TANTARAM-PIAINA
“Tea Fanompoa Aho Henanizao!”
NIBE tamy tanà ambanivohitsini-Balclutha, Antimoni-Nosy a Nouvelle Zélande any zay aho. Tena niteako biby Jehovah tamy zaho mbo nikely. Niteako ty nivory noho niaraky amy fiangona. Nifalifaly noho nahatiaro voaaro aho lafa niaraky tamy fiangona. Zaho aloha olo saro-kenatsy, fe tena niteako ty nandeha nitory sankerinandro. Tsy natahotsy nitory mihintsy aho ndre tamy mpiaraky mianatsy amiko rey io ndre tamin’olo hafa. Tsy nahamenatsy ahy mihintsy ty nikaihy hoe Vavolombeloni-Jehovah, le nanokam-bata ho ahi-Ndranahary aho tamy zaho ni-11 tao.
TSY NIFALIFALY SASY AHO
Mampalahelo fa nihananintsy ty fifandrambesako tamy Jehovah lafa zaho nihasomonjara. Tena niriko mpiaraky mianatsy amiko rey. Atao raha afaky manao ze raha tean-drozy zay rozy, kanefa zaho atao raha voateriterin-dry baba noho neny. Ho raha mamehifehy zay koa ty fitsipiky arahini-Kristiana le atao raha asa be io ty fahitako ty fanompoa ani-Jehovah. Haiko hoe tena misy Jehovah, fe zaho ro lasa tsy nifandramby marìny aminy.
Mbo nitory tsy tampaky avao aho, fe anaka kelikely avao. Tsy nanoma iaby aho lafa nandeha nitory, farany sahira lafa hiresaky amin’olo. Lasa tsy nahita vokatsy amy zay aho sady tsy nifalifaly sasy, le vomaiky aho nihanalay nanompo. Nieritseritsy iaby aho hoe: ‘Ia lie olo hahavita hitory sankerinandro sankerinandro zao?’
Tena fa ta hahaleo tena aho tamy zaho ni-17 tao, farany nahoroko ty entako. Niala baka an-trano ao aho le nifindra nana an’Ostralỳ any. Nalahelo biby ry babako tamy zay. Niasa loha rozy, fe nitamà avao hoe mbo hanohy hanompo ani-Jehovah avao aho.
Vomaiky nihena ty fanompoako ani-Jehovah lafa zaho tan’Ostralỳ any. Nanampatampaky fivoria iaby aho. Ajà maheriloha rey ro ninamàko. Nao le samby manatriky fivoria zao zahay hariva iny fe hamaray harivan’iny zahay minon-toaky noho mitsinjaky amy boaty any. Henanizao vo hitako hoe kay tamy rey tomboko raiky avao ro amy fahamarina ao fa tomboko raiky fa amy tontolo toy any. Fe samby tsy nahafa-po ahy iaby ndre tamy fahamarina ndre tamonto any.
RAHA TSY NAMPOIZIKO HOE HAMPIOVA AHY
Roe tao teo ho eo tafara atoy, nifankahita kelikely tamy rahavavy raiky zay aho. Tsy hainy mihintsy fa nahavy ahy nieritseritsy mikasiky ty fomba fiainako ie. Niaraky nipetraky amy rahavavy efatsy rezay aho. Samby tsy nanambaly zahay. Lafa nandalo ty mpiandraikitsini-faritsy, le nasànay hamanta aminay ao rozy amy Tamara valiny tanatini-herinandro iny. Saky rekitsy amy asani-fiangona any ranadahy iny le niaraky taminay Tamara, niaraky lanaky ty hehy zahay. Tena niteako fiarahanay rey. Olo tsy manahy ie sady mora iresaha. Tsy nampoiziko hoe olo tea raha ara-panahy ho rey le ho soasoa ty miaraky aminy.
