1. Ino ty teantsika hovolany amy hoe “fahamarina”?

“MANAO akory ty nahitanao fahamarina?” “Nitezà tamy fahamarina va iha?” “Firy tao zay iha tanatini-fahamarina?” Azo antoky fa napetrakin’olo taminao fanontanea reo, na fa napetrakinao tamin’olo. Fe ino ty teantsika hovolany amy hoe “fahamarina”? Mampiasa ani-safà io tsika matetiky mba hivolana ty raha inoantsika noho ty fomba anompoantsika a Ndranahary, voho ty fomba fiainantsika. Lasa “anatini-fahamarina” amy zay ty olo raiky lafa mahay ty raha ampianarini-Baiboly noho miay mifanaraky amy torolala anatiny ao. Afaky amy raha diso ampianarini-fivavaha rey rozy, sady falifaly avao ndre miay amy tontoloni-Satana toy.—Jaona 8:32.

2. Ino ty raha voalohany mety hitariky olo ho amy fahamarina, laha hentea ty Jaona 13:34, 35?

² Ino ty raha voalohany nitariky anao ho amy fahamarina? Niambinao vasa ty fandaisam-bata soa ananani-vahoakini-Jehovah. (1 Pet. 2:12) Na nihitanao hoe tea olo rozy. Maro ty olo nahita ani-fitiava zay tamin’ie nivory voalohany, ka ndre teo ty raha niresahy baka amy lampihazo eny, le fitiava io ro tena nitiarony marè. Tsy mahatseriky raha zay satria fa nivola Jesosy fa ty fifankatiava ro ahaizan’olo ani-mpianatsiny reo. (Vakio Jaona 13:34, 35.) Fe mbo misy raha hafa mila ataontsika mba hananantsika finoa matanjaky.

3. Ino ty mety hiseho laha ty fifankatiava asehoni-rahalahy noho anabavy reo avao ro iorenani-finoantsika a Ndranahary?

³ Mifankatea manahaky ani-Kristy ty vahoaki-Ndranahary, fe tsy fifankatiava io raiky avao ro iorenani-finoantsika. Ino ty antony? Satria ho mora rava ty finoantsika laha miory amy fitiava raiky avao. Eritsereto hoe manao fahotà bevata ty mpiara-manompo raiky. Mety ho anti-panahy ie na mpisava lala mihintsy.  Mety misy rahalahy na anabavy manao raha mampalahelo antsika koa, na misy olo nivadi-pinoa, le mivola hoe tsy marina ty raha inoantsika. Ino ty mety hataontsika laha zay ro miseho? Laha miory amy fitiava avao ty finoantsika, le mety ho voafinga tsika ka tsy hanompo ani-Jehovah sasy. Zao ty fianara rambesintsika: Tsy tokony hiory tanteraky amy ty raha ataon’olo hafa ty finoantsika a Ndranahary fa tokony hiory amy fifandrambesantsika amy Jehovah. Lafa manory trano tsika le tsy fitaova malemy avao ro ampiasantsika. Manampy antsika hanam-pinoa ty fitiavantsika ani-Jehovah noho ty vahoakiny. Fe mbo vatan-draha marè ty fianara laliky amy Baiboly ao mba hahavy antsika hana porofo, sady ho resy lahatsy hoe marina ty raha nianarantsika mikasiky ani-Jehovah.—Rom. 12:2.

4. Laha hentea ty Matio 13:3-6, 20, 21, manao akory ty olo sisany lafa misy raha sarotsy mitsapa ty finoany?

⁴ Nivola Jesosy fa ho “falifaly” ty olo sisany lafa maneky ty fahamarina, fe hihozonkozo ty finoany lafa misy raha sarotsy. (Vakio Matio 13:3-6, 20, 21.) Tsy nampoizin-drozy vasa hoe hiatriky fitsapà rozy lafa manori-dia ani-Jesosy. (Mat. 16:24) Na nieritseritsy rozy fa hahazo fitahia avao ty olo lafa manjary Kristiana, fa tsy hisy raha manahira azy mihintsy. Kanefa tsy afaky misaraky amy tontolo misy antsika toy ty fahasahirana. Mety hihena kindraiky ty hafaleantsika lafa miova ty fiainantsika.—Sal. 6:6; Mpito. 9:11.

