1. Ino ty raha hitani-Jehovah amy ty mpanompony?

TENA “teani-Jehovah ty vahoakiny.” (2 Tan. 2:11) Tsy hitanao hoe mahafalifaly ty mieritseritsy ani-zay? Ambini-Jehovah ty toetsy soa ananantsika. Hitany koa hoe mety hanjary olo soa tsika le ampeany mba hihariniky azy. Laha tsy mivaliky amy Jehovah mihintsy tsika le hinama amintsika zisiky farany ie!​—Jaona 6:44.

2. Manino ro sarotsy amin’olo sisany ty mino hoe tea an-drozy Jehovah?

² Mety hisy hivola hoe: ‘Haiko fa tea ty mpanompony amy fitambarany Jehovah, fe akory ty ahaizako hoe tea ahy ie?’ Mety ho ino ty antony mahavy olo sisany hieritseritsy ho zay? Mety hoe ty raha niainany taloha. Nijalijaly zao, ohatsy, Oksana * tamy mbo nikely. Henteo amy zay moa raha nivolaniny toy: “Nifalifaly biby aho lafa nivita batisa ka nanomboky nanao mpisava lala. Fe 15 tao tafara atoy, nitiaroko iaby raha nahazo ahy tamy mbo nikely rey. Nieritseritsy amy zay aho hoe tsy hahazo hatò amy Jehovah mihintsy. Aia koa hoasako ty hitiavany ahy!” Nanao ho zay koa ty nahazo ani-Yvette tamy ie mbo nikely. Mpisava lala ie henanizao le zao ty nivolaniny: “Natokako ho ani-Jehovah ty fiainako satria ta hampifalifaly azy aho. Fe tsy nino mihintsy aho hoe ho tea ahy ie.”

3. Ino ty hodinihintsika amy lahatsoratsy toy ato?

³ Mety hanahaky ani-anabavintsika roe reo koa iha, zany hoe tena tea ani-Jehovah, fe mety hisalasala hoe tea anao koa  va ie. Fe manino iha ro mila matoky hoe tena tea anao Jehovah? Le ino ty afaky hanampy anao laha mieritseritsy iha hoe tsy tea anao ie? Ndao hodinihintsika ty valini-fanontanea reo.

4. Manino ro tena raty ty misalasala hoe tea antsika vatany va Jehovah?

⁴ Tena mahery ty fitiava. Laha tsika matoky hoe tea antsika Jehovah, le haniry hanompo azy amy ty fontsika iaby tsika ndre eo ty raha sarotsy atrehintsika. Fa laha misalasala tsika hoe tsy no tsy midary antsika Ndranahary, le “ho kelikely” ty herintsika. (Ohab. 24:10.) Lafa tsika amy zay kivy satria mieritseritsy hoe tsy tea antsika Ndranahary, le tsy ho vitantsika ty hiatriky ty fanafihani-Satana.​—Efes. 6:16.

5. Ino ty vokany lafa nisalasala ty rahalahy noho anabavy sisany hoe tea azy vatany va Ndranahary?

⁵ Nihanalemy ty finoani-rahalahy noho anabavy sisany satria nanjary nisalasala rozy. Zao ty nivolanini-anti-panahy mana anara James zay: “Miasa amy Betela aho sady teako koa ty mitory miaraky amy fiangona misy ahy ndre tsy amy fivolanako aza. Fe ndre zay, le mbo nisy fotoa aho nisalasala avao hoe mankasitraky ty fanompoako va Jehovah. Lasa nieritseritsy mihintsy aza aho hoe mba mijanjy ty vavaky ataoko avao va Jehovah.” Manompo amy Betela koa Eva, le zao ty nivolaniny: “Hitako fa tena raty ty vokany laha misalasala iha hoe tea anao va Jehovah, satria hisy vokany amy ze raha iaby ataonao ho azy raha zay. Lasa tsy ta hanao raha ho ahi-Ndranahary iha sady tsy ho falifaly sasy lafa manompo azy.” Nivola ho zao koa Michael, anti-panahy sady mpisava lala: “Ho voatariky hiala amy Jehovah iha laha tsy mino hoe tea anao ie.”

