1-2. Ino ty fanohara hanampy antsika hahatakatsy ty raha volanini-​1 Petera 2:21?

ERITSERETO hoe misy olo maro mandeha mamakivaky liomonto mampatahotsy, le eny koa iha miaraky amin-drozy. Misy olo tena mahay mitari-dala anareo. Lafa mandeha ie le mbo tratsy ambany eo avao ty lian-tombony. Fa tsy hitanareo sasy amin’io olo mitariky iny. Fe tsy matahotsy nareo! Samby miezaky manoriky soa ani-lian-tomboky iny avao nareo!

² Sahala mamakivaky liomonto mampatahotsy koa tsika Kristiana henanizao, amy tontolo raty toy eto. Fe soa avao tsika fa nameani-Jehovah Mpitariky tena mahay, tsy ia zay fa Jesosy Kristy Anany. Afaky manoriky marìny ty liany tsika. (1 Pet. 2:21) Mivola manam-pahaiza raiky mikasiky Baiboly zay fa nampitovizini-Petera amy mpitari-dala io Jesosy eto. Manenga lian-tomboky azontsika orihy ie. Handiniky fanontanea telo mikasiky ani-zay tsika henanizao: Ino ty dikani-hoe manoriky ty liani-Jesosy? Manino tsika ro tokony hanoriky ty liany? Le akory ty hanaovantsika ani-zay?

3. Ino ty dikani-hoe manoriky lian’olo?

³ Manao akory manoriky lian’olo zao? Kindraiky ty Baiboly mampiasa ty safà hoe “mandeha” noho ty hoe “tomboky” mba hivolana ty raha ataon’olo raiky amy fiainany. (Gen. 6:9; Ohab. 4:26) Azo ampitovizy amy lian-tomboky mipetaky amy ty lala nandehanan’olo raiky ty fomba fiainany. Ka ty hoe manoriky lian’olo zany le midika hoe manaraky ty modeliny noho manahaky azy.

4. Ino ty dikani-hoe manoriky ty liani-Jesosy?

⁴ Ka ino zany ty dikani-hoe manoriky ty liani-Jesosy? Laha hazavany tsotsotra avao le hoe manaraky ty modeliny. Niresaky  mikasiky ty modely soa nameani-Jesosy amy resaky fiareta apostoly Petera tamy andinin-teny fototsini-fianarantsika toy. Fe tsy zay avao fa mbo maro ty raha azontsika anahafa ani-Jesosy. (1 Pet. 2:18-25) Ty fomba fiainani-Jesosy mihintsy, zany hoe ty raha iaby nivolaniny noho nataony le modely azontsika orihy.

5. Tena azontsika olombelo tsy lavorary atao va ty manaraky ty modely lavorary napetrakini-Jesosy? Hazavao.

⁵ Tena azontsika olombelo tsy lavorary atao va ty manaraky ty modelini-Jesosy? Eka. Tiarovo fa tsy nivola Petera hoe tena mila mitovy tanteraky amy ty raha nataoni-Jesosy ty raha iaby ataontsika. Nampirisiky antsika avao ie hoe ‘oriho marìny ty liani-Jesosy.’ Laha manaraky soa ty liany tsika, zany hoe manao ze fara herintsika olombelo tsy lavorary, le manoriky ani-raha nivolanini-apostoly Jaona toy: ‘Mandehana avao manahaky ty nandehanani-Jesosy.’​—1 Jaona 2:6.

6-7. Manino tsika ro afaky mivola hoe hifandramby marìny amy Jehovah tsika laha manoriky ty liani-Jesosy?

⁶ Hifandramby marìny amy Jehovah tsika laha manoriky ty liani-Jesosy. Manino tsika ro mivola ani-zay? Voalohany, nanome modely tena soa mikasiky ty fomba fiaina tea-Ndranahary Jesosy. (Jaona 8:29) Ka laha manoriky ty liani-Jesosy zany tsika, le hampifalifaly ani-Jehovah. Afaky matoky koa tsika fa hifandramby amy ze olo miezaky hinama aminy Babantsika an-danitsy any iny.​—Jak. 4:8.

⁷ Faharoe, tena nanahaky ani-Babany Jesosy. Zay nahavy ani-Jesosy nivola hoe: “Ze nahita ahy, le nahita ani-Baba koa.” (Jaona 14:9) Azontsika atao ty manahaky ty toetsini-Jesosy noho ty fomba fifandrambesany tamin’olo. Nahay niferinay olo, ohatsy, ie. Nampiseho ani-zay ie tamy lahilahy boka iny, ampela narary mafy iny, noho tamin’olo hafa  nimaty longo. Laha manahaky ani-Jesosy tsika, le hanahaky ani-Jehovah. (Mar. 1:40, 41; 5:25-34; Jaona 11:33-35) Arakaraky ty anahafantsika ani-Jehovah le vomaiky tsika hifandramby marìny aminy.

