1. Ino ty raha teani-Jehovah hatao henanizao?

 TEA-NDRANAHARY hotorỳ amin’olo iaby an-tany etoy ty vaovao soa mikasiky Fanjakà iny henanizao. (Mar. 13:10; 1 Tim. 2:3, 4) Ani-Jehovah asa io, ka rariny laha nifily ani-Anakilahiny teany iny ie mba hitariky ani-asa io. Jesosy ro mitariky ty asa fitoria, ka afaky matoky tsika fa ho vita mifanaraky amy ty itiavani-Jehovah azy asa io, aloha ty hiaviani-farany.​—Mat. 24:14.

2. Ino ty hodinihintsika amy lahatsoratsy toy ato?

² Ho hitantsika amy lahatsoratsy toy ato ty valini-fanontanea retoa: Akory ty ampiasani-Jesosy ty “mpanompo azo atokisa noho mahihitsy” mba hanome tari-dala baka amy Safà-Ndranahary ao? Akory ty ampiasany ani-mpanompo io mba handamina ty mpanori-dia azy hahavita ty asa fitoria, azy asa farani-ze bevata atao an-tany etoa io? (Mat. 24:45) Le ino ty azontsika kiraidraiky atao mba hanohana ani-Jesosy noho ty mpanompo azo atokisa?

3. Ino ty fahefà namea ani-Jesosy?

³ Mitariky ty asa fitoria Jesosy. Manino tsika ro mivola ani-zay? Taloha kelikelini-hiakarani-Jesosy tan-danitsy any, le nifankahita tamy sisany amy mpanori-dia azy rey ie, tamy vohitsy Galilia teo. Nivola tamin-drozy ie hoe: “Fa namea ahy ty fahefà iaby an-danitsy any noho an-tany etoy.” Henteo amy zay moa ty raha nivolaniny tafarani-zay. Hoy ty asany: “Mandehana zany, ampianaro ty olo amy firenena iaby mba ho lasa mpanori-dia ahy.” (Mat. 28:18, 19) Ankoatsini-raha iaby namea ani-Jesosy zany, le namea fahefà hitariky ty asa fitoria koa ie.

4. Manino tsika ro matoky fa mbo mitariky ty asa fitoria avao Jesosy?

 ⁴ Nivola Jesosy fa ho vita amy “firenena iaby” ty asa fitoria noho fampianara, le hiaraky amy ty mpanori-dia azy avao ie “sanandro, zisiky hitamperani-zao tontolo zao.” (Mat. 28:20) Hitantsika baka amy safàni-Jesosy reo hoe hitohy avao ty asa fitoria. Nitariky ani-asa io avao zany Jesosy nanomboky tamy zay zisiky henanizao.

5. Ino ty raha ataontsika mba handrambesa anjara amy fanatanteraha ty Salamo 110:3?

⁵ Tsy niasa loha Jesosy hoe mba ho maro avao va ty olo hanao ani-asa io, zisiky hiaviani-fotoa hitamperani-zao tontolo zao. Hainy fa ho tanteraky faminania nivolanini-mpanao salamo iny hoe: “Hanolo-tena an-tsitrapo ty vahoakinao amy andro anafihani-tafikinao.” (Sal. 110:3) Laha mitory ty vaovao soa iha, le manoha ani-Jesosy noho ty mpanompo azo atokisa sady mandramby anjara amy fanatanteraha ani-faminania io. Kely sisa le ho vita asa io, fe maro ty raha sarotsy.

6. Ino ty anisani-raha sarotsy atrehini-mpitory henanizao?

⁶ Anisani-raha sarotsy atrehini-mpitory ty fanohera. Mampiparitaky raha diso mikasiky asantsika io amin’olo maro ty mpivadi-pinoa, ty mpitariky fivavaha, noho ty mpanao politiky. Laha mino ani-vandin-drozy rey amy zay ty longontsika, ty olo haintsika, noho ty mpiaraky miasa amintsika, le mety hiforosè antsika hijano tsy hanompo ani-Jehovah noho tsy hitory sasy. Amy tany sisany, le mangorohoro, manafiky, na manambotsy ty rahalahy noho anabavintsika ty fahavalontsika. Misy aza mampigadra an-drozy mihintsy. Fe tsy mahatseriky antsika raha zay. Fa nivola Jesosy hoe: “Ho halani-firenena iaby nareo satria manday ty anarako.” (Mat. 24:9) Fankalaina manahaky ani-zay mihintsy ro porofo fa manoriky ty modelini-Jesosy tsika sady mahazo hatò amy Jehovah. (Mat. 5:11, 12) Ty Devoly ro anisani-mahavy ani-fanohera zay. Fe manampy antsika Jesosy. Tsy mahasaka ani-Jesosy ty Devoly, ka avy amin’olo maro amy firenena iaby ty vaovao soa. Diniho moa porofo retoa.