6. Ino ty tokony hataontsika laha manomboky mieritseritsy tsika hoe tsy tea antsika Jehovah?

⁶ Hitantsika baka amy ohatsy reo fa tena ho simba ty finoantsika laha mieritseritsy tsika hoe tsy tea antsika Jehovah. Fe ino ty tokony hataontsika laha manomboky misalasala ho zay tsika? Tokony avy le alàntsika an-tsaintsika ao raha zay! Mivavaha amy Jehovah mikasiky raha an-tsainao ao zay, soa iha hameany ‘ty fiadana-Ndranahary hiamby ty fonao noho ty sainao.’ (Sal. 139:23; Fil. 4:6, 7) Tiarovo fa tsy iha raiky avao ro mana eritseritsy manahaky ani-zay. Misy rahalahy noho anabavy tsy mivaliky sisany koa misalasala  hoe tea azy vatany va Jehovah. Ndre mpanomponi-Jehovah taloha tany rey koa aza nisy nanao ho zay. Raiky amy zay, ohatsy, apostoly Paoly. Ndao moa hodinihintsika hoe ino ty azontsika ianara baka aminy.

7. Ino iaby ty raha sarotsy nahazo ani-Paoly?

⁷ Mahatsapa va iha kindraiky hoe maro marè ty andraikitsinao ka lasa sarotsy aminao? Laha zay ie, le ho azonao soa ty raha nahazo ani-Paoly. Niasa loha mikasiky ani-rahalahy rey ie, le tsy hoe rahalahy amy fiangona raiky avao fa amy “fiangona iaby” mihintsy. (2 Kor. 11:23-28) Misy arety miteza va iha ka lasa tsy falifaly? Ho zay ty raha nahazo ani-Paoly. Nisy “fatiky amy nofotsy” nampijaly azy. Mety ho arety vasa io fe tsy nety afaky kanefa mba niriny hiala azy. (2 Kor. 12:7-10) Kivy koa va iha kindraiky satria sarotsy aminao ty manao raha soa? Nisy fotoa koa Paoly nahatsapa ani-zay. “Olo mahantra” hoasany ie. Nivola ani-zay ie satria tena nisarotsy taminy ty nanao raha soa ka nialy ay avao ie.​—Rom. 7:21-24.

8. Ino ty nanampy ani-Paoly hiaritsy ndre teo ty raha sarotsy nahazo azy?

⁸ Fe ndre teo raha sarotsy iaby nahazo ani-Paoly reo, le tsy nieny ie fa nanompo ani-Jehovah avao. Ino ty nanampy azy hahavita ani-zay? Hainy soa hoe tsy lavorary ie ka tena ninoany ty vilim-panavota. Nihainy soa koa fa nampitamà Jesosy hoe “ze mampiseho finoa [ani-Jesosy, le] ... hana fiaina zisiky farany.” (Jaona 3:16; Rom. 6:23.) Natoroni-Paoly hoe tena nino ani-vilim-panavota io ie. Natoky ie fa ndre misy aza olo nanao fahotà bevata, le parè hanenga ty hadisoany Jehovah laha tena mibebaky ie.​—Sal. 86:5.

9. Ino ty ianarantsika baka amy raha nivolanini-Paoly amy Galatianina 2:20 ao?

⁹ Nino koa Paoly hoe tena tea azy Ndranahary kanao naniraky ani-Jesosy ho maty mba hanavota azy. (Vakio Galatianina 2:20.) Henteo moa fa tsy nisalasala mihintsy Paoly nivola ho zao amy farani-andininy io: “Ty Anaki-Ndranahary ... nitea ahy ka nanome ty vatany ho ahy.” Tsy nieritseritsy Paoly hoe fa raty marè ie ka tsy ho tea azy Ndranahary. Tsy nanao ho zao ie hoe: ‘Haiko hoe manino Jehovah ro tea ani-rahalahiko reo, fa zaho tsy mino hoe ho tea ahy koa ie.’ Nampitiaro ani-Kristiana ta Roma tany rey Paoly hoe: “Tamy tsika mbo nimpanota, le nimaty ho antsika Kristy.” (Rom. 5:8) Tsy misy raha afaky manaka a Ndranahary tsy ho tea antsika mihintsy!

