1-2. Ino ty raha miavaky tamanini-mpanomponi-Jehovah?

TENA mahasoa ty hoe manan-draha tamany. Misy zao maniry hana tokantrano sambatsy, hanan’anaky salama soa, na ta ho janga. Ndre tsika Kristiana koa aza mba maniry ani-reo. Fe mbo bevata mandilatsy ani-reo ty raha tamanintsika, anatini-zay ty hoe hiay zisiky farany tsika amy hoavy sady hovelomy ndraiky longontsika fa nimaty rey.

² Ho zao ty raha nivolanini-apostoly Paoly: “Mitamà amy Ndranahary aho ... fa hisy fameloma ty marina noho ty tsy marina.” (Asa. 24:15) Tsy Paoly avao ro niresaky hoe mbo tamany ho velo ty maty. Fa niresaky ani-zay koa Joba. Natoky ie hoe hahatiaro azy Ndranahary ka hamelo azy ndraiky.​—Joba 14:7-10, 12-15.

3. Manino ro mahasoa antsika ty 1 Korintianina toko faha-​15?

³ Anisani-“fototsy” na “fampianara fototsy” inoani-Kristiana “ty fameloma ty maty.” (Heb. 6:1, 2) Niresaky mikasiky ty fameloma ty maty Paoly amy 1 Korintianina toko faha-​15 ao. Tena nampahery ani-Kristiana tamy taonjato voalohany rey ty raha nisoratiny. Ndre fa ela koa tsika ro nino hoe hovelomy ndraiky ty maty, le vomaiky hanampy antsika hatòky ani-zay toko io.

4. Manino tsika ro matoky hoe hovelomy ndraiky longontsika fa nimaty rey?

⁴ Tena matoky tsika hoe hovelomy ndraiky longontsika fa nimaty rey. Mino ani-zay tsika satria fa nivelomy Jesosy Kristy. Anisani-“vaovao soa” nambarani-Paoly tamy Korintianina reo raha zay. (1 Kor. 15:1, 2) Nivola koa ie hoe laha tsy mino ty Kristiana raiky hoe nivelomy Kristy, le tsy misy dikany ty finoany.  (1 Kor. 15:17) Fototsini-raha tamanintsika Kristiana mihintsy ty finoa hoe nivelomy Jesosy.

5-6. Midika ino ho antsika safà amy 1 Korintianina 15:3, 4 ao reo?

⁵ Nisy raha telo nivolanini-Paoly, talohani-niresahany mikasiky ty fameloma ty maty. 1) “Maty vokatsini-fahotantsika Kristy.” 2) “Nalevy” ie. Le 3) “nivelomy ndraiky” ie “tamy andro fahatelo, araky ty Soratsy Masy.”​—Vakio 1 Korintianina 15:3, 4.

⁶ Midika ino ho antsika ty nahafatesani-Jesosy, ty nandevena azy, noho ty nameloma azy ndraiky? Fa nivola Isaia mpaminany hoe “halà baka amy tanini-velo” eo ty Mesia, ka lafa maty ie le halevy “amy raty fanahy eo.” Fe mbo hisy raha hafa koa hiseho. Nivola Isaia hoe handay “ty fahotàn’olo maro” ty Mesia. Nanao ani-zay Jesosy lafa nanome ty ainy ho vilim-panavota. (Isa. 53:8, 9, 12; Mat. 20:28; Rom. 5:8) Ka ty fahafatesani-Jesosy, ty nandevena azy, noho ty nameloma azy zany ro mahavy antsika hatòky hoe ho afaky amy ota noho fahafatesa tsika, sady ho tafiaraky amy longontsika fa nimaty rey ndraiky.

7-8. Ino ty manampy ty Kristiana hatòky hoe nivelomy vatany Jesosy?

⁷ Mba hahavy antsika hino hoe hisy vatany ty fameloma ty maty, le mila mino tse tsika hoe nivelomy Jesosy. Manino tsika ro matoky hoe nivelomini-Jehovah vatany Jesosy?

