1. Ino ty tena mahafalifaly antsika?

 TEANI-JEHOVAH ho falifaly tsika. Akory ty ahaizantsika ani-zay? Satria anatini-vokatsini-fanahy masi-Ndranahary ty fifalea. (Gal. 5:22) Falifaly biby tsika lafa mandramby anjara feno amy fanompoa noho manampy ani-rahalahintsika reo amy fomba sankarazany. Ino ty antony mahavy ani-zay? Mivola ty Baiboly fa “mahasambatsy marè ty manome tany ty amea.”​—Asa. 20:35.

2-3. a) Laha hentea ty Galatianina 6:4, ino ty raha roe hanampy antsika ho falifaly avao amy fanompoa ani-Jehovah? b) Ino ty hodinihintsika amy lahatsoratsy toy ato?

² Niresaky raha roe hanampy antsika ho falifaly avao apostoly Paoly amy Galatianina 6:4 ao. (Vakio.) Voalohany, tokony hameantsika ani-Jehovah ze farani-soa ananantsika. Laha ze farani-soa baka amintsika ro ameantsika azy, le fa tokony hataontsika mahafalifaly antsika zay. (Mat. 22:36-38) Faharoe, tsy tokony hampitaha ty vatantsika amin’olo hafa tsika. Tsy mitovy ty fahasalamantsika, ty fampiofana niazontsika, na ty fahaizantsika. Ka ndre ino ino ty raha vitantsika, le tokony hankasitraky ani-Jehovah avao tsika. Sady baka aminy iaby ty raha ananantsika. Laha misy olo mahita vokatsy maro amy fanompoa mandilatsy antsika zany, le tokony ho falifaly tsika satria nampiasany mba hiderà ani-Jehovah ty fahaizany fa tsy nilàny ze hahasoa azy manoka. Soa tsika laha miana-draha baka amin-drozy fa tsy hanao kirebaky amin-drozy.

³ Ho hitantsika amy lahatsoratsy toy ato hoe ino ty hanampy antsika tsy ho kivy laha voafetra avao ty vitantsika amy fanompoa. Hodinihintsika koa hoe akory ty hampiasantsika soa  ani-ze fahaiza mety hananantsika, le ino ty azontsika ianara baka amy ty hafa.

4. Ino ty raha mety hahakivy antsika? Manomeza ohatsy.

⁴ Ta hanao ze fara heriny amy fanompoa ani-Jehovah ty sisany amintsika, fe tsy afaky manao ani-zay satria fa be na tsy salama. Mety hahakivy raha zay. Zay mihintsy ty raha nahazo ani-Carol. Nana tombontsoa hitory amy pilasy mila mpitory fanampiny rey tany ie. Nana mpianatsy Baiboly 35 ie lafa tany, ty sisany amin’olo nampeany reo aza nandroso ka nanokam-bata ho ani-Jehovah noho natao batisa. Tena nahita vokatsy soa tamy fanompoa Carol! Fe lafa nandeha ty fotoa, narary mafy Carol ka tsy afaky niboaky baka an-trano ao. Hoy ty asany: “Haiko hoe tsy afaky mahavita ty vitan’olo hafa aho satria tsy salama, fe atao raha tsy tena Kristiana zay ty fahitako ahy. Kivy aho satria tsy afaky manao ani-ze raha teako hatao ho ani-Jehovah.” Ta hanao ze fara heriny ho ani-Jehovah Carol. Tena soa faniriany zay! Azo antoky fa falifaly biby Ndranaharintsika soa fanahy iny satria manao ze fara heriny mpanompony io.

5. a) Ino ty tokony hotiarovintsika laha kivy tsika satria voafetra avao ty raha azontsika atao? b) Laha hentea sary reo, ino ty nataoni-rahalahy io mba hanomezany ze farani-soa amy fanompoa ani-Jehovah?

