15, 24)

⁸ Lafa midera ani-Jehovah tsika lafa mivavaky, le voatosiky hisaotsy azy amy ty raha soasoa ameany antsika. Afaky misaotsy azy, ohatsy, tsika lafa mahita loko soasoa amy folera rey. Eo koa ty karazan-kany soasoa noho nama tena tea antsika. Ameani-Babantsika be fitiava iny antsika raha reo noho ty raha maro hafa, mba hahafalifaly antsika. (Vakio Salamo 104:12-15, 24.) Fa ty tena vatan-draha, misaotsy ani-Jehovah tsika satria maro biby ty hany ara-panahy ameany antsika noho ty raha soasoa ampitamaniny antsika amy hoavy.

9. Ino ty hanampy antsika tsy hanalino hisaotsy ani-Jehovah? (1 Tesalonianina 5:17, 18)

⁹ Mety ho halinontsika ty hisaotsy ani-Jehovah amy ty raha iaby ataony ho antsika. Ino ty hanampy anao hahatiaro hisaotsy azy? Azonao atao lista ze raha nangatahinao tamy vavaky, le henteo raha nisoratinao iny  lafa afarafara ao mba hahitanao hoe nanao akory ty namaleani-Jehovah ani-raha rey. Bakeo misaora azy satria nanampy anao ie. (Vakio 1 Tesalonianina 5:17, 18.) Eritsereto zao: Mahatiaro falifaly noho misy mpitea tsika lafa misy olo mankasitraky antsika. Manahaky ani-zay koa Jehovah. Falifaly ie lafa tsy halinontsika ty misaotsy azy lafa tsika mivavaky. (Kol. 3:15) Fe misy raha hafa tena bevata koa tokony hisaorantsika ani-Ndranaharintsika iny.

10. Laha hentea ty 1 Petera 2:21, manino tsika ro tokony hisaotsy ani-Jehovah amy ty nanirahany ani-Jesosy an-tany etoy?

¹⁰ Vakio 1 Petera 2:21. Tokony hisaotsy ani-Jehovah tsika satria nirahiny hampianatsy antsika Anakilahiny teany iny. Lafa mianatsy mikasiky ani-Jesosy tsika, le hahay raha maro mikasiky ani-Jehovah. Ho haintsika koa hoe ino ty tokony hatao mba hampifalifalea azy. Laha tsika mampiseho finoa ty soro nataoni-Kristy, le hifandramby marìny amy Jehovah Ndranahary sady hilongo soa aminy.​—Rom. 5:1.

11. Manino ro ataontsika amy anarani-Jesosy ty vavakintsika?

¹¹ Misaotsy ani-Jehovah tsika satria afaky mivavaky aminy amy alalani-Anany iny. Jesosy ro ampiasani-Jehovah mba hanome antsika ze raha angatahintsika. Janjinini-Jehovah noho valeany ty vavaky atao amy anarani-Jesosy. Nivola Jesosy hoe: “Ze raha iaby angatahinareo amy anarako, le hataoko mba hanomezam-boninahitsy ani-Baba amy alalani-Anaky.”​—Jaona 14:13, 14.

12. Ino koa ty antony hafa mahavy antsika tokony hisaotsy ani-Jehovah amy nanomezany ani-Anakilahiny iny?

¹² Manenga ty hadisoantsika Jehovah, le ataony miory amy sorom-panavotani-Jesosy iny raha zay. Mivola ty Soratsy Masy fa ‘Mpisorobentsika’ Jesosy. “Mipetraky ankavanani-Ndranahary Be an-danitsy any iny ie.” (Heb. 8:1) Jesosy ro “mpanampy [antsika] amy Baba any.” (1 Jaona 2:1) Tena falifaly tsika hoe nameani-Jehovah Mpisorobe mahay antsika amy ty raha mampalemy antsika, sady “misoloho ho antsika”! (Rom. 8:34; Heb. 4:15) Olombelo tsy lavorary tsika. Tsy ho niafaky namonjy ani-Jehovah amy vavaky zany tsika, laha tsy teo soro nataoni-Jesosy iny. Tena lafovily fanomeza nameani-Jehovah antsika io. Azo antoky fa ekenao hoe tsy ho ampy mihintsy ty fisaora hataontsika azy ndre ombia ombia, satria Anakilahiny teany iny mihintsy ro nafoiny!

13. Tamy haliky talohani-nahafatesani-Jesosy iny, akory ty nampisehoany hoe teany mpianatsiny rey?

¹³ Tamy haliky talohani-nahafatesany iny, le nivavaky ela biby ho ani-mpianatsiny rey Jesosy. Nangataky tamy Babany ie mba ‘hiaro an-drozy amy azy raty iny.’ (Jaona 17:15) Hita hoe tena tea an-drozy vatany Jesosy! Fa nihainy hoe kely sisa le hiatriky raha tena sarotsy ie, fe ndre zay le mbo nila ze hahasoa ani-apostoliny rey avao ie.