7. Ino ty raha hitanao ka manaporofo hoe tanteraky ty Apokalypsy 14:6, 7?

⁷ Misy raha sarotsy hafa koa atrehini-mpitory. Tsy haintsika ty fivolana ty ankamaroan’olo. Fe fa nivola Jesosy tamy fahità raiky nasehony tamy apostoly Jaona amy Apokalypsy ao iny, fa tsy hahavita hisaka ty vaovao soa raha zay, amy androntsika henanizao. (Vakio Apokalypsy 14:6, 7.) Amy fomba akory? Miezaky tsika mila fomba sankarazany mba hahavy ty olo handramby ty hafatsini-Fanjakà iny. Henanizao, afaky mamaky boky noho gazety ara-baiboly amy jw.org ao ty olo amy tany toy iaby, satria fa misy amy fivolana 1 000 mahery ty raha ao! Nekeni-Filan-kevi-pitantana ty handikà ty boky Ho Azonao Tavy ty Fiaina Zisiky Farany! azy fitaova fampianarantsika Baiboly iny, amy fivolana 700 mahery! Natao video koa hany ara-panahy rey ho an’olo mareny, le misy boky noho gazety amy soratsy braille ho an’olo jiky. Hitantsika baka amy zay fa tanteraky ty faminaniani-Baiboly. Olo maro baka amy “fivolana maro ampiasani-firenena reo” ro mianatsy ty “safà malio”, zany hoe ty fahamarina amy Baiboly ao. (Zak. 8:23; Zef. 3:9) Vita iaby raha iaby reo satria Jesosy Kristy ro miandraikitsy azy.

8. Ino ty vokatsini-asa fitoria ataontsika bakany zay?

⁸ Olo 8 tapitrisa mahery amy tany 240 henanizao ro miaraky amy fandaminani-Jehovah, le an’aliny ty olo atao batisa santao! Tena maro aloha zay, fe tsy zay ty tena vatan-draha fa hoe lasa nana “toetsy vaovao”, zany hoe lasa nana toetsy kristiana mpianatsy vaovao reo. (Kol. 3:8-10) Maro ty tsy naloto fandaisam-bata sasy, tsy nisatà, tsy nanavakavaky,  noho tsy nanambonimbony ty firenena misy azy. Tanteraky ty faminania amy Isaia 2:4 ao satria ‘tsy mianatsy aly sasy’ rozy. Maro ty olo ta hilitsy amy fandamina-Ndranahary satria miezaky mafy tsika mba hisiky ty toetsy vaovao. Asehontsika koa hoe manaraky ani-Kristy Jesosy, azy mpitariky antsika iny tsika. (Jaona 13:35; 1 Pet. 2:12) Tsy kisendrasendra avao ty mahavy ani-raha zay. Fa manino? Satria manampy antsika Jesosy.

9. Laha hentea ty Matio 24:45-47, ino ty raha nivolanini-Jesosy fa hiseho amy andro farany?

⁹ Vakio Matio 24:45-47. Fa nivola Jesosy hoe amy andro farany, le hanendry “mpanompo azo atokisa noho mahihitsy” ie mba hampianatsy ty Safà-Ndranahary. Mitamà zany tsika fa hiasa mafy mpanompo io amy androntsika zao, le zay vatany ty ataon-drozy. Nampiasa lahilahy voahosotsy vitsivitsy Jesosy mba hanome ‘hany amy fotoa mety’ ty vahoaki-Ndranahary noho ze olo kinto. Tsy mieritseritsy ty vatan-drozy ho tomponi-finoan’olo hafa lahilahy reo. (2 Kor. 1:24) Eken-drozy fa Jesosy Kristy ro “mpitariky noho mpanday” ty vahoakiny.​—Isaia 55:4.

