1. Ino ty manampy ty vahoakin’i Jehovah hanompo azy avao ndre miatriky raha sarotsy rozy?

 MIVOLA ty Baiboly fa miay amy “fotoa sarotsy tsy mora atrehy” tsika henanizao. (2 Tim. 3:1) Miatriky raha sarotsy manahaky ty olo iaby tsika, amy tontolon’i Satana toy eto. Fe mbo miampy ty ahintsika. Toherin’olo noho enjehiny, ohatsy, tsika satria manompo an’i Jehovah. Ino ty hanampy antsika hanompo an’i Jehovah avao ndre eo raha sarotsy reo? Anisan’ny antony raiky bevata zao ty fahaizantsika hoe “Ndranahary velo” Jehovah.​—Jer. 10:10; 2 Tim. 1:12.

2. Manino Jehovah ro volany hoe Ndranahary velo?

² Tena misy Jehovah. Hitany ty raha sarotsy iaby atrehintsika sady ta hanampy antsika avao ie. (2 Tan. 16:9; Sal. 23:4) Hahavita hiaritsy raha sarotsy tsika laha tiarovintsika avao hoe Ndranahary velo ie. Zay mihintsy ty raha nitsapan’i Davida Mpanjaka. Ndao moa hodinihintsika zay.

3. Ino ty tean’i Davida hovolany lafa ie nivola hoe “velo Jehovah”?

³ Nahay an’i Jehovah Davida sady niantehitsy taminy. Lafa nila fomba hamonoa azy ty fahavalony, anisani-zay Saoly Mpanjaka, le nivavaky tamy Jehovah ie mba hanampy azy. (Sal. 18:6) Lafa namaly ty vavaky nataony Ndranahary sady nanavotsy azy, le zao ty nivolaniny: “Velo Jehovah!” (Sal. 18:46) Hita amy raha nivolaniny reo fa tsy hoe nahay avao Davida hoe misy Ndranahary. Mivola boky raiky zay fa nasehon’i Davida koa hoe natoky ie fa “ndranahary velo [Jehovah] sady parè hanampy ty vahoakiny avao.” Hain’i Davida hoe mahay ty raha iaby nahazo azy Ndranahariny io sady parè hanampy azy. Nampahery azy raha zay ka tapa-kevitsy hanompo noho hidera an’i Jehovah avao ie.​—Sal. 18:28, 29, 49.

4. Ino ty soa ho azontsika laha tiarovintsika avao hoe Ndranahary velo Jehovah?

⁴ Laha tena matoky tsika hoe Ndranahary velo Jehovah, le hanampy antsika hazoto hanompo azy avao raha zay. Lasa hana  hery hiareta raha sarotsy tsika sady lasa hazoto hiasa mafy amy fanompoa azy avao. Lasa ho tapa-kevitsy hifandramby soa amy Jehovah avao koa tsika.

HANOME HERY ANAO AZY NDRANAHARY VELO INY

5. Ino ty raha azontsika atokisa lafa miatriky raha sarotsy tsika? (Filipianina 4:13)

⁵ Hahavita hiaritsy tsika lafa tojiky raha sarotsy, ndre bevata zay ndre kelikely, laha tiarovintsika hoe velo Jehovah sady parè hanampy antsika avao. Afaky manampy antsika ie ndre ino ino raha sarotsy atrehintsika, satria tsy misy raha sarotsy tsy ho voavahan’ny Ndranaharintsika iny zao. Ie ro Farani-Ze Mahery, sady afaky manome hery antsika mba hahavitantsika miaritsy. (Vakio Filipianina 4:13.) Tsy misy antony tokony hampatahotsy antsika zany lafa tsika miatriky raha sarotsy. Lafa hitantsika hoe manampy antsika Jehovah lafa tsika miatriky problemo malinidiniky, le matoky tsika fa hanampy antsika koa ie lafa somary mafimafy ty raha sarotsy mahazo antsika.

6. Ino tamy ty raha niainan’i Davida tamy ie mbo nikely ro nanampy azy vomaiky hatòky an’i Jehovah?

⁶ Tena lasa nihanatoky an’i Jehovah Davida. Fa ino ty nanampy azy? Diniho moa raha roe niainany retoa. Mpiaraky aondry Davida tamy ie mbo nikely. Nisy orsa noho liona nanafiky an’ny aondrin’ny babany rey, le nahazo aondry kiraidraiky rozy. Tsy natahotsy Davida tamy raha niseho reo fa nihianiny biby reo le navotany aondry rey. Fe tsy nieritseritsy mihintsy ie hoe ie avao ro nahavita nanavotsy an’ny aondry reo. Hainy hoe Jehovah ro nanome hery azy. (1 Sam. 17:34-37) Tsy nihalinon’i Davida mihintsy raha niseho reo. Nivetsevetseny avao raha reo, ka natoky ie fa hanome hery azy Jehovah, azy Ndranahary velo iny, amy hoavy.