14. Akory ty ampisehoantsika hoe teantsika rahalahy noho anabavintsika reo?

¹⁴ Manahaky ani-Jesosy tsika laha tsy mieritseritsy ze hahasoa antsika avao. Mivavaky tsy tapaky ho ani-rahalahy noho anabavintsika reo tsika. Laha manao ani-zay tsika, le manoriky ani-didini-Jesosy mikasiky fitiava iny, sady asehontsika amy Jehovah koa amy zay hoe tena teantsika mpiara-manompo amintsika reo. (Jaona 13:34) Tsy hisera mihintsy ty vavaky ataontsika ho ani-rahalahy noho anabavintsika reo. Mivola ty Safà-Ndranahary fa “misy vokany bevata ty fisolohoani-olo marina.”​—Jak. 5:16.

15. Manino rahalahy noho anabavintsika rey ro mila vavaky baka amintsika?

 ¹⁵ Mila vavaky baka amintsika mpiara-manompo amintsika reo satria miatriky raha sarotsy maro rozy. Azontsika atao, ohatsy, ty mangataky ani-Jehovah mba hanampy an-drozy hiaritsy tsy fahasalamà, loza sankarazany, aly, fanenjeha, na raha sarotsy hafa. Afaky mivavaky ho ani-rahalahy noho anabavy miasa mafy manampy tra-boina rey koa tsika. Mety mahay mpiara-manompo vitsivitsy miatriky raha sarotsy zao iha. Azonao atao ty manono ty anaran-drozy amy vavaky ataonao. Asehontsika hoe tena teantsika mpiara-manompo amintsika rey laha mangataky ani-Jehovah tsika mba hanampy an-drozy hahavita hiaritsy.

16. Manino tsika ro tokony hivavaky ho ani-rahalahy mitariky antsika reo?

¹⁶ Tena teani-rahalahy mitariky anivoni-fiangona eo rey laha mivavaky ho an-drozy tsika, sady manampy an-drozy raha zay. Haini-apostoly Paoly, ohatsy, hoe nila vavaky baka amin’olo hafa ie. Nanoratsy amy zay ie hoe: “Mivavaha ho ahy koa mba hatoro ahy ze raha tokony hovolaniko lafa mivola aho. Amy zay aho hahasaky hivola lafa manambara ani-sekirè masy mikasiky ty vaovao soa iny.” (Efes. 6:19) Maro koa henanizao ty rahalahy miasa mafy mba hitariky antsika. Asehontsika hoe tea an-drozy tsika laha mangataky ani-Jehovah mba hanampy an-drozy amy ty asa ataon-drozy.

17-18. Amy fotoa manao akory tsika ro mety angatahy hisolo tena olo amy vavaky, le ino ty tokony hotiarovintsika?

¹⁷ Angatahy tsika kindraiky mba hisolo tena olo amy vavaky. Ty ranabavy raiky mampianatsy Baiboly, ohatsy, mety hangataky ani-ranabavy miaraky aminy iny mba hanao vavaky. Mety tsy tena mahay soa ani-mpianatsy iny ranabavy namany iny, ka mety ho teany ie laha amy farani-fianara iny vo manao vavaky. Ho hainy soa amy zay hoe ino ty raha tokony hovolany lafa mivavaky ho ani-mpianatsy iny ie.

¹⁸ Mety angatahy hanao vavaky amy fivoria alohani-fanompoa na amy fivoriani-fiangona, ohatsy, ty rahalahy raiky. Tokony hotiarovini-rahalahy voatendry hanao vavaky rey hoe ino ty raha kendreni-fivoria iny. Tsy natao hananara  na hampianara fiangona ty vavaky, na koa hoe hanaova fampandrenesa. Amy ankamaroani-fivoriani-fiangona, le limy minity ro atoka mba hanaova hira noho vavaky. Tsy tokony hanao vavaky “lava marè” zany rahalahy manao vavaky iny, sirtò amy fanombohani-fivoria.​—Mat. 6:7.

19. Ino ty hanampy antsika ho parè amy andro fitsaràni-Jehovah?

¹⁹ Tsy tokony hataontsika ambanin-draha mihintsy ty vavaky, satria fa mihamarìny ty andro fitsaràni-Jehovah. Zao ty raha nivolanini-Jesosy mikasiky ani-zay: “Miambena avao, le misolohoa avao mba ho afaky hilay ani-raha iaby tsy maintsy hiseho zay nareo, sady ho afaky hitsanga anatrehani-Anak’olo eo.” (Lioka 21:36) Laha mivavaky tsy tapaky tsika, le hihamatanjaky ty finoantsika ka ho parè tsika lafa avy ty andro fitsarà-Ndranahary.

20. Ino ty azontsika atao mba hanahaky emboky manitsy io ty vavaky ataontsika?

²⁰ Ino ty raha nidinihintsika tato? Tena tombontsoa bevata ty mivavaky. Ty raha mifandramby amy sitraponi-Jehovah ro tokony ho vatan-draha marè amintsika lafa tsika mivavaky. Tokony hankasitraky ani-Anaki-Ndranahary iny noho ty Fanjakàny koa tsika, sady hivavaky ho ahi-ty mpiara-manompo amintsika. Teani-Jehovah koa laha mivavaky mikasiky ty raha ilàntsika sanandro tsika sady mangataky aminy mba hanampy antsika hana finoa matanjaky avao. Asehontsika hoe lafovily amintsika ty vavaky laha eritseretintsika soa ty raha horesahintsika lafa tsika hivavaky. Hanahaky emboky manitsy rey amy zay ty faharezani-Jehovah ty raha volanintsika, zany hoe ho teateany.​—Ohab. 15:8.