⁵ Kivy va iha kindraiky satria voafetra avao ty raha azonao atao? Eritsereto zao: ‘Ino ty raha takini-Jehovah amiko?’ Teani-Jehovah hanao ze fara herinao iha arakaraky ty raha iainanao henanizao. Eritsereto tse moa toy: Fa 80 tao any ranabavy toy le kivy ie satria tsy afaky manompo marè sasy, tsy manahaky ty nataony tamin’ie mbo ni-40 tao tany. Mieritseritsy amy zay ie hoe ndre manome ze fara heriny ie, le tsy ho falifaly Jehovah. Fe marina va zay? Diniho zao. Nanome ze fara heriny ranabavy io tamin’ie ni-40 tao le mbo manao ani-zay avao ie amin’ie 80 tao henanizao. Dikani-zay tsy nijano mihintsy ie fa nanome ze fara heriny avao. Ka laha manomboky mahatsapa tsika hoe tsy ampy mba hampifalefalea ani-Jehovah ty fanompoantsika, le tokony hotiarovintsika fa Jehovah raiky avao ro mamaritsy hoe zisiky aia ty mampifalifaly azy. Laha manao ze fara herintsika tsika, le tena ho falifaly Jehovah ka hivola amintsika hoe: ‘Soa ty nataonao!’​—Ampitovizo amy Matio 25:20-23.

6. Ino ty ianarantsika baka amy ty raha nataoni-Maria?

⁶ Hahita fifalea tsika laha mifantoky amy raha azontsika atao fa tsy amy raha tsy ho vitantsika. Henteo moa ranabavy Maria toy. Marary ie ka voafetra avao ty raha azony atao amy fanompoa. Nikivy tse ie tamy voalohany sady nahatiaro tsy misy ilà azy. Fe bakeo ie nieritseritsy ani-rahavavy raiky amy fiangonan-drozy eo zay. Marary tsy afaky mihetsiky anabo kitrely eo rahavavy io. Nanapa-kevitsy hanampy azy amy zay Maria. Hoy Maria: “Nanao fandahara hiaraky mitory aminy an-telefony noho amy taratasy aho. Saky baka niaraky zahay le falifaly biby aho sady afa-po satria nahavita nanampy ani-rahavaviko iny.” Hihamitombo koa ty fifaleantsika laha mifantoky amy ze azontsika atao tsika fa tsy amy raha tsy ho vitantsika. Ka manao akory laha tsy voafetra manahaky ani-zay ty raha azontsika atao, fa afaky manao raha maro tsika na mahavita raha soa amy fanompoa ani-Jehovah?

7. Ino ty torohevitsy nameani-apostoly Petera ho ani-Kristiana namany?

⁷ Amy taratasiny voalohany iny ao apostoly Petera, nampirisiky ty rahalahiny mba hampiasa ani-ze fanomeza noho talenta nananan-drozy mba hampahereza ty  mpiara-manompo amin-drozy. Hoy ty asany: “Ampiasao mba hifanompoa ze namea anareo, arakaraky ze niazonareo kiraidraiky iaby. Satria nareo ro mpanompo soa manampy ty hafa mba handramby soa baka amy ty hasoam-panahy miavaky aseho-Ndranahary.” (1 Pet. 4:10) Tsy tokony hisalasala hampiasa ty fahaizantsika tsika ka hieritseritsy hoe mety hialona antsika na ho kivy ty olo lafa mahita ani-zay. Laha misalasala hanao ani-zay tsika, le lasa tsy afaky hanome ani-Jehovah ze farani-soa baka amintsika.