10. Ino ty ianarantsika baka amy Romanina 8:38, 39?

 ¹⁰ Vakio Romanina 8:38, 39. Tena natoky Paoly hoe mahery ty fitiava-Ndranahary. “Tsy hisy hahasaraky antsika amy fitiava-Ndranahary” hoasany. Nihaini-Paoly hoe tena nahaliny ty raha nataoni-Israelita reo Jehovah. Nihainy koa fa tena namindra fo taminy Jehovah. Laha avanta zany, le ta hivola Paoly hoe: ‘Satria Jehovah nandefa ty Anany mba ho maty ho ahy, le tsy tokony hisalasala mihintsy aho hoe tea ahy vatany ie.’​—Rom. 8:32.

11. Resahini-​1 Timoty 1:12-15 hoe nanao fahotà bevata Paoly, fe manino ie ro natoky fa tea azy Ndranahary?

¹¹ Vakio 1 Timoty 1:12-15. Mety nisy fotoa Paoly nalahelo lafa nahatiaro ty raha nataony talohani-naha lasa Kristiana azy. Tsy mahatseriky laha nivola ie hoe zaho ty “voalohany marè” amy ty mpanota! Talohani-nahaizany fahamarina, le nitety tanà ie nanenjiky ty Kristiana, nampigadra an-drozy, sady nanoha ty famonoa ani-Kristiana rey. (Asa. 26:10, 11) Mety nanan’anaky ty sisany amin’olo nampamonoany rey. Mba eritsereto amy zay hoe mety nanao akory ty nitsapani-Paoly lafa nifankahita tamy anakin’olo rey ie? Tena nanenenani-Paoly hadisoany rey fe hainy fa tsy afaky hanova ty raha fa lasa ie. Nekeny hoe ho azy ro nahafatesani-Kristy ka tsy nisalasala ie nivola hoe: “Ty hasoam-panahy tsy manam-paharoe naseho-Ndranahary ro nahavy ahy hanahaky zao.” (1 Kor. 15:3, 10) Ino ty fianara ho antsika? Ekeo hoe nimaty ho anao Kristy le nataony ze hahavy anao hifandramby soa amy Jehovah. (Asa. 3:19) Ze raha ataontsika henanizao noho amy hoavy ro ifantoha-Ndranahary fa tsy ty hadisoa nataontsika taloha tany, ndre fa ni-Vavolombeloni-Jehovah tsika tamy zay ndre mbo tsy nanompo azy.​—Isaia 1:18.

12. Manino ty raha volanini-​1 Jaona 3:19, 20 ro manampy antsika lafa tsika mahatsapa hoe tsy misy dikany na tsy maeva hotiavy?

 ¹² Lafa mieritseritsy iha hoe nimaty mba handimbofa ty fahotanao Jesosy, le mety hanao ho zao iha hoe: ‘Zaho va le haeva ani-zay!’ Mety ho ino ty antony mahavy anao hahatsapa ho zay? Mety mamitaky antsika ty fontsika tsy lavorary ka ataony ze hahavy antsika hieritseritsy hoe tsy misy dikany na tsy maeva hotiavy. (Vakio 1 Jaona 3:19, 20.) Amy fotoa rey mihintsy tsika ro mila mitiaro hoe “bevata mandilatsy ty fontsika Ndranahary.” Ndre mieritseritsy tsika hoe tsy tea antsika Jehovah sady tsy hanenga ty hadisoantsika, le tsy midika zay hoe tsy tea antsika noho tsy hanenga ty hadisoantsika vatany ie. Mila matoky tsika hoe tea antsika Jehovah. Hatòky azy tsika laha mianatsy tsy tampaky ty Safàny, mivavaky matetiky aminy, sady minama amin’olo tea azy. Manino ro tena ilà ty manao ani-raha reo?

13. Manino ro afaky manampy antsika ty fianara ty Safà-Ndranahary? (Henteo koa ty efajoro hoe “ Nanampy An-drozy ty Safà-Ndranahary.”)