Nafana fo biby Tamara ka lasa nifindra tamiko koa ty fitiavany fahamarina noho fanompoa. Tena nifalifaly ie nanome ze fara heriny ho ani-Jehovah, kanefa zaho tsy nifalifaly satria anaka kelikely avao ro nameako. Nisy vokany bevata tamiko ty raha nataony. Mifantoky amy raha soa avao ie sady tena falifaly. Lafa nahita azy aho le nahatiaro ani-fahamarina bevata raiky toy: Teani-Jehovah tsika laha ‘falifaly’ lafa manompo azy.—Sal. 100:2.
LASA TEA NANOMPO NDRAIKY AHO
Tena niriko Tamara. Fe tena nila niova aho laha ta ho falifaly manahaky azy. Nila fotoa raha zay. Niova tsikelikely avao aho telo tao tafara atoy. Nanomboky nanoma aho lafa hanompo, le bakeo nanao mpisava lala mpanampy kindraiky. Lasa tsy de natahotahotsy koa aho fa natoky tena. Nampiasa Baiboly matetitetiky aho lafa nanompo ka tena afa-po amy fanompoa. Lafa nandeha ty fotoa le nanao mpisava lala mpanampy mitohy aho.
Tsy somonjara rey avao ro ninamàko fa ndre olobe rey koa. Ninamàko lafa atao olo miezaky manao ze fara heriny amy fanompoa ani-Jehovah. Nanampy ahy ty modely soa asehon-drozy ka lasa nieritseritsy mikasiky ze tena vatan-draha amiko aho. Nanomboky namaky Baiboly koa aho sanandro. Vomaiky aho nihatea fanompoa le nanao mpisava lala maharitsy mihintsy aza aho tafara atoy. Zay ndraiky aho vo nahatiaro falifaly noho tamà amy fiangona eo.
NAHAZO NAMA MPISAVA LALA MAHARITSY AHO
Tao raiky tafarani-zay aho nifankahita tamy Alex. Soa fanahy ie sady tena tea ani-Jehovah noho tea fanompoa. Nimpanampy amy fanompoa ie tamy zay sady fa nimpisava lala enin-tao. Fa nanitatsy faritany ta Malawi any koa ie. Niaraky tamy misionera maro ie tany. Nanome modely soa ho azy misionera reo sady nampirisiky azy hanohy hanao ani-Jehovah amy pilasy voalohany avao.
Nifanambaly zahay amy Alex tamy 2003, le nanompo amy fotoa iaby avao zahay zisiky henanizao. Maro ty raha nianaranay sady tsy voaisaky mihintsy ty fitahia nameani-Jehovah anay.
MARO BIBY TY FITAHIA NAMEANI-JEHOVAH ANAY
Manompo a Gleno, a Timor-Leste
Nivoatendry misionera tamy nosy kelikely mifankariniriny a Indonezỳ any rezay zahay tamy 2009. Timor-Leste ty anarany. Sady nifalifaly zahay tamy zay ro natahotsy koa. Limy vola tafarani-zay zahay niavy ta Dili, renivohitsini-Timor.