⁸ Maro ty vavolombelo nahita maso ani-Jesosy tafarani-nameloma azy. (1 Kor. 15:5-7) Ty apostoly Petera (Kefasy) ro voalohany amy vavolombelo niresahini-Paoly rey. Nisy mpianatsy maromaro koa nivola hoe nihitani-Petera Jesosy lafa nivelomy. (Lioka 24:33, 34) Bakeo Paoly nivola hoe nahita ani-Jesosy ty apostoly “folo roamby.” Tafarani-zay Jesosy niseho “tamy rahalahy 500 mahery”, mety ho tamy fivoria niavaky natao ta Galilia resahini-​Matio 28:16-20 iny vasa. “Niseho tamy Jakoba”, azy rahalahiny tsy nino azy ho Mesia iny koa Jesosy. (Jaona 7:5) Nanjary resy lahatsy Jakoba lafa nahita ani-Jesosy nivelo ndraiky. Mbo nivelo ty maro amy vavolombelo reo tamy tao 55 tany ho any, lafa nanoratsy ani-taratasy io Paoly. Ze mbo nisalasala zany, le afaky nanontany ani-vavolombelo azo atokisa reo.

9. Laha hentea ty Asan’ny Apostoly 9:3-5, manino Paoly ro afaky manome porofo hoe nivelomy Jesosy?

⁹ Tafara atoy Jesosy niseho tamy Paoly. (1 Kor. 15:8) Fa nivelomy Jesosy tamy zay. Nireni-Paoly (Saoly) ty feony tamy Paoly tan-dala ho a Damaskosy any. Natoroni-Jesosy azy koa hoe fa an-danitsy any ie. (Vakio Asan’ny Apostoly 9:3-5.) Hita baka amy raha niseho tamy Paoly iny hoe tena nisy fa tsy tapasiry ty nameloma ani-Jesosy.​—Asa. 26:12-15.

10. Ino ty nataoni-Paoly lafa nino ie hoe nivelomy Jesosy?

¹⁰ Tena nahakinto olo sasany ty raha nivolanini-Paoly, satria nanenjiky ty Kristiana ie talohani-nisehoani-Jesosy taminy. Lafa niresy lahatsy Paoly hoe nivelomy Jesosy, le niezaky marè ie mba handresy lahatsy ty olo hafa hino ani-zay. Maro ty raha niaretany lafa nitory ie hoe nimaty Jesosy fe nivelomy ndraiky. Nivangoa ie, ginadra, le nivaky sambo koa. (1 Kor. 15:9-11; 2 Kor. 11:23-27) Tena natoky Paoly hoe nivelomy Jesosy, ka parè ho maty ie mba hiarova ty finoany. Tsy mahavy anao ho resy lahatsy va ty fisiani-vavolombelo tamy taonjato voalohany reo hoe nivelomy vatany Jesosy? Tsy vomaiky va iha mino hoe hovelomy vatany ty maty?

11. Mety ho ino ty antony nahavy ani-Kristiana sisany ta Korinto any rey ho diso hevitsy mikasiky fameloma ty maty?

¹¹ Nisy Kristiana sisany ta Korinto, amy tanàni-Grika reo any, nisalasala hoe misy ty fameloma ty maty. Nisy mihintsy aza nivola hoe “tsy misy ty fameloma ty maty.” Fa manino? (1 Kor. 15:12) Nihehezani-filozofy ta Atena, tanàni-Grika reo, ty olo nino hoe nivelomy Jesosy. Mety ho nisy vokany tamy Kristiana sisany raha zay. (Asa. 17:18, 31, 32) Ty sisany koa mety ho nieritseritsy fameloma ty maty an’ohatsy, zany hoe olo raiky “maty” amy fahotà fe “velo” lafa nanjary Kristiana. Ndre ino ndre ino ty antony nahavy an-drozy tsy nino ty fameloma ty maty, le tsy misy dikany ty finoan-drozy. Laha tsy nivelomi-Ndranahary Jesosy, le tsy ho nivoaloa ty vilim-panavota ka tsy ho nahazo fanengà hadisoa iaby tsika. Tsy mana raha tamany zany ze tsy mino ty fameloma ty maty.​—1 Kor. 15:13-19; Heb. 9:12, 14.