10. Ia amy boky amy sary eo reo ro nahavy anao ho resy lahatsy hanompo ani-Jehovah?

¹⁰ Nanomboky tamy 1919, le nampiboaky boky noho gazety sankarazany ty mpanompo azo atokisa, mba hanampea ty olo kinto hahazo tombontsoa hianatsy ty fahamarina amy Safà-Ndranahary ao. Le tamy 1921, nampiboaky ty boky Harpa-Ndranahary mpanompo io, mba hanampea ty olo kinto hianatsy fahamarina fototsy amy Baiboly ao. Fe nisy boky hafa naboaky lafa nandeha ty fotoa. Boky manao akory ty nanampy anao hahay noho ho tea ani-Babantsika an-danitsy any iny? Ty boky hoe “Aoka Andriamanitra no ho Fantatra fa Marina”, va sa Ny Fahamarinana Izay Mitarika ho Amin’ny Fiainana Mandrakizay, sa Azonao Atao ny Hiaina Mandrakizay ao Amin’ny Paradisa eto  An-tany, sa Fahalalana Izay Mitarika ho Amin’ny Fiainana Mandrakizay, sa Ino Marina ro Ampianary ty Baiboly? sa Ino ty Azonao Ianara amy Baiboly Ao? sa Ho Azonao Tavy ty Fiaina Zisiky Farany! azy bokintsika vaovao iny? Samby natao hanampea antsika hampianatsy Baiboly boky iaby reo. Tena niavy tamy fotoa nilantsika azy mihintsy boky reo tamy fotoa niboahany iny.

11. Manino tsika ro tena mila mianatsy mikasiky ani-Jehovah noho ty Baiboly?

¹¹ Tsy ty olo vaovao avao ro mila mahay soa ani-Jehovah noho ty Baiboly. Mila manao ani-zay iaby tsika. Hoy apostoly Paoly: “Ty ventin-kany le natao ho an’olo matotsy.” Le bakeo hoy ty asany hoe hanampy antsika “hahay hanavaky ty soa noho raty” ty fanoriha ty raha ianarantsika amy Baiboly ao. (Heb. 5:14) Mety ho sarotsy ty hanoriky ty fitsipikini-Jehovah henanizao satria raty fandaisam-bata ty ankamaroan’olo. Fe ataoni-Jesosy avao ze hahavy antsika hana finoa matanjaky, ka ameany hany ara-panahy matsiro tsika soa hazoto. Baka amy Safà-Ndranahary ao hany io, le ty mpanompo azo atokisa ro manoma noho mizara azy, fe Jesosy ro mitariky an-drozy.

12. Manahaky ty nataoni-Jesosy, akory ty nampisehoantsika hoe nanome voninahitsy ty anara-Ndranahary tsika?

¹² Manahaky ani-Jesosy, le nanome voninahitsy ty anara-Ndranahary tsika satria tena maeva ani-zay ie. (Jaona 17:6, 26) Tamy 1931, ohatsy, le nanomboky nanday anara hoe Vavolombeloni-Jehovah tsika. Nalà baka amy Soratsy Masy ao anara io. Nasehontsika hoe tena vatan-draha amintsika ty anara-Ndranahary, le teantsika laha anarani-Babantsika an-danitsy any io ro ahaizan’olo antsika. (Isaia 43:10-12) Le nanomboky tamy Oktobra tamy tao io, le nisy anara-Ndranahary iaby ze fononi-gazety Tilikambo Fiambena naboakintsika. Ankoatsini-zay, nampoly tamy pilasy  tokony hisy azy ty anara-Ndranahary amy Baiboly Ny Soratra Masina Fandikan-tenin’ny Tontolo Vaovao. Mifanohitsy tanteraky amy ty raha nataoni-Fivavaha Mivola ty Vatany ho Kristiana raha zay, satria nalan-drozy tamy ankamaroani-Baiboly nadikan-drozy ty anarani-Jehovah.