8. Laha hentea ty 1 Korintianina 4:6, 7, manino tsika ro tsy tokony hirengirengy laha misy raha haintsika?

⁸ Mila mampiasa soa ty fanomeza namea antsika tsika, fe mila miamby soa koa tsika mba tsy hirengirengy amy raha rey. (Vakio 1 Korintianina 4:6, 7.) Mety mahay manomboky fampianara Baiboly, ohatsy, iha. Tsy tokony hisalasala hampiasa ani-fahaizanao zay iha! Fe tiarovo avao hoe tsy tokony hirengirengy iha. Ndao hatao hoe nisoasoa ty resaky nifanaovanao tamin’olo tamy faritany eny ka afaky nanomboky fampianara Baiboly iha. Fa tsy lininao zay ty hitantara ani-raha iny amy andia-mpitorinareo. Fe lafa tafavory raiky amy zay nareo, nisy ranabavy nitantara hoe mba afaky nametraky gazety ie. Nahapetraky gazety raiky ie, le iha nanomboky fampianara Baiboly. Ino ty hataonao? Hainao fa tena hampahery ani-mpitory rey tantaranao iny, fe mety hanapa-kevitsy iha hoe aleo amy manaraky koa raha iny vo hotantaraninao. Fa manino? Satria tsy teanao ty hanao raha mety hahavy ani-ranabavy iny hieritseritsy hoe tsy tena nahita vokatsy ie laha ohary aminao. Soa mihintsy raha nataonao zay. Fe tsy midika zay hoe tsy hanomboky fampianara Baiboly sasy iha. Ampiasao avao fahaizanao zay!

9. Manao akory ty tokony hampiasantsika ani-fanomeza namea antsika rey?

⁹ Soa hotiarovintsika fa fanomeza baka amy Ndranahary iaby ty fahaiza ananantsika. Tokony hampiasantsika hampahereza ty fiangona raha zay fa tsy ilàntsika ze hahasoa antsika raiky avao. (Fil. 2:3) Laha mampiasa ty herintsika noho ty fahaizantsika mba hanaova ty sitrapo-Ndranahary tsika, le ho falifaly. Tsy hoe satria nahavita raha maro mandilatsy ty hafa tsika na niezaky ho anabo mandilatsy an-drozy, fa satria nampiasantsika hiderà ani-Jehovah fanomeza nameany antsika rey.

10. Manino ro tsy mety ty mampitaha ty vatantsika amin’olo hafa?

¹⁰ Fe laha tsy miamby soa ty olo raiky, le mety hanomboky hieritseritsy hoe mahavita  raha soa ie laha ampitovizy amin’olo hafa. Mety mahay mandaha-teny, ohatsy, ty rahalahy raiky. Fe mety hieritseritsy ie hoe mahay mandilatsy rahalahy hafa ie, satria somary sahintsahira rahalahy hafa io lafa manao lahateny. Marina fa tsy de mahay mandahateny rahalahy io fe mahay mandramby vahiny ie, tea mampiofana ty anany, sady mazoto manompo. Tena falifaly tsika fa mana rahalahy noho anabavy maro mana talenta! Ampiasan-drozy mba hanompoa ani-Jehovah noho hanampea ty hafa ty talentan-drozy.

11. Manino tsika ro tokony hiezaky hanaraky ty modelini-Jesosy?

¹¹ Marina fa tsy tokony hampitaha ty vatantsika amin’olo hafa tsika, fe afaky miana-draha baka amy mpanomponi-Jehovah tsy nivaliky rey tsika. Jesosy ro modely farani-ze soa azontsika tahafy. Lavorary ie fa tsika tsy lavorary, fe ndre zay, maro ty raha azontsika ianara baka amy ty toetsy soa nananany noho ty raha soa nataony. (1 Pet. 2:21) Laha manao ze fara herintsika tsika mba hanaraha marìny ty modeliny, le tsy hivaliky amy Jehovah mihintsy sady hahita vokatsy amy fanompoa.

12-13. Ino ty ianarantsika baka amy Davida Mpanjaka?

¹² Maro biby ty lahilahy noho ampela tsy nivaliky azontsika tahafy amy Safà-Ndranahary ao, ndre tsy lavorary aza rozy. (Heb. 6:12) Raiky amy zay, ohatsy, Davida Mpanjaka. Lafa nahita azy Jehovah le nivola hoe: “Lahilahy ekè ty foko ie.” (Asa. 13:22) Kanefa Davida tsy lavorary. Nisy fotoa aza ie nanao fahotà bevata. Fe ndre zay, modely soa ho antsika ie. Ino ty antony? Satria lafa nanary ie, le tsy nila fialan-tsiny. Nirambesiny soa ty torohevitsy namea azy, sady tena nanenenany ty raha raty vitany. Ino ty vokany? Nengani-Jehovah ty hadisoany.​—Sal. 51:3, 4, 10-12.

