▪ Voaporofo fa nanjary Mpisorobe Jesosy lafa natao batisa tamy tao 29. Manino tsika ro mivola ani-zay? Lafa natao batisa Jesosy, le sahala nanome ty vatany ho soro amy alitara mba hanao ty ‘sitrapo-Ndranahary.’ (Gal. 1:4; Heb. 10:5-10) Nanomboky nisy alitara an’ohatsy io tamy batisani-Jesosy, ka midika raha zay fa tsy maintsy tamy zay koa ro nampisy ty tempoly ara-panahy bevata, zany hoe ty fandahara natao mba hivavaha amy Jehovah, miory amy vilim-panavota. Alitara io ro pilasy miavaky marè amy tempoly ara-panahy iny ao.—Mat. 3:16, 17; Heb. 5:4-6.

Lafa niory tempoly ara-panahy bevata iny, le nila mpisorobe hanompo ao. Nihosora “tamy fanahy masy noho hery” Jesosy mba hanao ani-asa zay. (Asa. 10:37, 38; Mar. 1:9-11) Fe, akory ty ahazoantsika antoky hoe nivoatendry ho Mpisorobe Jesosy talohani-nahafatesany noho nameloma azy tamy maty? Ho haintsika ty valini-fanontanea zay lafa mandiniky mikasiky ani-Arona noho mpisorobe tafarany rey tsika.

Mivola ty Lalànani-Mosesy fa ty mpisorobe avao ro mahazo militsy amy Masy Marè amy Tranolay Masy ao, na amy Masy Marè amy tempoly ao lafa tafara tatoy. Nisy ridò nampisaraky ty efitsy Masy noho ty Masy Marè. Tsy nandalo mbeo ty mpisorobe laha tsy tamy Andro Fandimbofam-pahotà. (Heb. 9:1-3, 6, 7) Tsy maintsy nihosora ho mpisorobe Arona noho ze nandimby azy, zay vo afaky ‘namaky mbamy ridò’ ara-bakiteny tamy Tranolay Masy tao. Ka azo antoky fa tsy maintsy nitendrè ho Mpisorobe, amy tempoly ara-panahy bevata ani-Jehovah iny ao koa Jesosy talohani-nahafatesany. Tafarani-zay, le ‘namaky mbamy ridò iny, zany hoe ty nofotsiny’ ie mba ho velo an-danitsy any. (Heb. 10:20) Zay ro nahavy ani-apostoly Paoly nivola tse hoe “mpisorobe” Jesosy, le bakeo nandeha ho amy “tranolay bevata marè noho lavorary marè sady tsy natao tana” le nilitsy ho amy “ty lanitsy mihintsy.”—Heb. 9:11, 24.

Niakatsy an-danitsy any Jesosy sady nanome ty vilini-ay lavorary nafoiny ho antsika iny. Nanao ani-zay Jesosy mba hanan-kery ty fifanekea vaovao. Fe ino iaby ty raha tsy maintsy natao?

Voalohany, niseho tamy Jehovah teo Jesosy. Bakeo nameany ani-Jehovah ty vilini-sorom-panavota nataony. Le farany, nekeni-Jehovah ty vilini-lio nalatsakini-Jesosy. Mbo tsy afaky niasa ty fifanekea vaovao laha tsy fa vita raha reo.

Tsy volanini-Baiboly hoe nombia Jehovah ro naneky ty vilini-soro nataoni-Jesosy. Ka tsy afaky manondro daty voafaritsy tsika hoe nombia ro nanomboky nanan-kery ty fifanekea vaovao. Fe ndre zay, le haintsika hoe niakatsy an-danitsy any Jesosy folo andro talohani-Pentekosta. (Asa. 1:3) Tanatini-fotoa kelikely zay ie ro nanome ty vilini-sorom-panavota nataony tamy Jehovah, le nekeni-Jehovah raha zay. (Heb. 9:12) Nisy porofo hita maso tamy androni-Pentekosta iny nanamarina hoe nanan-kery fifanekea vaovao io. (Asa. 2:1-4, 32, 33) Fa nanomboky niasa zany ty fifanekea vaovao tamy zay.

Zao ie laha fintiny: Lafa nekeni-Jehovah ty vilini-lio nalatsakini-Jesosy sady nampiliriny tamy fifanekea io koa ty voahosotsy, le nanan-kery ty fifanekea vaovao. Afaky niasa amy zay fifanekea io, ka Jesosy Kristy Mpisorobe ro Mpanelanela amy fifanekea io.—Heb. 7:25; 8:1-3, 6; 9:13-15.