5. Akory ty ampisehoani-ankamaroani-rahalahy noho anabavintsika reo hoe resy lahatsy vatany rozy fa nahita ty marina?

⁵ Asehoni-ankamaroani-rahalahy noho anabavintsika reo hoe resy lahatsy vatany rozy fa nahita ty marina. Manino tsika ro mivola ani-zay? Tsy mihena ty fatokisan-drozy ndre misy mpiara-manompo manao raha mampalahelo an-drozy na maloto fandaisam-bata. (Sal. 119:165) Vomaiky mihamatanjaky aza ty finoan-drozy saky misy raha manahira, fa tsy hoe mihamalemy. (Jak. 1:2-4) Akory ty hanananao finoa matanjaky manahaky ani-zay?

6. Niory tamin’ino ty finoani-mpianatsy tamy taonjato voalohany?

⁶ Ty mpianatsy tamy taonjato voalohany, le nanory ty finoan-drozy tamy fahaizan-drozy ty Soratsy Masy noho ty fampianarani-Jesosy Kristy, zany hoe ty “fahamarinani-vaovao soa.” (Gal. 2:5) Ty raha iaby inoani-Kristiana fahamarina io, anatini-zay ty marina mikasiky ty vilim-panavotani-Jesosy noho fameloma azy amy maty. Niresy lahatsy Paoly hoe marina ty raha nianarany. Ino ty antony? Nampiasa ty Soratsy Masy ie mba hanaporofoa “baka amy ty raha voasoratsy fa tsy maintsy nijaly noho nivelomy tamy maty Kristy.” (Asa. 17:2, 3) Niresy lahatsy tamy raha nianaran-drozy mpianatsy tamy taonjato voalohany rey sady niantehitsy tamy fanahy masy mba hahaizan-drozy ty Safà-Ndranahary. Nataon-drozy ze hahazoa antoky hoe miory amy Soratsy Masy vatany fampianara rey. (Asa. 17:11, 12; Heb. 5:14) Tsy niory tamy fihetseham-po avao ty finoan-drozy, sady tsy hoe teatean-drozy avao ty miaraky amy rahalahy noho anabavy reo, le zay ty antony nanompoan-drozy ani-Jehovah. ‘Ty fahaiza marina soa a Ndranahary’ ro niorenani-finoan-drozy.—Kol. 1:9, 10.

7. Mahavy antsika hanao ino ty finoantsika ty fahamarina amy Baiboly ao?

⁷ Tsy miova ty fahamarina amy Safà-Ndranahary ao. (Sal. 119:160) Tsy miova, ohatsy, raha rey ndre misy rahalahy na anabavy manao raha maminga antsika na manao fahotà bevata. Tsy miova koa raha rey ndre miatriky raha sarotsy tsika. Ka tena mila azontsika soa ty fampianarani-Baiboly sady tokony ho resy lahatsy tsika hoe marina raha rey. Hanampy  antsika tsy hivaliky ty finoantsika lafa miory amy fahamarina amy Baiboly ao, manahaky nanga miaro sambo raiky tsy hilentiky lafa misy andro raty. Akory ty azonao ampitomboa ty fatokisanao hoe nahita ty fahamarina vatany iha?

