Tsy maintsy manam-pinoa tsika laha ta hampifalifaly an’i Jehovah. Fe mivola ty Baiboly fa “tsy hoe manam-pinoa iaby ty olo iaby.” (2 Tes. 3:2) Niresaky mikasiky olo nanenjiky azy rey apostoly Paoly eo. Nivola ie fa olo ‘satà noho raty fanahy’ rozy. Fe mihatra amin’olo hafa avao koa raha niresahiny mikasiky finoa io. Tsy eken’olo sisany mihintsy ty porofo mazava mampiseho hoe Ndranahary ro namoro ty raha iaby. (Rom. 1:20) Mety hivola ty olo sisany hoe mino a-Ndranahary. Fe tsy ampy zay mba hampifalea an’i Jehovah.

Tokony ho resy lahatsy tsika hoe misy Jehovah sady “mpanome raha soa” ani-ze olo tena mino azy. (Heb. 11:6) Anisan’ny vokatsin’ny fanahy masi-Ndranahary ty finoa. Mila mivavaky amy Jehovah zany tsika laha ta hahazo fanahy masy. (Lioka 11:9, 10, 13) Hahazo fanahy masy koa tsika laha mamaky ty Safà-Ndranahary. Bakeo vetsevetsentsika ze raha vakintsika sady miezaky tsika manoriky ze raha ianarantsika. Laha manao ani-zay tsika, le hiasa amintsika ty fanahin’i Jehovah ka hana an’ny finoa mampifalifaly azy iny tsika.