Mifanta ty olo raiky lafa “manao voady, manambara na mampitamà amy fomba miavaky fa hanao raha raiky, le matetiky ie mikaiky a Ndranahary ... mba ho vavolombelo.” Mety hatao am-bava raha zay na an-tsoratsy.

Mety misy mieritseritsy hoe raty ty mifanta satria nivola Jesosy hoe: “Ka mifanta mihintsy ... Fa aleo ty safànareo lafa ‘Eka’ le eka, lafa ‘Aha’ le aha, fa baka amy azy raty iny ty ankoatsy ani-zay.” (Mat. 5:33-37) Haini-Jesosy soa fa nivola ty Lalànani-Mosesy hoe tsy maintsy nifanta ty Israelita amy raha sisany sady nisy mpanompo-Ndranahary tsy nivaliky koa fa nanao ani-zay. (Gen. 14:22, 23; Eks. 22:10, 11) Hainy koa fa nifanta Jehovah. (Heb. 6:13-17) Tsy ta hivola zany Jesosy hoe tsy tokony hifanta mihintsy tsika. Tsy zay, nampitandrina ty olo avao ie mba tsy hifanta amy raha tsy misy dikany na amy fomba tsy mety. Tokony hanatanteraky ze raha nivolanintsika avao tsika, satria zay ty teani-Jehovah hataontsika.

Ka ino zany ty tokony hataonao laha ampifantà iha? Voalohany, anovo azo antoky hoe ho vitanao ty hanao ani-raha nifantanao iny. Laha misalasala iha, le aleo tsy mifanta. Manoro hevitsy antsika ho zao ty Safà-Ndranahary: “Aleo tsy mivoady, tozay mivoady kanefa tsy manatanteraky.” (Mpito. 5:5) Ankoatsini-zay, diniho ty torolalani-Baiboly mifandramby amy raha ampifantà anao iny, bakeo oriho ze raha volanini-feoni-fieritseretanao lafa mandramby fanapahan-kevitsy. Retoa misy torolalani-Baiboly vitsivitsy azo dinihy.

Tsy mifanohitsy amy sitrapo-Ndranahary ty fifantà sisany. Mifanao voady, ohatsy, ty Vavolombeloni-Jehovah lafa atao mariazy. Mbo karaza fifantà avao voady io, sady atao anatreha-Ndranahary noho ty olo maro. Mampitamà mpivaly rey hoe hifankatea noho hifanaja avao rozy laha “samby mbo velo.” (Mety tsy tena mitovy amy zay aloha ty raha volanin’olo sisany lafa rozy manao voady, fe mbo anatreha-Ndranahary eo avao ty anaovan-drozy ani-raha zay.) Lasa mpivaly rozy afarani-zay, le tokony haharitsy zisiky maty ty fanambalean-drozy. (Gen. 2:24; 1 Kor. 7:39) Tena mety soa fandahara io sady mifanaraky amy sitrapo-Ndranahary.

Mifanohitsy amy sitrapo-Ndranahary ty fifantà sisany. Tsy tokony hifanta ty tena Kristiana amy raha sisany, ohatsy hoe mampiasa fitaovam-pialia mba hiarova ty tanà misy azy, na mifanta mba hialà tsy ho mpanompo-Ndranahary. Mifanohitsy amy didi-Ndranahary ty fanaova ani-reo. Tsy tokony ‘hiharo amy zao tontolo zao’ ty Kristiana. Midika raha zay fa tsy tokony hilikilitsy amy alihevitsy na amy ze aly ataon-drozy tsika.​—Jaona 15:19; Isaia 2:4; Jak. 1:27.

 Mianky amy feoni-fieritseretan’olo kiraidraiky ty fifantà sisany. Alohani-hifantà, le mety hisy fotoa mila dinihintsika soa tse torohevitsini-Jesosy toy: “Aloavo amy Kaisara ze ani-Kaisara, fa amy Ndranahary ze ahi-Ndranahary.”​—Lioka 20:25.

Eritsereto, ohatsy, hoe misy Kristiana raiky mangataky zom-pirenena na pasiporo. Lasa hainy amy zay hoe mila manao voady an-taratasy ie hoe tsy hivaliky amy firenena iny. Laha, ohatsy, ka mampanao raha mifanohitsy amy lalàna-Ndranahary voady iny, le tsy hanenga azy hanao ani-zay ty feoni-fieritseretany voaofani-Baiboly. Fe mety hengani-fanjakà iny hanova ty voady ataony ie mba hifanaraky amy feoni-fieritseretany raha iny.

Mety hifanaraky amy torolala amy Romanina 13:1 toy fanovà voady zay: “Mba samby tokony haneky ty manam-pahefà ty olo iaby.” Mety hanapa-kevitsy amy zay ty Kristiana hoe tsy misy maharaty ty hoe mifanta mba hanao raha taki-Ndranahary amy ty Kristiana.

Mety hisy fihetsiky hampanaovy anao lafa iha mifanta na mety misy fitaova hafa ampiasà. Tena ilà ty manoriky ze raha volanini-feoni-fieritsereta amy fotoa zay. Nifanta tamy sabatsiny, ohatsy, ty Romanina noho Skytianina taloha, sahala hoe nampiasa ty mariky ahaiza ty ndranaharini-aly rozy mba hahavy ty olo hatòky ty raha volanin-drozy. Nananga tana manandrify amy lanitsy iny koa ty Grika lafa nifanta. Nieky rozy fa misy Ndranahary mahery mahita ze raha volanin-drozy noho ataon-drozy, le hamaly ani-ze ataon’olombelo.

Mazava ho azy fa tsy hifanta amy sainam-pirenena ty mpanomponi-Jehovah satria mifandramby amy fivavahan-diso raha rey. Fe ino ty hataonao laha, ohatsy, ka mijoro vavolombelo amy fitsarà any iha, le volany mba hametraky ty tananao anaboni-Baiboly eo noho hifanta hoe hivola ty marina? Laha zay ie, le mety hanapa-kevitsy hanao iha, satria resahy amy Baiboly ao hoe nisy mpanomponi-Jehovah tsy nivaliky nanao fihetsiky sisany lafa nifanta. (Gen. 24:2, 3, 9; 47:29-31) Soa ty mitiaro fa laha manao ani-zay iha, le sahala hoe mifanta anatreha-Ndranahary eo iha hoe hivola ty marina. Mila manao parè sandrany zany iha mba hivola ty marina avao lafa hamaly ty fanontanea iaby.

Tena lafovily amintsika ty fifandrambesantsika amy Jehovah, ka tokony hivavaky noho handiniky soa tsika saky misy fifantà ampanaovy antsika. Ho haintsika amy zay hoe tsy manao raha mifanohitsy amy feoni-fieritseretantsika na amy torolalani-Baiboly tsika. Laha manapa-kevitsy hifanta iha, le tokony hotanterahinao raha iny.​—1 Pet. 2:12.