8. Laha hentea ty 2 Timoty 3:14, 15, nanino Timoty ro nanjary resy lahatsy hoe nahita ty marina ie?

⁸ Niresy lahatsy Timoty hoe nahita ty marina ie. Akory ty nahaizany ani-zay? (Vakio 2 Timoty 3:14, 15.) Nampianatsy azy ty fampianarani-“Soratsy Masy” reniny noho bebeny. Fe azo antoky fa nanoka fotoa noho hery koa ie mba hianara ty Safà-Ndranahary. Farany nanjary ‘resy lahatsy ie sady nino’ hoe marina ty raha voasoratsy ao. Tafara tatoy, le nanomboky nifandramby tamy Kristiana hafa Timoty noho reniny voho bebeny. Azo antoky fa tena niteani-Timoty ty fitiava nasehoni-mpanori-dia ani-Jesosy rey, ka naniry marè hiaraky amy rahalahy noho anabavy rey ie sady ta hanampy an-drozy koa. (Fil. 2:19, 20) Fe tsy ty fitiavany ani-rahalahy noho anabavy reo avao ro nahavy azy nanam-pinoa. Tena natoky ie hoe marina ty raha nianarany tamy Baiboly ao, farany ie ta ho namani-Jehovah. Mila mianatsy Baiboly noho miezaky ho resy lahatsy amy ty raha ianaranao mikasiky ani-Jehovah koa iha.

9. Ino iaby ty fahamarina fototsy telo tokony hilànao porofo?

⁹ Tokony ho resy lahatsy amy fahamarina fototsy telo retoa tse iha. Voalohany, tokony hekenao hoe Jehovah Ndranahary ro Mpamoro ty kila raha iaby. (Eks. 3:14, 15; Heb. 3:4; Apok. 4:11) Faharoe, mila matoky iha hoe hafatsi-Ndranahary ho ahi-ty olombelo vatany ty Baiboly. (2 Tim. 3:16, 17) Le fahatelo, tokony ho hitanao ty porofo hoe misy vahoaky voalamy mba hanompo ani-Jehovah sady tarihini-Kristy, le tsy ia vahoaky io fa ty Vavolombeloni-Jehovah. (Isa. 43:10-12; Jaona 14:6; Asa. 15:14) Tsy mila mahay ani-ze raha iaby amy Baiboly ao iha vo ho afaky hanaporofo ani-fahamarina fototsy reo. Fa ty raha kendrenao, le mba hampiasa ty ‘sainao’ mba hampitomboa ty fatokisanao hoe nahita ty marina iha.—Rom. 12:1.

10. Ino ty mila ataontsika, ankoatsini-hoe mahay ty marina?

¹⁰ Lafa nidinihinao fahamarina fototsy telo mikasiky a Ndranahary noho ty Baiboly voho ty vahoaki-Ndranahary rey, le mila mampiasa ty Soratsy Masy iha mba hanaporofoa ani-fahamarina reo amin’olo hafa. Ino ty antony? Satria andraikitsintsika Kristiana ty mampianatsy ani-ze marina nianarantsika amy ze olo ta hijanjy antsika. * (1 Tim. 4:16) Ka lafa tsika miezaky handresy lahatsy olo amy fahamarina amy Baiboly ao reo, le hatanjaky koa ty finoantsika.

11. Ino ty modely nameani-apostoly Paoly lafa ie nampianatsy?

¹¹ Lafa nampianatsy olo ty apostoly Paoly, le “nandresy lahatsy an-drozy mikasiky ani-Jesosy, baka amy ty lalànani-Mosesy noho ty mpaminany.” (Asa. 28:23) Akory ty azontsika anahafa ani-Paoly lafa tsika mampianatsy olo fahamarina? Tsy ampy avao ty manambara amin-drozy ty raha volanini-Baiboly. Tokony hampiasa ty Soratsy Masy tsika mba hanampea ty olo ampianarintsika Baiboly handiniky ty raha nianarany, amy zay rozy hamonjy ani-Jehovah. Teantsika laha maneky ty fahamarina rozy, fe tsy vokatsini-fitiavany antsika ro antony, fa ty fahatakarany hoe marina ty raha nianarany mikasiky ani-Ndranahary be fitiava iny.