¹³ Ianaro tsy tampaky ty Safà-Ndranahary. Ho hainao soa amy zay ty toetsy maro mampiavaky ani-Jehovah. Ho hainao koa hoe zisiky aia ty fitiavani-Jehovah anao. Laha mametsivetsy ty Safà-Ndranahary sanandro iha, le hahay handiniky soa ka ho hainao ty fomba “hanarena ze diso” an-tsainao noho am-ponao ao. (2 Tim. 3:16) Nahatiaro tsy misy ilà azy anti-panahy raiky mana anara Kevin zay. Hoy ty asany: “Lafa namaky noho nametsivetsy ty Salamo 103 aho le niova ty fahitako ty raha eritseretini-Jehovah mikasiky ahy.” Zao koa ty nivolanini-Eva, azy niresahintsika taloha teroy iny: “Mametsivetsy ty raha teani-Jehovah aho saky hariva, ka lasa kalma soa ty foko sady mihamatanjaky ty finoako.”

14. Manino ty vavaky ro manampy antsika?

¹⁴ Mivavaha matetiky. (1 Tes. 5:17) Laha misy olo teanao hinamà, le tsy maintsy miresaky matetiky aminy iha sady resahinao aminy ze raha tsapanao. Ho zay koa laha ta hinama amy Jehovah iha. Lafa resahinao aminy amy vavaky ty raha tsapanao, ty raha eritseretinao, noho ty raha mampiasa loha anao, le hita hoe matoky azy iha sady mahay hoe tea anao ie. (Sal. 94:17-19; 1 Jaona 5:14, 15) Zao ty nivolanini-Yvette, azy niresahintsika taloha eroy iny: “Lafa mivavaky aho, le tsy hoe miresaky ani-ze raha niseho tamy andro iny avao, fa resahiko amy Jehovah iaby ze raha eritseretiko noho tsapako. Hitako hoe lasa nihanarìny azy aho satria manahaky Baba tea anaky ie fa tsy manahaky sefo be rey.”​—Henteo ty efajoro hoe “ Fa Nivakinao Va?”

15. Akory ty ampisehoani-Jehovah fa mila ze hahasoa antsika ie?

 ¹⁵ Minamà amin’olo tea ani-Jehovah. Fanomeza baka amy Jehovah rozy. (Jak. 1:17) Mila ze hahasoa antsika Babantsika an-danitsy any iny kanao nameany rahalahy noho anabavy ‘tea antsika amy fotoa iaby’ tsika. (Ohab. 17:17) Niresaky Kristiana vitsivitsy nanampy azy Paoly lafa nanoratsy taratasy ho ani-Kolosianina reo. Nivola ie hoe “nanampy noho nampahery azy” rozy. (Kol. 4:10, 11) Ndre Jesosy Kristy koa aza nila fanampea ka nifalifaly ie lafa nanampy azy ty namany, ndre anjely ndre olombelo.​—Lioka 22:28, 43.

16. Manino ty nama tea ani-Jehovah ro manampy antsika hifandramby soa amy Jehovah?

¹⁶ Fanomeza baka amy Jehovah ty nama amy fiangona eo. Fe tena mahasoa anao va raha io? Mety hitantara ty raha manahira antsika amy nama matotsy tsika. Fe tsy midika zay hoe tsy ampy finoa tsika. Vomaiky aza miaro antsika raha zay. Hoy James, azy niresahintsika taloha eroy iny: “Tena nanampy ahy ty finamà amy Kristiana matotsy. Lafa misy raha mahakivy ahy le mijanjy ahy soa rozy sady mivola amiko hoe tean-drozy aho. Lasa haiko amy zay hoe tea noho mikarakara ahy vatany Jehovah.” Tena mila miezaky hifandramby soa amy rahalahy noho anabavintsika reo avao tsika!

17-18. Ia ro tokony hojanjinintsika, le ino ty antony?

¹⁷ Teani-Satana laha tsy mahavita manao raha soa sasy tsika. Teany hino tsika hoe tsy tea antsika Jehovah sady tsy maeva havota tsika. Fe nianarantsika tato fa tena diso raha zay.

¹⁸ Tea anao Jehovah. Lafovily aminy iha. Laha manoriky ty raha volaniny iha, le ‘tsy hiala amy fitiavany’ mihintsy manahaky ty nataoni-Jesosy. (Jaona 15:10) Ka mijanjy ani-Satana. Ka janjiny mihintsy ze raha mety hahavy anao hahatsapa hoe tsy tea anao Jehovah. Aleo mijanjy ani-Jehovah satria ie ro mahita ty raha soa amintsika kiraidraiky. Matokisa fa “teani-Jehovah ty vahoakiny”, le anatini-zay koa iha!