Laha fa nanambaly ndraiky lahilahy iny ka fa vita soratsy ara-panjakà rozy, le fa rava tanteraky tokantranony taloha iny. Manahaky ani-zay ty tokony ho fahitani-fiangona azy. Fa manino? Hanampy antsika hahazo soa ani-zay ty fandiniha ty raha nivolanini-Jesosy mikasiky fisaraha noho fanambalea olo hafa ndraiky.

Nivolanini-Jesosy amy Matio 19:9 ao hoe raiky avao ty antony ahafahani-mpivaly misaraky noho manambaly olo hafa ndraiky. Hoy ty asany: “Ze lahilahy misaraky amy valiny ka manambaly olo hafa, le mandranto, laha tsy hoe fijangajangà avao ro antony isarahany.” Hitantsika baka amy safàni-Jesosy io hoe 1) ty fijangajangà avao ro antony araky ty Soratsy Masy ahafahani-mpivaly misaraky, le 2) mandranto ty lahilahy raiky laha misaraky amy valiny bakeo manambaly olo hafa ndraiky kanefa tsy antony araky ty Soratsy Masy ro isarahany aminy. a

Ta hivola va zany Jesosy hoe afaky manambaly ndraiky ty lahilahy raiky laha, ohatsy, ie ka nijangajanga bakeo nisaraky amy valiny? Tsy voatery. Laha nandranto lahilahy iny, le ampela iny ro manapa-kevitsy hoe hanenga ty hadisoani-valiny va ie sa tsy hanenga. Laha tsy nanenga ty hadisoani-valiny ampela iny, le samby afaky manambaly olo hafa ndraiky rozy roe lafa vita ara-panjakà ty fisarahan-drozy.

Fe ndao hataontsika hoe ta hiaro ty fanambalean-drozy ampela iny, le parè hanenga ty hadisoani-valiny. Ka manao akory laha tsy maneky lahilahy iny fa mangataky fisaraha ara-panjakà, ndre mbo ta hijano aminy aza ampela iny? Tsy mahazo manambaly olo hafa ie laha hentea ty Soratsy Masy, satria mbo parè hanenga ty hadisoany ampela iny sady mbo ta hanambaly azy. Laha misisiky manambaly olo hafa avao ie kanefa tsy manenga azy hanao ani-zay ty Soratsy Masy, le mbo mandranto ndraiky ie zay. Tokony hananga komity mpitsara ndraiky zany ty anti-panahy mba handamina ani-raha iny.​—1 Kor. 5:1, 2; 6:9, 10.

Laha manambaly olo hafa ty lahilahy raiky kanefa mbo tsy mahazo manao ani-zay ie laha hentea ty Soratsy Masy, manao akory ty tokony ho fahitani-fiangona ani-tokantranony taloha iny noho tokantranony vaovao iny? Mbo tsy rava va tokantranony taloha iny laha hentea ty Soratsy Masy? Mbo afaky manapa-kevitsy va valiny taloha iny hoe hanenga ty hadisoani-lahilahy iny ie sa tsy hanenga? Azo volany hoe mijangajanga va mpivaly vao rey?

Nieritseritsy tsika taloha hoe mijangajanga mpivaly vao rey laha mbo velo valiny tsy nanao diso iny, na mbo tsy manambaly hafa, na mbo tsy nijangajanga. Fe tsy nanisy resaky mikasiky ani-valy tsy diso iny Jesosy lafa niresaky mikasiky fisaraha noho fanambalea olo hafa ndraiky. Nanazava  avao ie hoe mandranto ty lahilahy raiky laha misaraky amy valiny ie bakeo manambaly olo hafa, kanefa tsy antony araky ty Soratsy Masy ro nisarahany aminy. Rava eo zany tokantrano taloha iny.

Laha nisaraky tamy valiny lahilahy iny ka fa nanambaly olo hafa, le fa tsy afaky mifily sasy ampela tsy diso iny hoe hanenga ty hadisoani-valiny sa tsy hanenga. Tsy voatery hiasa loha amy fanapahan-kevitsy sarotsy zay sasy ie. Tsy mianky amy ty raha miseho amy fiainani-ampela iny koa ty ho fahitani-fiangona ani-tokantrano vaovao iny. Tsy tokony hiova zany ty fahitani-fiangona ani-tokantrano vaovao iny, ndre maty ampela nivaliny taloha iny, ndre manambaly ndraiky, ndre nijangajanga. b

Nihitantsika tamy ohatsy taloha teo iny hoe nandranto lahilahy iny le zay ro nahavy an-drozy nisaraky. Fe manao akory laha tsy nandranto lahilahy iny fe nisaraky amy valiny ie, bakeo manambaly olo hafa? Na manao akory laha fa nisaraky rozy vo mijangajanga ie, le manambaly olo hafa ndre parè hanenga ty hadisoany aza valiny? Amy ohatsy iaby reo, le nandranto lahilahy iny satria nisaraky amy valiny ie le nanambaly olo hafa. Rava zany tokantranony taloha iny. Manan-kery ara-panjakà koa tokantrano vaovao iny. Hoy ty Tilikambo Fiambena 15 Mey 1980, pejy 31: “Fa nanambaly olo hafa ie ka tsy afaky hisaraky amy valiny vaovao iny koa, bakeo himpoly amy valiny taloha iny. Fa rava tokantrano taloha iny satria nisaraky tamy valiny lahilahy iny, nandranto, le nanambaly olo hafa.”

Tsy midika fanazavà vaovao toy hoe tsy masy amy Kristiana sasy ty fanambalea na tsy fahotà bevata ty fandrantova. Tokony hanangana komity mpitsara ty lahilahy raiky laha misaraky amy valiny bakeo manambaly olo hafa kanefa tsy antony araky ty Soratsy Masy ro isarahany aminy, sady mbo tsy mahazo manambaly hafa ie laha hentea ty Soratsy Masy. (Laha Kristiana valiny vaovao iny, le hanangana komity mpitsara koa ie satria nangalatsy valin’olo.) Ndre tsy azo volany hoe nijangajanga aza rozy roe, le tsy mahafeno fepetra hahazo tombontsoam-panompoa manoka anivoni-fiangona eo lahilahy iny anatini-tao maro. Tsy hahafeno fepetra ie laha mbo meloky amy raha nataony iny ty olo, na mbo mieritseritsy hoe tsy maeva hohajà ie. Tokony hodinihy koa ty raha mahazo ani-valiny taloha iny, satria mety hahatsapa ie hoe tsy rariny ty raha nahazo azy, le ho zay koa anany kelikely rey, satria nengani-baban-drozy iny.​—Mal. 2:14-16.

Hitantsika baka amy zay fa tena raty ty vokany laha misaraky amy valiny ty olo raiky bakeo manambaly olo hafa, kanefa tsy antony araky ty Soratsy Masy ro nisarahany aminy. Soa zany ty Kristiana laha miezaky hitovy hevitsy amy Jehovah ka hieritseritsy hoe masy ty fanambalea.​—Mpito. 5:4, 5; Heb. 13:4.