7. Ia ro tena nifantohan’i Davida lafa ie niatriky an’i Goliata, le nanino raha zay ro nanampy azy?

⁷ Niavy tamy toby nisy an’ny maramila israelita rey tany Davida tafara atoy. Mbo tsy ampy 20 tao ie tamy zay. Nihitany hoe navaka biby maramila rey satria nihorohoroan’i Goliata, lahilahy filistinina be noho abo zay. Nivola Goliata hoe: ‘Ia aminareo maramilan’ny Israely reo ro mahasaky hialy amiko?’ (1 Sam. 17:10, 11) Navaka maramila rey satria nifantoky tamy haben’i Goliata noho ty raha nivolaniny tamin-drozy. (1 Sam. 17:24, 25) Fe hafa mihintsy ty raha nifantohan’i Davida. Hainy fa lafa nanambanimbany ty maramilan’ny Israely Goliata, le tsy rozy avao ro nilàny aly, fa ‘nila aly tamy tafikin’ny Ndranahary velo iny’ ie. (1 Sam. 17:26) Nifantoky tamy Jehovah Davida. Natoky ie fa hanampy azy ndraiky, azy Ndranahary nanampy azy taloha tany iny. Nanampy azy Ndranahary ka afaky nialy tamy Goliata ie, le nandresy!​—1 Sam. 17:45-51.

8. Ino ty hanampy antsika hatòky hoe hanampy antsika Jehovah lafa tsika miatriky raha sarotsy? (Henteo koa sary io.)

⁸ Hahavita hiatriky raha sarotsy koa tsika laha tiarovintsika avao hoe parè hanampy antsika, azy Ndranahary velo iny. (Sal. 118:6) Afaky matoky tsika hoe hanampy antsika Jehovah laha vetsevetsentsika ty raha fa nataony ho antsika taloha tany. Vakio ze tantara amy Baiboly ao hanampy anao hahatiaro ty fomba nanavotan’i Jehovah ty mpanompony. (Isaia 37:17, 33-37) Diniho koa tantaran’ny rahalahy noho anabavintsika amy zao, amy tranonkalantsika jw.org ao. Hita amy tantara rey hoe akory ty fomba nanampean’i Jehovah an-drozy. Ankoatsini-zay, tiarovo hoe nombia Jehovah ro nanao raha mba hanampea anao. Fe manao akory laha mahatsapa iha hoe mbo tsy nanao raha miavaky be taminao Jehovah, ohatsy hoe manampy anao hialy amy  liona noho orsa? Laha zay ty tsapanao, le ka miasa loha. Fa manino? Satria maro ty raha fa nataon’i Jehovah ho anao! Nitaominy iha mba ho namany. (Jaona 6:44) Mbo tsy miala amy fahamarina ao avao iha zisiky amy zao satria manampy anao ie. Angataho zany Jehovah mba hampitiaro anao ty fotoa namaleany ty vavaky nataonao, ty nanomezany anao ze raha nilanao tamy iha nila an’ny raha iny mihintsy, na tamy ie nanampy anao lafa iha niatriky raha sarotsy. Laha mametsivetsy an’ny raha rey iha, le vomaiky hatòky hoe hanampy anao avao Jehovah.

9. Ino ty raha mila tiarovintsika lafa tsika miatriky raha sarotsy? (Ohabolana 27:11)

⁹ Lafa tsika miatriky raha sarotsy, le mila mifantoky amy hoe ino ro tena vatan-draha. Nivola ty Devoly fa hivaliky amy Jehovah tsika lafa miatriky raha sarotsy. Misy vokany amy Jehovah zany ze fomba iatrehantsika ty raha sarotsy mahazo antsika. (Joba 1:10, 11; vakio Ohabolana 27:11.) Fe laha tsy mivaliky amy Jehovah mihintsy tsika ndre miatriky raha sarotsy, le asehontsika hoe teantsika ie sady porofoentsika hoe mpavandy ty Devoly. Mety manohitsy ty vahoakin’i Jehovah vasa ty fanjakà aminareo any, na tozoro tsy manan-drala avao iha, na tsy midary ty vaovao soa ty olo itorianao, na misy raha hafa mampijaly anao. Laha zay ie, le tiarovo fa raha iainanao zay le azonao hararaoty mba hampifalifalea ty fon’i Jehovah. Tiarovo koa fa tsy hengany hiatriky raha sarotsy tsy ho zakanao mihintsy iha. (1 Kor. 10:13) Hameany hery iha mba hahavitanao miaritsy.