8. Manino tsika ro ‘handresy ani-zao tontolo zao’ laha manoriky ty liani-Jesosy? Hazavao.

⁸ Tsy hanenga ani-tontolo raty toy hanelingely ty fanompoantsika ani-Jehovah tsika laha manoriky ty liani-Jesosy. Ho zao ty raha nivolanini-Jesosy tamy haly farany niainany tan-tany etoy: “Zaho fa naharesy ani-zao tontolo zao.” (Jaona 16:33) Ta hivola ie hoe tsy nengany hisy vokany aminy ty raha ataon’olo amy tontolo toy eto, ty fomba fisainan-drozy, noho ty raha kendren-drozy. Tsy nihalinoni-Jesosy mihintsy hoe hanamasy ty anarani-Jehovah ro antony naniraha azy ho an-tany etoy. Ka manao akory tsika? Maro ty raha amy tontolo toy eto mety hisaka antsika tsy hifantoky amy fanompoa ani-Jehovah. Fe laha manahaky ani-Jesosy tsika le hanao ty sitraponi-Jehovah avao. ‘Handresy’ ani-tontolo toy koa tsika laha manao ani-zay.​—1 Jaona 5:5.

9. Ino ty tokony hataontsika laha teantsika ty hiay zisiky farany?

⁹ Afaky hiay zisiky farany tsika laha manoriky ty liani-Jesosy. Lafa nanontany mpamaraky raiky mpanarivo zay hoe ino ty raha mila ataony mba hahazoa fiaina zisiky farany, le namaly Jesosy hoe: “Ndao hanori-dia ahy.” (Mat. 19:16-21) Nisy Jiosy sisany koa tsy nino hoe Jesosy ro Kristy, le zao ty nivolaniny tamin-drozy: “Ty aondriko ... manaraky ahy. Le hameako fiaina zisiky farany rozy.” (Jaona 10:24-29) Nisy lahilahy anatini-Fitsarà Anabo Jiosy zay koa ta hahay raha maro mikasiky ty fampianarani-Jesosy. Nikodemosy ty anarany. Nivola taminy Jesosy hoe ze “mampiseho finoa azy”, le “hana fiaina zisiky farany.” (Jaona 3:16) Mampiseho finoa ani-Jesosy tsika laha manoriky ty raha nampianariny noho manao ze raha nataony. Afaky hiay zisiky farany tsika laha manao ani-zay.​—Mat. 7:14.

10. Ino ty tsy maintsy ataontsika mba hahavy antsika “hahay” soa ani-Jesosy? (Jaona 17:3)

¹⁰ Tsy maintsy miezaky hahay ani-Jesosy tse tsika zay vo afaky hanoriky ty liany. (Vakio Jaona 17:3.) Mila ezaky mitohy raha zay. Tsy maintsy mianatsy raha maro mikasiky azy avao tsika, anatini-zay ty toetsiny, ty fomba fisainany, noho ty fitsipiky narahiny. Tsy mianky amy ty haelantsika tamy fahamarina ao raha zay, fa tsy maintsy miezaky hahay soa ani-Jehovah noho Anakilahiny iny avao tsika.

11. Ino ty raha hitantsika anatini-Filazantsara efatsy reo ao?

¹¹ Ino ty nataoni-Jehovah mba hanampea antsika hahay ani-Anakilahiny iny? Nampanoratsy  Filazantsara efatsy ie amy Safàny ao. Hitantsika amy Filazantsara reo ao ty tantaram-piainani-Jesosy noho ty fanompoany. Resahy ao koa ty raha nivolanini-Jesosy, ty raha nataony, noho ty raha tsapany. Hanampy antsika ‘handiniky soa’ ty modelini-Jesosy boky efatsy reo. (Heb. 12:3) Hita amy boky reo ao ty modely nengany ho antsika. Hahay soa ani-Jesosy zany tsika laha mianatsy ani-Filazantsara reo. Afaky hanoriky marìny ty liany tsika amy zay.