12. Laha hentea ty 1 Petera 3:18, 22, manino ro miavaky ty fameloma ani-Jesosy?

¹² Tsy nitantaranan’olo Paoly fa ie mihintsy ro nahita hoe “nivelomy ndraiky Kristy.” Mbo soa marè mandilatsy ani-fameloma olo maty taloha rey raha io, satria mbo nimaty ndraiky olo nivelomy taloha rey. Nivola Paoly hoe Jesosy ro “voaloham-bokatsy amy azy nimaty rey.” Ino ty dikani-zay? Ie ro olombelo voalohany nivelomy mba hanjary zavaboary ara-panahy, le ie koa ro voalohany nivelomy mba hiakatsy an-danitsy any.​—1 Kor. 15:20; Asa. 26:23; vakio 1 Petera 3:18, 22.

13. Ino ty nivolanini-Paoly hoe tsy mampitovy ani-Adama noho Jesosy?

¹³ Olo raiky avao ro nimaty kanefa olo maro ro hahazo fiaina. Akory ty hampety ani-zay? Nanome valiny mazava soa amy fanontanea zay Paoly. Nihazavaniny fa samby hafa ty raha niazon’olombelo baka amy Adama noho baka amy Kristy. Ho zao ty nisoratiny mikasiky ani-Adama: “Olo raiky ro niaviani-fahafatesa.” Lafa nanota Adama, le nanjary mety maty ie noho ty taranakiny. Mbo miaritsy ty vokatsini-tsy fanorihany safà zay tsika henanizao. Fe lafa nivelomi-Ndranahary Anakilahiny iny, le afaky hana hoavy soa tsika! “Olo raiky koa”, zany hoe Jesosy, “ro iaviani-fameloma ty maty.” “Fa manahaky ty ahafatesani-olo iaby amy Adama ao”, hoasani-Paoly, “ro hameloma ty olo iaby koa amy Kristy ao.”​—1 Kor. 15:21, 22.

14. Mbo hovelomy ndraiky va Adama? Hazavao.

¹⁴ Ino ty teani-Paoly hovolany lafa nivola ie hoe ‘amy Adama ao ro ahafatesan’olo iaby’? Niresaky mikasiky ty olombelo iaby Paoly. Nandova ota noho tsy fahalavoria baka amy Adama rozy ka mety maty. (Rom. 5:12) Tsy anisani-azy hovelomy rey Adama. Tsy mahasoa azy ty sorom-panavota nataoni-Kristy, satria olombelo lavorary ie fe nanapa-kevitsy tsy hanoriky ty safà-Ndranahary. Hanahaky olo tsaràni-“Anak’olo” iny hoe “aosy” rey ty hiafarany, zany hoe “ho amy fandripaha zisiky farany any.”​—Mat. 25:31-33, 46; Heb. 5:9.

15. Ia koa ty tafilitsy amy hoe olo “iaby” hovelomy reo?

¹⁵ Henteo fa nivola Paoly hoe ‘amy Kristy ao ro hameloma ty olo iaby.’ (1 Kor. 15:22) Nisoratini-Paoly ho ani-Kristiana voahosotsy ta Korinto any taratasy io. Hovelomy hiay an-danitsy any “azy nimaty amy Kristy ao” reo hoasany satria fa “nihamasiny tamy Kristy Jesosy ao”, “sady voakaiky ho olo masy.” (1 Kor. 1:2; 15:18; 2 Kor. 5:17) Nivola koa Paoly amy taratasy hafa nisoratiny hoe azy “tafiharo amy Kristy amy fahafatesa ao” rey, le “ho tafiharo aminy koa amy fameloma ty  maty manahaky ty azy.” (Rom. 6:3-5) Lasa fanahy Jesosy lafa nivelomy, bakeo niakatsy an-danitsy any. Hanao ho zay koa azy “tafiharo amy Kristy” reo, zany hoe ty Kristiana iaby voahosotsini-fanahy.

16. Ino ty teani-Paoly hovolany lafa ie nikaiky ani-Jesosy hoe “voaloham-bokatsy”?

¹⁶ Nanoratsy Paoly hoe Kristy ro “voaloham-bokatsy amy azy nimaty rey.” Tiarovo fa fa nisy olo nivelomy ty tan-tany etoy. Raiky amy zay Lazarosy. Fe Jesosy ro voalohany nivelomy mba ho lasa fanahy noho hiay zisiky farany. Azo nampitovizy amy voaloham-bokatsy nameani-Israelita reo a Ndranahary ie. Lafa nikaiky ani-Jesosy hoe “voaloham-bokatsy” zany Paoly, le ta hivola hoe mbo hisy olo hafa koa hovelomy mba hiay an-danitsy any. Hovelomy manahaky nameloma ani-Jesosy iny koa zany apostoly rey miaraky amin’olo hafa “tafiharo amy Kristy.”