12-13. Akory ty hanampeani-baba noho reny ty anakin-drozy hijano amy fahamarina ao avao?

¹² Nareo baba noho reny, azo antoky fa teanareo laha mijano amy fahamarina ao avao ty anakinareo. Mety mieritseritsy nareo hoe handroso ara-panahy soa rozy laha mana nama soa amy fiangona eo. Fe mbo misy raha hafa mila ataon-drozy mba hahavy an-drozy ho resy lahatsy hoe nahita ty marina rozy. Mila mana fifandrambesa manoka amy Ndranahary rozy, sady resy lahatsy hoe marina ty raha ampianarini-Baiboly.

¹³ Lafa mampianatsy ty marina mikasiky a Ndranahary amy ty anakiny ty baba noho reny, le tokony hanome modely ka hazoto hianatsy Baiboly. Mila manoka fotoa hametsevetsea ty raha nianarany rozy, bakeo hampianarin-drozy hanao ho zay koa ty anakin-drozy. Tokony hampianarin-drozy ty anakin-drozy mba hahay hampiasa ani-fitaova fikaroha rey, manahaky ty ataon-drozy amy ze olo ampianarin-drozy Baiboly. Lafa manao ani-zay rozy, le ho tea ani-Jehovah ty anakin-drozy sady hatòky hoe “ty mpanompo azo atokisa noho mahihitsy” ro ampiasani-Jehovah mba hanome sakafo ara-panahy antsika. (Mat. 24:45-47) Nareo baba noho reny, tsy ampy avao ty mampianatsy ty anakinareo ty fahamarina fototsy amy Baiboly ao. Ampeo rozy mba hanatanjaky ty finoan-drozy ka ampianaro mikasiky “ty raha  laliki-Ndranahary”, le anovo mifanaraky amy ty taon-drozy noho ty fahaizan-drozy raha zay.—1 Kor. 2:10.

14. Manino ro tokony hianarantsika ty faminania amy Baiboly ao? (Henteo ty efajoro hoe “ Hainao va ty Manazava ani-Faminania Retoa?”)

¹⁴ Tampany bevata amy Safà-Ndranahary ty faminaniani-Baiboly, ka manampy antsika hanatanjaky ty finoantsika ani-Jehovah. Ino iaby ty faminania nanatanjaky ty finoanao? Mety hanao ho zao iha hoe faminania mikasiky “andro farany” iny. (2 Tim. 3:1-5; Mat. 24:3, 7) Fe ino koa ty faminania fa nitanteraky ka afaky manatanjaky ty finoanao? Hainao va, ohatsy, ty manazava hoe ino amy faminaniani-Daniela toko faha-2 na toko faha-11 ro fa tanteraky henanizao na mbo ho tanteraky? * Tsy ho rava mihintsy ty finoanao laha miory amy Baiboly avao. Diniho ty ohatsini-rahalahintsika niaritsy fanenjeha mafy tan’Alemaigny any tamy Aly Bevata Faharoe rey. Ndre tsy niazon-drozy soa aza ty faminaniani-Baiboly mikasiky ty andro farany, le tena natoky ty Safà-Ndranahary avao rozy.

15-17. Manino ty fianara Baiboly ro nanatanjaky ani-rahalahintsika nenjehini-Nazỳ rey?

¹⁵ Lafa nanday ani-Alemaigny ty fanjakàni-Nazỳ, le nisy rahalahy noho anabavintsika an’arivony nalefa amy toby figadrà any. Nalay Vavolombeloni-Jehovah Hitler noho ty manam-pahefà raiky kaihy hoe Heinrich Himmler. Nitantaranini-ranabavy raiky zay ty raha nivolanini-Himmler tamy ranabavy maromaro tamy toby figadrà raiky, hoe: “An-danitsy any vasa ro anjakàni-Jehovah nareo zao, fa laha mbo an-tany etoy, zahay ro mandidy! Mbo ho hita eo ze ho vozaky amintsika!” Ino ty nanampy ani-vahoakini-Jehovah reo tsy hivaliky?