12. Ino ty azontsika atao laha teantsika hahasoa antsika Filazantsara reo?

¹² Tsy ampy ty hoe mamaky avao laha teantsika hahasoa antsika ty raha resahy amy Filazantsara reo ao. Mila manoka fotoa hianara soa an-drozy noho hametsevetsea soa tsika. (Ampitovizo amy Josoa 1:8.) Ndao tsika handiniky soso-kevitsy roe afaky hanampy antsika hametsivetsy ani-Filazantsara reo noho hanoriky ze raha vakintsika ao.

13. Ino ty azonao atao mba hahavy ty tantara amy Filazantsara ao sahala iainanao?

¹³ Voalohany, anovo sahala iainanao ty raha voaresaky amy Filazantsara reo ao. Alao sary an’eritseritsy ty raha mety ho hitanao, renao noho tsapanao amy raha voaresaky ao iny. Manaova fikaroha amy raha naboakini-fandaminani-Jehovah rey ao mba hahavy anao hahavita ani-zay. Diniho ty hevitsy manodidy, ty raha niseho talohani-raha iny na tafarany lafa mianatsy. Anovo hay soa koa ty olo na ty pilasy voaresaky amy tantara iny. Ampitovizo amy raha volanini-Filazantsara hafa tantara ianaranao iny. Tsy mitovy kindraiky mpanoratsy Filazantsara rey. Misy tena miresaky tsipiriany mikasiky raha raiky fa ty mpanoratsy hafa zista miresaky ani-raha iny avao.

14-15. Ino ty tokony hataontsika mba hahavy antsika hanoriky ty raha nianarantsika mikasiky ty tantarani-Jesosy?

¹⁴ Faharoe, oriho amy fiainanao ty raha voaresaky amy Filazantsara reo ao. (Jaona 13:17) Saky baka nandiniky tantara raiky baka amy  Filazantsara ao iha, le eritsereto zao: ‘Misy fianara azoko orihy amy fiainako va amy tantara toy? Akory ty hampiasako ani-tantara toy mba hanampea olo?’ Mieretsereta olo raiky hainao, le amy fotoa hitanao hoe mety resaho aminy ze raha nianaranao.

¹⁵ Ndao tsika handiniky ohatsy raiky mba hahitantsika hoe akory ty hanorihantsika ani-soso-kevitsy roe reo. Hodinihintsika ty tantarani-ampela nahantra sady maty valy nihitani-Jesosy tamy tempoly tao iny.

16. Mety ho ino iaby ty raha niseho tamy tantara voaresaky amy Marka 12:41 ao?

¹⁶ Anovo sahala iainanao tantara iny. (Vakio Marka 12:41.) Eritsereto ty raha niseho. Tamy 11 Nisana tao 33 tamy zay, zany hoe andro vitsivitsy talohani-hahafaty ani-Jesosy. Nampianatsy tamy tempoly tao avao Jesosy tamy andro io. Fe nanohitsy azy mpitariky fivavaha rey. Nanontany azy tse ty ilany amin-drozy hoe ia ty nanome fahefà ani-Jesosy hanao ani-raha nataony rey. Ty sisany koa nametraky fanontanea eritseretin-drozy tsy ho voavalini-Jesosy. (Mar. 11:27-33; 12:13-34) Nifindra amy pilasy hafa tamy tempoly ao Jesosy henanizao. Mety tamy faritsy kaihy hoe Tokotanini-Ampela teny vasa ie kanao nahajilo ani-vata fandatsaha drala iny. Nipetraky ie le nanomboky nanenty ani-ze olo nandatsaky fanomeza tanatini-vata io. Nahita mpanarivo nandatsaky drala vy maro ie. Mety tsy nilavitsy loatsy ie ka mety nireny mihintsy ty fanenoni-drala nalatsakin-drozy tanatini-vata ao rey.

17. Ino ty raha nataoni-ampela nahantra sady maty valy voaresaky amy Marka 12:42 ao iny?

¹⁷ Vakio Marka 12:42. Tafara kelikelini-zay, niambini-Jesosy ampela raiky toy. Nahantra ampela io sady “maty valy.” (Lioka 21:2) Tena sahira vatany ampela io satria ndre drala hiviliana ze raha tena nilàny aza tsy nananany. Fe nivonjeny moramora ty raiky amy vata rey, mety nitolitoliky tse ie, bakeo nandatsaky anaka drala vy roe. Mety tsy nirè aza ndre ty fanenoni-drala reo lafa nalatsakiny tao. Haini-Jesosy drala nalatsany tao rey. Leptona roe, zany hoe anaka drala vy tsy nisy viliny tamy fotoa zay. Ndre fody raiky aza tsy niazoni-drala reo kanefa fody ty farani-mora amy voro fihany tamy zay.