HAMALY SOA ANAO AZY NDRANAHARY VELO INY

10. Ino ty hataoni-azy Ndranahary velo iny ho ani-ze olo manompo azy?

¹⁰ Mpamaly soa ani-ze manompo azy Jehovah. (Heb. 11:6) Ameany fiadana noho raha soa maro tsika henanizao mba hahavy antsika ho sambatsy. Le amy hoavy, hameany fiaina mandrakizay tsika. Afaky matoky tanteraky tsika fa ta hamaly soa antsika Jehovah sady mana hery hanaova ani-zay. Lasa miezaky ho  be atao amy fanompoa azy amy zay tsika, manahaky ty nataon’ny mpanompony taloha tany rey. Zay mihintsy ty nataon’i Timoty.​—Heb. 6:10-12.

11. Nanino Timoty ro niasa mafy tamy fiangona eo? (1 Timoty 4:10)

¹¹ Vakio 1 Timoty 4:10. Tena nino tanteraky Timoty hoe hamaly soa azy Jehovah, azy Ndranahary velo iny. Zay ty antony nahavy azy niasa mafy ho an’i Jehovah noho ho ahi-ty olo hafa. Akory ty nampisehoany ani-zay? Nampirisiky azy apostoly Paoly mba hiezaky hahay hampianatsy, ndre tamy fanompoa eny zay ndre tamy fiangona teo. Nivola taminy koa Paoly mba hiezaky ho modely soa ho an’ny mpiara-manompo aminy, ndre tanora zay ndre fa be. Nanankina andraikitsy mavesatsy ie, anisani-zay ty hoe manome torohevitsy hentitsy fe amim-pitiava, ho ani-ze nila ani-zay. (1 Tim. 4:11-16; 2 Tim. 4:1-5) Natoky Timoty hoe hamaly soa azy Jehovah, ndre tsy nisy nahita aza ty asa nataony kindraiky na tsy nisy olo nankasitraky azy.​—Rom. 2:6, 7.

12. Manino ty anti-panahy ro miezaky miasa mafy avao amy fiangona eo? (Henteo koa sary io.)

¹² Afaky matoky koa ty anti-panahy hoe hitan’i Jehovah ty asa soa ataon-drozy, le tena lafovily aminy raha rey. Ankoatsin’ny hoe manao fitsidihan’aondry, mampianatsy, noho mitory, le maro amy anti-panahy reo ro mandramby anjara amy fanorena noho fanampea tra-boina. Misy amin-drozy anisan’ny Antoko Mpamangy Marary na Komity Mifandramby amy Hopitaly. Hain’ny anti-panahy mandramby anjara amy asa rey fa an’i Jehovah ty fiangona, fa tsy an’olo. Vokany, miezaky mamita ty andraikitsin-drozy amy fiangona eo rozy sady matoky tanteraky hoe hamaly soa an-drozy Ndranahary, amy ze raha iaby ataon-drozy.​—Kol. 3:23, 24.

13. Manao akory Jehovah lafa mahita antsika manao ze fara herintsika amy fanompoa azy?

¹³ Tsy tsika iaby ro afaky ho anti-panahy. Fe samby mana raha hamea an’i Jehovah tsika iaby. Tena ankasitrahan’ny Ndranaharintsika iny ze raha ameantsika azy, laha manao ze  fara herintsika tsika mba hanompoa azy. Hitany lafa manao fanomeza tsika mba hanohana ty asa maneran-tany, ndre tsy afaky manome be aza tsika. Falifaly biby ie lafa tsika mananga tana mba hamaly teny lafa am-pivoria any, ndre saro-kenatsy aza tsika. Falifaly koa ie lafa tsika manenga ty hadisoani-ze olo nanao raha nampalahelo antsika. Ndre mahatsapa aza iha hoe tsy afaky manao raha maro ho an’i Jehovah, le matokisa fa lafovily aminy ze kely vitanao. Teany iha lafa manao ani-zay, sady hamaly soa anao ie.​—Lioka 21:1-4.