¹⁶ Nihaini-Mpianatsy Baiboly rey hoe nanomboky nanday ty Fanjakà-Ndranahary tamy 1914. Tsy nahatseriky an-drozy laha nenjehy marè rozy. Fe niresy lahatsy vahoakini-Jehovah reo hoe tsy ho vitani-fanjakàn’olombelo ty  hanaka ty fikasà-Ndranahary tsy ho tanteraky. Tsy nahavita nandrava ty fivavaha marina Hitler sady tsy afaky nananga fanjakà matanjaky mandilatsy ty Fanjakà-Ndranahary. Natoky rahalahintsika reo hoe tsy maintsy ho tampitsy ty fandaisani-Hitler.

¹⁷ Tsy diso rahalahy noho anabavy rey laha natoky ani-zay. Tao vitsivitsy tafarani-zay, le nirava ty fanjakàni-Nazỳ. Nitavan’ay Heinrich Himmler, azy lahilahy nivola ho zao iny hoe “laha mbo an-tany etoy, zahay ro mandidy.” Lafa ie nilay, le nifankahita tamy Rahalahy Lübke. Fa nigadra Rahalahy Lübke taloha sady haini-Himmler hoe Vavolombeloni-Jehovah. Nikivy biby Himmler ka nanontany ani-Rahalahy Lübke hoe: “Mpianatsy Baiboly e, ino amy zay zany ty hiseho henanizao?” Nihazavanini-Rahalahy Lübke tamy Himmler hoe fa nihaini-Vavolombeloni-Jehovah avao bakany zay fa ho rava ty fanjakàni-Nazỳ, le ho bototsy rozy. Nandratiraty Vavolombeloni-Jehovah Himmler taloha, fe tsy nahafivola ie tamy ndraiky toy. Namono fo ie tsiela tafarani-zay. Ino ty fianara ho antsika? Lafa mianatsy Baiboly tsika, anatini-zay faminania rey, le afaky manampy antsika raha zay, ka tsy hihozonkozo mihintsy ty finoantsika a Ndranahary, sady tsy hivaliky tsika ndre miatriky raha sarotsy aza.—2 Pet. 1:19-21.

18. Manino tsika ro mila ani-“fahaiza marina soa noho fahaiza manavaky” niresahini-Paoly iny, laha hentea ty Jaona 6:67, 68?

¹⁸ Tokony hampiseho fitiava tsika kiraidraiky, satria zay ro ahaiza ty Kristiana marina. Fe mila mana “fahaiza marina soa noho fahaiza manavaky tanteraky” koa tsika. (Fil. 1:9) Laha tsy zay, le mety hisy vokany amintsika ty “karazan-drivotsini-fampianara iaby toy, amy alalani-famitahan’olo”, anatini-zay ty mpivadi-pinoa. (Efes. 4:14) Lafa nijano tsy nanori-dia ani-Jesosy sasy ty mpianatsy maro tamy taonjato voalohany, le nivola apostoly Petera fa tena resy lahatsy ie hoe Jesosy ro mana “ty safàni-fiaina zisiky farany.” (Vakio Jaona 6:67, 68.) Ndre tsy niazoni-Petera aza ty tsipiriany iaby mikasiky ty raha nivolanini-Jesosy, le tsy nivaliky avao ie satria nahay ty marina mikasiky ani-Kristy. Azonao atao koa ty manamafy ty fatokisanao ty raha ampianarini-Baiboly. Laha manao ani-zay iha, le hatanjaky avao ty finoanao ndre ino ndre ino miseho, sady hanampy ty hafa hana finoa matanjaky koa.—2 Jaona 1, 2.