18. Laha hentea ty Marka 12:43, 44, ino ty raha nivolanini-Jesosy mikasiky fanomeza nataoni-ampela maty valy iny?

¹⁸ Vakio Marka 12:43, 44. Tena nidosiky ty foni-Jesosy ty raha nataoni-ampela maty valy io. Farany nikaihiny mpianatsiny rey mba hanenty soa ani-ampela io, le hoy ty asany: “Ampela mahantra sady maty valy io ro nanome maro mandilatsy an-drozy iaby.” Bakeo nanazava ie hoe: “Rozy iaby [sirtò azy mpanarivo rey] nanome ambiambiny avao, fa ampela io ndre mahantra aza, le nanome ze raha iaby nananany, zany hoe ty velomampony iaby.” Nameani-ampela io ani-Jehovah iaby ze drala farany taminy any tamy andro io, satria natoky ie hoe hikarakara azy Jehovah.​—Sal. 26:3.

19. Ino ty fianara bevata azontsika baka amy raha nivolanini-Jesosy mikasiky ampela maty valy iny?

¹⁹ Oriho ze raha nianaranao baka amy tantara io. Eritsereto zao: ‘Ino ty ianarako baka amy raha nivolanini-Jesosy mikasiky ampela nahantra sady maty valy iny?’ Diniho tse moa ampela iny. Azo antoky fa ta ho nanao fanomeza maro biby ho ani-Jehovah ie. Fe ndre tsy nana ie le nanao ze azony natao ka ze farani-soa ro nameany ani-Jehovah. Haini-Jesosy fa lafovily tamy Babany fanomeza io. Misy fianara bevata ho antsika toy: Falifaly Jehovah  lafa ameantsika azy ze farani-soa, ka manompo azy amy ty fontsika iaby noho ty vatantsika iaby tsika. (Mat. 22:37; Kol. 3:23) Falifaly Jehovah lafa mahita antsika manao ze fara herintsika! Tafilitsy amy zay ty fotoa noho hery atokantsika amy fanompoa, ohatsy hoe amy fitoria noho fanatreha fivoria.

20. Akory ty azonao anoriha ty fianara baka amy ampela maty valy iny? Manomeza ohatsy.

²⁰ Akory ty azonao anoriha ty fianara baka amy tantarani-ampela maty valy io? Eritsereto hoe ia ty olo mety hahazo fampahereza laha ampitiarovinao hoe mahafalifaly ani-Jehovah ty ezaky ataony. Iha va, ohatsy, mahay anabavy be tao raiky manome tsiny ty vatany, na mahatsapa hoe tsy de ilà satria marary avao, na fa mihareraky ka fa tsy mahavita firy amy fanompoa? Sa misy rahalahy mana arety miteza, na arety mampijaly mety hahavy azy ho kivy satria tsy afaky manatriky fivoria amy Efitrano Fanjakà any sasy ie? Manampy an-drozy iha laha manao “safà soa ho fampahereza” an-drozy. (Efes. 4:29) Resaho amin-drozy ty fianara mampahery azo baka amy tantarani-ampela nahantra sady maty valy iny. Safà mampahery ataonao zay hanome toky an-drozy hoe falifaly Jehovah laha ameantsika azy ze farani-soa. (Ohab. 15:23; 1 Tes. 5:11) Laha iha midera ty olo manome ze farani-soa ho ani-Jehovah, ndre kelikely manao akory ty fahità azy, le manoriky marìny ty liani-Jesosy iha.

21. Tapa-kevitsy hanao ino iha?

²¹ Tena falifaly tsika satria miresaky tsipiriany maro mikasiky ty fiainani-Jesosy Filazantsara rey! Lasa mora hitantsika ty fomba hanahafa azy noho hanoriha marìny ty liany. Manino laha mba manoka fotoa handiniha ani-Filazantsara rey amy fianara am-bata na Fotoam-pivavahani-Fianakavia? Soa hotiarovintsika hoe tena hahasoa antsika fianara rey laha ataontsika sahala iainantsika mihintsy tantara iny, bakeo orihintsika ze raha nianarantsika tao. Laha teantsika koa ty hanahaky ty raha nataoni-Jesosy le mila mijanjy ty raha nivolaniny tsika. Nisy raha maromaro nivolanini-Jesosy tamin’ie fa ho maty tamy hazo fijalea teo. Hodinihintsika amy lahatsoratsy manaraky hoe ino ty ianarantsika baka amy safàny reo.