17. Ombia azy “tafiharo amy Kristy” rey ro mahazo ty valisoan-drozy an-danitsy any?

¹⁷ Tamy fotoa nanoratani-Paoly ho ani-Korintianina reo, le mbo tsy nivelomy an-danitsy any mpianatsini-Kristy voahosotsini-fanahy rey. Nasehoni-Paoly hoe mbo amy hoavy raha zay. Hoy ty asany: “Samby araky ty filaharany iaby: Kristy ro voaloham-bokatsy, bakeo ze ani-Kristy anatini-fanatrehany.” (1 Kor. 15:23; 1 Tes. 4:15, 16) Miay amy fotoa ‘fanatrehani-Kristy’ io tsika henanizao. Tsy maintsy nandiny ty fiaviani-fanatreha io zany apostoly noho Kristiana hafa voahosotsini-fanahy rey ndre nimaty taloha aza. Hahazo ty valisoan-drozy an-danitsy any noho “ho tafiharo aminy [Jesosy] ... amy fameloma ty maty manahaky ty azy” rozy.

18. a) Manino tsika ro mivola hoe mbo hisy fameloma hafa afarani-azy an-danitsy any iny? b) Ino ty raha volanini-​1 Korintianina 15:24-26 mikasiky ty raha hiseho an-danitsy any?

¹⁸ Ka manao akory ty amy Kristiana iaby tsy mivaliky fe tsy hiay an-danitsy any miaraky Kristy rey? Mitamà hovelomy koa rozy. Mivola ty Baiboly hoe nahazo “ty fameloma ty maty aloha marè” Paoly noho ty olo sisany niakatsy an-danitsy any. (Fil. 3:11) Tsy midika va zay hoe mbo hisy fameloma hafa afarani-zay? Mifanaraky amy zay ty raha nivolanini-Joba mikasiky ty hoaviny. (Joba 14:15) Fa hiaraky amy Jesosy an-danitsy any iaby “ze ani-Kristy anatini-fanatrehany” rey, lafa ie handrava ty fanjakà noho ty fahefà voho ty hery iaby. Ndre “ty fahafatesa, azy fahavalo  farany iny” aza hatao tsy misy sasy. Mazava ho azy fa tsy hisy vokany amy azy nivelomy ho an-danitsy any rey sasy fahafatesa nilovà iny. Fe manao akory ty amin’olo hafa?​—Vakio 1 Korintianina 15:24-26.

19. Ino ty raha tamanin’olo hiay an-tany etoy rey?

¹⁹ Ino ty raha tamanin’olo hiay an-tany etoy rey? Afaky mitamà ani-raha nivolanini-Paoly toy rozy: “Mitamà amy Ndranahary aho ... fa hisy fameloma ty marina noho ty tsy marina.” (Asa. 24:15) Mazava ho azy fa tsy afaky hilitsy an-danitsy any ty olo tsy marina. Dikani-zay, miresaky ty fameloma ty maty an-tany etoy amy hoavy safà reo.

20. Akory ty azonao anatanjaha ty finoanao hoe hisy ty fameloma ty maty?

²⁰ Tena hisy vatany ty fameloma ty maty! Ze hovelomy an-tany etoy, le afaky mitamà hiay zisiky farany etoy. Azo atokisa fampitamana zay! Mampahery ty mieritseritsy ani-zay lafa misy longo maty. Afaky ho velo ndraiky rozy lafa “manjaka ... arivo tao” Kristy noho azy hiaraky aminy rey. (Apok. 20:6) Afaky matoky koa iha hoe hovelomy ndraiky, laha ohatsy ka maty aloha ty anombohani-Fanjakà Arivo Tao. Tsy handiso fanantenà antsika mihintsy raha tamanintsika io. (Rom. 5:5) Afaky manatanjaky anao raha io henanizao sady manampy anao ho falifaly manompo a Ndranahary. Fe mbo maro ty raha azontsika ianara baka amy 1 Korintianina toko faha-​15. Hiresaky ani-zay ty lahatsoratsy manaraky.