Nampianatsy olo ho tea filongoa Jesosy. Fe nivola tamy apostoliny rey ie ndraiky zay hoe: “Ka mieritseritsy hoe avy handay filongoa an-tany etoa aho. Tsy avy handay filongoa aho fa handay sabatsy. Satria avy aho mba hampisaraky ty anakilahy noho ty babany, ty anakampela noho ty reniny, le ty vinantovavy noho ty rafozambaviny.” (Mat. 10:34, 35) Ino ty teani-Jesosy hovolany?

Tsy ta hampisaraky ty mpilongo Jesosy, fe hainy fa hahavy ty fianakavia sisany hizarazara ty fampianarany. Ka ze maniry ho lasa mpianatsini-Kristy noho hatao batisa zany, le tokony hahay hoe mety tsy ho teani-fianakaviany kindraiky ty fanapahan-kevitsy ataony. Mety hanohitsy azy ty valiny na ty fianakaviany tsy Vavolombeloni-Jehovah. Lafa miseho raha zay, le mety ho sarotsy aminy ty tsy hivaliky amy fampianarani-Kristy.

Mampirisiky ty Kristiana ‘hilongo amin’olo iaby’ ty Baiboly. (Rom. 12:18) Fe mety ho lasa sahala amy “sabatsy” io ty fampianarani-Jesosy amy fianakavia sisany. Ino ty antony? Satria mety haneky ty fampianarani-Jesosy ty sisany amin-drozy, fa ty ilany mety handà na hanohitsy ani-raha zay. Lafa miseho raha zay, le manjary lasa ‘fahavaloni-azy’ raiky mianatsy fahamarina iny ty fianakaviany.​—Mat. 10:36.

Mila manapa-kevitsy kindraiky ty mpianatsini-Kristy miaraky mipetraky amy fianakavia tsy Vavolombeloni-Jehovah hoe hanao ze mahafalifaly ani-Jehovah noho Jesosy va ie, sa hanao raha mahafalifaly ani-longony reo. Mety hampirisiky azy hankalaza fety mifandramby amy fivavahan-diso, ohatsy, longony tsy Vavolombeloni-Jehovah reo. Tsy maintsy manapa-kevitsy ie amy fotoa zay hoe ia ty teany ho falifaly. Nivola Jesosy hoe: “Ze tea ty babany na ty reniny mandilatsy ty fitiavany ahy le tsy maeva ahy.” (Mat. 10:37) Tsy ta hivola Jesosy hoe laha ta ho lasa mpianatsiny ty olo raiky le tsy tokony ho tea ty ray aman-dreniny. Tsy zay mihintsy, fa nampianariny rozy mba hanapa-kevitsy hoe ino ty tena vatan-draha marè amy fiainan-drozy. Teantsika avao ty fianakaviantsika ndre manohitsy antsika aza rozy satria hoe manompo ani-Jehovah tsika. Fe mieky tsika fa Ndranahary ro tokony ho teantsika marè mandilatsy ty olo hafa.

Marina aloha fa tena maharary ty hoe toherini-fianakavia. Fe miezaky mitiaro ani-raha nivolanini-Jesosy toy avao ty mpianatsiny: “Ze tsy maneky handay ty hazo fijaleany ka tsy manaraky ahy, le tsy maeva ahy.” (Mat. 10:38) Laha atao amy safà hafa le hoe tokony ho parè hiaritsy ty fanohera ataoni-fianakaviany ty mpianatsini-Kristy. Fe mitamà rozy fa mbo hiova fianakavian-drozy rey lafa mahita ty fandaisam-bata soa ananan-drozy, ka mety haniry hahay ty raha volanini-Baiboly.​—1 Pet. 3:1, 2.