Aha, samby tsy miresaky ani-zay ndre ty Baiboly ndre ty tantara.

Mahavy olo hieritseritsy ani-zay ty fomba nandikà ani-andinin-teny io amy Baiboly maro. Toy misy ohatsy: “Laha tsy hovelomy mihintsy ty maty, nanino rozy ro atao batisa misolo azy?”​—Baiboly Malagasy.

Fe, henteo moa raha nivolanin’olo roe manam-pahaiza mikasiky Baiboly retoa. Nivola Dr. Gregory Lockwood hoe tsy misy porofo amy Baiboly na amy tantara mampiseho hoe nisy olo natao batisa mba hisolo ty maty. Manahaky ani-zay koa ty nivolanini-Profesera Gordon Fee. Nanoratsy ie hoe: “Mbo tsy nisy karaza batisa ho zay mihintsy ndre tamy tantara ndre amy Baiboly ao. Ndre ty Testamenta Vaovao aza tsy ahità resaky mikasiky an’io mihintsy. Tsy misy koa porofo mampiseho hoe nanao ani-zay ty Kristiana tamy taonjato voalohany, na ty fiangona niforo tafara kelikelini-nahafaty ani-apostoly rey.”

Mivola ty Baiboly hoe ty mpanori-dia ani-Jesosy, le tokony ‘hanao mpianatsy ty olo amy firenena iaby any, ka hanao batisa an-drozy ... Hampianatsy an-drozy hanaraky ze raha iaby nandidiany.’ (Mat. 28:19, 20) Alohani-hanaova batisa ty olo raiky, le mila mianatsy mikasiky ani-Jehovah noho Anakilahiny iny ie, mampiseho finoa noho manoriky ze raha volanin-drozy. Tsy afaky hanao ani-zay ty olo raiky fa maty noho an-dolo any, ndre ty Kristiana raiky mbo velo aza tsy afaky hanao ani-zay ho an’olo maty iny.​—Mpito. 9:5, 10; Jaona 4:1; 1 Kor. 1:14-16.

Ka ino avao zany nivolanini-Paoly io?

Nisy Korintianina sisany nivola hoe tsy hisy ty fameloma ty maty. (1 Kor. 15:12) Nasehoni-Paoly an-drozy hoe diso raha zay. Tamy fomba akory? Nivola Paoly hoe ‘fa ho nimaty ie sanandro.’ Mbo nivelo aloha ie. Fe ndre ho azon-doza aza ie, le natoky hoe lafa maty ie le hovelomy an-danitsy any manahaky ani-Jesosy.​—1 Kor. 15:30-32, 42-44.

Tokony ho haini-Korintianina reo hoe Kristiana voahosotsy zao tsy maintsy hiatriky fitsapà sanandro sady ho maty, alohani-hameloma an-drozy. Ka lafa natao “batisa ho amy Kristy Jesosy” zany rozy, le natao “batisa ho amy fahafatesany” koa. (Rom. 6:3) Midika raha zay hoe hiatriky fitsapà noho ho maty manahaky ani-Jesosy rozy, zay vo hovelomy an-danitsy any.

Roe tao mahery tafarani-nanaova batisa ani-Jesosy tanaty rano, le nivola tamy ty roe amy apostoliny reo ie hoe: “Hatao batisa manahaky ty nanaova batisa ahy [nareo].” (Mar. 10:38, 39) Tsy batisa anaty rano niresahini-Jesosy eo io fa batisa amy fahafatesa. Ta hivola zany ie hoe ty tsy fivaliha amy Ndranahary ro hahavy azy ho maty. Nanoratsy Paoly hoe ‘hiaraky mijaly amy [Jesosy] voahosotsy rey, amy zay hamea voninahitsy miaraky aminy koa.’ (Rom. 8:16, 17; 2 Kor. 4:17) Dikani-zay, tsy maintsy ho maty koa rozy vo hovelomy hiay an-danitsy any.

Zao zany ty tena dikani-raha nivolanini-Paoly io: “Laha tsy zay, le ino ty soa ho azoni-azy atao batisa mba ho maty rey? Laha tsy hovelomy mihintsy ty maty, nanino rozy ro atao batisa mba ho maty?”