Manino ty olo sisany ro mivola fa “ty safàn’i Jehovah” (amy andininy 6 eo) ro tean’ny Salamo 12:7 hovolany, kanefa ty olo mijaly (amy andininy 5 eo) ro resahin’ny Fandikan-tenin’ny Tontolo Vaovao?

Olo ro tean’ny andininy io hovolany laha hentea ty safà manodidy.

Mivola ty Salamo 12:1-4 hoe “tsy ahità olo azo atokisa sasy amin’olombelo eo.” Bakeo ho zao ty volaniny amy Salamo 12:5-7 ao:

Miresaky ty raha hatao-Ndranahary amin’olo “mijaly” ty andininy faha-5. Hanavotsy an-drozy ie.

Mivola ty andininy faha-6 fa “malio ty safàn’i Jehovah”, ka ‘manahaky volafoty voadio io.’ Manahaky ani-zay mihintsy ty fahitantsika ty safàn’i Jehovah.​—Sal. 18:30; 119:140.

Ndao hodinihintsika henanizao ty Salamo 12:7: “Hiamby an-drozy lahy iha Jehovah! Hiaro an-drozy kiraidraiky mandrakizay tsy ho azon’ny taranaky toy iha.” Manondro ino ‘rozy’ eo io?

Satria miresaky mikasiky “ty safàn’i Jehovah” ty andininy faha-6, le mieritseritsy amy zay ty olo sisany hoe manondro ty safà-Ndranahary ‘rozy’ io. Haintsika fa niaro ty Baiboly Ndranahary ndre maro aza ty olo miezaky handrava noho hamotiky azy.​—Isaia 40:8; 1 Pet. 1:25.

Fe ambenan’i Jehovah manahaky ani-zay koa ty olo voaresaky amy andininy faha-5 eo. Fa nanampy noho nanavotsy “ty olo mijaly” noho ty olo “ampijalỳ” Jehovah bakany zay sady mbo hanao ani-zay avao.​—Joba 36:15; Sal. 6:4; 31:1, 2; 54:7; 145:20.

Ka manondro ino zany ‘rozy’ amy andininy faha-7 eo io?

Laha mandiniky soa an’ny salamo io tsika, le lasa mazava soa amintsika fa olo ro teany hovolany amy hoe ‘rozy’ amy andininy faha-7 eo.

Mivola mikasiky “olo tsy mivaliky” nifitahin’olo raty Davida, amy Salamo 12:1, 2 eo. Hitantsika amy andininy manaraky eo fa hitsanga Jehovah mba hanameloha ani-azy mivola raha raty reo. Manome toky antsika salamo io hoe afaky matoky a-Ndranahary tsika fa hiaro ty vahoakiny ie satria malio ty safàny.

Ka lafa nivola zany ty andininy faha-7 hoe hiamby noho hanampy “an-drozy” Jehovah, le ty olo mijaly vokatsin’ny raha ataon’olo raty ro teany hovolany.

Hita amy soratsy hebreo Masoreta ty hoe ‘rozy’ amy andininy io. Mampiasa ty safà hoe “tsika” ty Fandikan-teny Grikan’ny Fitopolo, amy andininy io sady mimpoly indroe. Ty olo tsy mivaliky mijaly noho ampijalỳ ro teany hovolany. Mivola ty andininy faha-7 fa harova ty “kiraidraiky” amin’olo tsy mivaliky mba tsy ho azon’ny “taranaky toy”, zany hoe tsy ho azon’olo “mampirisiky ty olo ho raty fandaisam-bata.” (Sal. 12:7, 8) Ho zao ty andikà an’ny andininy faha-7 io amy Soratsy Masy amy fivolana aramianina: “Hiaro ty olo marina lahy iha TOMPO, hiamby an-drozy tsy ho azon’ny taranaky raty fanahy toy mandrakizay iha.” Mampiasa ty safà hoe ‘rozy’ koa ty tampany voalohany amy andininy io. Hitantsika baka amin’io zany fa vomaiky matoky tsika fa tsy ty safà-Ndranahary ro teany hovolany amy Salamo 12:7 io.

Vokany, lasa mitamà “ty olo tsy mivaliky” hoe hanao raha Ndranahary mba hanampea an-drozy.