13. Ino ty mahavy anao ho resy lahatsy hoe mampiasa ty “mpanompo azo atokisa noho mahihitsy” Jesosy henanizao? (Jaona 6:68)

¹³ Nanory fandamina raiky tena miavaky an-tany etoy Jesosy mba hampandroso ty fivavaha marina, le ty “mpanompo azo atokisa noho mahihitsy” ro ampiasany. Manao akory ty fahitanao ani-fandamina io? Mety hieritseritsy ani-raha nivolanini-apostoly Petera iny vasa iha. Hoy ty asany tamy Jesosy: “Hanaia moa zahay io? Ty safà volaninao ro hahazoa fiaina mandrakizay.” (Jaona 6:68) Ho nanao akory hoasanao tsika kiraidraiky henanizay laha tsy tanatini-fandaminani-Jehovah? Mampiasa ani-fandamina io Kristy, ka ataony azo antoky hoe mahazo ze raha iaby hanampy antsika tsy hivaliky amy Ndranahary tsika. Ampiofaniny koa tsika mba hahavita soa ty fanompoantsika sady hahita vokatsy. Fa ty tena vatan-draha, ampeany tsika mba hisiky “ty toetsy vaovao”, amy zay tsika hanao raha mampifalifaly ani-Jehovah.​—Efes. 4:24.

14. Nanino ro nahasoa anao ty hoe anisani-fandaminani-Jehovah tanatini-arety mandripaky COVID-19 iny?

¹⁴ Manome tari-dala feno fahendrea Jesosy lafa misy fotoa sarotsy. Hita hoe tena nahasoa antsika raha rey lafa niseho ty arety mandripaky COVID-19. Tseri-draha ty ankamaroan’olo amy tontolo toy eto satria tsy hain-drozy hoe ino ty hatao. Fe tsy manahaky ani-zay tsika. Nataoni-Jesosy azo antoky hoe nahazo toromariky mazava soa tsika mba hiarova antsika avao. Nampirisihy, ohatsy, tsika mba hanao  kasibosy lafa mandeha amy pilasy maro olo, noho hanaja elanela. Nampitiarovy koa ty anti-panahy mba hikaiky matetiky ty olo iaby amy fiangona eo, noho mba hiezaky hahay ty raha ilàn-drozy hanampy an-drozy ho voaaro, ho salama, noho hifandramby soa amy Jehovah avao. (Isaia 32:1, 2) Nahazo toromariky fanampiny noho fampahereza koa tsika amy vaovao farany baka amy Filan-kevi-pitantana rey.

15. Ino ty toromariky namea antsika mba hahavy antsika hivory noho hitory avao tanatini-arety mandripaky iny, le nanao akory ty vokany?

¹⁵ Namea toromariky mazava soa koa tsika tanatini-arety mandripaky iny. Natoro antsika hoe akory ty hatao mba hahavy ty fiangona hivory noho handramby anjara amy asa fitoria avao. Tsiela avao, le fa nanomboky nampiasa internet tsika mba hivoria noho hanatreha fivoriambe. Nanomboky teo koa, le presky fitoria an-taratasy noho an-telefony avao ro nataontsika. Nitahy ty ezaky nataontsika Jehovah. Maro ty sampana nanao tatitsy hoe tena nitombo ty isakini-mpitory amy tany misy an-drozy. Lasa nana traikefa koa ty ankamaroantsika tanatini-fotoa sarotsy toy.​—Henteo ty efajoro hoe “ Mitahy ty Asa Fitoria Ataontsika Jehovah.”

16. Ino ty raha azontsika antoky?

¹⁶ Mety hanao ho zao ty olo sisany hoe nitandrina marè loatsy ty fandamina tamy arety mandripaky iny. Fe hitantsika matetiky hoe tena nety soa noho feno fahendrea toromariky namea antsika rey. (Mat. 11:19) Tena mitariky ty vahoakiny am-pitiava Jesosy. Lafa mandiniky ani-raha zay tsika, le matoky fa ndre ino ino ty raha mety hiseho amy hoavy, le hanampy antsika Jehovah noho Anakilahiny teany iny.​—Vakio Hebreo 13:5, 6.

17. Manao akory ty fahitanao ty hoe tarihini-Jesosy?

¹⁷ Soa avao fa Jesosy ro Mpitariky antsika! Hafa mihintsy fandamina misy antsika toy, satria tsy voazarazarani-fombafomba, firenena, noho fivolana samby hafa. Mahazo fampianara maro baka amy Safà-Ndranahary ao tsika, sady mahazo ze fampiofana ilàntsika mba hahavitantsika ty asa fitoria. Nampianary antsika kiraidraiky hoe akory ty hisikinantsika ty toetsy vaovao, le mianatsy mifankatea koa tsika. Afaky mirengirengy vatany tsika satria Jesosy ro Mpitariky antsika!