Nampimpoly raha nivolanini-Davida amy Salamo 22:1 ao Jesosy lafa ho maty tamy hazo fijalea teo. Ino ty antony?

Maro ty raha nivolanini-Jesosy talohani-nahafatesany, le raiky amy zay azy amy Matio 27:46 toy: “Ndranahariko ô, Ndranahariko ô, nanino ro nahafoy ahy iha?” Nanatanteraky ty faminaniani-Davida amy Salamo 22:1 ao Jesosy lafa nivola ani-reo. (Mar. 15:34) Tsy hoe nidiso fanantenà Jesosy kanao nivola ani-reo, na hoe nihena ty finoany tamin’io. Haini-Jesosy soa hoe tsy maintsy ho maty ie, le hainy koa ty antony ka fa parè ie. (Mat. 16:21; 20:28) Fa nihaini-Jesosy hoe tsy ‘hiaro’ azy sasy Jehovah amy fotoa hahafaty azy io. (Joba 1:10) Nanao ani-zay Jehovah soa Jesosy ho afaky hanaporofo hoe tsy mivaliky mihintsy ie ndre marary manao akory amy fotoa hahafatesany io.​—Mar. 14:35, 36.

Ka ino zany ty antony nahavy ani-Jesosy nampimpoly ani-safà baka amy salamo ao io? Tsy tena haintsika aloha, fe horesahintsika hoe mety ho ino iaby ty antony. *

Lafa nivola ani-reo Jesosy, ta hiresaky va ie hoe tsy hiaro azy tsy ho maty mihintsy Jehovah? Tsy tokony hampeani-Jehovah mihintsy Jesosy lafa mandoa ty vilim-panavota. Tsy maintsy nimaty ie mba hanavota ty olo iaby.​—Heb. 2:9.

Lafa nampimpoly safà baka amy salamo io Jesosy, teany hieritseritsy ty andininy iaby amy Salamo 22 io ao va ty olo? Fa mahazatsy  ani-Jiosy reo tamy fotoa zay ty hoe manao tsianjery salamo maro. Ka lafa maharè andininy baka amy salamo raiky rozy, le tonga de mieritseritsy ty andininy iaby anatini-salamo iny ao. Laha zay ty antony nivolanani-Jesosy ani-salamo io, le mety teany ho tiaroni-Jiosy nanori-dia azy rey iaby ty faminania maro mikasiky fahafatesany voaresaky amy Salamo 22 ao. (Sal. 22:7, 8, 15, 16, 18, 24) Tsy zay avao fa midera ani-Jehovah koa ty andininy faramparany amy salamo io sady miresaky fa Mpanjaka amy tany toy iaby ie.​—Sal. 22:27-31.

Lafa nampimpoly safàni-Davida reo Jesosy, ta hivola va ie hoe tsy nanao raha raty ie? Nitsaràni-Fitsarà Anabo Jiosy Jesosy taloha kelikelini-hamonoa azy. Tsy rariny ty fomba fitsaràn-drozy azy sady nasara hoe nanivativa a Ndranahary ie. (Mat. 26:65, 66) Nivory tsielatsiela avao azy hitsara azy reo, amin’io fa haly biby. Tsy nifanaraky amy lalàna iaby fitsarà iny. (Mat. 26:59; Mar. 14:56-59) Ka lafa nanao ho zao zany Jesosy hoe “Ndranahariko ô, Ndranahariko ô, nanino ro nahafoy ahy iha?”, le mety ta hivola ie hoe tsy nanao raha raty ie ka tsy misy antony tokony hamonoa azy.

Teani-Jesosy hampitiarovy koa va tamin’io hoe ndre nengà-Ndranahary hijaly aza Davida, azy nanoratsy ani-salamo io, le tsy midika zay hoe tsy nahazo hatò taminy ie? Tsy hoe tsy niampy finoa sasy Davida kanao nametraky ani-fanontanea io, satria nivola ie bakeon’iny hoe matoky ie fa hanavotsy ty vahoakiny Jehovah sady hitahy azy avao. (Sal. 22:23, 24, 27) Ho zay koa Jesosy, azy “Anani-Davida” iny. Marina fa nijalijaly tamy hazo fijalea teo ie, fe tsy midika zay hoe tsy nahazo hatò tamy Jehovah sasy ie.​—Mat. 21:9.

Nalahelo marè va Jesosy satria tsy narovani-Jehovah mba hahità hoe tena tsy mivaliky vatany ie? Tsy teani-Jehovah hijaly noho ho maty mihintsy Anakilahiny io. Fe tsy maintsy nivonoa avao ie lafa nizizo Adama noho Eva. Tsy nanao raha raty mihintsy Jesosy, fe tsy maintsy nijalijaly noho nimaty ie mba hamalea ani-alihevitsy naboakini-Satana iny. Tsy maintsy nanao ani-zay koa ie mba hikaloa ndraiky ty raha narian’olombelo. (Mar. 8:31; 1 Pet. 2:21-24) Tsy niaro ani-Jesosy mihintsy Jehovah tamy fotoa io mba hahatanteraky ani-raha iaby reo. Sambany ie tamin’io tsy niaro ani-Jesosy.

Niteani-Jesosy hieritseritsy va mpanori-dia azy rey hoe ino ty antony nahavy ani-Jehovah nanenga azy ho maty tamy hazo fijalea teo? * Nihaini-Jesosy fa maro ty olo tsy ho tea ani-fomba nahafaty azy iny satria ty malaso ro vonoa amy hazo fijalea. (1 Kor. 1:23) Fe laha antony nahafaty azy iny ro ifantohani-mpanori-dia azy reo le ho hain-drozy hoe manino ie ro nimaty teo. (Gal. 3:13, 14) Tsy ho malaso ty fahitan-drozy azy amy zay fa Mpanavotsy.

Ndre ino ndre ino ty antony nahavy ani-Jesosy nivola ani-safà iaby reo, le nihainy fa nanao ty sitraponi-Jehovah ie lafa nimaty tamy hazo fijalea teo. Tafara kelikelini-niresahany safà baka amy salamo reo, le zao ty nivolaniny: “Vita!” (Jaona 19:30; Lioka 22:37) Lafa tsy niaro ani-Jesosy tanatini-fotoa kelikely io Jehovah, le sahala nanenga azy hamita ty raha naniraha azy tan-tany etoy. Tsy zay avao fa lasa tanteraky taminy koa ty raha iaby “amy lalànani-Mosesy noho ty Mpaminany voho ty Salamo.”​—Lioka 24:44.