¹³ Afaky hanahaky ani-Davida tsika laha mieritseritsy hoe: ‘Manao akory aho lafa amea torohevitsy? Avy le mieky ty hadisoako va aho, sa mila fialan-tsiny? Meky hanome tsiny olo va aho? Miezaky mafy va aho mba tsy hampimpoly ani-raha tsy nety nataoko iny?’ Afaky mametraky fanontanea mitovy amy reo avao koa iha lafa mamaky tantarani-lahilahy noho ampela hafa tsy nivaliky amy Baiboly ao. Niatriky raha sarotsy mitovy amy ty mahazo anao va rozy? Ino ty toetsy soa nasehon-drozy? Eritsereto hoe: ‘Akory ty hanahafako ani-mpanomponi-Jehovah tsy nivaliky toy?’

14. Manino ro mahasoa antsika ty mandiniky ty mpiara-manompo amintsika?

 ¹⁴ Mahasoa antsika koa ty mandiniky ty mpiara-manompo amintsika, ndre tanora zay ndre antitsy. Azonao atao, ohatsy, ty mieritseritsy hoe ia ty olo amy fiangonanareo eo miatriky fitsapà fe tsy mivaliky. Mety hoe taomini-namany hanao raha tsy mety ie, na toherini-fianakaviany, na tsy salama. Misy toetsy soa hitanao va ananan’olo io ka teanao hotahafy? Lafa mandiniky ty modely soany iha, le mety hahita fomba hanampy anao mba hahafahanao miaritsy ty raha sarotsy mahazo anao. Tena falifaly tsika fa mana rahalahy noho anabavy manam-pinoa ka azontsika tahafy!​—Heb. 13:7; Jak. 1:2, 3.

15. Ino ty torohevitsy nameani-apostoly Paoly manampy antsika ho falifaly avao amy fanompoantsika ani-Jehovah?

¹⁵ Samby mila manome ze farani-soa tsika kiraidraiky mba hahavy ty fiangona hilamy noho hiharo raiky avao. Eritsereto ty fiangona tamy taonjato voalohany. Nahazo fanomeza noho fanendrea samby hafa rozy. (1 Kor. 12:4, 7-11) Fe tsy nahavy an-drozy hifanao kirebaky na hialy raha zay. Nampirisiky an-drozy kiraidraiky aza Paoly mba hanao ze azo atao ‘hanatanjaha ty vatani-Kristy.’ Zao ty nisoratiny ho ani-Efesianina reo: “Lafa miasa soa ty rantsambata kiraidraiky, le mitombo ty vata ka mihamatanjaky satria eo ty fitiava.” (Efes. 4:1-3, 11, 12, 16) Nampisy filongoa noho nampiharo raiky ty fiangona ze nanao ani-raha nivolanini-Paoly io. Ho zay koa ty raha hitantsika amy fiangona misy antsika eo henanizao.

16. Tokony ho tapa-kevitsy hanao ino tsika? (Hebreo 6:10)

¹⁶ Ka mampitaha ty vatanao amin’olo hafa mihintsy. Ianaro ty raha nataoni-Jesosy ka miezaha hanahaky ty toetsiny. Mandrambesa fianara baka amin’olo nanam-pinoa amy Baiboly ao noho amy henanizao rey. Miezaha avao hanao ze fara herinao, le matokisa fa ‘tsy manao tsy rariny Jehovah ka hanalino ani-ze nataonao.’ (Vakio Hebreo 6:10.) Miezaha avao ho falifaly amy fanompoa ani-Jehovah satria hainao fa ankasitrahany ty ezaky mafy ataonao amy fo mba hampifalifalea azy.