Tsy nanahaky tamy nipetrahanay taloha tany mihintsy tanà vaovao io. Tsy maintsy niezaky zahay mba ho zatsy ty fomban-tany, ty fivolana, ty hany, noho ty fiaimpiainan’olo tany. Lafa nanompo zahay le matetiky nifankahita amin’olo farani-ze mahantra, olo tsy de nahita fianara na tsy nianatsy mihintsy, na olo sereseren’olo. Matetiky koa zahay mahita olo kilemaina na kivikivy noho malahelo satria nampijalìn’olo na nitratsini-aly tamy tanà iny. *
Tena nisoasoa biby fanompoa rey! Nisy fotoa, ohatsy, aho nifankahita tamy Maria *, ajà 13 tao zay. Nalahelo biby ie satria vo tao vitsivitsy ty nahafaty an-dreniny, kanefa zarany ie laha mahita ani-babany satria tsy miaraky mipetraky rozy. Mbo kelikely Maria ka tsy hainy hoe ino ty hataony amy ty fiainany. Tiaroko ie ndraiky zay nitany lafa nitantara ty raha mahazo azy. Tsy misy azoko iaby amin’io raha volaniny rey satria mbo tsy haiko soa ty safàn-drozy. Farany aho nivavaky tamy Jehovah soa hampeany mba hahay hampahery ani-Maria. Bakeo ie namakiako andinin-teny mampahery vitsivitsy. Lafa nandeha ty tao, le niova tsikelikely ty fomba fiainani-Maria. Nanjary falifaly ie. Niova ty fisikinany, le namboariny soa koa ty volony . Tena nanova azy ty fahamarina. Natao batisa ie le mampianatsy Baiboly olo koa ie henanizao. Manan-dongo maro Maria henanizao satria anatini-vahoakini-Jehovah. Tsapany hoe tena tea azy rozy.
Nitahini-Jehovah ty asa fitoria ta Timor-Leste tany. Marina fa tanatini-folo tao faramparany tato vo natao batisa ty ankamaroani-mpitory rey, fe ty ankamaroan-drozy henanizao mpisava lala, mpanampy amy fanompoa, na anti-panahy. Ty sisany koa miasa amy biròni-fandikan-teny mitoka ao le manampy amy fandikà boky amy fivolanan’olo an-tanà eo. Hafalean-draha aho lafa maharè an-drozy mihira am-pivoria ao noho mahita an-drozy homehomehy. Falifaly biby aho mahita an-drozy lasa namani-Jehovah.
Miaraky amy Alex, hizara fanasà Fahatiarova amy faritany tsy misy tompony
AIA KOA TY HAHITAKO HASAMBARA MANAHAKY ANI-TOY
Tsy mitovy mihintsy Ostralỳ noho Timor-Leste. Nahatiaro sambatsy zahay ta Timor-Leste tany. Nisy fotoa aloha zahay nifampisisisisiky tanaty tomabily kelikely feno olo, miaraky amy fia maiky noho legimy baka an-tanà eo. Nisy fotoa koa zahay nampianatsy Baiboly amy trano maifitsy kanefa mbo misy akoho mamijabija avao. Nafana biby amin’io ty tao sady naloto. Tsy mora rey fe mbo nanao ho zao avao aho: ‘Mba raha soa!’
Handeha hamonjy faritany
Misaotsy an-dry babako noho neniko aho saky mitoliky ty lasa. Niezaky rozy nampianatsy ahy ty raha teani-Jehovah le nanampy ahy avao rozy ndre tamy zaho tsy nifandramby soa tamy Jehovah rey. Marina vatany raha volanini-Ohabolana 22:6 iny. Mahatiaro sambatsy ry baba noho neny mana anay amy Alex. Falifaly rozy mahita anay manompo ani-Jehovah. Manao ty asani-faritsy an’Ostraly atoy zahay liany tamy 2016.
Mampitoro video Kaleba noho Sofia amin’ajà a Timor-Leste any, le falifaly ajà rey
Tsy mampino hoe nisy fotoa aho tsy nitea fanompoa. Mahazo tavy fanompoa aho henanizao! Hitako hoe ndre ino ino raha miseho amy fiainan-tena, le ty fanompoa ani-Jehovah amy fo iaby avao ro tena mahasambatsy. Ho zay ty nataonay amy Alex liany niarahanay tanatini-18 tao zay. Reo ty fotoa tena nahafalifaly ahy tamy fiainako. Azoko amy zay henanizao hoe manino Davida mpanao salamo ro nivola tamy Jehovah hoe: “Ho falifaly ze mialoky aminao, ho falifaly marè avao rozy. ... Le ho falifaly aminao ze olo tea ty anaranao.”—Sal. 5:11.
Tena soasoa ty mampianatsy Baiboly olo miambany ho reo!