MIEZAHA HIHARINY AN’NY NDRANAHARY VELO INY AVAO

14. Manino tsika ro tsy hivaliky amy Jehovah avao laha miezaky mifandramby soa aminy? (Henteo koa sary io.)

¹⁴ Laha tena mino tsika hoe misy Jehovah, le tsy ho sarotsy amintsika ty tsy hivaliky aminy. Zay mihintsy ty nataon’i Josefa. Tsy nety nijangajanga mihintsy ie. Nino ie hoe tena misy Ndranahary ka tsy ta hanao raha hampalahelo azy ie. (Gen. 39:9) Mila manoka fotoa hivavaha noho hianara ty Safàn’i Jehovah tsika laha teantsika ty hinama aminy avao. Laha manao ani-zay tsika le vomaiky hinama aminy avao. Lafa minama soa amy Jehovah amy zay tsika, manahaky an’i Josefa, le tsy ta hanao raha hampalahelo azy mihintsy.​—Jak. 4:8.

15. Ino ty ianarantsika baka amy ty raha nahazo an’ny Israelita rey tamy rozy tan-diomonto tany iny? (Hebreo 3:12)

¹⁵ Ze olo manalino hoe Ndranahary velo Jehovah ro mora mivaliky aminy. Diniho ty raha niseho tamy Israelita rey, tamy rozy tan-diomonto tany. Hain-drozy hoe misy Jehovah, fe nanomboky nisalasala rozy laha hanome ze raha ilàn-drozy ie. Nanontany mihintsy aza rozy hoe: “Amintsika etoa va Jehovah zao sa tsy etoa?” (Eks. 17:2, 7) Lasa nanohitsy a-Ndranahary amy zay rozy. Azo antoky fa tsy teantsika mihintsy ty hanahaky an-drozy, sady fampitandrema ho antsika ty raha nataon-drozy.​—Vakio Hebreo 3:12.

16. Ino ty raha mety hitsapa ty finoantsika?

¹⁶ Sarotsy amintsika ty hifandramby marìny amy Jehovah avao, vokatsy ty raha ataon’olo  amy tontolo toy eto. Maro ty olo tsy mino hoe misy Ndranahary. Matetiky, le atao raha milamindamy ty fiainani-ze olo tsy manoriky ty fitsipiki-Ndranahary. Mety ho sarotsy amintsika amy zay ty tsy hivaliky lafa mahita ani-zay. Ndre mino aza tsika hoe misy Ndranahary, le mety hanomboky hisalasala tsika laha hanampy antsika ie. Nahatsapa ani-zay koa ty mpanoratsy ty Salamo faha-73. Hitany hoe tsy nidary ty lalàna-Ndranahary ty olo nanodidy azy, fe mbo nana fiaina milamy avao rozy. Vokany, nanomboky nisalasala ie hoe mety sa tsy mety ty manompo a-Ndranahary​—Sal. 73:11-13.

17. Ino ty hanampy antsika hifandramby marìny amy Jehovah avao?

¹⁷ Ino ty nanampy an’ny mpanao salamo io hanova ty eritseritsiny? Nivetsevetseny hoe ino ty raha hahazo ani-ze olo tsy matoky an’i Jehovah sasy. (Sal. 73:18, 19, 27) Nidinihiny koa hoe manino ro mahasoa ty manompo a-Ndranahary. (Sal. 73:24) Afaky mametsivetsy ty fitahia fa namean’i Jehovah antsika koa tsika. Mba diniho hoe ho nanao akory zay ty fiainantsika laha tsy nanompo an’i Jehovah tsika. Laha tiarovintsika hoe manino ro mahasoa antsika ty manompo an’i Jehovah, le hanampy antsika tsy hivaliky aminy avao raha zay. Hivola manahaky an’ny mpanao salamo iny tsika amy zay hoe: “Fa zaho, ty mihariny a-Ndranahary ro soa amiko.”​—Sal. 73:28.

18. Manino tsika ro tsy tokony hatahotsy ty hoavy?

¹⁸ Ho afaky hiaritsy ze raha sarotsy mety hahazo antsika amy andro farany zao tsika, satria ‘manompo an’ny Ndranahary velo noho marina iny.’ (1 Tes. 1:9) Tena misy Ndranaharintsika iny sady tozoro hanampy antsika avao. Fa nasehony hoe niaraky tamy ty mpanompony ie taloha tany, le mbo manahaky ani-zay koa ty ataony henanizao. Kely sisa le hiatriky ty fijalea bevata tsika. Fe tsy ho raiky zao tsika satria hiaraky amintsika Jehovah. (Isaia 41:10) Enga anè tsika iaby “ho be herim-po ... ka hivola hoe: ‘Jehovah ro mpanampy ahy, ka tsy hatahotsy aho.’”​—Heb. 13:5, 6.